1. Nɛ̌ mǐ ka wa gbɔn bo tuun ɖɔ Jexóva ba ná sɛkpɔ́ mǐ?

 JEXÓVA byɔ́ mǐ ɖɔ mǐ ní sɛkpɔ́ émí. (Ja. 4:8) É ba ná nyí Mawu mǐtɔn, Tɔ́ mǐtɔn kpó Xɔ́ntɔn mǐtɔn kpó. É nɔ ná xósin nú ɖɛ mǐtɔn lɛ́, bo nɔ lɛ́ d’alɔ mǐ hwenu e mǐ ɖo hwenu vɛ́ wǔ lɛ́ mɛ gbɔn wɛ é. É nɔ kplɔ́n nǔ mǐ gbɔn tutoblónúnǔ tɔn jí, bo nɔ lɛ́ cyɔ́n alɔ mǐ jí. Amɔ̌, étɛ́ mǐ ka ɖó ná wa bá dó sɛkpɔ́ Jexóva?

2. Nɛ̌ mǐ ka sixú sɛkpɔ́ Jexóva gbɔn?

² Ényí mǐ nɔ xo ɖɛ sɛ́dó Jexóva, nɔ xa Xó tɔn, bo nɔ lɛ́ lin tamɛ d’é jí ɔ, mǐ sixú sɛkpɔ́ ɛ. Mɔ̌ wiwa ná zɔ́n bɔ wǎn e mǐ yí n’i é kpó nǔ tɔn e nɔ su nukún mǐtɔn mɛ é kpó ná jɛjí. Akpakpa nɔ sɔ́ mǐ dó tónú sise n’i kpó susu e jɛxá ɛ é xixɔ n’i kpó wú. (Nǔɖe. 4:11) Lě do mǐ tuun Jexóva sɔ é ɔ, mɔ̌ do wɛ mǐ ná ɖeji dó wǔ tɔn, lobo lɛ́ ɖeji dó tutoblónúnǔ tɔn e é sɔ́ b’ɛ ɖo alɔ dó mǐ wɛ é wú sɔ é nɛ́.

3. Nɛ̌ Awǒvi ka nɔ tɛ́n kpɔ́n bo ná ɖe mǐ ɖó vo nú Jexóva gbɔn? Étɛ́ lɛ́ ka ná d’alɔ mǐ bɔ mǐ ma ná jó Mawu mǐtɔn kpó tutoblónúnǔ tɔn kpó dó gbeɖé ǎ? (Ðɛhan 31:14, 15)

³ Awǒvi ka nɔ tɛ́n kpɔ́n bo ná ɖe mǐ ɖó vo nú Jexóva, ɖo tají ɔ, hwenu e mǐ ɖo wǔvɛ́ lɛ́ mɔ wɛ é. Wlɛnwín tɛ́ é ka nɔ zán? É nɔ tɛ́n kpɔ́n bo ná vɔ́ da nú jiɖe e mǐ ɖó dó Jexóva kpó tutoblónúnǔ tɔn kpó wú é kpɛɖé kpɛɖé. Amɔ̌, mǐ sixú gbí dɔn ɖo wlɛnwín e é nɔ zán lɛ́ é nukɔn. Ényí nǔɖiɖi e mǐ ɖó nú Jexóva é lí dǒ, bɔ jiɖiɖe e mǐ ɖó dó wǔ tɔn é lɔ ma sɛ do ǎ ɔ, mǐ ná jó Mawu mǐtɔn kpó tutoblónúnǔ tɔn kpó dó ǎ.—Xa Ðɛhan 31:14, 15.

4. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

⁴ Ðo xóta élɔ́ mɛ ɔ, mǐ ná ɖɔ xó dó wǔvɛ́ e sixú gosín agun ɔ gúdo é atɔn wú; wǔvɛ́ énɛ́ lɛ́ ɖokpó ɖokpó sixú vɔ́ da nú jiɖe e mǐ ɖó dó Jexóva kpó tutoblónúnǔ tɔn kpó wú é.  Nɛ̌ wǔvɛ́ énɛ́ lɛ́ ka sixú ɖe mǐ ɖó vo nú Jexóva gbɔn? Étɛ́ mǐ ka sixú wa bo ná gbo kpo nyi ali jí nú gǎn e dó wɛ Satáan ɖe lɛ́ é?

