1-2. Étɛ́wú mǐ ka sixú mɔ ɖɔ Jexóva kún ɖo sin ná nú ɖɛ mǐtɔn lɛ́ wɛ ó?

 ‘SƆ́ JEXÓVA dó ɖó nǔ e víví nú we hú nǔ bǐ é; énɛ́ ɔ, é ná ná nǔ e ɖo hǔn mɛ nú we lɛ́ we.’ (Ðɛh. 37:4) Akpá énɛ́ jí wǔ kpɔ́n! Amɔ̌, mǐ ka ɖó ná ɖó nukún ɖɔ Jexóva ná ná nǔ ɖěbǔ e mǐ byɔ́ ɛ é mǐ afɔjíafɔjí wɛ a? Étɛ́wú mǐ ka sixú kan nǔ énɛ́ byɔ́? Ð’ayi kpɔ́ndéwú élɔ́ lɛ́ wú. Nɔví nyɔ̌nu ɖokpó nɔ ɖo ɖɛ xo wɛ ɖɔ è ní ylɔ́ émí nú Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́. Amɔ̌, xwe gěgé ko wá yi, bɔ è ka ko ylɔ́ ɛ ǎ. Nɔví súnnu wínnyáwínnyá ɖokpó nɔ byɔ́ Jexóva ɖɔ é ní d’alɔ émí bónú azɔn émítɔn ní gbɔ, énɛ́ ɔ, émí ná sixú wa nǔ gěgé d’é jí ɖo agun ɔ mɛ. Amɔ̌, azɔn ɔ kpɔ́n te n’i ǎ. Vǐtɔ́ kpó vǐnɔ kpó ɖé xo ɖɛ ɖɔ vǐ émítɔn ní nɔ nǔgbó ɔ mɛ. Amɔ̌, vǐ ɔ wá gbeta ɔ kɔn bo ɖó Jexóva sinsɛn te.

² Hwi lɔ sixú ko byɔ́ nǔɖé Jexóva, bo ka mɔ ǎ. Wǎgbɔ tɔn ɔ, a sixú wá gbeta ɔ kɔn ɖɔ Jexóva nɔ ná sin nú ɖɛ ɖé lɛ́, bo kún ka nɔ ná sin nú ɖɛ émílɛ́ tɔn lɛ́ ó. Alǒ, a sixú lin ɖɔ nǔɖé jɛ́n émí ná ko wa nyi do. Nɔví nyɔ̌nu e nɔ nyí Janice b é ɖó linlin mɔ̌hun. É kpó asú tɔn kpó xo ɖɛ dó ba e ba wɛ yě ɖe bo ná wa sinsɛnzɔ́ ɖo Betɛ́li é takúnmɛ. É ɖɔ: “Un kú d’é jí ɖɔ mǐ ná yi Betɛ́li malínmálín mɛ.” Amɔ̌, xwe ko jɛ có, è ylɔ́ yě ǎ. Janice ɖɔ: “Wǔ kú mì, bɔ un lɛ́ flú. Un nɔ kanbyɔ́ nyiɖée ɖɔ, étɛ́ un ka wa bɔ é ma nyɔ́ Jexóva nukúnmɛ ǎ é jí. Un xo ɖɛ gěgé dó Betɛ́li yiyi tamɛ. Étɛ́wú é ma ka ná sin nú ɖɛ ce ǎ?”

3. Étɛ́ jí mǐ ka ná ɖɔ xó dó ɖo xóta élɔ́ mɛ?

