1. Gbeta tɛ kɔn mɛ lɛ bǐ ka ɖó na wá dó mɛ e ye na sɛn é wu égbé?

JEZU ɖɔ: “Mɛ e ma ɖò ahwan ce mɛ ǎ ɔ, mɛ enɛ ɔ mɔ mì gbɔ ǎ.” (Matie 12:30) Enyi mǐ ma nɔ Jehovah sín ahwan mɛ ǎ ɔ, mǐ ka na nɔ Satáan sín ahwan mɛ. Mɛ gegě nɔ lin ɖɔ emi ɖò Mawu sɛn wɛ lee é jɛxa gbɔn é, amɔ̌, Biblu ɖɔ ɖɔ Satáan “flú gbɛ̀ ɔ bǐ.” (Nǔɖexlɛ́mɛ 12:9) Gbɛtɔ́ livi mɔkpan nɔ lin ɖɔ emi ɖò Mawu sɛn wɛ, amɔ̌, nǔgbo ɔ wɛ nyí ɖɔ Satáan Awoví sɛn wɛ ye ɖè! Gbɛtɔ́ lɛ bǐ wɛ ɖó na wá gbeta ɖé kɔn: Ye ɖó na sɛn Jehovah, Mawu e ma “nɔ ɖó adingban ǎ” é, alǒ Satáan, ee nyí “adingbannɔ lɛ sín tɔ́” é.—Titu 1:2; Jaan 8:44.

2. Ðɔ ali e nu Satáan nɔ tɛ́n kpɔ́n bá glɔ́n ali nú mɛ lɛ ɖè, bonu ye ni ma sɛn Jehovah ó é ɖokpo.

² Jlǒ sísɔ́ dó sɛn Jehovah ɔ, gbeta e nǔnywɛ kpé é ɖé wɛ bo nɔ zɔ́n bɔ nǔ mɛtɔn nɔ nyɔ́ Mawu nukúnmɛ. Amɔ̌, Satáan nɔ hun xomɛ dó mɛ e nɔ sɛn Mawu lɛ é ɖebǔ wu ǎ, é nɔ dó tagba nú ye. Ali e nu é nɔ wà mɔ̌ ɖè é ɖokpo wɛ nyí ɖɔ é nɔ bló bɔ mɛ lɛ nɔ cá mǐ ko alǒ klán gbè xá mǐ, bo tlɛ nɔ zán xɔ́ntɔn mǐtɔn lɛ alǒ hagbɛ̌ xwédo mǐtɔn tɔn lɛ dó wà mɔ̌. Jezu gb’akpá nú mǐ ɖɔ: “Xwé mɛtɔn gbè nu lɛ na huzu kɛntɔ́ mɛtɔn.”—Matie 10:36.

3. Enyi mɛ towe lɛ abǐ xɔ́ntɔn towe lɛ klán gbè xá we ɖó Mawu sínsɛ́n wu ɔ, etɛ a ka na wà?

³ Enyi enɛ jɛ dó jǐ we ɔ, etɛ a ka na wà? Mɛ gegě tuùn ɖɔ ali e nu sɛn Mawu ɖè wɛ emi ɖè é kún sɔgbe ó, amɔ̌, ye nɔ xò nǔ kpɔ́n dó kɔlilɛ wu. Ye nɔ lin ɖɔ kɔlilɛ na nyí gbejimanɔ nú mɛ emitɔn lɛ. Hwɛ yetɔn ka jɔ à? Enyi a sè ɖɔ mɛ vívɛ́ná emitɔn lɛ nɔ  zán azɔ gblégblé lɛ ɔ, a na gb’akpá nú ye dó awovínú e ɖ’emɛ lɛ é wu à cé? A na gɔ́ nú ye bɔ hwi lɔ na nu azɔ ǎ, kabǐ?

