XÓTA NǓKPLƆ́NKPLƆ́N TƆN 7
HAN 15 Kpa Nukɔngbéví Jexóva tɔn!
Hwɛsɔ́kɛmɛ Jexóva tɔn: Lěe é nɔ hɛn le wá nú we gbɔn é
“Hwɛsɔ́kɛ [nǔgbó] ɔ, hwi gɔ́n wɛ è nɔ mɔ ɖe.”—ÐƐH. 130:4.
XÓNUSƆ́ÐÓTE
Ðo xóta élɔ́ mɛ ɔ, mǐ ná gbéjé nǔjlɛ́dónǔwú Biblu tɔn ɖěɖěe tínmɛ ali bǔnɔ e nu Jexóva nɔ sɔ́ hwɛ kɛ mǐ ɖe é ɖé lɛ́ kpɔ́n; mɔ̌ wiwa ná d’alɔ mǐ bɔ hwɛsɔ́kɛmɛ tɔn ná lɛ́ su nukún mǐtɔn mɛ d’é jí.
1. Étɛ́wú é ka nɔ vɛ́ wǔ bɔ è ná tuun nǔ e ɖɔ wɛ mɛɖé ɖe tawun hwenu e é ɖɔ un sɔ́ hwɛ kɛ we é?
“UN SƆ́ hwɛ kɛ we.” Xókwín énɛ́ lɛ́ sixú dó gbɔ nú mɛ tawun, ɖo tají ɔ, ényí è tuun ɖɔ è ɖɔ nǔɖé, alǒ wa nǔɖé bɔ é dó xomɛsin nú mɛɖé ɔ nɛ́. Amɔ̌, étɛ́ ka nyí tínmɛ nukɛgbe “un sɔ́ hwɛ kɛ we” ɔ tɔn tawun? Ðiɖɔ wɛ mɛ e a dó xomɛsin ná é ɖe ɖɔ hwi kpó émí kpó ná lɛ́ kpo ɖo xɔ́ntɔn alɔmayimɛ nyí wɛ a? Alǒ ɖiɖɔ wɛ é ɖe kpowun ɖɔ émí kún sɔ́ jló ná kɛ nu dó xó ɔ wú ɖě ó. Ényí gbɛtɔ́ ɖɔ émí sɔ́ hwɛ kɛ mɛ ɔ, nǔ e ɖɔ wɛ é ɖe é nɔ sukpɔ́.
2. Nɛ̌ Mawuxówéma ɔ ka tínmɛ hwɛsɔ́kɛmɛ Jexóva tɔn gbɔn? (Kpɔ́n tínmɛ e ɖo do é lɔmɔ̌.)
2 Ali e nu Jexóva nɔ sɔ́ hwɛ kɛ mǐ mɛ gbɛtɔ́ hwɛhutɔ́ lɛ́ ɖe é gbɔn vo sésé nú ali e nu mǐ nɔ sɔ́ hwɛ kɛ mǐɖée lɛ́ ɖe é. Ali e nu Jexóva nɔ sɔ́ hwɛ kɛ mɛ ɖe é kpé we ǎ. Ðɛhanwlántɔ́ ɔ ɖɔ dó Jexóva wú ɖɔ: “Hwɛsɔ́kɛ [nǔgbó] ɔ, hwi gɔ́n wɛ è nɔ mɔ ɖe, énɛ́ wú wɛ è ɖó ná ɖó sísí nú we.” a (Ðɛh. 130:4) Ɛɛn, “hwɛsɔ́kɛ [nǔgbó] ɔ” wɛ nyí hwɛsɔ́kɛ Jexóva tɔn. É wɛ nyí mɛ e ɖe nǔ e hwɛsɔ́kɛmɛ nyí nǔgbó nǔgbó é xlɛ́ mǐ é. Ðo ninɔmɛ ɖé lɛ́ mɛ ɔ, bibluwlántɔ́ lɛ́ zán xókwín Ebléegbe tɔn ɖé nú hwɛsɔ́kɛmɛ, bɔ è zán gbeɖé dó tínmɛ hwɛsɔ́kɛmɛ gbɛtɔ́ tɔn ǎ.