 ³ Mǐ sixú nɔ kanbyɔ́ mǐɖée hweɖélɛ́nu ɖɔ Jexóva ka nɔ ɖótó ɖɛ mǐtɔn lɛ́ a jí. Súnnu gbejínɔtɔ́ hwexónu tɔn ɖé lɛ́ tlɛ kan nǔ mɔ̌hun byɔ́. (Jɔb. 30:20; Ðɛh. 22:3; Xab. 1:2) Étɛ́ ka sixú ná we gǎnjɛwú ɖɔ Jexóva ná ná sin nú ɖɛ towe lɛ́? (Ðɛh. 65:3) Bo ná dó d’alɔ we nú a ná mɔ xósin nǔkanbyɔ́ énɛ́ tɔn ɔ, mǐ ná to ba xósin nǔkanbyɔ́ élɔ́ lɛ́ tɔn hwɛ̌: (1) Étɛ́ mǐ ka sixú ɖó nukún ɖo Jexóva sí? (2) Étɛ́ Jexóva ka nɔ ɖó nukún ɖo mǐ sí? (3) Étɛ́wú é ka sixú byɔ́ ɖɔ mǐ ní xo ɖɛ dó nǔ ɖěvo sín takúnmɛ?

4. Sɔgbe xá Jelemíi 29:12 ɔ, étɛ́ Jexóva ka d’akpá bo ná wa?

⁴ Jexóva d’akpá ɖɔ émí ná nɔ ɖótó ɖɛ mǐtɔn lɛ́. (Xa Jelemíi 29:12.) Mawu mǐtɔn yí wǎn nú mɛsɛntɔ́ tɔn gbejínɔtɔ́ lɛ́, énɛ́ wú ɔ, é ná gɔn ɖɛ yětɔn lɛ́ se gbeɖé ǎ. (Ðɛh. 10:17; 37:28) É ɖo mɔ̌ có, énɛ́ ɖo xlɛ́xlɛ́ wɛ ɖɔ é ná nɔ ná nǔ e mǐ nɔ byɔ́ ɛ lɛ́ é bǐ mǐ ǎ. É sixú byɔ́ ɖɔ mǐ ní nɔ te káká jɛ gbɛ yɔ̌yɔ́ ɔ mɛ hwɛ̌ cóbá mɔ nǔ e mǐ byɔ́ ɛ é ɖé lɛ́.

5. Ényí Jexóva ɖo ɖɛ mǐtɔn lɛ́ ɖótó wɛ ɔ, étɛ́ é ka nɔ da kpɔ́n? Tínmɛ.

⁵ Jexóva nɔ kpɔ́n kancícá e ɖo nǔ e mǐ byɔ́ ɛ lɛ́ é kpó linlin tɔn tají ɔ kpó tɛ́ntin é. (Eza. 55:8, 9) Akpáxwé linlin énɛ́ tɔn ɖokpó wɛ nyí ɖɔ gbɛtɔ́ lɛ́ ná gɔ́ ayǐkúngban ɔ jí, bo ná nɔ bǔ, ɖo awǎjijɛ mɛ, ɖo acɛkpikpa tɔn glɔ́. Amɔ̌, Satáan ɖɔ ɖɔ ényí gbɛtɔ́ lɛ́ kp’acɛ dó yěɖée lɛ́ jí ɔ, é ná kpɔ́n te hú gǎn. (Bǐb. 3:1-5) Bo ná dó xlɛ́ ɖɔ nǔ e Awǒvi ɖɔ é ɔ adingban wɛ é nyí ɔ, Jexóva yí gbe nú gbɛtɔ́ lɛ́, bɔ yě ɖo acɛ kpa dó yěɖée lɛ́ jí wɛ. Amɔ̌, acɛkpikpa gbɛtɔ́ lɛ́ tɔn wɛ dɔn tagba e mǐ nɔ mɔ égbé lɛ́ é gěgé wá. (Nǔt. 8:9) Mǐ tuun ɖɔ Jexóva kún ná ɖe tagba énɛ́ lɛ́ bǐ síin din ó. Ényí é wa mɔ̌ ɔ, mɛɖé lɛ́ sixú lin ɖɔ acɛkpikpa gbɛtɔ́ lɛ́ tɔn ɖo azɔ̌ wa wɛ, bo kpé wú bo sixú ɖe tagba mǐtɔn lɛ́ síin.

6. Étɛ́wú é ka byɔ́ ɖɔ mǐ ní kú d’é jí ɖɔ Jexóva ná wa nǔ kpó wǎnyíyí kpó, lobo lɛ́ ná sin nú ɖɛ mǐtɔn lɛ́ ɖo ali ɖagbe nu hwebǐnu?

