‘Mi ɖó na nyí mɛ̌si.’ (Ebl. 5:12) Dǒ nukún mɛ kpɔ́n! Jehovah e nyí Mɛ̌si ɖagbe hugǎn wɛkɛ ɔ tɔn é ylɔ́ mǐ, bonu mǐ na kplɔ́n nǔ mɛ ɖevo lɛ dó wǔ tɔn! Azɔ̌ ɖebǔ e è ɖè nú mǐ, bɔ mǐ na kplɔ́n nǔgbo ɔ mɛ dó Jehovah wu ɖò xwédo mɛ, ɖò agun mɛ, alǒ ɖò sinsɛnzɔ́ ɔ mɛ é, nyí wǔjɔmɛ xɔ akwɛ ɖé kpo azɔ̌ kpinkpɛn ɖé kpo. Nɛ̌ mǐ ka sixu kpéwú gbɔn?

Xósin ɔ ɖò nǔ e mɛsɛ́dó Pɔlu wlan sɛ́dó Timɔtée é mɛ: “Ðǒkan dó Mawuxó xixa ɖò agun mɛ, kpodo Mawuxóɖiɖɔ kpo wu, bo lɛ́ ɖókan dó nǔkplɔnmɛ wu.” Pɔlu ɖɔ gɔ́ na ɖɔ: “Nú a ɖò nǔ wà gbɔn mɔ̌ wɛ ɔ, a na hwlɛn hwiɖée gán, bo na hwlɛn mɛ e ɖò tó ɖó we wɛ lɛ bǐ gán.” (1 Tim. 4:13, 16) Gbɛhwlɛngán sín wɛn ɖé wɛ a ɖó bo na dó mɛ lɛ. Enɛ wu ɔ, é sɔgbe ɖɔ a ni dó gǎn bonu nǔxixa towe kpo mɛkplɔnkplɔn towe kpo na kpɔ́n te d’eji. È sɔnǔ nú alɔnuwema elɔ bonu é na d’alɔ we nú a na wà mɔ̌. Nǔ e ɖ’emɛ lɛ é kpɛɖé ɖíe:

Nǔkplɔnmɛtɔ́ ɖě ɖè bo cí Jehovah ɖɔhun ǎ. (Jɔb. 36:22) Nǔgbo wɛ ɖɔ alɔnuwema elɔ na d’alɔ we bɔ nǔxixa kpo mɛkplɔnkplɔn kpo sín nǔwukpíkpé e a ɖó é na lɛ́ sɛ́ sò d’eji, amɔ̌, ma wɔn gbeɖé ɖɔ Jehovah wɛ nyí Jɔtɛn wɛn mǐtɔn tɔn ó, bɔ é wɛ nɔ dɔn gbɛtɔ́ lɛ. (Jaan 6:44) Enɛ wu ɔ, nɔ xoɖɛ hwɛhwɛ bo nɔ byɔ gbigbɔ mímɛ́. Nɔ zán Xó Mawu tɔn hwɛhwɛ. Nɔ dɔn ayi mɛ lɛ tɔn wá Jehovah jí, ni ma nyí dó hwiɖesunɔ jí gbeɖé ó. Tɛ́n kpɔ́n bonu tóɖówetɔ́ lɛ ni ɖó wanyiyi ɖaxó nú Jehovah sín ayi mɛ.

È ylɔ́ we ɖɔ a ni wá kplɔ́n wɛn e ɖò taji hugǎn bɔ è sɔ́ d’así nú gbɛtɔ́ lɛ kpɔ́n é mɛ. Mǐ ɖeji ɖɔ enyi a ganjɛ ‘hlɔnhlɔn e Mawu nɔ na mɛ é’ wu ɔ, é na kpa we.​—1 Pi. 4:11.

Nǔkplɔnmɛtɔ́ gbɛ̌ towe lɛ,

Hagbɛ̌ Alixlɛ́mɛtɔ́ Kúnnuɖetɔ́ Jehovah Tɔn lɛ Tɔn