Nú è ɖɔ mɛɖé xwlé nǔ ɔ, “akpá e é dó dó nǔjɔnǔ mɛ ɖɔ émí ná wa nǔɖé é xó ɖɔ wɛ è ɖe. Hwɛhwɛ ɔ, Mawu . . . wɛ è nɔ sɔ́ dó ɖó kúnnuɖetɔ́ akpá mɔ̌hun tɔn.” É sixú nyí nu wɛ è ɖɔ ɖe, alǒ wěma jí wɛ è wlán dó.

Mɛɖé lɛ́ sixú lin ɖɔ nǔ nyanya wɛ é nyí ɖɔ è ní xwlé nǔ, ɖó Jezu ɖɔ: “Mi ma xwlé nǔ ɖěbǔ ó. . . . Ényí xó mitɔn nyí ‘ɛɛn’ hǔn, ní nyí ‘ɛɛn,’ é ka nyí ‘éǒ’ hǔn, ní nyí ‘éǒ.’ Nǔ e mi nɔ xwlé d’é jí ɔ bǐ ɔ, awǒvi gɔ́n wɛ é gosín.” (Mat. 5:33-37) É ɖo wɛn ɖɔ Jezu tuun ɖɔ Mɔyízisɛ́n ɔ nɔ byɔ́ hweɖélɛ́nu ɖɔ è ní xwlé nǔ, bɔ mɛsɛntɔ́ Mawu tɔn gbejínɔtɔ́ ɖé lɛ́ xwlé nǔ. (Bǐb. 14:22, 23; Tín. 22:10, 11) É lɛ́ tuun ɖɔ Jehovah ɖésúnɔ nɔ xwlé nǔ. (Ebl. 6:13-17) Énɛ́ wú ɔ, ɖiɖɔ wɛ Jezu ɖe ɖɔ mǐ kún ɖó ná xwlé nǔ gbeɖé ó ǎ. É nyɔ́ wá ɔ, akpá gba nú mɛ wɛ é ɖe ɖɔ è ní ma nɔ xwlé nǔ dó nǔmaɖinǔ lɛ́ sín takúnmɛ ó, loɔ, nǔ e tamɛ è ná nɔ xwlé nǔ dó lɛ́ é ní nɔ nyí nǔjɔnǔ. Mǐ ɖó ná nɔ mɔ ɖɔ dandan sín nǔ wɛ é nyí ɖɔ mǐ ní nɔ wa nǔ sɔgbe xá akpá e mǐ nɔ dó lɛ́ é, ɖó nǔ e Jehovah nɔ ba ɖɔ mǐ ní wa é nɛ́.

Énɛ́ wú ɔ, ényí è byɔ́ we ɖɔ hwi ní xwlé nǔ ɔ, étɛ́ a ka ɖó ná wa? Jɛ nukɔn hwɛ̌ ɔ, mɔ nǔ jɛ wú ɖɔ émí sixú wa nǔ sɔgbe xá nǔ e ná xwlé wɛ émí ɖe é. Ényí a ma kán ɖ’é jí ɖɔ émí ná wa nǔ ɔ ǎ ɔ, é ná nyɔ́ hú gǎn ɖɔ a ní ma xwlé nǔ ó. Xó Mawu tɔn gba akpá élɔ́ nú mǐ: “A gbɔ bó gɔn akpá dó ɔ, é nyɔ́ hú a dó bó gɔn ɖiɖe.” (Nǔt. 5:4) Énɛ́ gúdo hǔn, gbějé nǔgbódodó Biblu tɔn ɖěɖěe kúnkplá akpá syɛ́nsyɛ́n ɖé dídó lɛ́ é kpɔ́n, lobo wá wa nǔ sɔgbe xá nǔ e ayixa towe e a sɔ́ Biblu dó kplɔ́n ná é ɖɔ nú we é. Nǔgbódodó ɖětɛ́ lɛ́ mɔ̌ ka wɛ?