⁶ Jexóva sixú ná sin nú ɖɛ ɖokpó ɔ lɛ́ ɖo ali vovo nu. Ði kpɔ́ndéwú ɔ, hwenu e axɔ́sú Ezekiyási ɖo azɔn jɛ wɛ syɛ́nsyɛ́n é ɔ, é sa vo nú Jexóva ɖɔ é ní d’alɔ émí bónú azɔn émítɔn ní gbɔ. Jexóva se ɖɛ tɔn bo gbɔ azɔn n’i. (2 Axɔ́. 20:1-6) Ðo alɔ ɖěvo mɛ ɔ, hwenu e mɛsɛ́dó Pɔ́lu sa vo nú Jexóva ɖɔ é ní ɖe ‘wun e ɖo agbaza émítɔn mɛ’ é síin é ɔ, Jexóva ɖe síin ǎ; wun énɛ́ sixú ko nyí lanmɛzɔn ɖé. (2 Kɔ. 12:7-9) Mǐ ní lɛ́ ɖɔ xó dó kpɔ́ndéwú mɛsɛ́dó Jaki kpó Piyɛ́ɛ kpó tɔn wú. Yě mɛ we lɛ́ bǐ wɛ axɔ́sú Elódu jló ná hu. Agun ɔ xo ɖɛ dó Piyɛ́ɛ tamɛ, bo sixú ko lɛ́ wa mɔ̌ nú Jaki lɔ. É ɖo mɔ̌ có, è hu Jaki, bɔ wɛnsagun ɖokpó ka hwlɛ́n Piyɛ́ɛ gán. (Mɛ. 12:1-11) Mǐ sixú nɔ kanbyɔ́ mǐɖée ɖɔ: ‘Étɛ́wú Jexóva ka hwlɛ́n Piyɛ́ɛ, bo jó Jaki dó?’ Biblu ɖɔ ǎ. c Nǔ e jí mǐ sixú kú dó é wɛ nyí ɖɔ, ali Jexóva tɔn lɛ́ nɔ “jlɔ́” hwebǐnu. (Sɛ́n. 32:4) Gɔ́ ná ɔ, mǐ tuun ɖɔ Piyɛ́ɛ kpó Jaki kpó bǐ sín nǔ wɛ nyɔ́ Jexóva nukúnmɛ. (Nǔɖe. 21:14) Hweɖélɛ́nu ɔ, Jexóva sixú gɔn sin ná nú ɖɛ mǐtɔn lɛ́ lěe ba gbɔn wɛ mǐ ɖe é. Amɔ̌, ɖó mǐ kú d’é jí ɖɔ lěe Jexóva nɔ ná sin nú ɖɛ mǐtɔn lɛ́ gbɔn é ná nɔ nyí kpó wǎnyíyí kpó, lobo lɛ́ nyí ɖo ali e sɔgbe é nu hwebǐnu wútu ɔ, mǐ nɔ xo nǔ kpɔ́n dó ali e nu é nɔ ná sin nú ɖɛ mǐtɔn lɛ́ ɖe é wú ǎ.—Jɔb. 33:13.

7. Étɛ́ mǐ ka nɔ tɛ́n kpɔ́n bo nɔ nyi alɔ ná? Aniwú?

