1. Etɛ mɛɖé ka ɖó na wà cobo na jɛ xɔ ɖé gbá jí?

MǏ NI ɖɔ ɖɔ mɛɖé jló na gbá xɔ ɖé. É tuùn xɔ alɔkpa e é jló na gbá é. É na tɔ́n bo yì xɔ azɔ̌wanú ɖé lɛ kpowun bá jɛ xɔ ɔ gbá jí wɛ à? Eǒ. Cobonu é na bɛ́ ɔ, é ɖó na wà nǔ taji ɖé hwɛ̌; é na lɛ́n akwɛ nabi e xɔ ɔ na ɖu é. Etɛwu? Ðó enɛ na zɔ́n bɔ é na kpɔ́n ɖɔ akwɛ e ɖ’así emitɔn é na kpé kaka bɔ xɔ ɔ na fó à jí. Enyi é xwè sɔ bo lɛ́n akwɛ e é na byɔ é jɛ nukɔn ɔ, é na ɖibla kpéwú bo fó xɔ tɔn.

2. Sɔgbe xá Luki 14:27-30 ɔ, etɛ jí a ka ɖó na xwè sɔ bo lin tamɛ dó cobo bló baptɛm?

² Wanyiyi e a ɖó nú Jehovah é kpo lee nǔ tɔn nɔ sù nukún towe mɛ gbɔn é kpo ka ko sísɛ́ we bɔ a nɔ lin na bló baptɛm wɛ à? Enyi mɔ̌ wɛ hǔn, a ɖó na wá gbeta ɖokpo ɔ kɔn nya e jló na gbá xɔ ɖé é ɖɔhun. Etɛwu mǐ ka sixu ɖɔ mɔ̌? Kpɔ́n xó e Jezu ɖɔ ɖò Luki 14:27-30 mɛ lɛ é. (Xà.) É ɖò nǔ e ahwanvu tɔn nyínyí byɔ lɛ é tinmɛ wɛ. Bonu mǐ na nyí ahwanvu tɔn ɔ, mǐ ɖó na sɔ́ jlǒ dó yí gbè nú “akwɛ nabi” e é byɔ é; enɛ wɛ nyí wuvɛ̌ lɛ kpo vɔsisa lɛ kpo. (Luk. 9:23-26; 12:51-53) Enɛ wu ɔ, cobonu a na bló baptɛm ɔ, a ɖó na xwè sɔ bo lin tamɛ dó nǔ e é byɔ lɛ é bǐ jí hwɛ̌. Enɛ gudo ɔ, Klisanwun e bló baptɛm é ɖé ɖɔhun ɔ, a na ɖò gbesisɔmɛ hugǎn bo na kpó ɖò Mawu sɛn wɛ kpo gbejininɔ kpo.

3. Etɛ jí mǐ ka na ɖɔ xó dó ɖò xóta elɔ mɛ?

³ É ka jɛxa ɖɔ è ni savɔ̌ enɛ lɛ bo huzu ahwanvu Klisu tɔn e bló baptɛm é ɖé à? Ganji! Baptɛm nɔ hun nyɔna maxamaxa lɛ sín hɔn nú mɛ ɖò égbé kpo sɔ kpo. Mi nú mǐ ni ɖɔ xó dó nǔkanbyɔ taji e kúnkplá baptɛm é ɖé lɛ jí. Enɛ na  d’alɔ we bɔ a na na sinkɔn nú nǔkanbyɔ elɔ: “Un ka ɖò gbesisɔmɛ bo na bló baptɛm à?”

4. (a) Etɛ ka nyí mɛɖée zízé jó nú Jehovah? (b) Lee Matie 16:24 ɖɔ gbɔn é ɔ, etɛ ka nyí tinmɛ è ni “jó tito [mɛ]ɖesunɔ tɔn lɛ dó” tɔn?