Nǔ e mǐ nɔ xwlé é ɖé lɛ́ nɔ xo nǔ dó akpa ɖokpó ɔ mɛ xá linlin Mawu tɔn. Ði kpɔ́ndéwú ɔ, ényí Kúnnuɖetɔ́ Jehovah tɔn lɛ́ jló ná wlí alɔ ɔ, yě nɔ dó akpá. Ðo ali ɖé nu ɔ, nǔ xwlé wɛ yě ɖe mɔ̌ nɛ́. Ðo Mawu kpó gbɛtɔ́ lɛ́ kpó sín nukɔn ɔ, nyɔ̌nu ɔ kpó súnnu ɔ kpó nɔ dó akpá lɛ́ nú yěɖée ɖɔ émí ná yí wǎn nú émíɖée, wlíbo nú émíɖée, bó lɛ́ ɖó sísí nú émíɖée, lobo ná ɖo mɔ̌ wa wɛ “nú táan nabí e émí mɛ we lɛ́ ná nɔ gbɛ ɖó kpɔ́ xɔ é.” (Asú kpó asi kpó ɖěvo lɛ́ sixú gɔn xógbe énɛ́ lɛ́ zán pɛ́pɛ́pɛ́ dó dó akpá nú yěɖée hwenu e yě ɖo alɔ wlí wɛ é, amɔ̌, yě nɔ dó akpá ɖé nú yěɖée dandan ɖo Mawu nukɔn.) Énɛ́ gúdo ɔ, yě nɔ húzú asú kpó asi kpó, bɔ mɔ̌ wɛ yě ɖó ná nɔ nú gbɛhwenu yětɔn bǐ. (Bǐb. 2:24; 1 Kɔ. 7:39) Alɔwlíwlí sín akpádídó nylá ǎ, bó lɛ́ sɔgbe xá linlin Mawu tɔn.

Nǔ e è nɔ xwlé é ɖé lɛ́ nɔ sɔ́ ta linlin Mawu tɔn. Klisánwun nǔgbó ɖé ɖó ná xwlé nǔ mɔ̌hun ɖé ǎ; é sixú nyí ahwanlyánnú lɛ́ zínzán dó jɛ hun dó to mɛtɔn jí, alǒ nǔɖiɖi mɛtɔn sísɔ́ sa. Nǔ wa gbɔn mɔ̌ ná t’afɔ sɛ́n Mawu tɔn lɛ́ jí. Klisánwun lɛ́ ɖó ná “nyí gbɛ ɔ tɔn ǎ,” énɛ́ wú ɔ, mǐ sixú ɖ’alɔ ɖo hunnyahunnya kpó ahwan kpó mɛ ǎ.—Jaan 15:19; Eza. 2:4; Ja. 1:27.

 Akpá ɖé lɛ́ nɔ kúnkplá nǔ e ayixa mɛ ɖokpó ɖokpó tɔn ɖɔ n’i é. Hweɖélɛ́nu ɔ, é sixú byɔ́ ɖɔ mǐ ní gbéjé mǐɖée kpɔ́n ganjí kpó wě e Jezu ɖe xá mǐ, bó ɖɔ ɖɔ ‘mǐ ní sɔ́ nǔ e nyí Dadá Hlɔ̌ma tɔn tɔn ɔ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ jó nú Mawu’ é kpó, cóbó wá gbeta ɔ kɔn ɖɔ mǐ ná xwlé nǔ, alǒ gbɔ.—Luk. 20:25.

Ði kpɔ́ndéwú ɔ, mǐ ní ɖɔ ɖɔ Klisánwun ɖé jló ná bló mɛɖéedógesíwéma (carte d’identité) alǒ togúdoyiyiwéma (passeport), bó ka se ɖɔ cóbónú émí ná bló ɔ, é ná byɔ́ ɖɔ émí ní dó akpá syɛ́nsyɛ́n ɖé, alǒ xwlé nǔ. Ényí akpá syɛ́nsyɛ́n ɖé dídó ɖo to mɔ̌hun mɛ nɔ byɔ́ ɖɔ è ní xwlé nǔ ɖɔ è ná wa nǔ e ná t’afɔ sɛ́n Mawu tɔn jí é ɔ, ayixa tɔn e é sɔ́ Biblu dó kplɔ́n é ná yí gbe n’i bónú é ná wa nǔ mɔ̌hun ǎ. Amɔ̌, acɛkpikpa ɔ sixú ná ɛ gbe bɔ é ná húzú nǔ e ɖo wěma ɔ mɛ lɛ́ é, énɛ́ ɔ, ayixa tɔn ná yí gbe n’i b’ɛ ná dó akpá ɔ.