⁷ Mǐ ná tɛ́n kpɔ́n, bo ná nɔ jlɛ́ ninɔmɛ  mǐtɔn dó mɛ ɖěvo lɛ́ tɔn wú ǎ. Ði kpɔ́ndéwú ɔ, mǐ sixú byɔ́ alɔdó Jexóva tɔn ɖo ali tají ɖé nu, amɔ̌, é ná nǔ e ba wɛ mǐ ɖe é mǐ ǎ. Nukɔnmɛ ɔ, mǐ se ɖɔ mɛɖé byɔ́ nǔ mɔ̌hun Jexóva, bɔ é cí ɖɔ é ná ɛ ɖɔhun. Nǔ mɔ̌hun wɛ xá nɔví nyɔ̌nu e nɔ nyí Anna é. É xo ɖɛ ɖɔ kansɛ́ɛzɔn e jɛ wɛ asú émítɔn Matthew ɖe é ní gbɔ. Ðo hwe ɖokpó ɔ nu ɔ, nɔví nyɔ̌nu mɛxómɔ we ɖo xwi ɖí xá kansɛ́ɛzɔn wɛ. Anna xo ɖɛ vívɛ́ dó Matthew kpó nɔví nyɔ̌nu lɛ́ kpó takúnmɛ. Nɔví nyɔ̌nu lɛ́ sín azɔn gbɔ, amɔ̌ Matthew kú. Ðo bǐbɛ́mɛ ɔ, Anna sixú ko kanbyɔ́ éɖée ɖɔ Jexóva jɛ́n d’alɔ bɔ nɔví nyɔ̌nu lɛ́ sín azɔn gbɔ nǔgbó a jí. Ényí mɔ̌ wɛ ɔ, étɛ́wú é ma ka se ɖɛ tɔn lɛ́ bónú asú tɔn gán ǎ? É ɖo wɛn ɖɔ mǐ kún sixú ɖɔ nǔ e zɔ́n bɔ nɔví nyɔ̌nu we lɛ́ mɔ yěɖée mɛ é ó. Nǔ e mǐ tuun é wɛ nyí ɖɔ Jexóva ná ɖó nǔ wǔvɛ́ mǐtɔn lɛ́ bǐ nu mlɛ́mlɛ́, bɔ akpakpa ɖo sísɔ́ ɛ wɛ, b’ɛ ná fɔ́n xɔ́ntɔn tɔn lɛ́ wá gbɛ.—Jɔb. 14:15.

8. (a) Sɔgbe xá Ezayíi 43:2 ɔ, nɛ̌ Jexóva ka nɔ nɔ gǔdo nú mǐ gbɔn? (b) Nɛ̌ ɖɛ ka nɔ d’alɔ mǐ hwenu e mǐ ɖo ninɔmɛ vɛ́ wǔ lɛ́ mɛ é gbɔn? (Kpɔ́n video Ðɛ xixo nɔ d’alɔ mǐ bɔ mǐ nɔ dɛ.)

⁸ Jexóva ná nɔ gǔdo nú mǐ hwebǐnu. Ðó Jexóva nyí Tɔ́ wǎnyíyínɔ mǐtɔn wútu ɔ, é nɔ ba ɖɔ mǐ ní se wǔvɛ́ ǎ. (Eza. 63:9) É ɖo mɔ̌ có, é ka nɔ sú ali dó wǔvɛ́ mǐtɔn, éé sixú cí tɔ, alǒ myɔ ɖɔhun lɛ́ é bǐ ǎ. (Xa Ezayíi 43:2.) Amɔ̌, é d’akpá ɖɔ émí ná d’alɔ mǐ bɔ mǐ ná “gbɔn” yě mɛ dín. Gɔ́ ná ɔ, é ná yí gbe bɔ wǔvɛ́ mǐtɔn lɛ́ ná wa nǔ dó mǐ wú káká sɔ́yi ǎ. Jexóva nɔ lɛ́ ná gbigbɔ mímɛ́ tɔn agbɔ̌nnɔ ɔ mǐ, bónú é ná d’alɔ mǐ nú mǐ ná dɛ. (Luk. 11:13; Filí. 4:13) Wǎgbɔ tɔn ɔ, mǐ sixú kú d’é jí ɖɔ, mǐ ná nɔ mɔ nǔ ɖěbǔ e sín hudó mǐ ɖó pɛ́pɛ́pɛ́ bá dɛ, bá dó kpo ɖo gbejí n’i lɛ́ é hwebǐnu. d