⁴ Etɛ ka nyí mɛɖée zízé jó nú Jehovah? Cobonu a na bló baptɛm ɔ, a ɖó na zé hwiɖée jó nú Jehovah. Enyi a jló na zé hwiɖée jó nú Jehovah ɔ, a na xoɖɛ vívɛ́ sɛ́dó è, bo ɖɔ n’i ɖɔ emi jló na zán gbɛzán emitɔn dó sɛn ɛ kaka sɔyi. Nú a zé hwiɖée jó nú Mawu ɔ, enɛ xlɛ́ ɖɔ a “jó tito [hwi]ɖesunɔ tɔn lɛ dó” nɛ. (Xà Matie 16:24.) Jehovah tɔn wɛ a nyí dìn; wǔjɔmɛ ɖaxó ɖé wɛ. (Hlɔ. 14:8, nwt) A ɖò ɖiɖɔ n’i wɛ ɖɔ bɛ́sín dìn ɖidó ɔ, nǔ e na ɖò taji hugǎn nú we é wɛ nyí ɖɔ a na nɔ sɛn ɛ, é nyí a na hɛn xomɛ hwiɖesunɔ tɔn hun ǎ. Akpá ɖé wɛ zě e a zé hwiɖée jó nú Mawu é nyí, bɔ a dó dó nǔjɔnǔ mɛ. Jehovah nɔ hɛn kan gli mǐtɔn bonu mǐ na d’akpá enɛ ǎ. Amɔ̌, enyi mǐ dó ɔ, é nɔ ɖó nukún ɖɔ mǐ ni ɖè.—Ðɛh. 116:12, 14.

5. Nɛ̌ mɛɖée zízé jó nú Jehovah ka cá kan xá baptɛm gbɔn?

⁵ Nɛ̌ mɛɖée zízé jó nú Jehovah ka cá kan xá baptɛm gbɔn? Hwenu e a zé hwiɖée jó nú Jehovah é ɔ, mɛ ɖebǔ tuùn ǎ; hwi kpo é kpo kɛɖɛ tɛntin wɛ é ɖè. Baptɛm ɔ, agbawungba wɛ è ka nɔ bló ɖè; bɔ hwɛhwɛ ɔ, é nɔ nyí ɖò kpléɖókpɔ́ ɖé jí. Enyi a bló baptɛm ɔ, a na xlɛ́ mɛ ɖevo lɛ ɖɔ emi ko zé emiɖée jó nú Jehovah. * Enɛ wu ɔ, baptɛm towe na zɔ́n bɔ mɛ ɖevo lɛ na tuùn ɖɔ a yí wǎn nú Jehovah Mawu towe kpo ayi, lindɔ̌n, linlin gɔ́ nú hlɔnhlɔn towe bǐ kpo, bo kánɖeji bo na sɛn ɛ kaka sɔyi.—Mak. 12:30.

6-7. Sɔgbe xá 1 Piyɛ́ɛ 3:18-22 ɔ, ɖɔ hwɛjijɔ e wu baptɛm biblo ɖò dandan é we.

⁶ Dandan jɛn è ka na bló baptɛm à? Mǐ ni lin tamɛ dó xó e ɖò 1 Piyɛ́ɛ 3:18-22 mɛ lɛ é jí. (Xà ɖò nwt mɛ.) Lee tɔjihun ɔ nyí xlɛ̌ e nukún nɔ mɔ é bo ɖè nǔɖiɖi Nɔwée tɔn xlɛ́ gbɔn é ɔ, mɔ̌ wɛ baptɛm towe na xlɛ́ nyi wɛn ɖɔ a ko zé hwiɖée jó nú Jehovah gbɔn. Amɔ̌, baptɛm ɔ ka ɖò dandan dóo à? Ganji. Piyɛ́ɛ ɖɔ hwɛjijɔ e wu wɛ é. Nukɔntɔn ɔ, é “ɖò mi lɔ hwlɛngán wɛ.” Enyi mǐ ɖè afɔ e ɖò dandan lɛ é bo xlɛ́ ɖɔ mǐ ɖi nǔ nú Jezu, bo ɖi nǔ ɖɔ é kú nú mǐ, bɔ è fɔ́n ɛ sín kú dó jixwé, lobɔ é “ɖò ɖisíxwé nú Mawu” ɔ, baptɛm sixu hwlɛn mǐ.