3. Nɛ̌ hwɛsɔ́kɛmɛ Jexóva tɔn ka gbɔn vo nú mǐdɛɛ lɛ́ tɔn gbɔn? (Ezayíi 55:6, 7)
3 Ényí Jexóva sɔ́ hwɛ kɛ mɛɖé ɔ, é nɔ súnsún hwɛ mɛ ɔ tɔn bǐ mlɛ́mlɛ́. É kpó mɛ ɔ kpó hɛn ɔ, yě ná lɛ́ zun xɔ́ntɔn alɔmayimɛ. Jexóva nɔ sɔ́ hwɛ kɛ mɛ bǐ mlɛ́mlɛ́, bɔ hwɛsɔ́kɛmɛ tɔn nɔ lɛ́ ɖó dogbó ǎ.—Xa Ezayíi 55:6, 7.
4. Nɛ̌ Jexóva ka d’alɔ mǐ bɔ mǐ mɔ nukúnnú jɛ hwɛsɔ́kɛmɛ sín tínmɛ nǔgbó ɔ wú gbɔn?
4 Ényí hwɛsɔ́kɛmɛ Jexóva tɔn gbɔn vo nú hwɛsɔ́kɛmɛ mǐ mɛ gbɛtɔ́ hwɛhutɔ́ lɛ́ tɔn ɔ, nɛ̌ mǐ ka sixú mɔ nǔ jɛ nǔ e hwɛsɔ́kɛmɛ nǔgbó ɔ nyí é wú gbɔn? Bo ná dó d’alɔ mǐ ɔ, Jexóva zán nǔjlɛ́dónǔwú e ɖo wɛn lɛ́ é dó tínmɛ nǔ e hwɛsɔ́kɛmɛ tɔn nyí é. Ðo xóta élɔ́ mɛ ɔ, mǐ ná ba do nú ɖé lɛ́. Yě ná xlɛ́ mǐ lěe Jexóva nɔ ɖe hwɛ lɛ́ síin, bɔ ɖo hwe ɖokpó ɔ nu ɔ, é nɔ lɛ́ bló bɔ xɔ́ntɔn zunzun e hwɛhuhu ko hɛn gblé é nɔ lɛ́ jɛ ganjí gbɔn é. Ée mǐ ná ɖo nǔjlɛ́dónǔwú énɛ́ lɛ́ gbéjé kpɔ́n wɛ é ɔ, hwɛ e Tɔ́ mǐtɔn xomɛnyɔ́tɔ́ ɔ nɔ sɔ́ kɛ mɛ ɖo ali gěgé nu é ná lɛ́ su nukún mǐtɔn mɛ d’é jí.
JEXÓVA NƆ ÐE HWƐ SÍIN
5. Ényí Jexóva sɔ́ hwɛ mǐtɔn lɛ́ kɛ mǐ ɔ, étɛ́ ka nɔ jɛ?
5 Ðo Biblu mɛ ɔ, hwɛhwɛ ɔ, è nɔ sɔ́ hwɛ jlɛ́ dó agban kpinkpɛn wú. Axɔ́sú Davídi ɖɔ dó hwɛ éɖésúnɔ tɔn lɛ́ wú ɖɔ: “Hwɛ ce lɛ́ kplé káká bo yi jǐ hú mì; hwɛ ce lɛ́ ɖo kpinkpɛn mì wɛ agban ɖɔhun.” (Ðɛh. 38:5) Amɔ̌, Jexóva nɔ sɔ́ hwɛ kɛ nǔwanyidotɔ́ ɖěɖěe hwɛ yětɔn lɛ́ vɛ́ nú yě lɛ́ é. (Ðɛh. 25:18; 32:5) Xógbe Ebléegbe tɔn e è tínmɛ dó “sɔ́ kɛ” é sín tínmɛ dodó ɔ wɛ nyí “sɔ́ síin” alǒ “sɔ́ yi.” Mǐ sixú dó nukún mɛ kpɔ́n ɖɔ Jexóva cí súnnu hlɔ̌nhlɔ́nnɔ ɖé ɖɔhun, bo sɔ́ hwɛgban e ɖo abɔ̌ mǐtɔn ta é síin, bo sɔ́ yi ɖo nǔjlɛ́dónǔwú linu.
