“Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akafɔ̃ bo diɛŋtsɛ oniiashishinumɔ nɔ. Jwɛŋmɔ ehe yɛ ogbɛi fɛɛ amli, ni ebaahã ogbɛi aja.”​—Abɛi 3:5, 6, Jeŋ Hee Shishitsɔɔmɔ.

 “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ!”​—Abɛi 3:5, 6, Ga Biblia Momo.

 Esa akɛ wɔkɛ wɔhiɛ afɔ Yehowa a Nyɔŋmɔ nɔ kɛhã gbɛtsɔɔmɔ moŋ fe ni wɔkɛ wɔhiɛ baafɔ̃ wɔ diɛŋtsɛ wɔniiashishinumɔ nɔ kɛ́ wɔbaakpɛ yiŋ ko ni he hiaa.

 “Okɛ ohiɛ afɔ̃ Yehowa nɔ kɛ otsui fɛɛ.” Kɛ́ wɔfee nibii yɛ gbɛ ni Yehowa etsɔɔ lɛ nɔ lɛ, no tsɔɔ akɛ wɔkɛ wɔhiɛ miifɔ̃ enɔ. Esa akɛ wɔkɛ wɔhiɛ afɔ Yehowa Nyɔŋmɔ nɔ kwraa kɛ wɔtsui muu fɛɛ. Yɛ Biblia lɛ mli lɛ, bei pii lɛ, tsui lɛ kɔɔ bɔ ni mɔ ko ji diɛŋtsɛ lɛ he; nɔ ni fata he hu ji bɔ ni enuɔ nii ahe ehãa, nibii ni kanyaa lɛ ni efee nɔ ko, esusumɔi, kɛ esubaŋ. No hewɔ lɛ, kɛ́ akɛɛ wɔkɛ wɔhiɛ afɔ̃ Nyɔŋmɔ nɔ kɛ wɔtsui fɛɛ lɛ, ebiɔ babaoo fe bɔ ni wɔnuɔ nii ahe wɔhãa lɛ kɛkɛ. Wɔkpɛɔ wɔyiŋ nakai, ejaakɛ wɔyɛ nɔmimaa akɛ, wɔ-Bɔlɔ lɛ le nɔ ni hi kɛhã wɔ.​—Romabii 12:1.

 “Okɛ ohe akafɔ̃ bo diɛŋtsɛ oniiashishinumɔ nɔ.” Esa akɛ wɔkɛ wɔhiɛ afɔ̃ Nyɔŋmɔ nɔ, ejaakɛ, wɔnyɛŋ wɔkɛ wɔhe afɔ̃ wɔjwɛŋmɔ ni yeee emuu lɛ nɔ. Kɛ́ wɔkɛ wɔhe fɔ̃ wɔ diɛŋtsɛ wɔhe nɔ, loo wɔhã bɔ ni wɔnuɔ nii ahe wɔhãa lɛ kudɔ wɔyiŋkpɛi lɛ, ekolɛ, wɔbaakpɛ yiŋ ko ni shishijee lɛ wɔbaasusu akɛ eja, shi eyagbeŋ naa ekpakpa. (Abɛi 14:12; Yeremia 17:9) Nyɔŋmɔ le nii kwraa fe wɔ. (Yesaia 55:8, 9) Kɛ́ wɔhã etsɔɔ wɔ nii lɛ, wɔbaaye omanye.​—Lala 1:1-3; Abɛi 2:6-9; 16:20.

 “Jwɛŋmɔ ehe yɛ ogbɛi fɛɛ amli.” Esa akɛ wɔna Nyɔŋmɔ susumɔ yɛ wɔshihilɛ mli kɛ yiŋ srɔtoi fɛɛ ni wɔkpɛɔ lɛ amli. Wɔbaanyɛ wɔfee enɛ kɛ́ wɔsɔleɔ kɛbiɔ egbɛtsɔɔmɔ, ni wɔhiɔ shi yɛ nɔ ni ekɛɔ yɛ e-Wiemɔ, ni ji Biblia lɛ mli lɛ naa.​—Lala 25:4; 2 Timoteo 3:16, 17.

 “Ebaahã ogbɛi aja.” Nyɔŋmɔ waa wɔ ni wɔhi shi yɛ ejalɛ shishitoo mlai lɛ anaa koni no ahã wɔgbɛi aja. (Abɛi 11:5) No hãa wɔtsiɔ wɔhe kɛjeɔ naagbai ahe ni wɔnáa miishɛɛ yɛ shihilɛ mli.​—Lala 19:7, 8; Yesaia 48:17, 18.

 Shishitoo mlai ni baahã wɔná miishɛɛ yɛ shihilɛ mli, ni wɔsa Nyɔŋmɔ hiɛ lɛ pii yɛ Abɛi awolo lɛ mli. Aŋma klɛŋklɛŋ yitsei nɛɛhu lɛ tamɔ ŋaa ni tsɛ ko woɔ ebi ni esumɔɔ. Yitso 3 lɛ wieɔ sɛɛnamɔi ni mɛi ni boɔ wɔ-Bɔlɔ lɛ ŋaawoi ni nilee yɔɔ mli lɛ toi lɛ náa lɛ he.​—Abɛi 3:13-26.