⁷ Wegɔ́ ɔ, baptɛm nɔ zɔ́n bɔ mǐ nɔ ɖó “ayixa mímɛ́ ɖé.” Enyi mǐ sɔ́ mǐɖée jó nú Mawu bo bló baptɛm ɔ, kancica bǔnɔ ɖé nɔ ɖò mǐ tɛntin. Ðó mǐ lɛkɔ sín hwɛ mǐtɔn lɛ gudo nǔgbo nǔgbo bo ɖi nǔ nú gbɛxixɔ ɔ wutu ɔ, Mawu nɔ sɔ́ hwɛ mǐtɔn lɛ kɛ mǐ. Enɛ wu ɔ, mǐ sixu ɖó ayixa mímɛ́ ɖé ɖò nukɔn tɔn.

8. Etɛ jí gbeta e kɔn a wá bo na bló baptɛm é ka ɖó na jinjɔn?

⁸ Etɛ lɛ jí gbeta e kɔn a wá bo na bló baptɛm é ka ɖó na jinjɔn? Biblu e a kplɔ́n kpo sɔxwixwe kpo é ko zɔ́n bɔ a kplɔ́n nǔ gegě dó Jehovah wu, ɖi mɛ alɔkpa e é nyí é kpo ali tɔn lɛ kpo. Nǔ e a kplɔ́n dó wǔ tɔn lɛ é byɔ ayi mɛ nú we tawun bo sísɛ́ we bɔ a yí wǎn n’i tawun. Wanyiyi e a ɖó nú Jehovah é jí wɛ gbeta e kɔn a wá bo na bló baptɛm é ɖó na jinjɔn jɛ nukɔn.

9. Lee Matie 28:19, 20 ɖɔ gbɔn é ɔ, etɛ ka nyí tinmɛ è ni bló baptɛm ɖò Tɔ́ ɔ, Vǐ ɔ kpo gbigbɔ mímɛ́ kpo sín nyikɔ mɛ tɔn?

⁹ Gbeta e kɔn a wá bo na bló baptɛm é lɛ́ jinjɔn nǔgbo Biblu tɔn e a yí gbè na lɛ é jí. Kpɔ́n nǔ e Jezu ɖɔ hwenu e é ɖegbe nú mɛ  ɖɔ è ni kplɔ́n nǔ xá mɛ lɛ bonu ye ni huzu ahwanvu é. (Xà Matie 28:19, 20.) Nú Jezu ɔ, mɛ ɖěɖee bló baptɛm lɛ é ɖó na wà mɔ̌ ɖò “Tɔ́ ɔ, Vǐ ɔ, kpodo [gbigbɔ mímɛ́] ɔ kpo sín nyikɔ” mɛ. Etɛ ka nyí tinmɛ enɛ tɔn? A ɖó na ɖi nǔ nú nǔgbo e Biblu kplɔ́n mɛ dó Jehovah, Vǐ tɔn Jezu, kpo gbigbɔ mímɛ́ kpo wu é kpo ayi towe bǐ kpo. Nǔgbo enɛ lɛ ɖó hlɔnhlɔn tawun bo sixu byɔ ayi mɛ nú we titewungbe. (Ebl. 4:12) Mi nú mǐ ni lɛ́ kpɔ́n ɖé lɛ ɖò ye mɛ.

10-11. Nǔgbo e kúnkplá Tɔ́ ɔ é tɛ lɛ a ka ko kplɔ́n bo yí gbè na?