5. Nɛ̌ wǔvɛ́ lɛ́ ka sixú vɔ́ da nú jiɖe e mǐ ɖó dó Jexóva kpó tutoblónúnǔ tɔn kpó wú é gbɔn?

⁵ Hweɖélɛ́nu ɔ, mǐ nɔ ɖí xwi xá wǔvɛ́ lěhun lɛ́, gbeklánxámɛ xwédo tɔn, alǒ azɔ̌gblédómɛ. Nɛ̌ wǔvɛ́ énɛ́ lɛ́ ka sixú vɔ́ da nú jiɖe e mǐ ɖó dó tutoblónúnǔ Jexóva tɔn wú é, bo ɖe mǐ ɖó vo n’i gbɔn? Ényí mǐ ɖo didɛ ɖo wǔvɛ́ lɛ́ nu wɛ ɔ, é ko lín ɔ, mǐ sixú ba nukúnɖíɖó kpo, bɔ awakanmɛ lɛ́ kú mǐ. Satáan nɔ gbɔn yɛdo énɛ́ lɛ́ mɛ, bo nɔ tɛ́n kpɔ́n bo ná bló bónú mǐ ná xo nǔ kpɔ́n dó wǎn e Jexóva yí nú mǐ é wú. Awǒvi nɔ ba ɖɔ mǐ ní lin ɖɔ Jexóva, alǒ tutoblónúnǔ tɔn wú wɛ wǔvɛ́ mǐtɔn lɛ́ nɔ sín. Nǔ mɔ̌hun jɛ dó Izlayɛ́li ví lɛ́ jí hwenu e yě ɖo Ejípu é. Ðo bǐbɛ́mɛ ɔ, yě ɖi ɖɔ Jexóva wɛ sɛ́ Mɔyízi kpó Aalɔ́ɔn kpó dó bónú yě ná ɖe yě sín kannumɔgbénu. (Tín. 4:29-31) Amɔ̌, nukɔnmɛ hwenu e Falawɔ́ɔn bló bɔ gbɛ vɛ́ wǔ nú yě d’é jí é ɔ, yě dó hwɛ Mɔyízi kpó Aalɔ́ɔn kpó ɖɔ yě wú wɛ wǔvɛ́ émítɔn lɛ́ sín, bo ɖɔ: “Mi wɛ zɔ́n bɔ axɔ́sú Ejípu tɔn ɔ kpó azaglɔ́gán tɔn lɛ́ kpó gbɛ́ wǎn nú mǐ. Mi wɛ sɔ́ ahwanfunnú e yě ná dó hu mǐ ɔ dó alɔ mɛ nú yě.” (Tín. 5:19-21) Yě dó hwɛ mɛsɛntɔ́ gbejínɔtɔ́ Mawu tɔn lɛ́. É blá wǔ tawun! Ényí a ko ɖo didɛ ɖo wǔvɛ́ lɛ́ nu wɛ sín hwenu línlín ɖíe ɔ, nɛ̌ a ka sixú kpo ɖo hlɔ̌nhlɔ́n ná jiɖe e a ɖó dó Jexóva kpó tutoblónúnǔ tɔn kpó wú wɛ é gbɔn?

6. Étɛ́ gbeyíɖɔ Xabakúku ka kplɔ́n mǐ dó lěe mǐ sixú ɖí xwi xá wǔvɛ́ lɛ́ gbɔn é wú? (Xabakúku 3:17-19)

