Dindinwayixwe gudogudo tɔn e Jezu na ɖu é na ɖó tinmɛ taji ɖé. Ðó kú tɔn ko sɛkpɔ́ wutu ɔ, é bló tuto bá ɖu Dindinwayixwe ɔ xá mɛsɛ́dó tɔn lɛ, bo sɔ́ nǔwiwa xwewu xwewu tɔn yɔyɔ̌ ɖé ɖ’ayǐ, enɛ wɛ nyí Aklunɔ Sín Nǔɖuɖu. Enɛ wu ɔ, é ɖɔ nú Piyɛ́ɛ kpo Jaan kpo ɖɔ ye ni yì sɔnǔ ɖ’ayǐ nú xɔ e mɛ ye na ɖu Dindinwayixwe ɔ ɖè é. (Lk 22:7-13; kpɔ́n ɖiɖe e ɖò akpa ɔ jí é.) Enɛ flín mǐ ɖɔ é ɖò dandan ɖɔ mǐ ni sɔnǔ ɖ’ayǐ nú Flǐn e mǐ na bló ɖò 27 mars é. É ɖò wɛn ɖɔ agun lɛ na sɔnǔ nú xóɖɔtɔ́ ɖé, wɔ̌xúxú kpo vɛ̌ɛn kpo, gɔ́ nú nǔ ɖevo lɛ. É ɖò mɔ̌ có, etɛ ɖokpo ɖokpo mǐtɔn ka sixu wà bá dó ɖò gbesisɔmɛ nú Flǐn ɔ?

Sɔnǔ nú ayi towe. Nɔ xà wemafɔ Biblu tɔn Flǐn ɔ tɔn lɛ bo nɔ lin tamɛ dó ye jí. A sixu mɔ tito tɔn ɖò Nɔ Kíjé Mawuxówema ɔ Gbè Bǐ Gbè mɛ. A sixu lɛ́ mɔ tito e è gbló ada na ganji é ɖò Nudọnamẹ Dogọ B12, ee ɖò Owe Wiwe lẹ—Lẹdogbedevomẹ Aihọn Yọyọ Tọn e è vɔ́ jlaɖó é mɛ é mɛ. (Lɛ̌ kpɔ́n Kplé Gbɛzán kpo Sinsɛnzɔ́ kpo Tɔn Sín Azɔ̌wema avril 2020 tɔn.) Xwédo lɛ sixu zán Index des publications des Témoins de Jéhovah kpo Anademẹwe Dodinnanu Tọn Na Kunnudetọ Jehovah Tọn Lẹ kpo dó ba xóta ɖěɖee ɖɔ xó dó nǔ e wu gbɛxixɔ ɔ dó ɖò taji é wu lɛ é, bo zán ye ɖò sinsɛn-biblo xwédo tɔn yetɔn hwenu.

Ylɔ̌ mɛ ɖevo lɛ dó Flǐn ɔ tɛnmɛ. Ð’alɔ ɖò mɛylɔwema ɔ mímá mɛ bǐ mlɛ́mlɛ́. Lin tamɛ dó mɛ elɔ lɛ e a sixu ylɔ́ lɛ é jí: mɛbakpɔ́n towe lɛ, mɛ e a ko kplɔ́n Biblu xá wá yì lɛ é, mɛtuùnmɛ towe lɛ, kpo hɛ̌nnumɔ towe lɛ kpo. Mɛxo agun tɔn lɛ ɖó na mɔ nǔ jɛ wu ɖɔ ye ylɔ́ mɛ e awakanmɛ gbɔjɔ na lɛ é. Flín ɖɔ enyi mɛɖé ma nɔ nɔ xá towe mɛ ǎ ɔ, a hɛn ɔ, a na mɔ hwenu kpo fí e è na bló Flǐn ɔ ɖè ɖò xá tɔn mɛ é kpo ɖò jw.org jí. Zǐn NǓ E KAN MǏ LƐ É ɖò akpáxwé bǐbɛ̌mɛ tɔn ɖò aga, bo sɔ́ “Flǐn.”

Nǔ ɖevo tɛ mǐ ka sixu bló dó sɔnǔ nú mǐɖée nú Flǐn ɔ?