Díreach roimh Cháisc na nGiúdach sa mbliain 32 CR, d’fhill na haspail ó thuras craobhscaoilte agus iad tuirseach. Thug Íosa go Béatsáide i mbád iad chun go mbeidís in ann a scíth a ligean. Ach nuair a tháinig an bád in aice an chladaigh bhí na mílte duine ann rompu. Cé go raibh Íosa ag iarraidh am a chaitheamh lena chuid aspal, chuir sé fáilte chroíúil roimh na daoine. Leigheas sé na daoine a bhí tinn agus thosaigh sé ag múineadh. Chaith sé an lá ag múineadh dóibh faoi Ríocht Dé. Le teacht an tráthnóna, tháinig na haspail chuige ag rá: ‘Chaithfeadh sé go bhfuil ocras ar na daoine. Scaoil leo go bhfaighidh siad greim le hithe.’

Dúirt Íosa: ‘Ní gá dóibh imeacht. Tugaigí rud éigin le hithe dóibh anseo.’ D’fhiafraigh na haspail: ‘An bhfuil tú ag iarraidh orainne a dhul agus arán a cheannach dóibh?’ Dúirt an t-aspal Pilib: ‘Dá mbeadh go leor airgid againn fiú, ní bheadh muid in ann a ndóthain aráin a cheannach chun an tslua seo a bheathú.’

D’fhiafraigh Íosa: ‘Cé mhéad bia atá againn?’ D’fhreagair Aindrias: ‘Tá chúig bhuilín againn agus dhá iasc. Ach níl ár ndóthain ansin.’ Dúirt Íosa: ‘Tabhair chugam an t-arán agus an t-iasc.’ Dúirt sé leis na daoine suí ar an bhféar ina ngrúpaí de chaoga agus de chéad. Thóg Íosa an t-arán agus an t-iasc, d’fhéach sé suas chun na bhflaitheas agus ghuigh sé. Ansin thug sé an bia do na haspail, agus roinn siadsan amach ar na daoine é. D’ith an 5,000 fear, na mná agus  na páistí go dtí go raibh siad sách. Ina dhiaidh sin, bhailigh na haspail an fuílleach agus níor cuireadh dada amú. Líon siad 12 chiseán! Nárbh iontach an mhíorúilt a bhí ansin?

Chuaigh an mhíorúilt seo chomh mór sin i gcion ar na daoine is go raibh siad ag iarraidh rí a dhéanamh d’Íosa. Ach bhí a fhios ag Íosa nárbh é seo an t-am a bhí leagtha amach ag Iehova dó le bheith ina rí. Mar sin scaoil sé leis an slua agus dúirt sé leis na haspail a dhul anonn go dtí an taobh thall de Mhuir na Gailíle. Chuaigh siadsan isteach sa mbád, agus chuaigh Íosa suas an sliabh ina aonar. Cén fáth? Mar bhí sé ag iarraidh labhairt lena Athair go príobháideach. Cé go raibh Íosa cruógach, rinne sé am i gcónaí le labhairt lena Athair.