⁶ Nɔ ɖɔ nǔ e ɖo ayi towe mɛ lɛ́ é bǐ nú Jexóva ɖo ɖɛ mɛ, bo nɔ ba alɔdó tɔn. Gbeyíɖɔ Xabakúku mɔ wǔvɛ́ gěgé. É wá su hweɖénu bɔ é cí ɖɔ é xo nǔ kpɔ́n dó nukún e kpé dó wǔ tɔn wɛ Jexóva ɖe é wú ɖɔhun. Énɛ́ wú ɔ, é ɖɔ lěe nǔ cí n’i é nú Jexóva ɖo ɖɛ mɛ. É ɖɔ: ‘Jexóva, un ɖo ylɔ̌ylɔ́ we wɛ ɖɔ hwi ní wá dó alɔ mì, bɔ a tin dó mì. Káká jɛ hwetɛ́nu a ka ná tin dó mì yi jɛ? . . . Nɛ̌ awě ná ɖo mɛ xo wɛ mɔ̌, bɔ é ka nɔ nyɔ́ kpɔ́n nú we gbɔn?’ (Xab. 1:2, 3) Jexóva ná xósin nú ɖɛ e mɛsɛntɔ́ tɔn gbejínɔtɔ́ énɛ́ xo sɛ́dó è kpó ayi bǐ kpó é. (Xab. 2:2, 3) Amɔ̌, ée Xabakúku lin tamɛ dó lěe Jexóva ko hwlɛ́n togun tɔn gbɔn é jí céɖécéɖé é ɔ, é lɛ́vɔ́ ɖó awǎjijɛ. É wá kú d’é jí ɖɔ Jexóva ɖo nukún kpé dó émí wú wɛ, bo ka ná lɛ́ d’alɔ émí bɔ émí ná dɛ ɖo wǔvɛ́ lɛ́ bǐ nu. (Xa Xabakúku 3:17-19.) Étɛ́ énɛ́ ka kplɔ́n mǐ? Ényí a ɖo wǔvɛ́ lɛ́ ɖí xwi xá wɛ hǔn, nɔ xo ɖɛ sɛ́dó Jexóva, bo nɔ ɖɔ lěe nǔ cí nú we é n’i. Énɛ́ gúdo hǔn, ba alɔdó tɔn. Ényí a wa mɔ̌ ɔ, a sixú kú d’é jí ɖɔ Jexóva ná ná hlɔ̌nhlɔ́n e sín hudó a ɖó bá dɛ é we. Gɔ́ ná ɔ, ényí a ɖ’ayi lě do é ɖo alɔ dó we wɛ gbɔn é wú ɔ, nǔɖiɖi towe ná lɛ́ lí dǒ d’é jí.

7. Étɛ́ hɛ̌nnumɔ Shirley tɔn lɛ́ ɖokpó ka tɛ́n kpɔ́n bá bló b’ɛ ná lin? Étɛ́ lɛ́ ka d’alɔ ɛ bɔ nǔɖiɖi e é ɖó nú Jexóva é ma vɔ́ da ǎ?

⁷ Kpo ɖo nǔ e ná zɔ́n bɔ hwi kpó Jexóva kpó ná vɛ́ lɛ́ é wa wɛ. Ð’ayi lěe énɛ́ d’alɔ nɔví nyɔ̌nu e nɔ nyí Shirley é gbɔn é wú, hwenu e é ɖo wǔvɛ́ lɛ́ mɛ gbɔn wɛ é; Papouasie Nouvelle-Guinée wɛ é nɔ nɔ. b Yatɔ́nɔ wɛ nyí xwédo Shirley tɔn, bɔ hweɖélɛ́nu ɔ, gǎn wɛ yě nɔ dó tawun cóbó nɔ mɔ nǔɖuɖu e ná kpé yě é. Hɛ̌nnumɔ tɔn ɖokpó tɛ́n kpɔ́n bo ná vɔ́ da nú jiɖe e é ɖó dó Jexóva wú é. É ɖɔ: “A ɖɔ ɖɔ gbigbɔ mímɛ́ Mawu tɔn nɔ d’alɔ émí, bɔ fítɛ́ alɔdó ɔ ka ɖe? Xwédo ɔ kpo ɖo yatɔ́nɔ nyí wɛ. A nɔ ɖo hwenu towe hɛn gú dó  ɖɔ Mawuxó wɛ.” Shirley ɖɔ: “Un kanbyɔ́ nyiɖée ɖɔ: ‘Mawu ka nɔ kpé nukún dó mǐ wú dóó a, alǒ é nɔ wa mɔ̌ ǎ?’ Énɛ́ wú ɔ, afɔjíafɔjí ɔ, un xo ɖɛ sɛ́dó Jexóva, bo ɖɔ nǔ e ɖo ayi ce mɛ é bǐ n’i. Un nɔ gɔn Biblu kpó wěma mǐtɔn lɛ́ kpó xa ǎ; gɔ́ ná ɔ, un kpo ɖo Mawuxó ɖɔ wɛ, lobo nɔ lɛ́ yi kplé lɛ́.” É sɔ́ lín ǎ bɔ Shirley jɛ ayi ɖ’é wú jí ɖɔ Jexóva nɔ kpé nukún dó xwédo tɔn wú. Xwédo tɔn nɔ ba nǔ e yě ná ɖu é kpo ǎ, bo lɛ́ ɖó awǎjijɛ. Shirley ɖɔ: “Un mɔ ɖɔ Jexóva ɖo xósin ná nú ɖɛ ce lɛ́ wɛ.” (1 Tim. 6:6-8) Ényí hwi lɔ tɛ́dó tuto gbigbɔ tɔn towe lɛ́ wú ɔ, a ná lɔn nú wǔvɛ́ lɛ́, alǒ nǔxokpɔ́n ná ɖe we ɖó vo nú Jexóva ǎ.

