TOƁERE 5
Samu’iila jokkuno waɗugol ko haani
Gila Samu’iila wonunoo paykun, ko ka suudu rewirdu Allah o hoɗuno e wonunoo gollude, ka yimɓe ɓen yahaynoo fii rewugol Yahuwah. Hiɗon anndi honno Samu’iila yaari ka suudu rewirdu Allah ? Janngen taho fii neene makko Haanah.
Ko neeɓi, Haanah heɓaali ɓiɗɗo fii kala himo faalanoo moƴƴa. Ko ontuma o torii Yahuwah fii yo o okku mo ɓiɗɗo. O waɗi fodoore o wi’i, si Allah okkii mo ɓiɗɗo gorko, o naɓay mo o wonoya, o golla ka suudu rewirdu Allah. Yahuwah jaabii toraare makko nden, o heɓi ɓiɗɗo gorko. O noddi mo samu’iila. Wano no Haanah fodirnoo non, ko Samu’iila wonunoo hakkunde duuɓi tati e nay, o naɓuno mo ka suudu rewirdu fii gollanngol Allah.
Ko Elii wonunoo mawɗo yottinoowo sadaka ka suudu rewirdu Allah. Ɓiɓɓe makko ɓen ɗiɗo kadi gollayno ton. Annditee ko ka suudu rewirdu Allah yimɓe ɓen araynoo fii rewugol Allah. Ko nokkuure ka yimɓe haanunoo waɗude ko moƴƴi. Kono ɓiɓɓe Elii ɓen hari no waɗude piiji bonɗi. Samu’iila yi’uno ko ɓe wonunoo waɗude kon. Samu’iila waɗuno piiji bonɗi wa ɓiɓɓe Elii ɓen ? — Oo’o, kanko o luttuno waɗude ko moƴƴi wano mawɓe makko ɓen ne’iri mo non.
Ko honɗun sikkuɗon Elii no haanunoo waɗude fii ko ɓiɓɓe makko ɓen waɗi kon ? — Himo haanunoo ɓe donkinde. Hara o accaali ɓe golla ka suudu rewirdu Allah hannde kadi. Kono Elii waɗaali ɗun. Yahuwah weltananooki mo kanko e ɓiɓɓe makko ɓen ɗiɗo. Yahuwah ƴetti aada donkingol ɓe.
Samu’iila yottinno nulal Yahuwah ngal e Elii
Jemmaare goo tawi Samu’iila no ɗaanaade, o nani goɗɗo no nodda mo : « Samu’iila ! » O dogi o yahi ka Elii, kono Elii wi’i mo : « Mi noddaali ma. » Waɗuno nde laaɓi ɗiɗi ɓawto ɗun. Ko onsay Elii yeetimo si o nanii hito ngon kadi, ko yo o wi’u : « Daalu Yahuwah, hilan jentima. » Ko ɗun Samu’iila waɗunoo. Ontuma yahuwah daalani Samu’iila : « Yeeto Elii, mi donkinay mo, kanko e ɓeynguure makko nden fii piiji bonɗi ko ɓe waɗi kon. » Hiɗon sikkude sattanaano Samu’iila fii yottingol ngal nulal e Elii ? — Oo’o, sattanno mo. Fii kala hari Samu’iila no huli, kono o waɗuno ko Yahuwah daalannoo mo kon. Ko Yahuwah daalunoo kon, aruno e waɗude. Ɓiɓɓe Elii ɓen ɗiɗoo non warano. Elii kadi maayuno.
Ko Samu’iila waɗi kon, ko misal moƴƴal fii men. O waɗuno ko moƴƴi fii kala o yi’uno woɓɓe goo no waɗa ko boni. Onon le ? On waaway wa’ude wa Samu’iila e jokkon waɗugol ko moƴƴi ? Si on waɗii ɗun, on weltinay Yahuwah e mawɓe mon ɓen.