¹⁰ Lin tamɛ dó hwenu e a kplɔ́n nǔgbo elɔ lɛ dó Tɔ́ towe wu é jí: “Nyikɔ [tɔn] nɔ nyí Jehovah,” b’ɛ “nyí Ajalɔnlɔn ɖò ayikúngban ɔ bǐ jí” bɔ éɖokponɔ géé wɛ nyí ‘Mawu nǔgbo ɔ.’ (Ðɛh. 83:18, nwt; Eza. 37:16) É wɛ nyí Gbɛɖotɔ́ mǐtɔn, bɔ “[é] sí wɛ hwlɛngán ɔ ɖè.” (Ðɛh. 3:9; 36:10) É bló tuto bo na hwlɛn mǐ sín hwɛhuhu kpo kú kpo sí bo na mǐ nukúnɖiɖó gbɛ̀ mavɔmavɔ tɔn. (Jaan 17:3) Hwiɖée zízé jó nú Jehovah kpo baptɛm kpo na xlɛ́ ɖɔ a nyí Kúnnuɖetɔ́ Jehovah tɔn ɖé. (Eza. 43:10-12) A na ɖò mɛsɛntɔ́ Mawu tɔn e gbɔn gbɛ̀ ɔ bǐ mɛ bo nɔ gó ɖó nyikɔ Mawu tɔn ɖò ta nú ye, bɔ ye nɔ lɛ́ bló bɔ mɛ ɖevo lɛ nɔ tuùn lɛ é mɛ.—Ðɛh. 86:12.

¹¹ Wǔjɔmɛ ɖaxó wɛ ɖɔ è ni mɔ nukúnnú jɛ nǔ e Biblu kplɔ́n mɛ dó Tɔ́ ɔ wu lɛ é mɛ! Enyi a yí gbè nú nǔgbo xɔ akwɛ enɛ lɛ ɔ, ayixa towe na sísɛ́ we bɔ a na sɔ́ hwiɖée jó nú Jehovah bo bló Baptɛm.

12-13. Nǔgbo e kúnkplá Vǐ ɔ é tɛ lɛ a ka kplɔ́n bo yí gbè na?

¹² Nɛ̌ a ka wà nǔ gbɔn hwenu e a kplɔ́n nǔgbo elɔ lɛ dó Vǐ ɔ wu é? Jezu wɛ nyí mɛ taji hugǎn wegɔ́ e ɖò wɛkɛ ɔ mɛ é. É wɛ nyí Gbɛxɔnúmɛtɔ́ mǐtɔn. É sɔ́ jlǒ dó sɔ́ gbɛ̀ tɔn jó dó ta mǐtɔn mɛ. Enyi mǐ xlɛ́ ɖò nǔwiwa mǐtɔn lɛ mɛ ɖɔ mǐ ɖó nǔɖiɖi nú gbɛxixɔ ɔ ɔ, è sixu sɔ́ hwɛ mǐtɔn lɛ kɛ mǐ, mǐ sixu ɖó kancica ɖé xá Mawu, bo lɛ́ mɔ gbɛ̀ mavɔmavɔ. (Jaan 3:16) Jezu wɛ nyí Vɔsanúxwlémawutɔ́ Ðaxó mǐtɔn. É jló na d’alɔ mǐ bonu mǐ na ɖu lè gbɛxixɔ ɔ tɔn bo lɛ́ ɖó kancica syɛnsyɛn ɖé xá Mawu. (Ebl. 4:15; 7:24, 25) Ðó é wɛ nyí Axɔ́su nú Axɔ́suɖuto Mawu tɔn wutu ɔ, Jehovah na gbɔn jǐ tɔn dó bló bɔ nyikɔ Tɔn na nyí nǔ mímɛ́, ɖó nǔ nǔnyanyawiwa nu, lobo hɛn nyɔna mavɔmavɔ lɛ wá ɖò Palaɖisi e ja é mɛ. (Mat. 6:9, 10; Nǔɖe. 11:15) Jezu wɛ nyí kpɔ́ndéwú mǐtɔn. (1 Pi. 2:21) É zán gbɛ̀ tɔn dó wà jlǒ Mawu tɔn bo gbɔn mɔ̌ mɛ bo zé kpɔ́ndéwú ɖé ɖ’ayǐ nú mǐ.—Jaan 4:34.

¹³ Enyi a yí gbè nú nǔ e Biblu kplɔ́n we dó Jezu wu é ɔ, a na wá yí wǎn nú Vǐ vívɛ́ Mawu tɔn. Wanyiyi enɛ na sísɛ́ we bɔ a na zán gbɛ̀ towe dó wà jlǒ Mawu tɔn Jezu ɖɔhun. Wǎgbɔ tɔn ɔ, a na ba na sɔ́ gbɛ̀ towe jó nú Jehovah bo bló Baptɛm.