4. Etɛ Jozuwée ka ɖɔ nú Izlayɛli-ví hwetɔnnu tɔn lɛ dó mɛ e ye na sɛn é wu?

⁴ Jozuwée dó wusyɛn lanmɛ nú Izlayɛli-ví lɛ ɖɔ ye ni jó nǔwalɔ sinsɛn nǔvú tɔn lɛ kpo aca tɔ́gbó yetɔn lɛ tɔn lɛ kpo dó. É ɖɔ: “Dìn ɔ, mi ɖó sísí nú Mawu Mavɔmavɔ bo sɛn ɛ kpodo ayixa mitɔn bǐ kpo, bo nɔ gbeji n’i. Vodun e tɔ́gbó mitɔn lɛ nɔ sɛn ɖ’ayǐ ɖò Eflati tɔ̀ ɔ gudo kpo Ejipu kpo lɛ ɔ, mi bɛ́ ye kɔn nyi gbě, bo sɛn Mawu Mavɔmavɔ.” (Jozuwée 24:14) Jozuwée nɔ gbeji nú Jehovah Mawu, bɔ é kɔn nyɔna dó jǐ tɔn. Enyi mǐ nɔ gbeji nú Jehovah ɔ, é na kɔn nyɔna dó mǐ lɔmɔ̌ jí.—2 Samuwɛli 22:26.

5. Etɛwu mǐ ka ɖó na bɛ́ nǔ e kan majiki lɛ é bǐ nyi gbě?

⁵ Sinsɛn nǔvú mɛ tíntɔ́n sín lɛ́ byɔ ɖɔ mǐ ɖó na hɛn nǔ ɖebǔ e cá kan xá majiki bo ɖò mǐ sí lɛ é bǐ gblé. Ye wɛ nyí bǒ, tílá, alɔgan kpo alɔkɛ́ kpo e è sɔ́ majiki dó bló na lɛ é, kpo nǔ mɔhun ɖevo lɛ kpo. Mɔ̌ wiwa ɖò taji ɖó é na xlɛ́ ɖɔ mǐ ɖeji dó Jehovah wu bǐ mlɛ́mlɛ́.

6. Etɛ Klisanwun xwè kanweko nukɔntɔn ɔ tɔn lɛ ka wà nú majikiwema yetɔn lɛ?

⁶ Ð’ayi nǔ e Klisanwun xwè kanweko nukɔntɔn ɔ tɔn ɖé lɛ wà, hwenu e ye wá gbeta ɔ kɔn bá sɛn Mawu nǔgbo ɔ é wu. Biblu ɖɔ: “Majikiblotɔ́ gegě nɔ bɛ́ Majikiwema yetɔn lɛ wá, bo nɔ dó zo, ɖò mɛ bǐ nukúnmɛ.”—Mɛsɛ́dó 19:19.

7. Enyi awoví lɛ ɖò ya dó nú mǐ wɛ ɔ, etɛ mǐ ka sixu wà?

⁷ Awoví lɛ sixu dóya nú mɛ e jɛ Jehovah sɛn jí, bo ko ɖ’alɔ ɖò amɔɛkinkan, azě alǒ majiki mɛ kpɔ́n lɛ é. Enyi nǔ mɔhun jɛ dó jǐ we hǔn, súxó ylɔ́ Jehovah ɖò ɖɛ mɛ bo zán nyikɔ tɔn. É na d’alɔ we.—Nǔnywɛxó 18:10; Jaki 4:7.

8. Linlin tɛ Klisanwun lɛ ka nɔ ɖó dó bocyɔ kpo ɖiɖe e è nɔ zán ɖò sinsɛn nǔvú mɛ lɛ é kpo wu?

⁸ Mɛ e jló na sɛn Jehovah lɛ é sɔ́ ɖó na kpó ɖò bocyɔ alǒ ɖiɖe e nyí sinsɛn nǔvú tɔn lɛ é zán wɛ ǎ. Klisanwun nǔgbo lɛ ‘nɔ ɖi zɔnlin gbɔn nǔɖiɖi gblamɛ, é nyí gbɔn mimɔ gblamɛ ǎ.’ (2 Kɔlɛntinu lɛ 5:7) Ye nɔ setónú nú sɛ́n Mawu tɔn e gbɛ́ ɖɔ è ni ma sɛn ɖiɖe lɛ ó é.—Tíntɔ́n 20:4, 5.

9. Alixlɛ́mɛ tɛ Biblu ka na dó lee è na huzu nǔnywɛtɔ́ gbɔn é wu?

⁹ Biblu ɖɔ: “A dó nǔnywɛtɔ́ há ɔ, a na huzu nǔnywɛtɔ́.” (Nǔnywɛxó 13:20) Enyi mǐ jló na nyɔ́nǔi ɔ, mǐ ɖó na nɔ wà nǔ ɖó kpɔ́ xá Kúnnuɖetɔ́ Jehovah tɔn lɛ. Yedɛɛ lɛ wɛ ɖò zɔnlin ɖi wɛ ɖò ali e nɔ kplá mɛ yì gbɛ̀ mɛ é jí.—Matie 7:14.

