AKO 13
Koleā a Logo Mālie o Uiga Mo Lotu?
1. E mālie ko ia a lotu fuli?
E iai le kakai e tausi fakamālotoloto i lotu fuli. Ko le logo mālie ko le ’Atua e tio mo tokaga kia lātou. Ko lotu anā e lotou fai tu’uma’u a ne’a alā e veli. (2 Kolinito 4:3, 4; 11:13-15) Ofaipe lona māsau’i i le fakasā o logo e kau a ’iki a lotu i le aga makeke faka’ī’ī ki le mate’i o le kakai o se lanu, mo tau mo le fakaveliveli o toe. E fakaloto mamae ki le kakai e tui fakamālotoloto. Lau ia Mateo 24:3-5, 11, 12.
Ko le lotu mā’oki e fakakololia ki le ’Atua. Kae ko lotu sala e se mālie kiate ia. E lotou ako’i a manatu e se tu’u i le Tosi-Tapu, ko akonaki sala ki le Atua mo le mate. Kae e loto Seova ke iloa e le kakai le mā’oki o uiga mo ia. Lau ia Esekiele 18:4; 1 Timoteo 2:3-5.
2. Koleā le logo mālie o uiga mo lotu?
Ko le ne’a mālie e iloa e le ’Atua a lotu fuli e pati e ’alofa kiate ia kae e lotou fia fai ki le mālama o Satana. (Saakopo 4:4) I le Tosi-Tapu e igoa a lotu sala fuli ko “Papilone lasi.” Ko Papilone i le temi mu’a ko le kolo āfea na tupu ai le lotu sala i le ’oki o le Lōmaki. Kua vave le puli’i e le ’Atua a lotu e lotou kākā’i mo pule’i fakamakeke le kakai. Lau ia Apokalipisi 17:1, 2, 5, 16, 17; 18:8.
Kae e se gato iai le logo mālie. E se galo’i e Seova le kakai e tausi fakamālotoloto e mavete i lotu sala o le mālamanei. E fakatasi’i e ia o ako’i ki le mā’oki. Lau ia Mika 4:2, 5.
3. Koleā e tonu ke fai e le kakai e tausi fakamālotoloto?
E fakatasi’i e le lotu mā’oki le kakai
E tokaga Seova ki le kakai e lotou fia fai le ne’a e mā’oki ti mo mālie. E ekenaki e ia lātou ke lotou mavae fakavilivili mei lotu sala. Ko leia e ’alofa ki le ’Atua e tali mālie ke fai e ia ni fetogi mo fakafiafia’i le ’Atua. Lau ia Apokalipisi 18:4.
I le ’uluaki sekulo, na tali fakafiafia e le kakai e tausi fakamālotoloto a logo mālilie na fakamatala e le kau ’apositolo. Na lotou ako meia Seova le ma’uli fo’ou ti toe fiafia ake, mo le amanaki mālie. Ko faifaitaki mālie kia tātou i aso anei, na lotou tali le logo mālie o fakamu’amu’a Seova i olotou ma’uli. Lau ia 1 Tesalonika 1:8, 9; 2:13.
E tali e Seova i lona famili lātou ku mavae i lotu sala, ke ’atolasio fakatasi kiate ia. Kapau e ke aga o tali fakafiafia le fakaafe a Seova, e ke ma’ua lona manava’alofa, se famili ’alofa ti mo le ma’uli le’egato. Lau ia Maleko 10:29, 30; 2 Kolinito 6:17, 18.
4. E fefe’aki le aga a le ’Atua o fakafiafia’i le kele katoa?
Ko le fakamāu kua ofi ka fai ki lotu sala ko se logo mālie. E fakafimālie’i le kele kātoa mei le pule fakamakeke. E se toe mafai ki lotu sala ke lotou fakasesē’i mo fakamaveuveu le kakai. Ko lātou fuli e ma’u’uli e fakatasi’i lātou i le tausi ki le ’Atua mā’oki e tasi. Lau ia Apokalipisi 18:20, 21; 21:3, 4.