9. Sɔgbe xá Jaki 1:6, 7 ɔ, étɛ́wú é ka byɔ́ ɖɔ mǐ ní ɖeji ɖɔ Jexóva ná d’alɔ mǐ?

⁹ Jexóva nɔ ɖó nukún ɖɔ mǐ ní gán jɛ émí wú. (Ebl. 11:6) Hweɖélɛ́nu ɔ, wǔvɛ́ mǐtɔn lɛ́ sixú cí nǔ e jí mǐ ma sixú ɖu ɖe gbeɖé ǎ é ɖɔhun. Mǐ tlɛ sixú jɛ nǔ xo kpɔ́n jí ɖɔ Jexóva ka ná d’alɔ mǐ a jí. Amɔ̌, Biblu ná gǎnjɛwú mǐ ɖɔ hlɔ̌nhlɔ́n Mawu tɔn sixú d’alɔ mǐ bɔ mǐ ná “lɔ́n d’asá ahohó.” (Ðɛh. 18:30) Énɛ́ wú ɔ, mǐ ná jó nǔxokpɔ́n mǐtɔn lɛ́ dó nú yě ná ɖí bú mǐ ǎ, é nyɔ́ wa ɔ, mǐ ná xo ɖɛ kpó nǔɖiɖi ɖaxó kpó, bo kú d’é jí ɖɔ Jexóva ná ná sin nú ɖɛ mǐtɔn lɛ́.—Xa Jaki 1:6, 7.

10. Nǎ kpɔ́ndéwú ɖé dó ɖe lěe mǐ sixú wa nǔ sɔgbe xá ɖɛ mǐtɔn lɛ́ gbɔn é xlɛ́.

¹⁰ Jexóva nɔ ɖó nukún ɖɔ mǐ ní nɔ wa nǔ sɔgbe xá ɖɛ mǐtɔn lɛ́. Ði kpɔ́ndéwú ɔ, nɔví súnnu ɖé sixú byɔ́ Jexóva ɖɔ é ní d’alɔ émí bónú gǎn émítɔn ní ná gbe émí, énɛ́ ɔ, émí ná kpé wú bo yi kpléɖókpɔ́ ɖaxó ɖé. Nɛ̌ Jexóva ka sixú ná sin nú ɖɛ énɛ́ gbɔn? É sixú ná nɔví ɔ, akɔ́nkpinkpan e sín hudó é ɖó, bo ná byɔ́ gbe gǎn tɔn é. Amɔ̌, é byɔ́ ɖɔ nɔví súnnu ɔ ní wa nǔ sɔgbe xá ɖɛ tɔn bo yi gǎn tɔn gɔ́n, lobo byɔ́ gbe. É sixú byɔ́ ɖɔ é ní byɔ́ gbe ɔ azɔn gěgé. É tlɛ sixú byɔ́ ɖɔ é ní wa azɔ̌ ɖó azɔ̌gbɛ́ tɔn ɖěvo domɛ. Gɔ́ ná ɔ, ényí é byɔ́ ɖó mɔ̌ ɔ, é sixú byɔ́ gǎn ɔ ɖɔ é ní gɔn azǎn e émí ná gɔn azɔ̌mɛ ná lɛ́ é sín axɔ́ sú émí.

11. Étɛ́wú mǐ ka ɖó ná nɔ xo ɖɛ hwɛhwɛ dó nǔ e ɖo ayi mɛ ɖu nú mǐ wɛ lɛ́ é wú?

¹¹ Jexóva nɔ ɖó nukún ɖɔ mǐ ní nɔ xo ɖɛ hwebǐnu dó nǔ e hɛn hǔn nú mǐ lɛ́ é takúnmɛ. (1 Tɛ. 5:17) Jezu ɖɔ ɖɔ mǐ sixú gɔn sin mɔ nú nǔ e mǐ byɔ́ ɖo ɖɛ mǐtɔn ɖé lɛ́ mɛ é tlóló. (Luk. 11:9) Énɛ́ wú ɔ, ma jó gbe ó! Nɔ xo ɖɛ azɔn gěgé sín ayi mɛ. (Luk. 18:1-7) Ényí mǐ kpo ɖo ɖɛ xo dó nǔɖé tamɛ wɛ hǔn, xlɛ́xlɛ́  Jexóva wɛ mǐ ɖe ɖɔ nǔ e byɔ́ wɛ mǐ ɖe é kún nyí nǔ vlɛ́kɛ́sɛ́ɛ ɖé ó. Xlɛ́xlɛ́ wɛ mǐ lɛ́ ɖe ɖɔ mǐ ɖi nǔ ɖɔ é kpé wú, bo ná d’alɔ mǐ.

