TOƁƁERE 44
Feetooji ɗin fow no wela Alla ?
Yahuwah Alla no faalaa yo en heɓu ngurndan welɗan e fii yo en fiju saa’iiji goo. Kono ko feetooji ɗin fow welata mo ? Ko honno hollirten hiɗen yiɗi Yahuwah Alla e ɗee baŋŋe ?
1. Fii honɗun feetooji buy welataa Yahuwah Alla ?
No gasa ŋalɗinay on anndugol feetooji buy yaadaa e ko Deftere Alla nden janni kon maa no iwri e yimɓe ɓe rewataano Alla. Sifa ɗin feetooji no yaadi e diina fenaande. Hiɗi humondiri e mbileyaagal maa woɓɓe goo no miijoo si goɗɗo maayii, wonkii makko kin maayataa. Goɗɗi e feetooji ɗin no tuggii e bidi’a maa hoolaare ɗun no wondi e arsike (Isaaya 65:11). Ko ɗun waɗi, Yahuwah Alla waajii rewooɓe mo ɓen : « Iwee e hakkunde maɓɓe, seedon, wota on meemu ko laaɓaa a » (2 Korenti 6:17).
2. Ko honno Yahuwah Alla miijori fii feetooji teddinayɗi yimɓe ko feƴƴiti ?
Yahuwah Alla no haɗi wota en « faawu hoolaare men nden e yimɓe melenɓe » (janngee Yeremiiya 17:5). Feetooji goo no teddina lamɓe maa sooriiɓe. Goɗɗi goo no mawnina al’alaamaaji maa hettaare leydi (1 Yuuhanna 5:21). Goɗɗi goo kadi no manta feddeeji politik maa mojobe darantooɗe woɓɓe goo. Ko honno Yahuwah Alla miijortoo si en okkii goɗɗo maa fedde teddungal ngal haanaa, tentinii si tawii ngal yaadaa e faale makko on ?
3. Ko jikkuuji honɗi haɗata feeto jaɓee ?
Deftere Alla nden no harmini « mandilugol [...] e mottondirgol ka mandiletee » (1 Petruusu 4:3). E feetooji goo, woɓɓe waawataa hoore maɓɓe e hiɓe waɗa jikkuuji ɗi Alla harmini. Si hiɗen faalaa luttude wonugol yiɓɓe Yahuwah Alla, hiɗen haani woɗɗitaade kala ko laaɓaa.
LUGGINEE
Ndaaree no weltinirten Yahuwah Alla e hoore fewjugol fii feetooji no moƴƴiri.
4. Wikkee feetooji ɗi teddintaa Yahuwah Alla
Janngee Efeesi 5:10 e yewton fii ɗee lanndaale :
-
Ado en fewjude si en tawete maa si en tawetaake ka feeto, ko honɗun haanuɗen anndude ?
-
Ko feetooji honɗi waɗetee ka wonuɗon ɗon ?
-
E miijo mon, ɗin feetooji no wela Yahuwah Alla ?
E piide misal, ko honɗun Yahuwah Alla miijii fii annditugol ɲalaande nde goɗɗo jibinaa ? Hay nokku Deftere Alla nden hollaali fii rewoowo Yahuwah Alla waɗuɗo feeto fii annditugol ɲalaande nde o jibinaa. Kono hinde haali fii yimɓe ɗiɗo ɓe rewataano Yahuwah Alla waɗuɓe feeto fii annditugol ɲalaande nde ɓe jibinaa. Janngee Fuɗɗoode nden 40:20-22 (VPFJ) e Matta 14:6-10 e yewton fii ɗee lanndaale :
-
Ko honno ɗii feetooji ɗiɗi nanndiri ?
-
E nder ko jannguɗon kon, ko honno Yahuwah Alla miijorii fii annditugol ɲalaande nde goɗɗo jibinaa ?
No gasa hiɗon lanndoo : « Fii Yahuwah Alla, no hulɓini tawegol ka annditugol ɲalaande nde goɗɗo jibinaa maa feeto ngo yaadaa e Daaluyee makko on ? » Janngee Eggudu ndun 32:1-8 (VPFJ). Ɓawto ɗun fijinee VIDIO on e yewton fii lanndaale jokkituɗe ɗen.
-
Fii honɗun no hitti anndugol si feeto no wela Yahuwah Alla ?
-
Ko honno waɗirten ɗun ?
Ko honno anndirton si feeto welataa Alla ?
-
No tuggii e ko yaadaa e ko Deftere Alla nden janni kon ? Fii anndugol ɗun, taskee fii iwdi ngon feeto.