8. Étɛ́ ka sixú jɛ dó nɔví e ɖo nukún kpé dó nǔ lɛ́ wú wɛ ɖo tutoblónúnǔ Jexóva tɔn mɛ lɛ́ é wú?

⁸ Kɛntɔ́ mǐtɔn lɛ́ nɔ zán hladíó, televizyɔn, xójláwéma lɛ́, alǒ tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é dó fúnfún adingbanxó lɛ́ kpé dó nɔví e ɖo nukún kpé dó nǔ lɛ́ wú wɛ ɖo tutoblónúnǔ Jexóva tɔn mɛ lɛ́ é wú, alǒ nɔ bló bónú mǐ ná xo nǔ kpɔ́n dó yě wú. (Ðɛh. 31:14) È ko wlí nɔví mǐtɔn ɖé lɛ́ bo dó hwɛ yě ɖɔ yě nyí dǎkaxotɔ́ akowunká. Nǔ mɔ̌hun gbo klisánwun xwe kanweko nukɔntɔn ɔ tɔn lɛ́ hwenu e è dó hwɛ agɔ mɛsɛ́dó Pɔ́lu bo wlí i é. Nɛ̌ yě ka wa nǔ gbɔn?

9. Hwenu e è wlí mɛsɛ́dó Pɔ́lu dó gan mɛ é ɔ, nɛ̌ klisánwun ɖé lɛ́ ka wa nǔ gbɔn?

⁹ Hwenu e mɛsɛ́dó Pɔ́lu ɖo gankpá mɛ ɖo Hlɔ̌ma é ɔ, klisánwun xwe kanweko nukɔntɔn ɔ tɔn ɖé lɛ́ ɖó alɔ e yě nɔ dó è é te. (2 Tim. 1:8, 15) Étɛ́wú? Winnyá wɛ ka hu yě ɖó mɔ e mɛ lɛ́ nɔ mɔ ɖɔ Pɔ́lu nyí dǎkaxotɔ́ akowunká é wú a? (2 Tim. 2:8, 9) Alǒ xɛsi ɖi wɛ yě ɖe ɖɔ è sixú wá dó ya nú émí lɔ a? Ðěbǔ wɛ é ná bo nyí ɔ, dǒ nukún lěe nǔ ná ko cí nú Pɔ́lu é mɛ kpɔ́n. É dɛ ɖo wǔvɛ́ gěgé nu, káká bo tlɛ sɔ́ gbɛ tɔn ɖó axɔ́ nu. (Mɛ. 20:18-21; 2 Kɔ. 1:8) Mi nú mǐ ní ma wa nǔ mɛ ɖěɖěe jó Pɔ́lu dó hwenu e é ɖo hudó mɛ lɛ́ é ɖɔhun gbeɖé ó! Étɛ́ mǐ ka ɖó ná hɛn d’ayi mɛ hwenu e è ɖo ya dó nú nɔví ɖěɖěe ɖo nukún kpé dó nǔ lɛ́ wú wɛ lɛ́ é?

10. Hwenu e è ɖo ya dó nú nɔví e ɖo nukún kpé dó nǔ lɛ́ wú wɛ lɛ́ é ɔ, étɛ́ mǐ ka ɖó ná nɔ flín?

 ¹⁰ Nɔ flín nǔ e wú è nɔ dó ya nú mǐ é kpó mɛ e ɖo gǔdo ná é kpó. Timɔtée wegɔ́ wěmata 3, wěmafɔ 12 ɖɔ: “Mɛ e jló ná zán gbɛ yětɔn nú Mawu kpó sísí kpó, ɖo bǔ e yě ɖe xá Klísu Jezu é mɛ ɔ bǐ wɛ è ná tlɛ dó ya ná lɔ.” Énɛ́ wú ɔ, é ɖó ná kpácá mǐ ɖɔ mɛ e gbé Satáan nɔ nya tawun lɛ́ é wɛ nyí nɔví ɖěɖěe ɖo nukún kpé dó nǔ lɛ́ wú wɛ lɛ́ é ǎ. É ba ɖɔ nɔví énɛ́ lɛ́ ní gɔn gbejí nɔ nú Jexóva, bo lɛ́ ba ɖɔ xɛsi ní ɖi mǐ.—1 Pi. 5:8.

