Nǔnywɛ́xó 15:1-33
15 Xósin e è ná kpó gbe fífá* kpó é nɔ cí asɔ nú xomɛsin,amɔ̌, xó vɛ́ sin* nɔ fɔ́n xomɛsin dó jǐ.
2 Ðɛ̌ nǔnywɛ́tɔ́ tɔn nɔ zán nǔtuuntuun ganjí,amɔ̌, xlonɔ sín nu nɔ kɔ́n sɛ sín xlojijɔ tɔn jí.
3 Nukún Jexóva tɔn nɔ mɔ nǔ jɛ fí bǐ,é nɔ ɖo mɛ nyanya kpó mɛ ɖagbe kpó bǐ kpɔ́n wɛ.
4 Atín e nɔ ná gbɛ mɛ é wɛ ɖɛ̌ e nɔ nɔ xwíí é* nyí,amɔ̌, mɛblɛ́blɛ́xó nɔ zɔ́n bɔ è nɔ flú.*
5 Xlonɔ nɔ ɖó sísí nú kplɔ́n e tɔ́ tɔn ná ɛ é ǎ,amɔ̌, mɛ e nɔ nɔ acéjí é nɔ yí gbe nú nǔgbɛ́númɛ.*
6 Dɔkun ɖo nǔjlɔ́jlɔ́watɔ́ xwégbe bo túnflá,amɔ̌, sínsɛ́n e mɛdídá nɔ ná é nɔ dɔn ɛ dó hɔzɔ mɛ.
7 Nǔnywɛ́tɔ́ sín nu nɔ fúnfún nǔtuuntuun kpé,amɔ̌, xlonɔ sín ayi nɔ wa mɔ̌ ǎ.
8 Vɔ̌sísá mɛdídá tɔn nɔ vɛ́ mɔ nú Jexóva,amɔ̌, nǔjlɔ́jlɔ́watɔ́ sín ɖɛ nɔ dó xomɛhunhun n’i.
9 Jexóva gbɛ́ wǎn nú mɛdídá sín ali,amɔ̌, é nɔ yí wǎn nú mɛ e nɔ xo nǔjlɔ́jlɔ́wiwa kan é.
10 Kplɔ́n e ná mɛ wɛ è ɖe é nɔ cí nǔ e nylá é* ɖɔhun ɖo mɛ e gosín ali ɖagbe jí é nukúnmɛ,amɔ̌, mɛ ɖěbǔ e ma nɔ ba ɖɔ è ní kɛ nu dó nǔ wú nú émí ǎ é ná kú.
11 Jexóva nɔ mɔ nǔ jɛ Yɔdo* kpó fí e è nɔ sú kún dó nú nǔ ɖe é kpó* wú bǐ mlɛ́mlɛ́.
Nukúnnú mimɔ jɛ gbɛtɔ́ sín ayi mɛ zun kwínkwín má kwín!
12 Mɛcákotɔ́ nɔ yí wǎn nú mɛ e ɖo nǔ gbɛ́ n’i wɛ é* ǎ.
É ná kan nǔ byɔ́ nǔnywɛ́tɔ́ ǎ.
13 Awǎjijɛ gɔ́ ayi mɛ nú mɛ ɔ, nukúnmɛ mɛtɔn nɔ hɔ́n,linkpɔ́n ka ɖo ayi mɛ nú mɛ ɔ, wǔ nɔ kú mɛ.
14 Ayi e ɖó nukúnnúmɔjɛnǔmɛ é nɔ ba nǔtuuntuun,amɔ̌, xlonɔ lɛ́ ɔ, xlojijɔ wɛ yě nɔ ɖu.*
15 Azǎn lɛ́ bǐ wɛ nɔ nyí azǎn nyanya nú mɛ e ɖo wǔvɛ́ se wɛ é,amɔ̌, mɛ e awǎjijɛ gɔ́ ayi tɔn mɛ é* nɔ ɖo agɔ̌ ɖu wɛ magbokɔ.
16 È ɖó nǔ kpɛɖé bo ɖó sísí e gɔ́ngɔ́n é nú Jexóva ɔ,é nyɔ́ hú è ní jɛ dɔkun gěgé bɔ linkpɔ́n ka xo kpóɖó ná.*
17 È ɖu mǎ yǎyá ɖo fí e wǎnyíyí ɖe é ɔ,é nyɔ́ hú è ní ɖu nyibúsú e dó jǒ é ɖo fí e wǎngbɛ́númɛ ɖe é.