“A ɖe agɔ e un jɛ ɔ sín kɔ nú mì” (Ðɛh. 32:5)
6. Nɛ̌ do fí e Jexóva nɔ sɔ́ hwɛ mǐtɔn lɛ́ yi é ka lín sɔ?
6 Nǔjlɛ́dónǔwú ɖěvo xlɛ́ káká fí e Jexóva nɔ sɔ́ hwɛ mǐtɔn lɛ́ yi é. Ðɛhan 103:12 ɖɔ nú mǐ ɖɔ: ‘Lě do gbadahwe jí lín dó zǎnzǎnhwe jí sɔ é ɔ, mɔ̌ do wɛ Jexóva nɔ sɛ nǔwanyido mǐtɔn lɛ́ dó zɔ nú mǐ sɔ.’ Zǎnzǎnhwe jí wɛ nyí fí e lín dó gbadahwe jí hú gǎn é. Fí we lɛ́ sixú kplé ɖo fí ɖě gbeɖé ǎ. Ðo xógbe ɖěvo mɛ ɔ, Jexóva nɔ sɔ́ hwɛ mǐtɔn lɛ́ yi fí e lín tawun bɔ mǐ ma sixú dó nukún mɛ kpɔ́n ǎ é. Énɛ́ ná jiɖe mǐ ɖɔ Jexóva nɔ sɔ́ hwɛ kɛ mǐ bǐ mlɛ́mlɛ́.
“Lě do gbadahwe jí lín dó zǎnzǎnhwe jí sɔ ɔ” (Ðɛh. 103:12)
7. Nɛ̌ Biblu ka tínmɛ nǔ e Jexóva nɔ sɔ́ hwɛ mǐtɔn lɛ́ dó wa é gbɔn? (Micée 7:18, 19)
7 Amɔ̌, Jexóva nɔ sɔ́ hwɛ mǐtɔn lɛ́ yi fí línlín ɖo nǔjlɛ́dónǔwú linu, bɔ yě nɔ lɛ́ kpo ɖo así tɔn wɛ a? Éǒ. Axɔ́sú Ezekiyási wlán dó Jexóva wú ɖɔ: “A ɖe hwɛ e un hu lɛ́ bǐ ɖó zɔ nú mì” alǒ “sɔ́ nyi gǔdo towe” sɔgbe xá Biblu gbɛ yɔ̌yɔ́ ɔ tɔn. (Eza. 38:9, 17) Nǔjlɛ́dónǔwú énɛ́ xlɛ́ ɖɔ Jexóva nɔ da mɛ ɖěɖěe sín hwɛ vɛ́ nú yě lɛ́ é sín hwɛ dó gbě, bo kún sɔ́ nɔ kpɔ́n ó. È sixú lɛ́ tínmɛ nukɛgbe énɛ́ gbɔn lě: “A bló cí nǔ ɖɔ un kún hu hwɛ lɛ́ ó ɖɔhun.” Biblu lɛ́ tɛ ɖɛ̌ nǔ énɛ́ jí ɖo nǔjlɛ́dónǔwú ɖěvo mɛ ɖo Micée 7:18, 19 mɛ. (Xa.) Wěmafɔ énɛ́ lɛ́ ɖɔ ɖɔ Jexóva nɔ sɔ́ hwɛ mǐtɔn lɛ́ nyi dó fí e gɔ́ngɔ́n hú fí bǐ ɖo xu mɛ é. Ðo hwexónu ɔ, mɛɖé sixú kpé wú bo mɔ nǔ e è sɔ́ nyi dó fí e gɔ́ngɔ́n hú fí bǐ ɖo xu mɛ é ǎ.
“A ɖe hwɛ e un hu lɛ́ bǐ ɖó zɔ nú mì” (Eza. 38:17)
“A . . . ná sɔ́ hwɛ mǐtɔn lɛ́ nyi dó fí e gɔ́ngɔ́n hú fí bǐ ɖo xu mɛ é” (Micée 7:19)
8. Étɛ́ mǐ ka kplɔ́n káká jɛ din?
