KAPITE 15
Ko Ai a Sesu?
Ko Sesu ko se tasi na iloa i le isitolia o le tagata la. Tokaʼapi e lotou iloa a lona igoa kae leʼaise lotou iloa mālie aia. Ti tokaʼapi a ʼiki, e lotou maʼua ni manatu kesekese o uiga mo ia. Kae koleā e pati i le Tosi-Tapu o uiga mo Sesu?
1. Ko ai a Sesu?
Ko Sesu ko se laumālie makeke e maʼuli i selo. Ko ia leia na ʼuluaki fakatupu e Seova. Ti ko ia leia na fakaʼigoa ai aia: Ko ‘le ʼuluaki tupu o neʼa fuli kua fakatupu.’ (Kolose 1:15) I le Tosi-Tapu e fakaʼigoa a Sesu, ko le ‘Alo fuatasi o le Atua’ ko lona fakaʼuiga na fakatupu fakaʼagatonu aia e Seova. (Soane 3:16) Na tokoi Sesu ki lona Tamana, a Seova, ki le fakatupu o neʼa fuli. (Lau Taagapati 8:30.) E feofi tuʼumaʼu a Sesu kia Seova. Ko ia “le folafola,” talie i lona uiga tuku folafola e fakasā e ia a logo mo fakatuʼutuʼu a le Atua.—Soane 1:14.
2. Koleā na ʼau ai Sesu ki le kele?
Kua sili ki ai fētuʼu e 2000, na nofo Sesu i selo. Kae i se milakulo, na ʼaga Seova o tuku le maʼuli o Sesu ki le manava o se fafine taupoʼou na igoa ko Malia, o soko atu ai mo lona tupu tagata. (Lau Luka 1:34, 35.) Na ʼau Sesu ki le kele ke liliu ko le Mesia pe ko Kilisito ti mo saofaki le kakai. a Ko māsau fakapolofeta fuli o le Tosi-Tapu o uiga mo le Mesia na soko māʼoki ia Sesu. Ti na mafai ki le kakai ke lotou matala pe ko ai le “Kilisito . . . le Alo o le Atua mauli.”—Mateo 16:16.
3. Ko fea Sesu i aso nei?
Sili o le mate o Sesu, na fakatuʼuake loa aia i lona uiga laumālie o toe liliu ki selo. Ko ia, ti “na siki ai a ia e le Atua ke taualuga oki.” (Filipe 2:9) I aso nei, e iai le tuʼulaga lasi o Sesu, ko se tagata maʼuiga mo logologona o le atulaulau e olo atu kia Seova.
MANATU LOLOTO
Ta tioʼi a ʼiki fakamatala o uiga mo Sesu ti koleā e maʼuiga ai ke ke iloa aia.
4. Ko Sesu e leʼese ko le Atua Māfimafi
E akoʼi mai i le Tosi-Tapu, logo ai ko Sesu ko se laumālie makeke i selo, kae fakalogo aia ki lona Tamana, le Atua ko Seova. Koleā lona Tupuʼaga? Tioʼi le GĀ ʼATA ke iloa ai pe koleā e akoʼi i le Tosi-Tapu o uiga mo le tuʼulaga o Sesu ti mo le tuʼulaga o le Atua Māfimafi.
Ko vaega ka soa mai, e tokoi mai ke tou matala ki le tuʼulaga o Seova ti mo Sesu. Lau a vaega ti fai a vesili anei.
Lau Luka 1:30-32.
-
O mulimuli ki le māsau a le āselo la, ko ai a Sesu ti ko ai Seova Atua, leia ko le “Taualuga”?
Lau Mateo 3:16, 17.
-
I le ʼoki o le papitema o Sesu, koleā le māsau leia na ʼau mei le lagi?
-
Kiate koe, ko ai leia na māsau?
Lau Soane 14:28.
-
Ko ai leia e lasi mo pule i le Tamana mo lona vosa?
-
Koleā leia e tou ako mei le ʼaga a Sesu o fakaʼigoa a Seova, Tamana?