11. Étɛ́ kpɔ́ndéwú Onɛzifɔ́ɔ tɔn ka kplɔ́n mǐ? (2 Timɔtée 1:16-18)

¹¹ Kpo ɖo gǔdo nɔ nú nɔví towe lɛ́ wɛ, bo lɛ́ tɛ́dó yě wú kpó gbejíninɔ kpó. (Xa 2 Timɔtée 1:16-18.) Hwenu e è sú Pɔ́lu dó gan mɛ é ɔ, lěe klisánwun xwe kanweko nukɔntɔn ɔ tɔn e nɔ nyí Onɛzifɔ́ɔ é wa nǔ gbɔn é gbɔn vo nú klisánwun e nɔ gbɛ hwenɛ́nu é ɖé lɛ́ tɔn. ‘Winnyá hu i ɖó gankpá mɛ e Pɔ́lu ɖe ɔ wú ǎ.’ É nyɔ́ wa ɔ, é ba fí e Pɔ́lu ɖe é, bɔ hwenu e é mɔ ɛ é ɔ, é wa nǔ tawun tawun ɖé lɛ́ dó d’alɔ ɛ. Gbɛ éɖée tɔn wɛ é ka sɔ́ ɖ’axɔ́ nu dó wa mɔ̌. Étɛ́ énɛ́ ka sixú kplɔ́n mǐ? Mǐ ɖó ná lɔn nú xɛsi ɖi nú gbɛtɔ́ ní wa nǔ dó mǐ wú, alǒ gbo kpo nyi ali jí nú mǐ bónú mǐ ná gɔn gǔdo nɔ nú nɔví mǐtɔn ɖěɖěe è ɖo ya dó ná wɛ lɛ́ é ǎ. É nyɔ́ wa hǔn, mi nú mǐ ní wa nǔ e wú mǐ kpé é bǐ bá d’alɔ yě. (Nǔx. 17:17) Yě ɖó hudó wǎnyíyí mǐtɔn kpó gǔdo e mǐ ná nɔ nú yě é kpó tɔn.

12. Étɛ́ kpɔ́ndéwú nɔví mǐtɔn e ɖo Russie lɛ́ é tɔn ka kplɔ́n mǐ?

¹² Nɔví mǐtɔn ɖěɖěe ɖo Russie lɛ́ é nɔ nɔ gǔdo nú nǔɖitɔ́ hǎtɔ́ yětɔn vívɛ́ ɖěɖěe ɖo ganxó lɛ́ é. Mi nú mǐ ní ɖɔ xó dó lěe yě nɔ wa mɔ̌ gbɔn é wú. Ényí è ɖo yě mɛɖé lɛ́ e è wlí dó gankpá mɛ é sín hwɛ ɖɔ wɛ ɔ, nɔví gěgé nɔ yi hwɛɖɔxɔsá ɔ dó nɔ gǔdo nú yě. Étɛ́ énɛ́ ka kplɔ́n mǐ? Ényí è kɔn cí dó nɔví ɖěɖěe ɖo nukɔn nú nǔ lɛ́ é wú, wlí yě, alǒ dó ya nú yě hǔn, ma nú xɛsi ɖi we ó. Nɔ xo ɖɛ dó ta yětɔn mɛ, nɔ kpé nukún dó mɛ e ɖo xwédo yětɔn mɛ lɛ́ é wú, bo lɛ́ ba ali tawun tawun ɖěvo e nu a ná xlɛ́ ɖɔ émí ɖo gǔdo nú yě ɖe lɛ́ é.—Mɛ. 12:5; 2 Kɔ. 1:10, 11.