Akpá énɛ́ e wú è w’azɔ̌ ɖe, bɔ é ɖo nǎ dó wɛ é sixú sɔgbe xá nǔgbódodó e ɖo Hlɔ̌manu lɛ́ 13:1 mɛ é; fínɛ́ ɖɔ: “Gbɛtɔ́ lɛ́ bǐ ɖó ná se tónú nú acɛkpikpa e ɖo to ɔ nu lɛ́.” Énɛ́ wú ɔ, Klisánwun ɔ sixú wá gbeta ɔ kɔn ɖɔ nǔɖé kún nylá ɖ’é mɛ ɖɔ émí ní dó akpá ɖɔ émí ná wa nǔ e Mawu ko byɔ́ mǐ ɖɔ mǐ ní wa é ó.

Ényí è byɔ́ we ɖɔ a ní zán nǔɖé, alǒ wa nǔɖé hwenu e a ɖo nǔ xwlé wɛ é ɔ, é lɛ́ ɖo tají tawun ɖɔ a ní se tónú nú nǔ e ayixa towe e a sɔ́ Biblu dó kplɔ́n ná é ɖɔ nú we é. Mɛ e nɔ nɔ Hlɔ̌ma hwexónu tɔn ɔ lɛ́ é kpó Sítu lɛ́ kpó nɔ xwlé hwǐ yětɔn lɛ́, bɔ énɛ́ nɔ xlɛ́ ɖɔ yě nɔ zán wuntun mawu ahwanfunfun tɔn tɔn, lobɔ énɛ́ nɔ nyí gǎnjɛwú ɖé ɖɔ mɛ e xwlé nǔ ɔ é ɔ, è sixú ɖeji dó wǔ tɔn. Glɛ̌kinu lɛ́ ja nǔ xwlé gbé ɔ, alɔ wɛ yě nɔ sɔ́ dó jǐ. Mɔ̌ mɛ ɔ, yě nɔ mɔ nǔ jɛ wú ɖɔ Mawu mɔ nǔ e è ɖɔ é kpó nǔ e è wa é kpó, bɔ é wɛ gbɛtɔ́ lɛ́ ná ɖó gbe ná.

Nǔgbó ɔ, mɛsɛntɔ́ Jehovah tɔn ɖé ɖó ná xwlé nǔ dó wuntun to tɔn e cá kan xá sinsɛn nǔvú é ɖé jí ǎ. Amɔ̌, nú è ka byɔ́ we ɖo hwɛɖɔxɔsá ɖé ɖɔ a ní sɔ́ alɔ ɖó Biblu ɖé jí, bó xwlé nǔ ɖɔ xó e ɖɔ wɛ émí ɖe é nyí nǔgbó ɔ, étɛ́ a ka ɖó ná wa? Ðo ninɔmɛ énɛ́ mɛ ɔ, a sixú wá gbeta ɔ kɔn, bó ná wa mɔ̌, ɖó Mawuxówéma ɔ ɖɔ xó dó mɛsɛntɔ́ gbejínɔtɔ́ e wa nǔ mɔ̌hun ɖé dó xwlé nǔ é ɖé lɛ́ wú. (Bǐb. 24:2, 3, 9; 47:29-31) É ɖo tají ɖɔ a ní flín ɖɔ ényí a ná xwlé nǔ gbɔn mɔ̌ hǔn, ɖiɖɔ wɛ a ɖe ɖo Mawu nukɔn ɖɔ émí ná ɖɔ nǔgbó. É byɔ́ ɖɔ a ní sɔ́ nǔ ɖ’ayǐ, bá ná xósin ɖejidéwú lɛ́ nú nǔ ɖěbǔ e è ná kanbyɔ́ we é.

Ðó kancícá e ɖo mǐ kpó Jehovah kpó tɛ́ntin é xɔ akwɛ́ nú mǐ tawun wútu ɔ, mǐ ɖó ná nɔ xo ɖɛ, bó lɛ́ xwe sɔ dó lin tamɛ dó nǔ ɖěbǔ e è byɔ́ mǐ ɖɔ mǐ ní xwlé é jí, lobo mɔ nǔ jɛ wú ɖɔ é kún ná d’akpa ayixa mǐtɔn wú, alǒ t’afɔ nǔgbódodó Biblu tɔn lɛ́ jí ó. Ényí a wá gbeta ɔ kɔn ɖɔ émí ná xwlé nǔ ɔ, a ɖó ná mɔ nǔ jɛ mɛ ɖɔ émí ná wa nǔ sɔgbe xá nǔ e émí xwlé é.—1 Pi. 2:12.