8 Nǔjlɛ́dónǔwú énɛ́ lɛ́ zɔ́n bɔ mǐ mɔ ɖɔ ényí Jexóva sɔ́ hwɛ kɛ mǐ ɔ, é nɔ ɖe hwɛgban mǐtɔn lɛ́ sín kɔ jí nú mǐ. Nǔgbó ɔ, lěe Davídi ɖɔ gbɔn é ɔ, “awǎjijɛnɔ wɛ nyí mɛ e è sɔ́ nǔ nyanya e yě wa lɛ́ é kɛ yě, bo cyɔ́n nǔ dó hwɛ yětɔn lɛ́ é; awǎjijɛnɔ wɛ nyí mɛ e Jexóva ma ná xa hwɛ dó kɔ ná gbeɖé ǎ é.” (Hlɔ̌. 4:7, 8) Hwɛsɔ́kɛmɛ nǔgbó ɔ nɛ́!
JEXÓVA NƆ SÚNSÚN HWƐ
9. Nǔjlɛ́dónǔwú tɛ́ lɛ́ Jexóva ka zán dó tínmɛ lěe hwɛsɔ́kɛmɛ tɔn d’agba sɔ é?
9 Jexóva nɔ gbɔn gbɛxixɔ ɔ gblamɛ bo nɔ súnsún mɛ ɖěɖěe hwɛ yětɔn lɛ́ vɛ́ nú yě lɛ́ é sín hwɛ lɛ́. Mǐ ní kpɔ́n lěe Biblu tínmɛ nǔ e Jexóva wa é gbɔn é. È ɖɔ dó Jexóva wú ɖɔ é nɔ klɔ́ hwɛ énɛ́ lɛ́ síin ɖo nǔjlɛ́dónǔwú linu. Énɛ́ nɔ zɔ́n bɔ è nɔ slá wǔ nú hwɛhutɔ́ ɔ. (Ðɛh. 51:9; Eza. 4:4; Jel. 33:8) Jexóva ɖésúnɔ tínmɛ le e afɔɖiɖe énɛ́ nɔ hɛn wá lɛ́ é: “Ényí hwɛ mitɔn lɛ́ ná bo myá cɛ́cɛ́ ɔ, yě ná wé tété avɔkanfún ɖɔhun. Yě ná bo myá káká bo wi d’é mɛ ɔ, yě ná wé la ɖɔhun.” (Eza. 1:18) É ná vɛ́ wǔ tawun bɔ è ná ɖe nǔ vɔvɔ cɛ́cɛ́, alǒ nǔ wiwi e kɔn nyi avɔ ɖé mɛ é síin. É ɖo mɔ̌ có, gbɔn nǔjlɛ́dónǔwú énɛ́ gblamɛ ɔ, Jexóva ná jiɖe mǐ ɖɔ émí hɛn ɔ, émí ná klɔ́ hwɛ mǐtɔn lɛ́ síin káká bɔ è kún sɔ́ ná mɔ yě ɖě ó.
“Ényí hwɛ mitɔn lɛ́ ná bo myá cɛ́cɛ́ ɔ, yě ná wé tété avɔkanfún ɖɔhun” (Eza. 1:18)
10. Nǔjlɛ́dónǔwú ɖěvo tɛ́ Jexóva ka zán dó tínmɛ lěe hwɛsɔ́kɛmɛ tɔn s’avɔ sɔ é?
10 Lěe xóta e wá yi é xlɛ́ gbɔn é ɔ, è lɛ́ sɔ́ hwɛ jlɛ́ dó “axɔ́” wú. (Mat. 6:12; Luk. 11:4) Hǔn, ényí mǐ hu hwɛ dó Jexóva hweɖébǔnu ɔ, é nɔ cí ɖɔ axɔ́ ɖu dó axɔ́ jí wɛ mǐ ɖe ɖo gɔ̌n tɔn ɖɔhun. Mǐ ɖu axɔ́ gɛnnyigɛnnyi ɖé dó è! Amɔ̌, ényí Jexóva sɔ́ hwɛ kɛ mǐ ɔ, é nɔ cí ɖɔ é dɔn nǔ gbɔn axɔ́ e mǐ ɖu dó è é jí wɛ ɖɔhun. É sɔ́ nɔ byɔ́ hwɛ e é ko sɔ́ kɛ mǐ lɛ́ é sín axɔ́ ǎ. Nǔjlɛ́dónǔwú e fá kɔ nú mɛ bo tínmɛ lěe mǐ nɔ mɔ kɔ dó sa fún gbɔn, hwenu e Jexóva sɔ́ hwɛ kɛ mǐ é ɖé nɛ́!
