Wěma Nǔɖexlɛ́mɛ tɔn 2:1-29

È wlán nǔ sɛ́dó Efɛ́zi (1-7), sɛ́dó Simíini (8-11), sɛ́dó Pɛɛgámu (12-17), sɛ́dó Tiatíi (18-29)

2 “Wlǎn sɛ́dó agun e ɖo Efɛ́zi é sín wɛnsagun ɖɔ: Mɛ e hɛn sunví tɛ́nwe lɛ́ ɖó alɔ tɔn ɖisí ɔ mɛ, bo ɖo zɔnlin ɖi wɛ ɖo zogbɛ́nhɛnnú tɛ́nwe e è sɔ́ siká dó bló lɛ́ é tɛ́ntin é ɔ, xó e é ɖɔ lɛ́ é ɖíe: ² ‘Un tuun nǔ e a wa lɛ́ é, azɔ̌ syɛ́nsyɛ́n e wa wɛ a ɖe é kpó didɛ towe kpó, un lɛ́ tuun ɖɔ a kún nɔ ba mɛdídá lɛ́ xó ó. Gɔ́ ná ɔ, a tɛ́n mɛ ɖěɖěe nɔ ɖɔ ɖɔ émí nyí mɛsɛ́dó bo ma ka nyí mɔ̌ ǎ lɛ́ é kpɔ́n, bo mɔ ɖɔ adingbannɔ wɛ nú yě. ³ A lɛ́ ɖo didɛ wɛ, a syɛ́nlǐn ɖó nyǐkɔ ce wú, bɔ awakanmɛ lɛ́ kú we ǎ. ⁴ É ɖo mɔ̌ có, nǔ towe e vɛ́ wǔ ce é ɖíe: a sɔ́ ɖó wǎnyíyí e a ɖó ɖo bǐbɛ́mɛ é ǎ. ⁵ “‘Énɛ́ wú ɔ, flín fí e a j’ayǐ sín é, bónú hwɛ towe lɛ́ ní vɛ́ nú we,* lobonú a ní wa nǔ e a wa ɖo bǐbɛ́mɛ lɛ́ é. Ényí a ma wa mɔ̌ ǎ ɔ, un ná wá gɔ̌n towe, bo ná ɖe zogbɛ́nhɛnnú towe sín tɛn tɔn mɛ, afi nú hwɛ towe lɛ́ vɛ́ nú we* ɔ nɛ́. ⁶ Amɔ̌, nǔ ɖagbe ɖé tíin bɔ a wa, é wɛ nyí ɖɔ a gbɛ́ wǎn nú nǔ e sinsɛngbɛ́ta Nikoláa tɔn nɔ wa lɛ́ é, lěe nyi lɔ gbɛ́ wǎn ná gbɔn é. ⁷ Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é: Un ná ná gbe mɛ e ná ɖu ɖ’é jí é, bɔ é ná ɖu atín e nɔ ná gbɛ mɛ, bo ɖo palaɖísi Mawu tɔn mɛ é sín sínsɛ́n.’ ⁸ “Wlǎn sɛ́dó agun e ɖo Simíini é sín wɛnsagun ɖɔ: Mɛ e nyí ‘Mɛ nukɔntɔn ɔ,’ bo lɛ́ nyí ‘Mɛ gǔdo tɔn ɔ,’ bo kú, bo lɛ́ fɔ́n wá gbɛ é ɔ, xó e é ɖɔ lɛ́ é ɖíe: ⁹ ‘Un tuun wǔvɛ́ e mɛ a ɖe é, bo tuun ɖɔ a jɛ hɛ̌n, loɔ, dɔkunnɔ wɛ nú we, un lɛ́ tuun nu e mɛ ɖěɖěe nɔ ylɔ́ yěɖée ɖɔ Jwifu bo ma ka nyí ǎ lɛ́ é nɔ nylá é; gbɛ̌ta* Satáan tɔn wɛ nú yě. ¹⁰ Nǔ e sín