-
No teddinde yimɓe, feddeeji maa al’alaamaaji leydi ko feƴƴiti ? Ko Yahuwah Alla teddinten e ko kanko hoolorten fii jittugol anndeeji aduna.
-
No wondi e naamuuji e jikkuuji ɗi yaadaa e sariyaaji Deftere Alla nden ? Hiɗen haani wonude laaɓuɓe ka ɓernde e ka kuuɗe.
5. Wallee woɓɓe goo teddingol ko hooliɗon kon
Wonnde, no sattana on salagol si woɓɓe goo no waɗa fii yo on tawe e feetooji ɗi welataa Yahuwah Alla. Si ko ɗun, sifanee ɓe ko fewjuɗon kon e hoore muɲal e newaare. Fii yi’ugol misal no waɗirton ɗun, fijinee VIDIO on.
Janngee Matta 7:12 e yewton fii ɗee lanndaale :
-
Wano oo aaya wi’iri non, hiɗon haani haalande musiɓɓe mon ɓe wonaa Seedeeɓe Yahuwah, wota ɓe tawe e sifa ɗin feetooji ?
-
Ko honno hollirton musiɓɓe mon hiɗon yiɗi ɓe e hiɗon teddini ɓe hay si on tawetaake e feetooji maɓɓe ɗin ?
6. Yahuwah Alla no faalaa yo en heɓu weltaare
Yahuwah Alla no faalaa yo en feƴƴindin saa’i moƴƴo e ɓeynguure men nden e yiɓɓe men ɗen. Janngee Waajotooɗo on 8:15 e yewton fii ngal lanndal :
-
Ko honno oo aaya holliri Yahuwah Alla no faalaa yo en heɓu weltaare ?
Yahuwah Alla no faalaa yo rewooɓe mo ɓen fiju e ɓe feƴƴindina saa’i moƴƴo. Fijinee VIDIO on fii yi’ugol ɗun ko laaɓi pos ka mottondire amen winndereyanke ɗen.
Janngee Galaasi 6:10 e yewton fii ɗee lanndaale :
-
Hiɗen haani taweede e feetooji ɗi yimɓe buy tawetee fii ‘waɗangol woɓɓe goo moƴƴere’ ?
-
Ko honɗun ɓurata on weltinde : ko okkugol sabu feeto ɓay hiɗon haani waɗude ɗun kaa ko okkugol ɓay hiɗon faalaa ?
-
Wonnde, Seedeeɓe Yahuwah buy waɗay saa’iiji fii weltingol fayɓe maɓɓe ɓen e okkorgol ɓe piiji ɗi ɓe tanƴinanooki. Si hiɗon mari fayɓe, ko honno weltinirton ɓe ?
WOƁƁE GOO NO WI’A : « Mi haajaaka ka feeto iwri. Ko moƴƴani lan ko feƴƴindingol saa’i moƴƴo e ɓeynguure an nden e yiɓɓe an ɓen. »
-
Ko honno jaabortoɗon ?
RAWNOODE
Yahuwah Alla no faalaa yo en feƴƴindin saa’i moƴƴo enen e ɓeynguure men nden e yiɓɓe men ɓen. Kono himo faalaa kadi yo en wikko feetooji ɗi welataa mo.
Ndartannde
-
Ko lanndaale honɗe wallata en anndugol si feeto welataa Yahuwah Alla ?
-
Ko honno wallirten ɓeynguure men nden e yiɓɓe men ɓen faamugol no fewjirten fii feetooji ?
-
Ko honno anndirton Yahuwah Alla no faalaa yo en welto e yo en fiju ?
TASKEE
Feetooji ɗi almasiiyaaɓe ɓen tawetaake e mun.
« Fii honɗun Seedeeɓe Yahuwah ɓen tawetaake e feetooji goo ? » (Winndannde ka jw.org)
Ndaaree dalilji 4 hollayɗi annditugol ɲalaande nde goɗɗo jibinaa welataa Alla.
Ndaaree fayɓe yiɗuɓe Yahuwah weltinta mo e saa’i feeto jibinaa nden.
Miliyonji almasiiyaaɓe no suɓii ɓe tawetaake e feeto fii annditugol ɲalaande nde annabi Iisaa jibinaa nden. Ko honɗun ɓe miijii fii ko ɓe fewji kon ?
« Ɓe heɓii ko ɓuri moƴƴude » (Suudu Aynirdu ndun, 1 deesaambur 2012)
a Ndaaree tinndinoore 5 fii anndugol no gerdirton fii feetooji.