14-15. Nǔgbo e kúnkplá gbigbɔ mímɛ́ é tɛ lɛ a ka kplɔ́n bo yí gbè na?

¹⁴ Etɛ a ka lin hwenu e a kplɔ́n nǔgbo elɔ lɛ dó gbigbɔ mímɛ́ wu é? É nyí gbɛtɔ́ ǎ, loɔ, hlɔnhlɔn e Mawu nɔ sɔ́ dó wà nǔ na é wɛ. Jehovah zán gbigbɔ mímɛ́ tɔn dó xlɛ́ ali mɛ e wlan Biblu ɔ lɛ é, bɔ gbigbɔ ɔ nɔ d’alɔ mǐ bɔ mǐ nɔ mɔ nukúnnú jɛ Biblu ɔ mɛ hwenu e mǐ ɖò xixa wɛ é lobo nɔ lɛ́ zán ɖ’eji. (Jaan 14:26; 2 Pi. 1:21) Jehovah nɔ gbɔn gbigbɔ tɔn gblamɛ bo nɔ na mǐ “hlɔnhlɔn aditi” ɔ. (2 Kɔ. 4:7) Gbigbɔ ɔ nɔ na mǐ hlɔnhlɔn bɔ mǐ nɔ jla wɛnɖagbe ɔ, fun ahwan xá mɛdókpɔ́n lɛ, ɖí xwi xá awakanmɛkúmɛ, bo nɔ dɛ ɖò mɛtɛnkpɔn lɛ nu. É nɔ d’alɔ mǐ bɔ mǐ nɔ ɖè jijɔ ɖagbe ɖěɖee ɖò “nǔ e [gbigbɔ mímɛ́] nɔ na mɛ” é mɛ é xlɛ́. (Ga. 5:22) Mawu nɔ hun alɔ bo nɔ na gbigbɔ tɔn mɛ ɖěɖee ɖeji dó wǔtu  tɔn, bo byɔ ɛ dó nǔjɔnǔ mɛ lɛ é.—Luk. 11:13.

¹⁵ Tuùn e mǐ tuùn ɖɔ mɛsɛntɔ́ Jehovah tɔn lɛ sixu ɖeji dó gbigbɔ mímɛ́ wu, b’ɛ na d’alɔ ye bɔ ye na sɛn ɛ é vɔ́ jiɖe na mǐ, bo dó gbɔ nú mǐ tawun! Enyi a yí gbè nú nǔgbo ɖěɖee a ko kplɔ́n dó gbigbɔ mímɛ́ wu lɛ é ɔ, é na sísɛ́ we bɔ a na zé hwiɖée jó nú Mawu bo bló baptɛm.

16. Etɛ mǐ ka kplɔ́n kaka jɛ fí dìn?

¹⁶ Enyi a wá gbeta ɔ kɔn bo na zé hwiɖée jó nú Mawu bo bló baptɛm hǔn, afɔ taji ɖé ɖè wɛ a ɖè mɔ̌ nɛ. Lee mǐ ko kplɔ́n gbɔn é ɔ, mǐ ɖó na sɔ́ jlǒ dó yí gbè nú akwɛ nabi e é byɔ é, enɛ wɛ nyí wuvɛ̌ lɛ kpo vɔsisa lɛ kpo. Amɔ̌, nyɔna lɛ hugǎn vɔsisa lɛ flaflá tɔn. Baptɛm sixu hwlɛn we, é na lɛ́ zɔ́n bɔ a na ɖó ayixa mímɛ́ ɖé ɖò Mawu nukɔn. Wanyiyi e a ɖó nú Jehovah Mawu é wɛ nyí nǔ nukɔntɔn e jí gbeta e kɔn a wá bo na bló baptɛm é ɖó na jinjɔn é. A ɖó na lɛ́ ɖi nǔ nú nǔgbo e a ko kplɔ́n dó Tɔ́ ɔ, Vǐ ɔ kpo gbigbɔ mímɛ́ ɔ kpo wu lɛ é kpo ayi towe bǐ kpo. Ee a gbéjé nǔ e mǐ ɖɔ kaka jɛ fí dìn lɛ é kpɔ́n gudo é ɔ, xósin tɛ a ka na na nú nǔkanbyɔ elɔ: “Un ka ɖò gbesisɔmɛ bo na bló baptɛm à?”