13. Nɛ̌ mɛcáko ka sixú vɔ́ da nú jiɖe e mǐ ɖó dó Jexóva kpó tutoblónúnǔ tɔn kpó wú é gbɔn?

¹³ Hɛ̌nnumɔ mǐtɔn nǔmaɖitɔ́ lɛ́, azɔ̌gbɛ́ mǐtɔn lɛ́, alǒ wěmaxɔmɛvígbɛ́ mǐtɔn lɛ́ sixú nɔ cá mǐ ko, ɖó mǐ nɔ ɖɔ Mawuxó, alǒ nɔ xwedó nǔgbódodó Jexóva tɔn lɛ́ wútu. (1 Pi. 4:4) Yě sixú nɔ ɖɔ: “Un yí wǎn nú hwiɖésúnɔ mɛtún ɔ, amɔ̌, sinsɛn towe nɔ hɛn nǔ gángángán dín, bo ka sɔ́ lɛ́ ɖo zo jí ǎ.” Mɛɖé lɛ́ sixú nɔ mɔ xó ɖɔ dó mǐ wú, ɖó lěe mǐ nɔ wa nǔ xá mɛ e è ɖe sín agun mɛ lɛ́ é gbɔn é wú, bo nɔ ɖɔ: “Nɛ̌ a ka sixú ɖɔ ɖɔ émí nɔ yí wǎn nú mɛ gbɔn?” Xó mɔ̌hun lɛ́ sixú zɔ́n bɔ nǔxokpɔ́n ná byɔ́ ayi mǐtɔn mɛ. Mǐ sixú jɛ kinkanbyɔ́ mǐɖée jí ɖɔ: ‘Nǔ gěgé ɖó nukún wɛ Jexóva ka ɖe ɖo así ce a? Tutoblónúnǔ tɔn ka nɔ hɛn nǔ gángángán dín wɛ a?’ Ényí a ɖo ninɔmɛ mɔ̌hun mɛ gbɔn wɛ ɔ, nɛ̌ a ka sixú kpo ɖo Jexóva kpó tutoblónúnǔ tɔn kpó sɛkpɔ́ wɛ gbɔn?

14. Ényí mɛ ɖěvo lɛ́ nɔ cá nú mǐ ɖó gbɛ e zán sɔgbe xá nǔgbódodó Jexóva tɔn lɛ́ wɛ mǐ ɖe é wú ɔ, nɛ̌ mǐ ka ɖó ná nɔ wa nǔ gbɔn? (Ðɛhan 119:50-52)

¹⁴ Kán ɖ’é jí bá tɛ́dó nǔgbódodó Jexóva tɔn lɛ́ wú. Mɛ lɛ́ nɔ cá nú Jɔbu ɖó nǔgbódodó Jexóva tɔn lɛ́ wú e é nɔ tɛ́dó é wú có, é ka kpo ɖo mɔ̌ wa wɛ. Xɔ́ntɔn-nyíjɛtɔ́ Jɔbu tɔn lɛ́ ɖokpó tlɛ tɛ́n kpɔ́n bo ná bló b’ɛ ná lin ɖɔ, ényí é tlɛ ɖo nǔgbódodó Mawu tɔn lɛ́ xwedó wɛ kpó é gbɔ kpó ɔ, Mawu kún ɖo étɔn ɖɔ wɛ ó. (Jɔb. 4:17, 18;  22:3) Amɔ̌, Jɔbu ɖi nǔ nú adingbanxó énɛ́ lɛ́ ǎ. É tuun ɖɔ nǔgbódodó Jexóva tɔn e kúnkplá nǔ ɖagbe kpó nǔ nyanya kpó lɛ́ é sɔgbe, bo kán ɖ’é jí bo ná tɛ́dó yě wú. É lɔn bónú nǔwiwa mɛ ɖěvo lɛ́ tɔn zɔ́n bónú é gɔn gbejí nɔ ǎ. (Jɔb. 27:5, 6) Étɛ́ énɛ́ ka kplɔ́n mǐ? Ma lɔn nú cá e cá nú we wɛ mɛ ɖěvo lɛ́ ɖe é ní zɔ́n bónú a jɛ nǔ xo kpɔ́n dó nǔgbódodó Jexóva tɔn lɛ́ wú jí ó. Nɔ lin tamɛ dó nǔ e ko jɛ dó hwiɖésúnɔ mɛtún ɔ jí lɛ́ é jí. A sixú ko ɖó ayi wú azɔn mɔ̌kpán ɖɔ ényí a wa nǔ e Jexóva ɖɔ é sɔgbe lɛ́ é ɔ, gbɛzán towe nɔ kpɔ́n te. Kán ɖ’é jí bo ná nɔ gǔdo nú tutoblónúnǔ e nɔ tɛ́dó nǔgbódodó énɛ́ lɛ́ wú é. Énɛ́ ɔ, mɛ lɛ́ ná bo cá nú mǐ gbɔn ɖěbǔ ɔ, mǐ ná ɖó Jexóva sinsɛn te gbeɖé ǎ.—Xa Ðɛhan 119:50-52.

