Ado annabi Iisaa maayude o wi’uno : ‘ Oo kibaaru moƴƴo fii Laamu Allah ngun feɲɲinte e aduna on fow, fii no leƴƴi ɗin nanira seeditoore nden. ’ (Matta 24:14). Kono ko honno ngol waajagol gasirta e oo aduna ? Men waajorto no annabi Iisaa waajoraynoo non. — Luuka 8:1.

Meɗen waajaade suudu e suudu. Annabi Iisaa ekkintinno taalibaaɓe makko ɓen no ɓe waajora oo kibaaru moƴƴo suudu e suudu (Matta 10:11-13 ; Kuuɗe sahaabaaɓe ɓen 5:42 ; 20:20). O holluno taalibaaɓe makko ɓen nokkuure ka ɓe waajotoo (Matta 10:5, 6 ; 2 Korenti 10:13). Ko wano non hannde, moftal kala no jonnaa nokkuure ka ɓe waajotoo. Ko ɗun wallata men no men waɗira ko annabi Iisaa yamiri men kon fii : “ waajagol jamaa on, fellitintinana ɓe. ” — Kuuɗe sahaabaaɓe ɓen 10:42.

Men wakkiloto yahugol ka yimɓe ɓen woni woo. Annabi Iisaa waajotono nokkeeli ɗin fow wano ka maakiti, ka takko baharu e kala ka yimɓe woni (Markuusa 4:1 ; Yuuhanna 4:5-15). Menen kadi men yewtay yimɓe ɓen ka ɓe woni woo wano ka laawi, ka ɓe gollata maa ka telefonji. Wonnde kadi men yewtay goreeɓe amen ɓen, kawtal amen ngal e siɓɓe amen ɓen. Wakkilaare amen nden no wallude yimɓe guluuji e guluuji no ɓe nanira “ kibaaru moƴƴo on fii kisiyee ”. — Zabuura 96:2, TMN.

Ko hommbo faalaɗon yewtude oo kibaaru moƴƴo fii Laamu Allah ngun e fii ko aroyta ? Kibaaru moƴƴo ko nanuɗen kon wonaa yo en maru fii men tun, kono ko yo en yewtu yimɓe ɓen.

• Kibaaru moƴƴo hommbo haanuɗen waajaade ?

• Honno Seedeeɓe Yahuwah ɓen woni waajoraade wano annabi Iisaa waajoraynoo non ?