“Okɛ woo ahã opapa kɛ omami koni owala sɛɛ atsɛ yɛ shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ.”​—2 Mose 20:12, Jeŋ Hee Shishitsɔɔmɔ.

 “Wo otsɛ kɛ onyɛ, koni ogbii atsɛ yɛ shikpɔŋ lɛ ni Yehowa, o-Nyɔŋmɔ lɛ, ŋɔhã bo lɛ nɔ.”​—2 Mose 20:12, Ga Biblia Momo.

 Nyɔŋmɔ fã Israelbii ni hi shi yɛ blema lɛ akɛ amɛkɛ woo ahã amɛfɔlɔi. Shiwoo ni ekɛfata famɔ nɛɛ he lɛ hã amɛná yiŋtoo kroko hewɔ ni esa akɛ amɛye nɔ. Eyɛ mli akɛ Kristofoi bɛ Nyɔŋmɔ Mla ni ekɛhã Israelbii lɛ ni atsɛɔ lɛ Mose Mla lɛ shishi moŋ, shi Nyɔŋmɔ shishitoo mlai lɛ tsakeko. Shishitoo mlai ni Nyɔŋmɔ Mla lɛ damɔ nɔ lɛ kã he eetsu nii lolo, no hewɔ lɛ, esa akɛ Kristofoi aye nɔ.​—Kolosebii 3:20.

 Kɛ́ bii lɛ edara jio, amɛdarako jio lɛ, kɛ́ amɛbu amɛfɔlɔi ni amɛbo amɛgbɛtsɔɔmɔi atoi lɛ, etsɔɔ akɛ amɛkɛ woo miihã amɛ. (3 Mose 19:3; Abɛi 1:8) Kɛ́ bii lɛ dara ni amɛná weku po lɛ, amɛyaa nɔ amɛsumɔɔ amɛfɔlɔi, ni amɛyeɔ amɛbua amɛ. Akɛ nɔkwɛmɔnɔ lɛ, kɛ́ amɛfɔlɔi lɛ gbɔlɔ lɛ amɛtoɔ gbɛjianɔ kɛkwɛɔ amɛ jogbaŋŋ, ni amɛyeɔ amɛbuaa amɛ yɛ shika gbɛfaŋ po kɛ́ ehe bahia ni amɛfee nakai.​—Mateo 15:4-6; 1 Timoteo 5:4, 8.

 Kadimɔ akɛ, akɛɛ bii ni ji Israelbii lɛ akɛ amɛkɛ woo ahã amɛpapa kɛ amɛmami, ni no tsɔɔ akɛ esa akɛ amɛyɔse akɛ mami lɛ hu yɛ gbɛfaŋnɔ ko ni he hiaa waa tsumɔ yɛ weku lɛ mli. (Abɛi 6:20; 19:26) Esa akɛ bii ni yɔɔ ŋmɛnɛ lɛ hu afee nakai nɔŋŋ.

 Kɛjɛ blema tɔ̃ɔ lɛ, husu yɛ famɔ akɛ akɛ woo ahã fɔlɔi lɛ he. Ahã bii ni ji Israelbii lɛ le akɛ, kɛ́ amɛfɔlɔi loo mɔ kroko bi ni amɛfee nɔ ko ni baahã amɛgbo Nyɔŋmɔ nɔ toi lɛ, esaaa akɛ amɛfeɔ. (5 Mose 13:6-8) Nakai nɔŋŋ ŋmɛnɛ lɛ, Kristofoi ‘boɔ Nyɔŋmɔ moŋ toi akɛ nɔyelɔ fe gbɔmɛi.’​—Bɔfoi 5:29.

 Yɛ Mla ni Nyɔŋmɔ kɛhã Israelbii lɛ mli lɛ, ewo shi akɛ bii ni kɛ woo hãa amɛfɔlɔi lɛ, ‘awala sɛɛ baatsɛ ni amɛbaashwere’ yɛ shikpɔŋ ni Nyɔŋmɔ kɛbaahã amɛ lɛ nɔ. (5 Mose 5:16) Amɛnáŋ toigbalamɔ ni baa bii ni edara ni kuɔ Nyɔŋmɔ mla lɛ mli, ni amɛtseɔ amɛfɔlɔi ahiɛ atua lɛ anɔ lɛ eko. (5 Mose 21:18-21) Kɛjɛ be ni akɛ mla lɛ hã lɛ, be eshwie mli moŋ nɛ, shi shishitoo mlai ni yɔɔ nakai mla lɛ mli lɛ tsakeko. (Efesobii 6:1-3) Wɔdara jio, wɔdarako jio, wɔbaabu wɔnifeemɔi lɛ ahe akɔntaa wɔhã wɔ-Bɔlɔ lɛ. Ni taakɛ ewo shi lɛ, bii ni boɔ lɛ kɛ amɛfɔlɔi hu atoi lɛ awala sɛɛ baatsɛ. Anɔkwa, amɛyɛ hiɛnɔkamɔ akɛ amɛbaahi shi kɛya naanɔ.​—1 Timoteo 4:8; 6:18, 19.

 Wɔbaanyɛ wɔkase nɔ ko ni he hiaa waa yɛ he ni akɛ famɔ ni yɔɔ 2 Mose 20:12 lɛ ewo yɛ Kitai Nyɔŋma lɛ loo Wiemɔi Nyɔŋma lɛ mli lɛ mli. (2 Mose 20:1-17) Famɔ ni tsɔ nakai famɔ lɛ hiɛ lɛ hãa Israelbii lɛ leɔ nɔ ni Nyɔŋmɔ kpaa gbɛ kɛjɛɔ amɛdɛŋ, tamɔ jamɔ ni esa akɛ amɛjá ekome too pɛ lɛ nɛkɛ. Famɔ ni nyiɛ sɛɛ lɛ hãa amɛnaa bɔ ni Nyɔŋmɔ kpaa gbɛ akɛ amɛkɛ amɛnyɛmi gbɔmɔ ahi shi, eko ji ni mɔ aye egbalashihilɛ mli hefatalɔ anɔkwa, kɛ agbɛnɛ hu lɛ, ni akɛju. No hewɔ lɛ, wɔnaa akɛ, kɛ́ oye famɔ akɛ “okɛ woo ahã opapa kɛ omami” lɛ nɔ lɛ, no tsɔɔ akɛ ootsu nɔ ni Nyɔŋmɔ kpaa gbɛ akɛ ofee ohã lɛ kɛ nɔ ni ekpaa gbɛ akɛ ofee ohã onyɛmi gbɔmɔ lɛ he nii.