FÉACH ar an aingeal anseo ag coinneáil doras an phríosúin oscailte. Aspail Íosa atá sé a ligeann saor. Féachaimis céard a thárla le gur cuireadh i bpríosún iad.

Níl sé ach achar gearr ó dóirteadh an spiorad naofa ar dheisceabail Íosa. Tá Peadar agus Eoin ag dul isteach sa teampall i Iarusailéim tráthnóna amháin. Ansiúd, in aice an dorais tá fear déirce a bhí ina chláiríneach ar feadh a shaoil. Nuair a fheiceann sé Peadar agus Eoin, impíonn sé orthu rud éicint a thabhairt dó. Céard a dhéanfaidh na haspail?

‘Níl aon airgead agam,’ deireann Peadar, ‘ach tabharfaidh mé duit an rud atá agam. In ainm Íosa, éirigh agus siúl!’ Ansin tógann Peadar láimh dheas an fhir, agus láithreach, léimeann sé suas agus tosaíonn sé ag siúl. Nuair a fheiceann na daoine é seo, bíonn íontas orthu agus an-áthas faoin míorúilt íontach seo.

‘Tré chumhacht Dé, a thóg Íosa ón mbás a rinne muid an mhíorúilt seo,’ deireann Peadar. Le linn dóibh a bheith ag caint, tagann roinnt ceannairí reiligiúnacha. Tá fearg orthu mar tá Eoin agus Peadar ag inseacht do na daoine faoi aiséirí Íosa. Beireann siad orthu agus cuireann siad i bpríosún iad.

Lá arna mhárach, ag cruinniú de na ceannairí reiligiúnacha, tugtar isteach Peadar agus Eoin, agus an fear a leigheas siad. ‘Tré cén chumhacht a rinne sibh an mhíorúilt?’ fiafraitear díobh.

Insíonn Peadar dóibh gur tré chumhacht Dé, a thóg Íosa ó mhairbh é. Níl fhios ag na sagairt céard a dhéanfaidh siad, mar ní féidir leo a shéanadh gur thárla an mhíorúilt íontach seo. Mar sin bagraíonn siad ar na haspail gan labhairt ar Íosa níos mó, agus ansin ligeann siad saor iad.

Leanann na haspail ag teagasc faoi Íosa agus ag leigheas na ndaoine tinne. Scaipeann an scéal faoi na míorúiltí seo. Agus tugann sluaite, fiú as na bailte timpeall Iarusailéim, a n-easláin chun go leigheasfadh na haspail iad. Cuireann sé seo éad ar na ceannairí reiligiúnacha agus cuireann siad na haspail i bpríosún. Ach ní bhíonn siad ann i bhfad.

I rith na hoíche osclaíonn aingeal Dé doras an phríosúin. Deireann an t-aingeal: ‘Téigí isteach sa teampall, agus lean ag labhairt leis na daoine’. An mhaidin dar gcionn, nuair a chuireann na ceannairí reiligiúnacha fir go dtí an príosún chun na haspail a fháil, bíonn siad imithe. Níos deireanaí fáigheann siad ag múineadh sa teampall iad agus tugann siad chuig halla an tSeanaid iad.

‘D’ordaíomar daoibh gan a bheith ag teagasc faoi Íosa níos mó,’ deireann na ceannairí reiligiúnacha. ‘Ach tá Iarusailéim líonta le bhur dteagasc agaibh.’ Freagraíonn na haspail: ‘Ní mór dúinn a bheith umhal do Dhia mar rialtóir agus ní do dhaoine.’ Agus leanann siad orthu ag múineadh an “deá-scéala.”