Wɛn ɖagbe Maki tɔn 9:1-50

Jezu húzú ninɔmɛ (1-13)
Jezu gbɔ azɔn nú nyaví e jí awǒvi ɖe é (14-29)
- Mɛ e ɖó nǔɖiɖi é nɔ kpé nǔ bǐ wú (23)
Jezu lɛ́ ɖɔ ɖɔ émí ná kú (30-32)
Ahwanvú lɛ́ dɔn nǔ dó mɛ e hú gǎn mɛ bǐ é wú (33-37)
Mɛ ɖěbǔ e ma klán gbe xá mǐ ǎ é ɖo jǐ mǐtɔn (38-41)
Afɔklɛ́nnú lɛ́ (42-48)
“Mi ní cí jɛ ɖɔhun” (49, 50)

9 Gɔ́ ná ɔ, é ɖɔ nú yě ɖɔ: “Má ɖɔ nǔgbó nú mi, mɛɖé lɛ́ ɖo mɛ e ɖo fí lɛ́ é mɛ, bo ná tó mɔ Axɔ́súɖuto Mawu tɔn b’ɛ ná wá kpó hlɔ̌nhlɔ́n tɔn kpó hwɛ̌ cóbó ná kú.” ² Azǎn ayizɛ́n gúdo ɔ, Jezu kplá Piyɛ́ɛ, Jaki kpó Jaan kpó, bɔ yě xá só ɖaxó ɖé jí yěɖokpónɔ. Bɔ é húzú ninɔmɛ ɖo nukɔn yětɔn; ³ awu tɔn aga tɔn lɛ́ jɛ kínkɔ́n jí, bo wé hú lěe avɔnyatɔ́ e ɖo ayǐkúngban jí é ɖěbǔ sixú bló bɔ avɔ ɖé wé gbɔn é flaflá tɔn. ⁴ Gɔ́ ná ɔ, Elíi kpó Mɔyízi kpó tɔ́n dó yě jí, bɔ yě ɖo xó ɖɔ ɖó kpɔ́ xá Jezu wɛ. ⁵ Bɔ Piyɛ́ɛ ɖɔ nú Jezu ɖɔ: “Mɛ̌si,* fí élɔ́ e mǐ ɖe é nyɔ́ mɛ! Énɛ́ wú ɔ, mǐ ní gbá goxɔ atɔn, ɖokpó ná nyí towe, ɖokpó ná nyí Mɔyízi tɔn, ɖokpó ná nyí Elíi tɔn.” ⁶ Nǔgbó ɔ, Piyɛ́ɛ tuun lěe é ná wa nǔ gbɔn é ǎ, ɖó xɛsi ɖi yě tawun. ⁷ Bɔ akpɔ́kpɔ́ ɖé dó bo cyɔ́n yě, lobɔ gbe ɖé ɖi sín akpɔ́kpɔ́ ɔ mɛ bo ɖɔ: “Vǐ súnnu ce vívɛ́ná ɔ ɖíe. Mi ɖótó è.” ⁸ Énɛ́ gúdo ɖo ajijimɛ ɔ, ée yě kpɔ́n fí e yě ɖe é lɛ́ lɛ̌ dó é ɔ, yě sɔ́ mɔ mɛ ɖěbǔ ɖo fínɛ́ xá yě zɛ Jezu wú ǎ. ⁹ Ée yě ɖo te jɛ sín só ɔ jí wɛ é ɔ, é gbɛ́ nú yě syɛ́nsyɛ́n ɖɔ yě ní ma ɖɔ nǔ e yě mɔ é nú mɛ ɖěbǔ hwɛ̌ cóbónú è ní fɔ́n Gbɛtɔ́ví ɔ sín kú ó. ¹⁰ Yě hɛn xó énɛ́ dó ayi mɛ,* bo ka ɖɔ ɖo yěɖée tɛ́ntin ɖɔ, étɛ́ ka nyí tínmɛ fínfɔ́n sín kú énɛ́ tɔn a jí. ¹¹ Bɔ yě jɛ nǔ kanbyɔ́ ɛ jí ɖɔ: “Étɛ́wú sɛ́nkplɔ́nmɛtɔ́ lɛ́ ka nɔ ɖɔ ɖɔ Elíi