12. (a) Ðɔ nǔ e mǐ ɖó ná kanbyɔ́ mǐɖée dó ɖɛ mǐtɔn lɛ́ wú é ɖokpó. Aniwú? (b) Nɛ̌ mǐ ka sixú wa gbɔn bo tuun ɖɔ ɖɛ mǐtɔn lɛ́ nɔ ɖe sísí xlɛ́ Jexóva? (Kpɔ́n gbǎví “ Ðɛ ce lɛ́ ka nɔ ɖe sísí xlɛ́ Jexóva a?”)

¹² Ényí mǐ ma mɔ nǔ e mǐ byɔ́ ɖo ɖɛ mǐtɔn mɛ é ǎ ɔ, mǐ sixú kan nǔ atɔn byɔ́ mǐɖée. Nukɔntɔn: ‘Un ka ɖo nǔ e jɛxá é takúnmɛ xo ɖɛ dó wɛ a?’ Hwɛhwɛ ɔ, mǐ nɔ lin ɖɔ mǐ tuun nǔ e nyɔ́ nú mǐ hú gǎn é. Amɔ̌, nǔ e byɔ́ wɛ mǐ ɖe lɛ́ é sixú gɔn nǔ e nyɔ́ hú gǎn é nyí nú mǐ. Ényí mǐ ɖo ɖɛ xo dó tagba ɖé tamɛ wɛ ɔ, wlɛnwín e nyɔ́ hú gǎn é nɔ ɖo fínɛ́, có mǐ nɔ ɖo ɖɛ xo dó ɖěvo tamɛ wɛ. Gɔ́ ná ɔ, nǔ e mǐ nɔ byɔ́ é ɖé lɛ́ sixú gɔn gbe sɔ xá jlǒ Jexóva tɔn. (1 Jaan 5:14) Ði kpɔ́ndéwú ɔ, mǐ ní ɖɔ xó dó kpɔ́ndéwú mɛjitɔ́ e xó mǐ ɖɔ wá yi lɛ́ é tɔn wú. Yě byɔ́ Jexóva ɖɔ é ní bló bónú vǐ émítɔn ní nɔ nǔgbó ɔ mɛ. Nǔ énɛ́ e yě byɔ́ é cí nǔ e sɔgbe é ɖɔhun. Amɔ̌, Jexóva ná hɛn mǐ mɛ ɖě gǎnnugǎnnu ɖɔ mǐ ní sɛn émí ǎ. É jló ɖɔ mǐ mɛ bǐ, káká jɛ vǐ mǐtɔn lɛ́ jí ní wá gbeta ɔ kɔn bá sɛn émí. (Sɛ́n. 10:12, 13; 30:19, 20) Énɛ́ wú ɔ, mɛjitɔ́ lɛ́ sixú byɔ́ Jexóva ɖɔ é ní d’alɔ émí bónú émí ná bló bónú nǔgbó ɔ ná byɔ́ ayi vǐ émítɔn tɔn mɛ, énɛ́ ná zɔ́n bɔ é ná yí wǎn nú Jexóva, lobo lɛ́ húzú xɔ́ntɔn tɔn.—Nǔx. 22:6; Efɛ́. 6:4.