“Sɔ́ hwɛxɔ́ mǐtɔn lɛ́ kɛ mǐ” (Mat. 6:12)
11. Nú Biblu ɖɔ è “súnsún” hwɛ mǐtɔn lɛ́ ɔ, étɛ́ ɖɔ wɛ é ka nɔ ɖe? (Mɛsɛ́dó 3:19)
11 Jexóva nɔ dɔn nǔ gbɔn axɔ́ mǐtɔn lɛ́, alǒ hwɛ mǐtɔn lɛ́ jí kpowun ǎ, loɔ, é nɔ súnsún yě. (Xa Mɛsɛ́dó 3:19.) Mǐ ní ɖɔ ɖɔ a ɖu axɔ́ dó mɛɖé, bɔ mɛ ɔ zɛ xwi gbɔn axɔ́ e a ɖu é jí. É ɖo mɔ̌ có, è sixú kpo ɖo wěkwín e jí è zɛ xwi gbɔn lɛ́ é mɔ wɛ. Amɔ̌, nǔ e è súnsún é tɔn gbɔn vo. Bo ná dó mɔ nukúnnú jɛ nǔjlɛ́dónǔwú énɛ́ mɛ ɔ, mǐ ɖó ná flín ɖɔ é nɔ bɔ wǔ bɔ è nɔ zán sin dó súnsún nǔ e è wlán kpó nǔwlánnú e mɛ lɛ́ nɔ zán ɖo hwexónu é kpó é. Mɛɖé sixú zán tekan e mɛ sin ɖe é dó súnsún nǔwlánwlán ɔ síin. Hǔn, nú è “súnsún” axɔ́ ɖé ɔ, é nɔ bú bǐ mlɛ́mlɛ́. È sɔ́ sixú mɔ nǔ e è wlán ɖó fínɛ́ ɖ’ayǐ lɛ́ é sín wuntun ǎ. É nɔ cí ɖɔ è kún ɖu axɔ́ ɔ kpɔ́n ó ɖɔhun. Tuun e mǐ tuun ɖɔ é kún nyí nǔ kɛ́ɖɛ́ wɛ Jexóva nɔ dɔn gbɔn hwɛ mǐtɔn lɛ́ jí ó, loɔ, é nɔ lɛ́ súnsún yě bǐ mlɛ́mlɛ́ é sɔ́ akpakpa mǐ tawun!—Ðɛh. 51:11.
“Mɔ̌ mɛ ɔ, è ná súnsún hwɛ mitɔn lɛ́” (Mɛ. 3:19)
12. Étɛ́ nǔjlɛ́dónǔwú e mɛ è ɖɔ akpɔ́kpɔ́ tlitli xó ɖe é ka kplɔ́n mǐ?
12 Jexóva zán nǔjlɛ́dónǔwú mɔ̌hun ɖěvo dó tínmɛ lěe é nɔ súnsún hwɛ lɛ́ gbɔn é. É ɖɔ: “Un ná súnsún agɔ e a jɛ lɛ́ é akpɔ́kpɔ́ wɛ un dó súnsún yě ná ɖɔhun, bo ná súnsún hwɛ towe lɛ́ akpɔ́kpɔ́ tlitli wɛ un dó súnsún yě ɖɔhun.” (Eza. 44:22, nwt) Ényí Jexóva sɔ́ hwɛ mǐtɔn lɛ́ kɛ mǐ ɔ, é nɔ bló nǔ cí nǔ ɖɔ akpɔ́kpɔ́ tlitli ɖé wɛ é zán dó cyɔ́n nǔ dó yě, bónú mǐ kpó é kpó ɖě ní ma sɔ́ mɔ yě ó ɖɔhun.
“Un ná súnsún agɔ e a jɛ lɛ́ é akpɔ́kpɔ́ wɛ un dó súnsún yě ná ɖɔhun” (Eza. 44:22, nwt)
13. Ényí Jexóva sɔ́ hwɛ mǐtɔn lɛ́ kɛ mǐ ɔ, nɛ̌ nǔ ka nɔ cí nú mǐ?
