“Kɛ́ minyiɛ jɔɔ voo ni mli ewo duŋ kpii mli po lɛ, misheee sane fɔŋ ko gbeyei, ejaakɛ okɛ mi yɛ; odɛhiɛmɔtso kɛ otoo kpalamɔtso lɛ shɛjeɔ mimii.”​—Lala 23:4, Jeŋ Hee Shishitsɔɔmɔ.

 “Ni asaŋ kɛ́ minyiɛ gbele hɔɔŋ jɔɔ lɛŋ lɛ, misheŋ efɔŋ ko gbeyei; ejaakɛ okɛ mi yɛ: otso kɛ odɛhiɛmɔtso lɛ, nomɛi shɛjeɔ mimii.“​—Lala 23:4, Ga Biblia Momo.

 Nyɔŋmɔ buɔ mɛi ni jáa lɛ lɛ ahe ni ekwɛɔ amɛnɔ kɛ́ amɛkɛ jaramɔ shihilɛ miikpe po. Kuku nɛɛ kɛ bɔ ni Nyɔŋmɔ kwɛɔ mɛi ni jáa lɛ lɛ anɔ ehãa lɛ to bɔ ni tookwɛlɔ kwɛɔ etoi anɔ ehãa lɛ he. b Kɛ́ amɛkɛ shihilɛi ni mli wawai tamɔ jɔɔ voo ni mli ewo duŋ kpii loo gbele ni akɛtsu nii yɛ kuku lɛ mli lɛ kpe lɛ, amɛhe efeee shoo. Amɛnuɔ he akɛ amɛyɛ shweshweeshwe tamɔ nɔ ni Nyɔŋmɔ yɛ amɛmasɛi nɔŋŋ.

 Yɛ Biblia beiaŋ lɛ, tookwɛlɔ kɛ edɛŋhiɛmɔtso loo tso tsuɔ nii kɛbuɔ etoo kuu lɛ he kɛjeɔ kooloo awuiyelɔ he. Agbɛnɛ hu lɛ, ekɛ etookpalamɔ tso ni bei babaoo lɛ, eji tso kakadaŋŋ ni dade ni adɔ yɔɔ enaabu lɛ tsuɔ nii kɛtsɔɔ etoi lɛ agbɛ loo ekɛjieɔ amɛ kɛjeɔ oshara mli. Nakai nɔŋŋ Yehowa Nyɔŋmɔ buɔ mɛi ni jáa lɛ lɛ ahe ni etsɔɔ amɛ gbɛ tamɔ tookwɛlɔ ni yɔɔ suɔmɔ feɔ lɛ. Yɛ shihilɛi ni mli wawai amli po lɛ, Yehowa tsɔɔ gbɛi srɔtoi anɔ ekwɛɔ amɛnɔ.

•   Etsɔɔ amɛ nii ni eshɛjeɔ amɛmii kɛtsɔ e-Wiemɔ ni ji Biblia lɛ nɔ.​—Romabii 15:4.

•   Eboɔ amɛsɔlemɔi atoi, ehãa amɛtoiaŋ jɔɔ amɛ, ni amɛyeee amɛtsui.​—Filipibii 4:6, 7.

•   Etsɔɔ ejálɔi krokomɛi anɔ ewoɔ amɛ hewalɛ.​—Hebribii 10:24, 25.

•   Ehãa amɛ hiɛnɔkamɔ akɛ amɛbaaná shihilɛ kpakpa wɔsɛɛ, ejaakɛ ebaajie nibii fɛɛ ni yeɔ amɛ awui ŋmɛnɛ lɛ kɛje shihilɛ mli.​—Lala 37:29; Kpojiemɔ 21:3-5.

 David ni eji tookwɛlɔ be ni eji oblanyo ni sɛɛ mli lɛ ebatsɔ maŋtsɛ yɛ blema Israel lɛ ji mɔ ni ŋma Lala 23 lɛ. (1 Samuel 17:34, 35; 2 Samuel 7:8) Yɛ lala lɛ shishijee lɛ, awie Yehowa he akɛ Tookwɛlɔ ni nyiɛɔ ejálɔi lɛ ahiɛ, elɛɔ amɛ ni eshɛjeɔ amɛmii, tamɔ tookwɛlɔ feɔ ehãa etoi lɛ nɔŋŋ.​—Lala 23:1-3.

 Yɛ Lala 23:4 lɛ mli be ni David wieɔ Nyɔŋmɔ hebuu lɛ he lɛ, ekɛ wiemɔ (bo) tsu nii moŋ fe ni ekɛ (lɛ) baatsu nii. Nakai tsakemɔ bibioo lɛ maa nɔ mi akɛ, wekukpaa kpakpa kã David kɛ Yehowa teŋ. David le akɛ Nyɔŋmɔ susuɔ ehe ni ele naagbai ni ekɛkpeɔ lɛ fɛɛ. Enɛ hewɔ lɛ, David sheee sane fɔŋ ko gbeyei.

 Yɛ Lala 23, kuku 5 kɛ 6 lɛ, akɛ Yehowa etooo tookwɛlɔ kɛ etoi ahe dɔŋŋ, moŋ lɛ akɛ lɛ to shĩatsɛ kɛ eshĩa gbɔ he. Taakɛ shĩatsɛ ni mli jɔ feɔ lɛ, Yehowa fee David gbɔ waa. David henyɛlɔi lɛ po nyɛɛɛ atsĩ Nyɔŋmɔ naa ni ekakwɛ David. Yɛ lala lɛ naagbee lɛ, David wie kɛ nɔmimaa akɛ, Nyɔŋmɔ baafee lɛ ekpakpa ni ebaajie suɔmɔ kpo etsɔɔ lɛ ewala gbii fɛɛ.

 Mfonirifeemɔŋ wiemɔ ni akɛtsu nii yɛ Lala 23 lɛ hãa wɔnaa bɔ ni Nyɔŋmɔ jɛɔ esuɔmɔ mli eyeɔ ebuaa mɛi ni jáa lɛ lɛ.​—1 Petro 2:25.