13. Sɔgbe xá Eblée lɛ́ 4:16 ɔ, hwetɛ́nu Jexóva ka ná d’alɔ mǐ? Tínmɛ.

¹³ Nǔkanbyɔ́ wegɔ́ ɔ ɖíe: ‘Hwenu e Jexóva ná ná sin nú ɖɛ ce é ɖíe a?’ Mǐ sixú mɔ ɖɔ é byɔ́ ɖɔ mǐ ní mɔ sin nú ɖɛ mǐtɔn lɛ́ afɔjíafɔjí. Amɔ̌, é ɖo wɛn ɖɔ Jexóva tuun hwenu e é ná d’alɔ mǐ, bɔ é ná nyɔ́ hú gǎn é. (Xa Eblée lɛ́ 4:16.) Hwenu e mǐ ma mɔ sin nú nǔ e mǐ  byɔ́ é afɔjíafɔjí ǎ é ɔ, mǐ sixú lin ɖɔ xósin Jexóva tɔn wɛ nyí ‘Éǒ.’ Amɔ̌, é sixú nyí ɖiɖɔ wɛ Jexóva ɖe ɖɔ: ‘Hwe ɔ nu ɖíe ǎ.’ Ði kpɔ́ndéwú ɔ, flín nɔví súnnu wínnyáwínnyá e xo ɖɛ ɖɔ azɔn émítɔn ní gbɔ é. Ényí Jexóva gbɔ azɔn n’i ɖo nǔjíwǔ linu ɔ, Satáan sixú ɖɔ ɖɔ azɔn e Jexóva gbɔ n’i é wɛ zɔ́n bɔ é kpo ɖo sinsɛn ɛ wɛ. (Jɔb. 1:9-11; 2:4) Gɔ́ ná ɔ, Jexóva ko sɔ́ hwenu ɖé, bo ná gbɔ azɔn lɛ́ bǐ mlɛ́mlɛ́. (Eza. 33:24; Nǔɖe. 21:3, 4) Din hwɛ̌ ɔ, mǐ sixú ɖó nukún ɖɔ é ná gbɔ azɔn nú mǐ ɖo nǔjíwǔ linu ǎ. Énɛ́ wú ɔ, nɔví súnnu ɔ sixú byɔ́ Jexóva ɖɔ é ní ná émí hlɔ̌nhlɔ́n kpó fífá ayi mɛ tɔn kpó, bónú émí ná dɛ ɖo azɔn émítɔn nu, lobo kpo ɖo sinsɛn ɛ wɛ kpó gbejíninɔ kpó.—Ðɛh. 29:11.

14. Étɛ́ kpɔ́ndéwú Janice tɔn ka kplɔ́n we?

¹⁴ Flín Janice e xó mǐ ɖɔ wá yi, bɔ é xo ɖɛ dó sinsɛnzɔ́wiwa ɖo Betɛ́li wú é. Xwe atɔ́ɔ́n ko wá yi cóbɔ é wá mɔ nukúnnú jɛ lěe Jexóva ná sin nú ɖɛ tɔn gbɔn é wú. É ɖɔ: “Jexóva zán hwenu énɛ́ dó kplɔ́n nǔ mì, bo lɛ́ d’alɔ mì bɔ un kpɔ́n te d’é jí. É byɔ́ ɖɔ jiɖe e un ɖó dó wǔ tɔn é ní lí dǒ. É byɔ́ ɖɔ má bló bónú lěe un nɔ kplɔ́n nǔ gbɔn é ní kpɔ́n te d’é jí. É byɔ́ ɖɔ má ɖó awǎjijɛ adodwé e ma nɔ sín dó ninɔmɛ e mɛ è ɖe lɛ́ é wú ǎ é.” Nukɔnmɛ ɔ, è byɔ́ Janice kpó asú tɔn kpó ɖɔ yě ní wa lɛ̌dózɔ́. Janice lin tamɛ dó nǔ e jɛ wá yi lɛ́ é jí bo ɖɔ: “Jexóva ná sin nú ɖɛ ce lɛ́, amɔ̌, é nyí lěe ɖó nukún tɔn gbɔn wɛ un ɖe é ǎ. É byɔ́ hwenu ɖo así ce cóbɔ un wá mɔ ɖɔ xósin ɖagbe hú gǎn e é sixú ná mì é nɛ́, amɔ̌, é su nukún ce mɛ tawun ɖɔ un ɖu wǎnyíyí kpó xomɛnyínyɔ́ kpó Mawu tɔn sín le.”