ɖó ná to wá hwɛ̌?” ¹² É ɖɔ nú yě ɖɔ: “Elíi ɖó ná to wá hwɛ̌ bo ná jlá nǔ lɛ́ bǐ ɖó. Amɔ̌, étɛ́wú è ka wlán dó Gbɛtɔ́ví ɔ wú ɖɔ é ɖó ná se wǔvɛ́ gěgé bɔ è kún ná sɔ́ ɛ dó ylɔ́ nǔɖé ó lo? ¹³ Má ɖɔ nú mi, Elíi wá nǔgbó, bɔ yě wa nǔ e jló yě lɛ́ é bǐ xá ɛ lěe è ko wlán ɖ’ayǐ dó wǔ tɔn gbɔn é.” ¹⁴ Hwenu e yě sɛkpɔ́ ahwanvú e kpo lɛ́ é ɔ, yě ɖ’ayi wú ɖɔ ahwan ɖaxó ɖé lɛ́ lɛ̌ dó yě, bɔ sɛ́nkplɔ́nmɛtɔ́ lɛ́ ɖo nǔ dɔn xá yě wɛ ɖo fínɛ́. ¹⁵ Amɔ̌, tlóló e ahwan ɔ bǐ mɔ ɛ é ɔ, é kpácá yě tawun bɔ yě kán wezun yi gɔ̌n tɔn, bo ná dó gbe n’i. ¹⁶ Énɛ́ ɔ, é kanbyɔ́ yě ɖɔ: “Étɛ́ dɔn xá yě wɛ mi ka ɖe?” ¹⁷ Mɛ ɖokpó ɖo ahwan ɔ mɛ, bo yí gbe n’i ɖɔ: “Mɛ̌si, un kplá vǐ súnnu ce wá nú we ɖó gbigbɔ ɖɛ̌hunúmɛtɔ́ ɖé ɖo jǐ tɔn. ¹⁸ Ényí gbigbɔ ɔ wá jǐ tɔn ɖo fí ɖěbǔ ɔ, é nɔ sɔ́ ɛ zin dó kɔ́mɛ bɔ é nɔ jɛ afúntúnkplɔ̌ tún jí, lobo nɔ jɛ aɖǔkún ɖu jí, bo nɔ ba hlɔ̌nhlɔ́n kpo. Un byɔ́ ahwanvú towe lɛ́ ɖɔ yě ní nya gbigbɔ ɔ sín jǐ tɔn, amɔ̌, yě ka kpé wú bo wa mɔ̌ ǎ.” ¹⁹ É yí gbe nú yě ɖɔ: “Jijimɛ nǔmaɖitɔ́ è mi, káká jɛ hwetɛ́nu un ka ɖó ná nɔ kpɔ́ xá mi yi jɛ? Káká jɛ hwetɛ́nu un ka ɖó ná xwe nǔ mitɔn ɖɔ yi jɛ? Mi kplá ɛ wá nú mì.” ²⁰ Énɛ́ ɔ, yě kplá vǐ ɔ wá n’i. Amɔ̌, ée gbigbɔ ɔ mɔ Jezu é ɔ, tlóló ɔ, é húnhún vǐ ɔ syɛ́nsyɛ́n. Ée é j’ayǐ gúdo é ɔ, é jɛ gbo blí jí bo jɛ afúntúnkplɔ̌ tún jí. ²¹ Énɛ́ ɔ, Jezu kanbyɔ́ tɔ́ ɔ ɖɔ: “Sín hwetɛ́nu nǔ énɛ́ ka nɔ wa ɛ?” É ɖɔ: “Sín hwenu e é ɖo vǔ é. ²² Bɔ hwɛhwɛ ɔ, é nɔ sɔ́ ɛ zin dó myɔ mɛ, bo nɔ lɛ́ sɔ́ ɛ zin dó sin mɛ, bá mɔ tɛn dó hu i. Amɔ̌, ényí a sixú wa nǔ ɖěbǔ hǔn, kú nǔbláwǔ nú mǐ bo d’alɔ mǐ.” ²³ Jezu ɖɔ n’i ɖɔ: “Étɛ́wú a ka ɖɔ: ‘Ényí a sixú’ ɔ? Mɛ e ɖó nǔɖiɖi é nɔ kpé