wǔvɛ́ ná se wɛ a ɖe lɛ́ é ní ma dó xɛsi we ó. Éɖíe! Awǒvi ná kpo ɖo mi mɛ ɖé lɛ́ bɛ́ nyi gan mɛ wɛ, bónú è ní dó sixú tɛ́n mi kpɔ́n bǐ mlɛ́mlɛ́, bɔ mi ná se wǔvɛ́ nú azǎn wǒ. Nɔ gbejí káká yi kú, énɛ́ ɔ, un ná ná we axɔ́súgbákún gbɛ tɔn. ¹¹ Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é: Kú wegɔ́ ɔ ná wa nǔ dó mɛ e ná ɖu ɖ’é jí é wú ɖo ali ɖěbǔ nu ǎ.’ ¹² “Wlǎn sɛ́dó agun e ɖo Pɛɛgámu é sín wɛnsagun ɖɔ: Mɛ e ɖó hwǐ nuwenɔ e ɖá, bo lɛ́ ɖi ga é ɔ, xó e é ɖɔ lɛ́ é ɖíe: ¹³ ‘Un tuun fí e a nɔ nɔ é, énɛ́ wɛ nyí, fí e axɔ́súzinkpo Satáan tɔn ɖe é; é ɖo mɔ̌ có, a kpo ɖo nyǐkɔ ce wú tɛ́ dó wɛ gbánwúngbánwún, bɔ é ná bo tlɛ nyí ɖo kúnnuɖetɔ́ ce gbejínɔtɔ́ Antipási e è hu ɖo akpá mitɔn, fí e Satáan nɔ nɔ é hwenu ɔ, a sa nǔɖiɖi e a ɖó nú mì é ǎ. ¹⁴ “‘É ɖo mɔ̌ có, nǔ towe ɖé lɛ́ vɛ́ wǔ ce, é wɛ nyí ɖɔ mɛɖé lɛ́ ɖo gɔ̌n towe, bo nɔ tɛ́ dó nǔkplɔ́nmɛ Baláamu tɔn wú; nya énɛ́ wɛ kplɔ́n nǔ Baláki ɖɔ é ní sɔ́ afɔklɛ́nnú ɖó nukɔn nú Izlayɛ́li ví lɛ́, énɛ́ wɛ nyí ɖɔ yě ní ɖu nǔ e è sɔ́ dó sá vɔ̌ nú vodún lɛ́ é, bo lɛ́ lɛ aga.* ¹⁵ Mɔ̌ ɖokpó ɔ, mɛɖé lɛ́ lɛ́ ɖo gɔ̌n towe, bo nɔ tɛ́ dó sinsɛngbɛ́ta Nikoláa tɔn sín nǔkplɔ́nmɛ wú. ¹⁶ Énɛ́ wú ɔ, hwɛ towe lɛ́ ní vɛ́ nú we.* É ma nyí mɔ̌ ǎ ɔ, un jawě gɔ̌n towe ɖo yǐyá mɛ, bo ná sɔ́ hwǐ gaga e nɔ tɔ́n sín nu ce mɛ é dó fun ahwan xá yě. ¹⁷ “‘Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é: Mɛ e ná ɖu ɖ’é jí é ɔ, un ná ná ɛ mǎna e ɖo hwlǎhwlá é kpɛɖé, un ná lɛ́ ná ɛ kɛ́n wěwé ɖokpó; è wlán nyǐkɔ yɔ̌yɔ́ ɖokpó dó kɛ́n ɔ jí, bɔ mɛ ɖěbǔ tuun zɛ mɛ e è ná é wú ǎ.’ ¹⁸ “Wlǎn sɛ́dó agun e ɖo Tiatíi é sín wɛnsagun ɖɔ: V ǐ Mawu tɔn e nukún tɔn lɛ́ cí myɔ hɛhɛ ɖɔhun, bɔ afɔ tɔn lɛ́ cí ganvɔ ɖagbe ɖagbe ɖɔhun é ɔ, xó e é ɖɔ lɛ́ é ɖíe: ¹⁹ ‘Un tuun nǔ e wa wɛ a ɖe lɛ́ é, wǎnyíyí towe, nǔɖiɖi towe, sinsɛnzɔ́ towe kpó didɛ towe kpó, bo lɛ́ tuun ɖɔ nǔ e wa wɛ a ɖe din lɛ́ é hú gǎn ée a wa ɖo bǐbɛ́mɛ lɛ́ é. ²⁰ “‘É ɖo mɔ̌ có, nǔ towe e vɛ́ wǔ ce é ɖíe: a jó nyɔ̌nu Jezabɛ́li énɛ́ e nɔ ylɔ́ éɖée ɖɔ gbeyíɖɔ é dó, bɔ é nɔ kplɔ́n nǔ kannumɔ ce lɛ́, lobo nɔ flú yě bónú yě ná lɛ aga,* lobo ɖu nǔ e è sɔ́ dó sá vɔ̌ nú vodún lɛ́ é. ²¹ Un ná ɛ hwenu bónú hwɛ tɔn lɛ́ ní vɛ́ n’i,* amɔ̌, é jló ná jó aga* e lɛ wɛ é ɖe é dó ǎ. ²² Éɖíe! Un ɖo nǎ sɔ́ ɛ nyi dó azɔnzan jí wɛ, bo ná ɖó wǔvɛ́ ɖaxó nú mɛ e nɔ lɛ aga* xá ɛ lɛ́ é, afi nú nǔ e é nɔ sísɛ́ yě bɔ yě nɔ wa lɛ́ é vɛ́ nú yě* ɔ nɛ́. ²³ Un ná sɔ́ jɛmɛjí e nɔ hu mɛ é dó hu vǐ tɔn lɛ́, mɔ̌ mɛ ɔ, agun lɛ́ bǐ ná tuun ɖɔ nyi wɛ nyí mɛ e nɔ kíjé linlin e gɔ́ngɔ́n lɛ́ é kpó ayi kpó kpɔ́n é, bɔ un ná sú axɔ́ mɛ ɖokpó ɖokpó sɔgbe xá nǔwiwa tɔn lɛ́. ²⁴ “‘É ɖo mɔ̌ có, mi mɛ e kpo ɖo agun Tiatíi tɔn mɛ lɛ́ é ɔ, un ɖo ɖiɖɔ nú midɛɛ lɛ́ e ma xwedó nǔkplɔ́nmɛ énɛ́ ǎ, bo ma kplɔ́n bo tuun nǔ e mɛ lɛ́ nɔ ylɔ́ ɖɔ “Satáan sín nǔ e gɔ́ngɔ́n lɛ́ é” ǎ lɛ́ é bǐ wɛ ɖɔ: Un ɖo agban kpinkpɛn ɖěvo ɖěbǔ ɖó kɔ jí nú mi wɛ ǎ. ²⁵ Nǔ ɔ kpowun wɛ nyí ɖɔ mi ní tɛ́ dó nǔ e mi ɖó é wú gbánwúngbánwún, káká jɛ hwenu e un ná wá é. ²⁶ Mɛ e ná ɖu ɖ’é jí bo ná xwedó nǔwiwa ce lɛ́ káká jɛ vivɔnu é ɔ, un ná ná ɛ acɛ dó akɔta lɛ́ jí, ²⁷ lěe Tɔ́ ce ná mì gbɔn é, bɔ é ná zán gankpo dó xlɛ́ ali togun ɔ lɛ̌ngbɔ́nyitɔ́ ɖɔhun, mɔ̌ mɛ ɔ, yě ná gba hánnyá kozɛ́n ɖɔhun. ²⁸ Bɔ un ná ná ɛ sunví zǎnzǎn tɔn. ²⁹ Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é.’