15. Étɛ́wú é ka sixú byɔ́ ɖɔ mǐ ní ma nɔ nɔ tlɔlɔ ɖo ɖɛ mǐtɔn lɛ́ mɛ hwebǐnu ó? (Lɛ̌ kpɔ́n fɔtóo lɛ́.)

¹⁵ Nǔkanbyɔ́ atɔngɔ́ ɔ ɖíe: ‘Un ka ɖó ná xo ɖɛ dó nǔ ɖěvo tamɛ wɛ a?’ É nyɔ́ ɖɔ mǐ ní nɔ  nɔ tlɔlɔ hwenu e mǐ ɖo ɖɛ xo wɛ é, amɔ̌ hweɖélɛ́nu ɔ, é sixú nyɔ́ hú ɖɔ mǐ ní ma nɔ tlɔlɔ dín ɖo ɖɛ mǐtɔn lɛ́ mɛ ó, énɛ́ ɔ, mǐ sixú mɔ nǔ e Jexóva ba nú mǐ é. Mǐ ní kpɔ́n kpɔ́ndéwú nɔví nyɔ̌nu tlɛnnɔ e xo ɖɛ dó Wěmaxɔmɛ nú wɛnɖagbejlátɔ́ Axɔ́súɖuto ɔ tɔn yiyi tamɛ é tɔn. É ba ná yi wěmaxɔmɛ ɔ bá dó sixú wa sinsɛnzɔ́ ɖo fí e hudó sukpɔ́ ɖe é. Ée é ná ɖo ɖɛ xo wɛ ɖɔ è ní ylɔ́ émí nú émí ná yi wěmaxɔmɛ ɔ é ɔ, é sixú lɛ́ byɔ́ Jexóva ɖɔ é ní d’alɔ émí bónú émí ná mɔ ali ɖěɖěe nu émí ná vlɔ́n kan nú sinsɛnzɔ́ émítɔn ɖe é. (Mɛ. 16:9, 10) Énɛ́ gúdo ɔ, é sixú wa nǔ sɔgbe xá ɖɛ énɛ́, bo kanbyɔ́ nukúnkpénǔwútɔ́ lɛ̌dó tɔn ɖɔ agun ɖé ka sɛkpɔ́ fínɛ́ bo ɖó hudó gběxosín-alijítɔ́ tɔn hú gǎn a jí. Alǒ, é sixú wlán nǔ sɛ́dó alaxɔ mɛ bo kan fí e è ɖó hudó wɛnjlátɔ́ Axɔ́súɖuto ɔ tɔn lɛ́ tɔn ɖe hú gǎn é byɔ́. e

16. Étɛ́ jí mǐ ka sixú kú dó?

¹⁶ Lěe mǐ mɔ gbɔn é ɔ, mǐ sixú kú d’é jí ɖɔ Jexóva ná ná sin nú ɖɛ mǐtɔn lɛ́ kpó wǎnyíyí kpó, lobo lɛ́ wa mɔ̌ ɖo ali ɖagbe nu. (Ðɛh. 4:4; Eza. 30:18) Hweɖélɛ́nu ɔ, xósin ɔ sixú nɔ ma nyí nǔ e mǐ ɖo nukún ɖó wɛ é. Amɔ̌, Jexóva ná wɔn ya nú ɖɛ mǐtɔn lɛ́ gbeɖé ǎ. É yí wǎn nú mǐ tawun. Gɔ́ ná ɔ, é ná jó mǐ dó gbeɖé ǎ. (Ðɛh. 9:11) Énɛ́ wú ɔ, kpo ɖo ‘hwiɖée sɔ́ dó alɔ mɛ n’i wɛ hwebǐnu,’ bo nɔ ɖɔ nǔ e ɖo akɔ́n towe jí lɛ́ é n’i ɖo ɖɛ mɛ.—Ðɛh. 62:9.