Lau Soane 12:49.
-
Na manatu ko ia a Sesu, ko ia mo lona Tamana ko le kilisiteano e tasi? Koleā lau manatu?
5. Ko fakamāʼoki ko Sesu ko le Mesia
E maʼuke a māsau fakapolofeta i le Tosi-Tapu, e tokoi mai ke tou iloa pe ko ai le Mesia, leia na filifili e le Atua ke ʼau o saofaki le mālamanei. Tioʼi le GĀ ʼATA e fakasā ai a ʼiki māsau fakapolofeta na fakasoko e Sesu i le temi na maʼuli ai i le kele.
Lau a māsau fakapolofeta ti fai a vesili anei:
Lau Mikea 5:1 ke iloa ai pe na tonu ke tupu i fea le Mesia. b
-
Na soko māʼoki ko ia le māsau fakapolofeta lenā?—Mateo 2:1.
Lau Pesalemo 34:21 mo Sakalia 12:10 ke tioʼi ai a māsau fakapolofeta e lua o uiga mo le mate o le Mesia.
-
Na soko māʼoki ko ia a māsau fakapolofeta anā?—Soane 19:33-37.
-
Ki lau manatu, na mafai ko ia ke fai e Sesu se neʼa ke fakasoko ai a māsau fakapolofeta anā?
-
Koleā e fakamāʼoki ai o uiga mo Sesu?
6. E maʼuiga ke tou iloa a Sesu
E pati i le Tosi-Tapu, e maʼuiga ke tou iloa a Sesu ti mo lona tuʼulaga. Lau Soane 14:6 mo 17:3, ti fai le vesili leinei:
-
Koleā e maʼuiga ai ke tou iloa a Sesu?
E fakasā mai e Sesu, le ala e tonu ke muli i ai ke tou kauneʼa ai mo le Atua. Na akoʼi e ia le māʼoki o uiga mo Seova, ti iate ia e mafai ke tou maʼua a le maʼuli leʼegato
E PATI A ʼIKI: “E leʼaise tui a le Kau Fakamāʼoki a Seova kia Sesu.”
-
Koleā loa lau tali ki ai?
MANATU TĀFITO
Ko Sesu ko se laumālie. Ko le Alo o le Atua ti ko le Mesia.
Fakamanatu
-
Koleā na fakaʼigoa ai a Sesu “ko le uluaki tupu a ia o nea fuli kua fakatupu”?
-
Koleā na fai e Sesu i muʼa o lona ʼau ki le kele?
-
E tou iloa fefeʼaki ko Sesu ko le Mesia?
A ʼIKI MANATU
Ko ʼiki fakamatala o uiga mo le tuʼulaga o Sesu i lona uiga ko ia le Mesia.
“E fakamāʼoki ko ia i māsau fakapolofeta, ko Sesu le Mesia?” (Aletike i le neti jw.org)
E pati i le Tosi-Tapu ko le Atua ko le tamana o Sesu talie na fakatupu fakaʼagatonu e ia aia. Kae leʼese tatau lona faʼasiga fakatupu mo le fakatupu o se gā toe.
“Koleā na fakaʼigoa ai Sesu ko le Alo o le Atua?” (Aletike i le neti jw.org)
Koleā e mafai ai ke tou pati na leʼaise akoʼi mai i le Tosi-Tapu a le Tasi-Tolu-Tapu?
Ko se fafine na fetogi lona maʼuli i lana ako a neʼa alā e māsau ki ai i le Tosi-Tapu o uiga mo Sesu.
a I le kapite 26 mo le 27, e tou tioʼi loa pe koleā e ʼaoga ai ke saofaki le kakai ti e fefeʼaki loa lotātou saofaki e Sesu.
b Tioʼi le Nota Fakaʼoki n° 2 e tuʼu i le Koga 4 e māsau ai ki le māsau fakapolofeta e fakasā ai le temi na liliu ai Sesu ko le Mesia.