15. Étɛ́wú è ka cá Brizit ko?

¹⁵ Ð’ayi kpɔ́ndéwú nɔví nyɔ̌nu e nɔ nyí Brizit, bo nɔ nɔ Inde é tɔn wú. Mɛ e ɖo xwédo tɔn mɛ lɛ́ é nɔ cá ɛ ko ɖó nǔ e é ɖi nǔ ná lɛ́ é wútu. É bló batɛ́mu ɖo 1997, b’ɛ ná nɔ zaan é ɔ, azɔ̌ gblé dó asú tɔn e nyí nǔmaɖitɔ́ é. Énɛ́ wú ɔ, asú ɔ wá gbeta ɔ kɔn ɖɔ émí kpó asi émítɔn Brizit kpó, gɔ́ nú vǐ nyɔ̌nu émítɔn lɛ́ ná yi jɛ mɛjitɔ́ émítɔn e ɖo toxo ɖěvo mɛ lɛ́ é kpá. Amɔ̌, Brizit ná lɛ́ mɔ wǔvɛ́ ɖaxó ɖěvo lɛ́. Ðó asú tɔn ma sɔ́ ɖó azɔ̌ ɖě ɖo alɔnu ǎ wútu ɔ, é ɖó ná wa azɔ̌ hwebǐnu bá dó nɔ gǔdo nú xwédo ɔ. Gɔ́ ná ɔ, agun e sɛkpɔ́ yě é ɔ, kilomɛ́tlu 350 mɔ̌ wɛ é ɖó. É blá wǔ ɖɔ asú tɔn sín mɛ lɛ́ klán gbe xá ɛ ɖó nǔ e é ɖi nǔ ná lɛ́ é wú. Ninɔmɛ ɔ syɛ́n káká bɔ Brizit kpó xwédo tɔn kpó ɖó ná lɛ́ sɛ tɛn. Énɛ́ gúdo ɔ, ajijimɛ ɔ, asú tɔn kú. Nukɔnmɛ ɔ, vǐ nyɔ̌nu tɔn e ɖó xwe 12 kpowun é kú ɖó kansɛ́ɛzɔn wú. Nǔ e lɛ́ zɔ́n bɔ nǔ lɛ́ bǐ lɛ́ nylá d’é jí é wɛ nyí ɖɔ hɛ̌nnumɔ Brizit tɔn lɛ́ ɖésú lɛ́ dó hwɛ ɛ ɖɔ é wú wɛ nǔ e jɛ lɛ́ é bǐ sín. Yě ɖɔ ɖɔ ényí é ma ko húzú Kúnnuɖetɔ́ Jexóva tɔn wɛ ǎ ɔ, awě énɛ́ lɛ́ ɖě kún ná xo è ó. Nǔ ɖo mɔ̌ có, é ka kpo ɖo jiɖe ɖó dó Jexóva wú wɛ, bo kpo ɖo bǔ xá tutoblónúnǔ tɔn.