18 Mɛ e nɔ yá wǔ sin xomɛ é nɔ fɔ́n jlɛ dó jǐ,amɔ̌, mɛ e ma nɔ yá wǔ sin xomɛ ǎ é nɔ cí asɔ nú hun.
19 Fɔnlínnɔ sín ali cí wunkan sín kpá ɖɔhun,amɔ̌, nǔjlɔ́jlɔ́watɔ́ sín ali cí ali ɖaxó e è jlɔ́ é ɖɔhun.
20 Vǐ e nyɔ́nǔi é nɔ dó xomɛhunhun nú tɔ́ tɔn,amɔ̌, xlonɔ nɔ ké ya nú nɔ tɔn ǎ.
21 Awǎjijɛ wɛ xlojijɔ nyí nú mɛ e ayivɔ vún é,amɔ̌, mɛ e ɖó nukúnnúmɔjɛnǔmɛ é nɔ ɖi zɔnlin tlélé.
22 Nú è ma ba wěɖexámɛ* ǎ ɔ, tuto e è bló lɛ́ é nɔ yi ta ǎ,amɔ̌, ényí wěɖexámɛtɔ́ sukpɔ́ ɔ, nǔ lɛ́ nɔ yi ta.
23 Nú è ná xósin e sɔgbe é ɔ,* xomɛ nɔ hun mɛ,xó e è ɖɔ bɔ é jɛ gan é nɔ nyɔ́ mɛ nya!
24 Mɛ e ɖó nukúnnúmɔjɛnǔmɛ é ɖo ali e nɔ kplá mɛ yi gbɛ ɖagbe mɛ é jí,é nɔ dó gǔdo ali e nɔ kplá mɛ yi Yɔdo* mɛ é.
25 Jexóva ná sú kún dó nú goyítɔ́ sín xwé,amɔ̌, é ná nya xɛ ɖo gle asúkúsi tɔn sín dogbó lɛ́ jí.
26 Jexóva gbɛ́ wǎn nú ayi gɛ́dɛ́gɛ́dɛ́ mɛdídá tɔn lɛ́,amɔ̌, xó e nɔ nyɔ́ se lɛ́ é nɔ mɛ́ ɖo nukún tɔn mɛ.
27 Mɛ e nɔ wa nǔ agɔ dó ɖu le é nɔ dɔn xwédo éɖésúnɔ tɔn dó hɔzɔ mɛ,*amɔ̌, mɛ e gbɛ́ wǎn nú nǔɖuɖonǔmɛ é ná nɔ gbɛ.
28 Ayi nǔjlɔ́jlɔ́watɔ́ tɔn nɔ lin tamɛ cóbó nɔ ná xósin,*amɔ̌, mɛdídá lɛ́ kɛ nu ɔ, nǔ nyanya lɛ́ wɛ yě nɔ ɖɔ.
29 Jexóva lín dó mɛdídá lɛ́,amɔ̌, é nɔ ɖótó nǔjlɔ́jlɔ́watɔ́ lɛ́ sín ɖɛ.
30 Nukúnmɛ mɛtɔn hɔ́n ɔ,* é nɔ dó awǎjijɛ nú ayi mɛtɔn;wɛn ɖagbe nɔ dó wǔsyɛ́n lanmɛ nú mɛ.*
31 Mɛ e è zán xógbe e nɔ ná gbɛ mɛ é dó kɛ nu dó nǔ wú n’i ɔ, é nɔ ɖótó éɖó tɛn tɔn ɖo nǔnywɛ́tɔ́ lɛ́ tɛ́ntin.
32 Mɛ ɖěbǔ e gbɛ́ kplɔ́n é ké ya nú gbɛ* éɖésúnɔ tɔn ǎ,amɔ̌, mɛ ɖěbǔ e nɔ ɖótó nu e è kɛ dó nǔ wú n’i é nɔ ɖó nukúnnúmɔjɛnǔmɛ.*
33 Sísí e gɔ́ngɔ́n é ɖíɖó nú Jexóva ɔ, nǔnywɛ́ kplɔ́nkplɔ́n wɛ,mɛɖée wɛ è nɔ sɔ́ hwe cóbɔ è nɔ sɔ́ mɛ su.
Tínmɛ e ɖo do lɛ́ é
^ Alǒ “xomɛnyínyɔ́.”
^ Alǒ “xó e nɔ ɖó wǔvɛ́ nú mɛ é.”
^ Alǒ “ɖɛ̌ e nɔ gbɔ azɔn é.”
^ Blǔju tɔn, “mɛblɛ́blɛ́xó nɔ li ayi.”
^ Alǒ “nú nu e è kɛ dó nǔ wú n’i é”
^ Alǒ “nǔ e syɛ́n é.”
^ Kpɔ́n Xógbe ɖé lɛ́ sín tínmɛ.
^ Alǒ “kpó Abadɔ́ɔn kpó.” Kpɔ́n Xógbe ɖé lɛ́ sín tínmɛ.
^ Alǒ “mɛ e ɖo nu kɛ dó nǔ wú n’i wɛ é.”
^ Alǒ “xlojijɔ gbé wɛ yě nɔ nya.”
^ Alǒ “mɛ e ɖó ayi ɖagbe é.”
^ Alǒ “bɔ nǔ bǐ ka wlú dó mɛ.”
^ Alǒ “yi kpá.”
^ Blǔju tɔn, “Xósin e tɔ́n sín nu mɛtɔn mɛ é nɔ zɔ́n bɔ.”
^ Kpɔ́n Xógbe ɖé lɛ́ sín tínmɛ.
^ Alǒ “nɔ kɔ́n xwédo éɖésúnɔ tɔn sín wi.”
^ Alǒ “nɔ gbéjé lěe é ná ná xósin gbɔn é kpɔ́n kpó sɔxwixwe kpó; nɔ lin tamɛ cóbó nɔ ɖɔ xó.”
^ Alǒ “Nukún mɛtɔn kɔ́n ɔ”
^ Blǔju tɔn, “nɔ bló bɔ xú nɔ dó jǒ.”
^ Alǒ “lǐndɔ̌n.”
^ Blǔju tɔn, “ayi.”