nǔ bǐ wú.” ²⁴ Tlóló ɔ, vǐ ɔ sín tɔ́ sú xó bo ɖɔ: “Un ɖó nǔɖiɖi! D’alɔ mì ɖo fí e un ɖó hudó nǔɖiɖi tɔn ɖe é.” ²⁵ Din ɔ, ée Jezu ɖ’ayi wú ɖɔ ahwan ɖé ɖo wezun jí ja gɔ̌n yětɔn é ɔ, é ɖe gbe dó gbigbɔ nyanya ɔ bo ɖɔ n’i ɖɔ: “Gbigbɔ ɖɛ̌hunúmɛtɔ́ kpó tóhunúmɛtɔ́ kpó è, un ɖe gbe nú we ɖɔ a ní gosín jǐ tɔn bo ma sɔ́ lɛ́ wá jǐ tɔn ɖě ó.” ²⁶ Ée gbigbɔ ɔ sú xó bo húnhún vǐ ɔ syɛ́nsyɛ́n gúdo é ɔ, é gosín jǐ tɔn, bɔ vǐ ɔ cí mɛ e kú é ɖɔhun. Énɛ́ ɔ, mɛ lɛ́ gěgé ɖo ɖiɖɔ wɛ ɖɔ: “É kú!” ²⁷ Amɔ̌, Jezu hɛn alɔ tɔn bo fɔ́n ɛ sí te, bɔ é nɔ te. ²⁸ Ée é wá byɔ́ xwé ɖé gbe gúdo é ɔ, ahwanvú tɔn lɛ́ kanbyɔ́ ɛ ɖo nǔglɔ́ ɖɔ: “Étɛ́wú mǐ ma ka kpé wú bo nya gbigbɔ nyanya ɔ ǎ?” ²⁹ É ɖɔ nú yě ɖɔ: “Ðɛxixo kɛ́ɖɛ́ jɛ́n sixú nya awǒvi alɔkpa énɛ́ sín mɛ jí.” ³⁰ Yě gosín fínɛ́ bo gbɔn Galilée, amɔ̌, é ba ɖɔ mɛ ɖěbǔ ní tuun ǎ, ³¹ ɖó é ɖo nǔ kplɔ́n ahwanvú tɔn lɛ́ wɛ bo ɖo ɖiɖɔ nú yě wɛ ɖɔ: “È ɖo Gbɛtɔ́ví ɔ ná sa wɛ, bo ná jó è nyi gbɛtɔ́ lɛ́ sín alɔ mɛ, bɔ yě ná hu i. Amɔ̌, è ná hu i có, azǎn atɔn gúdo ɔ, é ná fɔ́n.” ³² É ɖo mɔ̌ có, yě mɔ nukúnnú jɛ nǔ e ɖɔ wɛ é ɖe é mɛ ǎ, bɔ xɛsi lɛ́ ɖo yě ɖi wɛ bónú yě ná kan nǔ byɔ́ ɛ. ³³ Din ɔ, yě wá Kafaanawúmu. Bɔ ée yě ɖo xwégbe é ɔ, Jezu kanbyɔ́ yě ɖɔ: “Étɛ́ dɔn wɛ mi ka ɖe ɖo ali jí?” ³⁴ Yě cí xwíí, ɖó hwenu e yě ɖo ali jí é ɔ, yě ɖo nǔ dɔn wɛ ɖo yěɖée tɛ́ntin, dó mɛ e hú gǎn mɛ bǐ é wú. ³⁵ Énɛ́ ɔ, é jínjɔ́n ayǐ bo ylɔ́ mɛsɛ́dó 12 lɛ́, lobo ɖɔ nú yě ɖɔ: “Ényí mɛ ɖěbǔ ba ná nyí mɛ nukɔntɔn ɔ, é ɖó ná nyí mɛ gǔdo tɔn ɖo mi mɛ bǐ mɛ, bo ná nyí mɛsɛntɔ́ mi bǐ tɔn.” ³⁶ É kplá vǐ kpɛví ɖokpó wá, bo sɔ́ ɛ ɖó te ɖo tɛ́ntin yětɔn, lobo kpl’así kɔ n’i bo ɖɔ nú yě ɖɔ: ³⁷ “Mɛ ɖěbǔ e yí vǐ kpɛví lěhun ɖokpó ɖó nyǐkɔ ce wú é, yí nyi lɔmɔ̌; bɔ mɛ ɖěbǔ e yí mì é, yí nyiɖokpónɔ ǎ, amɔ̌, é lɛ́ yí Mɛ e sɛ́ mì dó é.” ³⁸ Jaan ɖɔ n’i ɖɔ: “Mɛ̌si, mǐ mɔ mɛɖé bɔ é ɖo nyǐkɔ towe zán dó ɖo awǒvi lɛ́ nya ná wɛ, bɔ mǐ tɛ́n kpɔ́n bo ná gbɛ́ n’i, ɖó é ɖo mǐ xwedó wɛ ǎ wútu.” ³⁹ Amɔ̌ Jezu ɖɔ: “Mi ma tɛ́n kpɔ́n bo ná gbɛ́ n’i ó, ɖó mɛ ɖěbǔ sixú bló nǔjíwǔ ɖo nyǐkɔ ce mɛ, bɔ énɛ́ gúdo tlóló ɔ, é ná ɖɔ xó nyanya dó wǔtu ce ǎ. ⁴⁰ Ðó mɛ ɖěbǔ e ma klán gbe xá mǐ ǎ é ɖo jǐ mǐtɔn. ⁴¹ Bɔ mɛ ɖěbǔ e ná ná mi sin kɔ́fu ɖokpó, bónú mi ná nu, ɖó mi nyí Klísu tɔn wútu é ɔ, má ɖɔ nǔgbó nú mi, é ná ba ajɔ tɔn kpo ɖo ali ɖěbǔ nu ǎ. ⁴² Amɔ̌, mɛ ɖěbǔ e ná nyí afɔklɛ́nnú nú mɛ ɖokpó ɖo mɛ kpɛví élɔ́ lɛ́ e ɖi nǔ é mɛ é ɔ, é ná kpɔ́n te n’i hú ɖɔ è ní sɔ́ sé ɖaxó e tócí nɔ lílɛ́ é kplá kɔ n’i, bo sɔ́ ɛ nyi dó xu mɛ. ⁴³ “Ényí alɔ towe nyí afɔklɛ́nnú nú we gbeɖé hǔn, sɛ́n síin. É ná kpɔ́n te nú we ɖɔ a ní nyí alɔkponɔ bo mɔ gbɛ hú ɖɔ a ní ɖó alɔ we bo ka yi Jeyɛ́nu* mɛ, é wɛ nyí myɔ e è ma sixú cí ǎ é mɛ. ⁴⁴ * —— ⁴⁵ Ényí afɔ towe nyí afɔklɛ́nnú nú we hǔn, sɛ́n síin. É ná kpɔ́n te nú we ɖɔ a ní nyí afɔkponɔ bo mɔ gbɛ hú ɖɔ a ní ɖó afɔ we, bɔ è ka ná sɔ́ we nyi dó Jeyɛ́nu* mɛ. ⁴⁶ * —— ⁴⁷ Ényí nukún towe nyí afɔklɛ́nnú nú we hǔn, sɔ́ nyi gbě. É ná kpɔ́n te nú we ɖɔ a ní ɖó nukún ɖokpó bo byɔ́ Axɔ́súɖuto Mawu tɔn mɛ hú ɖɔ a ní ɖó nukún we, bɔ è ka ná sɔ́ we nyi dó Jeyɛ́nu* mɛ, ⁴⁸ fí e wě lɛ́ ma nɔ kú ɖe ǎ, bɔ myɔ ma nɔ cí ɖe ǎ é. ⁴⁹ “Ðó zo wɛ nyí jɛ e è ná dó mɛ bǐ é. ⁵⁰ Jɛ ɔ, nǔ ɖagbe wɛ, amɔ̌, ényí jɛ ma sɔ́ wá ɖó tɔ́n ǎ ɔ, étɛ́ mi ka ná zán dó bló bɔ é ná lɛ́ ɖó tɔ́n? Mi ní cí jɛ ɖɔhun, mi nɔ nɔ fífá mɛ xá miɖée lɛ́.”