13 Étɛ́ nǔjlɛ́dónǔwú énɛ́ lɛ́ ka kplɔ́n mǐ? Ényí Jexóva sɔ́ hwɛ mǐtɔn lɛ́ kɛ mǐ ɔ, mǐ sɔ́ ɖó ná ɖo hwɛ dó mǐɖée wɛ nú gbɛhwenu mǐtɔn e kpo é ǎ. Vɔ̌sísá Jezu tɔn ko sú hwɛ mǐtɔn lɛ́ sín axɔ́ bǐ mlɛ́mlɛ́. Ényí Jexóva sɔ́ hwɛ ɖé kɛ mǐ ɔ, é nɔ cí ɖɔ mǐ kún hu hwɛ énɛ́ gbeɖé ó ɖɔhun. Ényí mǐ lɛ́ kɔ sín hwɛ mǐtɔn lɛ́ gúdo ɔ, lěe Jexóva nɔ sɔ́ hwɛ kɛ mǐ gbɔn é nɛ́.
JEXÓVA NƆ BLÓ BƆ MǏ NƆ LƐ́ ZUN XƆ́NTƆN VÍVƐ́ XÁ Ɛ
Hwɛ e Tɔ́ mǐtɔn e ɖo jǐxwé é nɔ sɔ́ kɛ mǐ bǐ mlɛ́mlɛ́ é nɔ hun ali nú mǐ bónú mǐ ná zun xɔ́ntɔn vívɛ́ xá ɛ (Kpɔ́n akpáxwé 14)
14. Étɛ́wú mǐ ka sixú gán jɛ wú ɖɔ Jexóva ná sɔ́ hwɛ kɛ mǐ bǐ mlɛ́mlɛ́? (Kpɔ́n ɖiɖe lɛ́ lɔmɔ̌.)
14 Hwɛsɔ́kɛmɛ nǔgbó Jexóva tɔn nɔ hun ali nú mǐ bɔ mǐ nɔ lɛ́ zun xɔ́ntɔn vívɛ́ xá ɛ. É nɔ d’alɔ mǐ bɔ hwɛ dídó mɛɖée sín linlin lɛ́ sɔ́ nɔ ɖí bú mǐ ǎ. É byɔ́ ɖɔ mǐ ní ɖi xɛsi ɖɔ Jexóva hɛn mǐ dó xomɛ ɖo ali ɖé nu, bo nɔ ɖo ali e nu é ná dɔn tó nú mǐ ɖe é ba wɛ ǎ. É ná wa mɔ̌ gbeɖé ǎ. Ényí Jexóva ɖɔ émí sɔ́ hwɛ kɛ mǐ ɔ, étɛ́wú mǐ ka sixú ɖeji? Jexóva ɖɔ nú gbeyíɖɔ Jelemíi ɖɔ: “Un ná sɔ́ nǔ e yě wa nyi do ɔ bǐ kɛ yě, bo sɔ́ ná flín hwɛ e yě hu dó mì lɛ́ ǎ.” (Jel. 31:34) Mɛsɛ́dó Pɔ́lu ɖe xó sín xó énɛ́ lɛ́ mɛ hwenu e é ɖɔ xó élɔ́ é: “Un sɔ́ ná flín hwɛ yětɔn lɛ́ ɖě ǎ.” (Ebl. 8:12) Amɔ̌, étɛ́ ka nyí tínmɛ énɛ́ tɔn tawun?
“Un . . . sɔ́ ná flín hwɛ e yě hu dó mì lɛ́ ǎ” (Jel. 31:34)
15. Étɛ́ ɖɔ wɛ è ka ɖe bo ɖɔ ɖɔ ényí Jexóva sɔ́ hwɛ mǐtɔn lɛ́ kɛ mǐ ɔ, é kún sɔ́ nɔ flín yě ó?
15 Ðo Biblu mɛ ɔ, xókwín “flín” ɔ nɔ dó gesí nǔ e flín wɛ mɛɖé ɖe é, alǒ nǔ e jí lin tamɛ dó wɛ é ɖe é hwebǐnu ǎ. Loɔ, é sixú dó gesí mɛ e ɖo nǔɖé wa wɛ é. Alǎnnúwatɔ́ e è xwe dó atín wú ɖo Jezu kpá é byɔ́ nǔ élɔ́ ɛ: “Jezu, flín mì hwenu e a ná byɔ́ Axɔ́súɖuto towe mɛ é.” (Luk. 23:42, 43) Byɔ̌byɔ́ Jezu wɛ é ɖe kpowun ɖɔ é ní flín émí ɖo hwe énɛ́ nu ǎ. Xósin e Jezu ná é xlɛ́ ɖɔ é ná fɔ́n alǎnnúwatɔ́ énɛ́ sín kú. Énɛ́ wú ɔ, ée Jexóva ɖɔ ɖɔ émí kún sɔ́ ná flín hwɛ mǐtɔn lɛ́ ó é ɔ, ɖiɖɔ wɛ é ɖe ɖɔ émí kún ná sɔ́ yě dó wa nǔ xá mǐ ó. É ná dɔn tó nú mǐ ɖo hweɖénu ɖo sɔgúdo ɖó hwɛ e é ko sɔ́ kɛ mǐ lɛ́ é wú ǎ.
16. Étɛ́ wú Biblu ka sɔ́ mǐ jlɛ́ dó?
16 Biblu zán nǔjlɛ́dónǔwú ɖěvo dó d’alɔ mǐ bónú mǐ ná mɔ nukúnnú jɛ mɛɖéesíjijɛ e hwɛsɔ́kɛmɛ nǔgbó ɔ nɔ zɔ́n bɔ è nɔ ɖó é mɛ. Ðó hwɛhuhugbaza mǐtɔn kpó jlǒ hwɛhuhu tɔn e mǐ nɔ ɖó é kpó wútu ɔ, mǐ nyí “kannumɔ nú hwɛhuhu.” Amɔ̌, ɖó Jexóva sɔ́ hwɛ kɛ mǐ wútu ɔ, mǐ cí kannumɔ e è ko ‘ɖe sín hwɛhuhu kannu’ lɛ́ é ɖɔhun. (Hlɔ̌. 6:17, 18; Nǔɖe. 1:5) Ɛɛn, hwɛsɔ́kɛmɛ Jexóva tɔn zɔ́n bɔ xomɛ hun mǐ kannumɔ e jɛ éɖée sí é ɖɔhun.
“È ɖe mi sín hwɛhuhu kannu” (Hlɔ̌. 6:18)
17. Nɛ̌ hwɛsɔ́kɛmɛ ka gbɔ azɔn nú mǐ gbɔn? (Ezayíi 53:5)
17 Xa Ezayíi 53:5. Nǔjlɛ́dónǔwú gǔdo tɔn e wú mǐ ná ɖɔ xó dó é jlɛ́ mǐ dó mɛ ɖěɖěe ɖo azɔn e nɔ kplá mɛ yi kú é ɖé jɛ wɛ é wú. Vɔ̌sísá gbɛxɔnúmɛ tɔn e Jexóva sɔ́ nǔ ná gbɔn Vǐ tɔn jí é zɔ́n bɔ, è ɖɔ ɖɔ azɔn mǐtɔn gbɔ ɖo nǔjlɛ́dónǔwú linu. (1 Pi. 2:24) Azɔn e mǐ jɛ ɖo gbigbɔ lixo é ko d’akpa xɔ́ntɔn e mǐ zun xá Jexóva é wú; gbɛxixɔ ɔ ka zɔ́n bɔ mǐ sixú lɛ́ zun xɔ́ntɔn alɔmayimɛ xá Jexóva. Nú mɛɖé ɖo azɔn syɛ́nsyɛ́n ɖé jɛ wɛ bɔ è gbɔ n’i ɔ, é nɔ j’awǎ tawun; mɔ̌ ɖokpó ɔ, mǐ lɔ nɔ j’awǎ ɖó Jexóva sɔ́ hwɛ kɛ mǐ, b’ɛ zɔ́n bɔ azɔn mǐtɔn gbɔ ɖo gbigbɔ lixo, bɔ mǐ sixú lɛ́ mɔ fɛ́nú Jexóva tɔn.