17. Afɔ tɛ lɛ mɔ̌ a ka sixu ɖè cobo bló baptɛm?

¹⁷ Enyi a mɔ ɖɔ emi ɖò gbesisɔmɛ bo na bló baptɛm ɔ, é ɖò wɛn ɖɔ a ko ɖè afɔ gegě bo na ɖó kancica ɖagbe ɖé xá Jehovah. * Ðó a nɔ kplɔ́n Biblu hwɛhwɛ wutu ɔ, a ko tuùn nǔ gegě dó Jehovah kpo Jezu kpo wu. A ko tɛ́n kpɔ́n bo ɖó nǔɖiɖi. (Ebl. 11:6) A ganjɛ akpá Mawu tɔn e ɖò Biblu mɛ lɛ é wu bǐ mlɛ́mlɛ́, bo kúdeji ɖɔ nǔ e a ɖi nú vɔsisa Jezu tɔn é sixu hwlɛn we sín hwɛhuhu kpo kú kpo sí. Hwɛ e a hu lɛ é ko vɛ́ nú we tawun, bɔ a ko lɛ́ byɔ Jehovah ɖɔ é ni sɔ́ ye kɛ emi. A ko lɛkɔ sín gbɛ̀ nyanya e a nɔ zán ɖ’ayǐ é gudo bǐ mlɛ́mlɛ́, bo ko jɛ gbɛ̀ e nɔ nyɔ́ Mawu nukúnmɛ é zán jí. (Mɛ. 3:19) Nǔ e a ɖi nǔ na lɛ é ɖiɖɔ nú mɛ ɖevo lɛ nɔ sɔ́ akpakpa we. A ko jɛxa bo nyí wɛnjlatɔ́ e ma ko bló baptɛm ǎ é ɖé, bo ko jɛ wɛn jla xá agun ɔ jí. (Mat. 24:14) Afɔ taji enɛ lɛ e a ɖè é zɔ́n bɔ Jehovah nɔ gó ɖó wǔ we. A ko dó awǎjijɛ n’i tawun.—Nǔx. 27:11.

18. Nǔ ɖevo tɛ a ka ɖó na wà cobo sixu bló baptɛm?

¹⁸ Cobonu a na sixu bló baptɛm ɔ, é lɛ́ kpò nǔ klewun ɖevo lɛ bɔ a ɖó na wà. Lee mǐ ko kplɔ́n gbɔn wá yì é ɔ, a ɖó na zé hwiɖée jó nú Mawu. Xoɖɛ vívɛ́ sɛ́dó è ɖò nǔglɔ, lobo d’akpá n’i ɖɔ emi na zán gbɛzán emitɔn dó wà jlǒ tɔn. (1 Pi. 4:2) Enɛ gudo hǔn, ɖɔ nú titoblonunutɔ́ kplékplé mɛxo lɛ tɔn tɔn ɖɔ emi jló na bló baptɛm. É na ɖɔ nú mɛxo ɖé lɛ bɔ ye na wá mɔ we. Kɛnklɛn nú ado ni ma hu we  hwenu e ye na wá mɔ we é ó. É ɖò wɛn ɖɔ nɔví sunnu vívɛ́ enɛ lɛ tuùn we bo yí wǎn nú we. Ye na vɔ́ nǔkplɔnmɛ dodó Biblu tɔn lɛ jí gbɔn xá we. Ye jló na kúdeji ɖɔ a mɔ nukúnnú jɛ nǔkplɔnmɛ enɛ lɛ mɛ, bo lɛ́ tuùn lee mɛɖée zízé jó nú Mawu kpo baptɛm biblo kpo ɖò taji sɔ́ é. Enyi ye yí gbè ɖɔ a ko sɔgbe nǔgbo ɔ, ye na ɖɔ nú we ɖɔ a sixu bló baptɛm ɖò kpléɖókpɔ́ e na bɔ d’ewu é jí.