16. Nyɔ̌ná tɛ́ lɛ́ Brizit ka mɔ ɖó tɛ́ e é tɛ́dó Jexóva kpó tutoblónúnǔ tɔn kpó wú é wú?

¹⁶ Ðó fí e Brizit ɖe é ɔ, agun ɖě ma sɛkpɔ́ ɛ ǎ wútu ɔ, nukúnkpénǔwútɔ́ lɛ̌dó tɔn  ɖokpó dó wǔsyɛ́n lanmɛ n’i ɖɔ é ní nɔ ɖɔ Mawuxó ɖo xá e mɛ é ɖe é, lobo nɔ kpé nukún dó kplé lɛ́ wú ɖo xwé éɖésúnɔ tɔn gbe. Ðo bǐbɛ́mɛ ɔ, é hú agbɔ̌n ɛ tawun. Amɔ̌, é xwedó ali e è xlɛ́ ɛ é. É nɔ jlá wɛn ɖagbe ɔ, nɔ kpé nukún dó kplé lɛ́ wú ɖo xwé tɔn gbe, lobo nɔ lɛ́ ba hwenu bɔ é kpó vǐ nyɔ̌nu tɔn lɛ́ kpó nɔ sɛn Mawu ɖo xwédo mɛ. Étɛ́ mɛ énɛ́ ka tɔ́n kɔ dó? Brizit kpé wú bo jɛ Biblu kplɔ́n xá mɛ gěgé jí, bɔ mɛ e kplɔ́n nǔ xá wɛ é ɖe lɛ́ é gěgé bló batɛ́mu. Ðo 2005 ɔ, é húzú gběxosín-alijítɔ́ hwebǐnu tɔn. É mɔ ajɔ jiɖe e é ɖó dó Jexóva wú é kpó gbejí e é nɔ nú tutoblónúnǔ tɔn é kpó tɔn. Vǐ nyɔ̌nu tɔn lɛ́ ɖo Jexóva sɛn wɛ kpó gbejíninɔ kpó, bɔ din ɔ, agun we ko ɖo xá ɔ mɛ! Brizit kú d’é jí ɖɔ Jexóva ná émí hlɔ̌nhlɔ́n bɔ émí ɖí xwi xá wǔvɛ́ émítɔn lɛ́, lobo lɛ́ dɛ ɖo cá e xwédo émítɔn nɔ cá nú émí é nu.

17. Étɛ́ mǐ ka ɖó ná kán ɖ’é jí bá wa?

¹⁷ Satáan ba ɖɔ mǐ ní ɖi ɖɔ Jexóva nɔ wɔn ya nú mǐ hwenu e mǐ ɖo wǔvɛ́ lɛ́ mɛ gbɔn wɛ é, lé gǔdo ninɔ nú tutoblónúnǔ tɔn ná zɔ́n bɔ wǔvɛ́ mǐtɔn lɛ́ ná jɛjí. Ényí è kɔn cí dó nɔví e ɖo nukún kpé dó nǔ lɛ́ wú wɛ lɛ́ é wú, dó ya nú yě, alǒ wlí yě dó gan mɛ ɔ, Satáan nɔ ba ɖɔ nǔ énɛ́ lɛ́ ní nɔ dó xɛsi mǐ. Ényí è ɖo mǐ cá ko wɛ ɔ, Satáan nɔ ba ɖɔ énɛ́ ní vɔ́ da nú jiɖe e mǐ ɖó dó nǔgbódodó Jexóva tɔn lɛ́ kpó tutoblónúnǔ tɔn kpó wú é. Amɔ̌, mǐ ko tuun wlɛnwín e é nɔ zán lɛ́ é, bɔ yě nɔ dó xɛsi mǐ ǎ. (2 Kɔ. 2:11) Kán ɖ’é jí bá gbɛ́ adingban Satáan tɔn lɛ́, lobo kpo ɖo gbejí nɔ nú Jexóva kpó tutoblónúnǔ tɔn kpó wɛ. Flín ɖɔ Jexóva kún ná jó we dó gbeɖé ó. (Ðɛh. 28:7) Énɛ́ wú ɔ, ma lɔn nú nǔ ɖěbǔ ɖe we ɖó vo nú Jexóva ó!—Hlɔ̌. 8:35-39.

18. Étɛ́ jí mǐ ka ná ɖɔ xó dó ɖo xóta e bɔ d’é wú é mɛ?

¹⁸ Ðo xóta élɔ́ mɛ ɔ, mǐ ɖɔ xó dó wǔvɛ́ e mǐ sixú mɔ bɔ yě nɔ gosín agun ɔ gúdo é ɖé lɛ́ jí. Amɔ̌, wǔvɛ́ e mǐ nɔ mɔ ɖo agun ɔ mɛ lɛ́ é lɔ sixú bló bɔ jiɖe e mǐ ɖó dó Jexóva kpó tutoblónúnǔ tɔn kpó wú é gbɔn tɛ́nkpɔ́n nu. Nɛ̌ mǐ ka sixú ɖí xwi xá wǔvɛ́ énɛ́ lɛ́ b’ɛ ná kpa mǐ gbɔn? Mǐ ná ɖɔ xó dó énɛ́ jí ɖo xóta e bɔ d’é wú é mɛ.