Ðò Biblu kplɔnkplɔn elɔ bǐ hwenu ɔ, a ko kplɔ́n nǔ gegě dó Jehovah wu. Nǔ e a kplɔ́n lɛ é zɔ́n bɔ a yí wǎn n’i tawun, bo sixu ko zɔ́n bɔ a sɔ́ hwiɖée jó n’i bo bló baptɛm. É ma ko nyí mɔ̌ ǎ ɔ, a sixu ko ɖò tamɛ lin wɛ bo na wà mɔ̌ ɖò malin-malin mɛ. Amɔ̌, nukɔnyiyi towe fó ɖó baptɛm blobló jí ǎ. A sixu kpò ɖò Jehovah sɛkpɔ́ d’eji wɛ kaka sɔyi. Gbɔn nɛ̌ é?

1. Etɛwu a ka ɖó na kpò ɖò kancica e ɖò hwi kpo Jehovah kpo tɛntin é hɛn lidǒ d’eji wɛ?

Mǐ ɖó na dó gǎn syɛnsyɛn bo na kpò ɖò kancica e ɖò mǐ kpo Jehovah kpo tɛntin é hɛn lidǒ wɛ. Etɛwu? “Bonu è ma wá dɔn mǐ ɖó zɔ” n’i ó. (Eblée lɛ 2:1) Etɛ ka sixu d’alɔ mǐ bɔ mǐ na kpò ɖò Jehovah sɛn wɛ kpo gbejininɔ kpo? Mǐ sixu kpò ɖò alɔnu mǐtɔn hɛn ján wɛ ɖò wɛnɖagbejijlazɔ́ ɔ mɛ, bo na lɛ́ ba ali ɖevo e nu mǐ na sɛn Mawu mǐtɔn ɖè bǐ mlɛ́mlɛ́ lɛ é. (Xà Filipunu lɛ 3:16.) Jehovah sinsɛn wɛ nyí ali ɖagbe hugǎn ɔ ɖò gbɛ̀ mɛ!—Ðɛhan 84:11.

2. Nǔ ɖevo tɛ lɛ a ka ɖó na kpò ɖò wiwa wɛ?

Nǔgbo wɛ ɖɔ Biblu kplɔnkplɔn elɔ ɖò vivɔnu wá wɛ dìn, amɔ̌, Klisanwun gbɛ zinzán towe na kpò ɖò nukɔn yì wɛ. Biblu ɖɔ ɖɔ mǐ ɖó na “sɔ́ mɛ yɔyɔ̌ . . . ɔ dó.” (Efɛzinu lɛ 4:23, 24) Ee a na ɖò Xó Mawu tɔn kplɔ́n wɛ, bo na lɛ́ ɖò kplé agun tɔn lɛ yì wɛ é ɔ, a na kplɔ́n nǔ yɔyɔ̌ ɖevo lɛ dó Jehovah kpo jijɔ tɔn lɛ kpo wu. Ba ali ɖěɖee nu a na xwedó jijɔ tɔn lɛ ɖè d’eji ɖò gbɛzán towe mɛ lɛ é. Kpò ɖò huzuhuzu ɖebǔ e é na byɔ, bonu a na kpò ɖò xomɛ Jehovah tɔn hɛn hun wɛ lɛ é bló wɛ.

3. Nɛ̌ Jehovah ka na d’alɔ we bɔ a na kpò ɖò nukɔn yì wɛ gbɔn?

Biblu ɖɔ: “Mawu . . . [ɖesunɔ] na wà azɔ̌ ɖò mi wu, bɔ mi na nyɔ́ yì fó; é na bló bɔ mi na syɛnlǐn; é na na hlɔnhlɔn mi; é na dó mi dò nyi dodó syɛnsyɛn lɛ jí.” (1 Piyɛ́ɛ 5:10) Mǐ mɛ bǐ wɛ nɔ mɔ mɛtɛnkpɔn lɛ. Amɔ̌, Jehovah nɔ na nǔ e sín hudo mǐ ɖó, bá dɛ ɖò ye nu é mǐ. (Ðɛhan 139:23, 24) É d’akpá ɖɔ emi na bló bɔ hwi na ɖó jlǒ kpo hlɔnhɔn kpo, bo na sɛn emi kpo gbejininɔ kpo.—Xà Filipunu lɛ 2:13, nwt.

 BA DÒ NÚ NǓ D’EJI

4. Kpò ɖò xó ɖɔ ɖó kpɔ́ xá Xɔ́ntɔn towe ɖagbe hugǎn ɔ wɛ

Ðɛxixo kpo Biblu kplɔnkplɔn kpo ko d’alɔ we bɔ a huzu xɔ́ntɔn Jehovah tɔn. Nɛ̌ nǔ enɛ lɛ wiwa ka sixu d’alɔ we bɔ a na lɛ́ sɛkpɔ́ ɛ d’eji hugǎn gbɔn?

Xà Ðɛhan 62:9, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nú kancica e ɖò hwi kpo Jehovah kpo tɛntin é na lidǒ d’eji ɔ, nɛ̌ a ka sixu bló gbɔn bɔ ɖɛ towe lɛ na kpɔ́n te d’eji?

Xà Ðɛhan 1:2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nú kancica e ɖò hwi kpo Jehovah kpo tɛntin é na lidǒ d’eji ɔ, nɛ̌ a ka sixu bló gbɔn bɔ Biblu xixa towe na hɛn lè wá nú we hugǎn?

Nɛ̌ a ka sixu bló gbɔn bɔ nǔkplɔnkplɔn mɛɖesunɔ tɔn towe na hɛn lè wá nú we hugǎn? Nú a jló na mɔ wlɛnwín ɖé lɛ hǔn, xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.

• Wěɖexámɛ e ɖò video ɔ mɛ lɛ é ɖětɛ lɛ a ka sixu xwedó?

• Xóta tɛ lɛ jí a ka jló na kplɔ́n nǔ dó?

 ETƐ LƐ A KA KPLƆ́N?

Kpò ɖò kancica e ɖò hwi kpo Jehovah kpo tɛntin é hɛn lidǒ wɛ, bo kpò ɖò nǔ gbigbɔ tɔn lɛ gbé nya wɛ. Mɔ̌ mɛ ɔ, a sixu ɖu gbɛ̀ víví kaka sɔyi!

Vɔ̌gbɔnji

• Etɛwu a ka sixu kúdeji ɖɔ Jehovah na d’alɔ we, bɔ a na sɛn ɛ kpo gbejininɔ kpo?

• Nɛ̌ a ka sixu hɛn kancica e ɖò hwi kpo Jehovah kpo tɛntin é lidǒ gbɔn?

• Nɛ̌ nǔ gbigbɔ tɔn lɛ gbé nyinya ka sixu d’alɔ we bɔ a na yì nukɔn gbɔn?