“Wǔ e è gblé è ɔ gbɔ azɔn nú mǐ” (Eza. 53:5)
LE E HWƐSƆ́KƐMƐ JEXÓVA TƆN NƆ HƐN WÁ NÚ MǏ É
18. Étɛ́ nǔjlɛ́dónǔwú Biblu tɔn vovo e mǐ gbéjé kpɔ́n bɔ yě ɖɔ xó dó hwɛsɔ́kɛmɛ Jexóva tɔn wú lɛ́ é ka kplɔ́n mǐ? (Kpɔ́n gbǎví “Lěe Jexóva nɔ sɔ́ hwɛ kɛ mǐ gbɔn é” lɔmɔ̌)
18 Étɛ́ nǔjlɛ́dónǔwú e kunkplá hwɛsɔ́kɛmɛ Jexóva tɔn lɛ́ é ka kplɔ́n mǐ? Ényí Jexóva sɔ́ hwɛ kɛ mɛ ɔ, é nɔ wa mɔ̌ bǐ mlɛ́mlɛ́, bo nɔ lɛ́ wa mɔ̌ káká sɔ́yi. Énɛ́ nɔ hun xɔ́ntɔn alɔmayimɛ zunzun xá Tɔ́ mǐtɔn jǐxwé tɔn ɔ sín ali nú mǐ. Hwe ɖokpó ɔ nu ɔ, mǐ nɔ flín ɖɔ nǔníná ɖé wɛ hwɛsɔ́kɛmɛ nǔgbó ɔ nyí. Jexóva nɔ ɖe wǎn e é yí nú mǐ mɛ gbɛtɔ́ hwɛhutɔ́ lɛ́ é kpó xomɛ e é nyɔ́ dó mǐ wú bɔ mǐ ma jɛxá ǎ é kpó xlɛ́, gbɔn hwɛ e é nɔ sɔ́ kɛ mǐ é gblamɛ. É nyí acɛ tɔn wɛ gbɛtɔ́ lɛ́ ɖó ǎ.—Hlɔ̌. 3:24.
19. (a) Étɛ́ ka ɖó ná su nukún mǐtɔn mɛ? (Hlɔ̌manu lɛ́ 4:8) (b) Étɛ́ jí mǐ ka ná ɖɔ xó dó ɖo xóta e bɔ d’é wú é mɛ?
19 Xa Hlɔ̌manu lɛ́ 4:8. É su nukún mǐtɔn mɛ tawun ɖɔ Jexóva nyí Mawu e nɔ sɔ́ hwɛ kɛ mɛ nǔgbó nǔgbó é. (Ðɛh. 130:4) Amɔ̌, ényí mǐ ba ɖɔ Jexóva ní sɔ́ hwɛ kɛ mǐ ɔ, mǐ ɖó ná wa nǔ tají ɖé. Jezu tínmɛ ɖɔ: ‘Ényí mi ma sɔ́ nǔwanyido gbɛtɔ́ lɛ́ tɔn lɛ́ kɛ yě ǎ ɔ, Tɔ́ mitɔn lɔ ná sɔ́ nǔwanyido mitɔn lɛ́ kɛ mi ǎ.’ (Mat. 6:14, 15) Hǔn, é ɖo tají ɖɔ mǐ ní xwedó hwɛsɔ́kɛmɛ Jexóva tɔn sín kpɔ́ndéwú. Bɔ nɛ̌ mǐ ka sixú wa énɛ́ gbɔn lo? Xóta e bɔ d’é wú é ná xlɛ́ mǐ lěe mǐ ná wa mɔ̌ gbɔn é.
HAN 46 Mǐ dó kú nú we, Jexóva
a Ebléegbe dodó ɔ zán xókwín “hwɛsɔ́kɛmɛ” ɔ bɔ é nɔ dó gesí hwɛsɔ́kɛmɛ nǔgbó ɔ kɛ́ɖɛ́, ényí hwɛsɔ́kɛmɛ alɔkpa ɖěvo lɛ́ ná bo tlɛ ɖe ɔ nɛ́. Biblu gěgé ɖe xókwín tají énɛ́ tɔ́n ɖo Ðɛhan 130:4 mɛ ǎ.