19-20. Etɛ a ka ɖó na bló ɖò baptɛm towe gudo? Nɛ̌ a ka sixu wà mɔ̌ gbɔn?

¹⁹ Enyi a bló baptɛm gudo ɔ, etɛ a ka ɖó na wà? * Flín ɖɔ hwiɖée e a zé jó nú Jehovah é nyí akpá ɖé, bɔ é nɔ ɖó nukún ɖɔ a ni ɖè. Enɛ wu ɔ, ɖò baptɛm towe gudo ɔ, a ɖó na zán gbɛ̀ sɔgbe xá hwiɖée e a zé jó n’i é. Nɛ̌ a ka sixu wà mɔ̌ gbɔn?

²⁰ Tɛ́dó agun e mɛ a ɖè é wu. Ðó a bló baptɛm bo nyí Klisanwun ɖé wutu ɔ, a byɔ kplékplé nɔví lɛ tɔn mǐtɔn mɛ. (1 Pi. 2:17) Nɔví e ɖò agun towe mɛ lɛ é nyí xwédo gbigbɔ tɔn towe. Enyi a nɔ yì kplé lɛ hwɛhwɛ ɔ, a na hɛn kancica e ɖò hwi kpo ye kpo tɛntin é lidǒ. Nɔ xà Xó Mawu tɔn bo nɔ lin tamɛ d’eji gbè bǐ gbè. (Ðɛh. 1:1, 2) Enyi a xà akpáxwé Biblu tɔn ɖé gudo hǔn, nɔ lin tamɛ dó nǔ e a xà é jí ganji. Enɛ ɔ, xó ɔ na byɔ ayi towe mɛ. Nɔ “xoɖɛ” hwebǐnu. (Mat. 26:41) Ðɛ e a nɔ xò kpo ayi bǐ kpo lɛ é na zɔ́n bɔ a na sɛkpɔ́ Jehovah. “Axɔ́suɖuɖu Mawu tɔn . . . ni nɔ mya nukún nú [we] jɛ nukɔn.” (Mat. 6:33) A sixu wà mɔ̌ gbɔn wɛnjijlazɔ́ ɔ sísɔ́ ɖó tɛn nukɔntɔn mɛ ɖò gbɛzán towe mɛ gblamɛ. Enyi a nɔ ɖ’alɔ ɖò sinsɛnzɔ́ ɔ mɛ hwɛhwɛ ɔ, nǔɖiɖi towe na lidǒ, a sixu lɛ́ d’alɔ mɛ ɖevo lɛ bɔ ye wlí gbɛ̀ li ɔ.—1 Tim. 4:16.

21. Ali tɛ baptɛm towe ka na hun nú we?

²¹ Hwiɖée zízé jó nú Jehovah bo bló baptɛm wɛ nyí gbeta taji hugǎn e kɔn a na wá ɖò gbɛzán towe mɛ kpɔ́n é. Nǔgbo wɛ ɖɔ é ɖó wuvɛ̌, bo lɛ́ byɔ vɔsisa. É ka jɛxa ɖɔ è ni savɔ̌ lɛ à? Ganji! A na bo mɔ wuvɛ̌ ɖebǔ ɖò gbɛ̀ xóxó elɔ mɛ ɔ, wuvɛ̌ ‘kpɛɖé’ jɛn é na nyí bo na lɛ́ nyí “nú hwenu ɖé.” (2 Kɔ. 4:17) Baptɛm towe na hun gbɛzán e na jɛmɛ nú we hugǎn é sín ali nú we dìn, bɔ a na lɛ́ mɔ “gbɛ̀ jɔ gbɛ̀” e ja é. (1 Tim. 6:19) Enɛ wu ɔ, kɛnklɛn bo lin tamɛ kpo sɔxwixwe kpo, bo lɛ́ xoɖɛ dó xósin e a na na nú nǔkanbyɔ elɔ é jí: “Un ka ɖò gbesisɔmɛ bo na bló baptɛm à?”