10. Nɛ̌ Kúnnuɖetɔ́ Jehovah tɔn lɛ ka sixu d’alɔ we bɔ a na sɛn Mawu gbɔn?

¹⁰ Gbɛtɔ́ lɛ sín nǔ nɔ ɖu ayi mɛ nú Kúnnuɖetɔ́ Jehovah tɔn lɛ tawun. Azɔ̌ yetɔn wɛ nyí ɖɔ ye nɔ d’alɔ ayijlɔjlɔnɔ lɛ bɔ ye nɔ mɔ nukúnnú jɛ nǔgbo Biblu tɔn e nɔ kplá mɛ yì gbɛ̀ mavɔmavɔ mɛ lɛ é mɛ. Ye sixu d’alɔ we bo kplɔ́n Biblu xá we vɔ̌nu. Ye na na xósin nú nǔkanbyɔ towe lɛ, bo na xlɛ́ we lee a na zán nǔgbo Biblu tɔn lɛ ɖò gbɛzán towe mɛ gbɔn é.—Jaan 17:3.

11. Nɛ̌ kplé Klisanwun tɔn lɛ ka na d’alɔ we gbɔn?

¹¹ Ðò kplé yetɔn e ye nɔ bló ɖò Kpléxɔ Axɔ́suɖuto ɔ tɔn mɛ hwɛhwɛ lɛ é hwenu ɔ, a na kplɔ́n nǔ gegě dó ali Jehovah tɔn lɛ wu. Jlǒ e a ɖó bo na sɛn Mawu ɖò nǔgbo mɛ é na lɛ́ syɛn d’eji. È na lɛ́ kplɔ́n lee a na d’alɔ mɛ ɖevo lɛ bɔ ye na kplɔ́n nǔgbo Biblu tɔn lɛ gbɔn é we.—Eblée lɛ 10:24, 25.

12. Nɛ̌ ɖɛxixo ka sixu d’alɔ we bɔ a na sɛn Mawu gbɔn?

¹² Ee a na ɖò nǔ kplɔ́n dó jlǒ Jehovah tɔn kpo linlin tɔn lɛ kpo wu wɛ é ɔ, é ɖò wɛn ɖɔ lee é nɔ wà nǔ kpo wanyiyi kpo gbɔn é na lɛ́ sù nukún towe mɛ d’eji. Jlǒ e a ɖó bo na nyɔ́ nukún tɔn mɛ, bo na nɔ nyi alɔ nú  nǔ e é gbɛ́ wǎn na lɛ é ɖó na lɛ́ kpó ɖò jijɛji wɛ. Lɛ̌ flín ɖɔ a sixu sɛkpɔ́ Jehovah ɖò ɖɛ mɛ, bo byɔ ɛ ɖɔ é ni d’alɔ emi bonu emi na wà nǔ ɖagbe, bo hɔn nú nǔ nyanya.—1 Kɔlɛntinu lɛ 6:9, 10; Filipunu lɛ 4:6.

13. Nɛ̌ a ka sixu hɛn xomɛ Jehovah tɔn hun gbɔn?

¹³ Ee a na ɖò susu wɛ ɖò gbigbɔ lixo é ɔ, é ɖò wɛn ɖɔ a na mɔ ɖɔ emi ɖó na sɔ́ emiɖée jó nú Jehovah, bo bló baptɛm, lobo huzu Kúnnuɖetɔ́ Jehovah tɔn. Enyi a huzu Kúnnuɖetɔ́ Jehovah tɔn ɔ, a na hɛn xomɛ Jehovah tɔn hun. (Nǔnywɛxó 27:11) A na nɔ togun awǎjijɛnɔ e wu Mawu ɖɔ xó elɔ dó é mɛ: “Un na nɔ ye mɛ, bo na ɖi zɔnlin xá ye; un na nyí Mawu yetɔn, bɔ ye na nyí togun ce.”—2 Kɔlɛntinu lɛ 6:16.