Nǔ e Mɛsɛ́dó lɛ́ wa lɛ́ é 27:1-44
27 Din ɔ, ɖó è wá gbeta ɔ kɔn ɖɔ mǐ ná dó tɔjíhún, bo ná yi Italíi wútu ɔ, yě sɔ́ Pɔ́lu kpó gantɔ́ ɖé lɛ́ kpó dó alɔ mɛ nú sɔ́jakanwekogán e nɔ nyí Juliwúsi, bo ɖo ahwangbɛ́ Ogwísi tɔn mɛ é.
2 Tɔjíhún ɖé gosín Adlamitiwɔ́mu, bo ja tɔjíhúnglíntɛn e ɖo xutó ɖo tokpɔn Azíi tɔn mɛ lɛ́ é gbɔn gbé, bɔ mǐ byɔ́ mɛ bo ɖidó. Alisitáki e nyí Masedwáninu, bo gosín Tɛsaloníki é zɔn xá mǐ.
3 Ayǐhɔ́ngbe tɔn ɔ, mǐ glín hǔn ɖo Sidɔ́ɔn, bɔ Juliwúsi wa nǔ xá Pɔ́lu kpó xomɛnyínyɔ́ kpó, bo ná gbe è ɖɔ é ní yi xɔ́ntɔn tɔn lɛ́ gɔ́n, bónú yě ní kpé nukún dó wǔ tɔn.
4 Mǐ sún hǔn sín fínɛ́, bɔ ɖó mǐ ɖo jɔhɔn kpé wɛ wútu ɔ, mǐ gbɔn tɔtɛ́ntinto Cíplu tɔn kpá, bo mɔ tɛn dó gló jɔhɔn ɔ.
5 Énɛ́ gúdo ɔ, mǐ kun hǔn bo xo xu e ɖo Silisíi kpó Panfilíi kpó é zlɛ́, bo wá nɔ te ɖo tɔjíhúnglíntɛn Mǐilu tɔn ɖo Lisíi.
6 Sɔ́jakanwekogán ɔ mɔ tɔjíhún e gosín Alɛsándli, bo xwe Italíi é ɖokpó ɖo fínɛ́, bo ɖɔ bɔ mǐ byɔ́ mɛ.
7 Énɛ́ gúdo ɔ, mǐ kun hǔn dɛ̌dɛ̌ nú azǎn nabí ɖé, bo wá wá Kinídi, é ka fá ɖěbǔ ǎ. Amɔ̌, ɖó jɔhɔn ɔ ma ɖo nǔ lɔn nú mǐ wɛ ǎ wútu ɔ, mǐ gbɔn Klɛ́ti sín akpá ɖo Salumɔnɛ́ɛ sín alɔxwé, bo ná mɔ tɛn dó gló jɔhɔn ɔ.
8 É bɔ wǔ ǎ, amɔ̌, mǐ kun hǔn gbɔn xutó, bo wá fí e è nɔ ylɔ́ ɖɔ Tɔjíhúnglíntɛn ɖagbe, b’ɛ ɖo toxo Lazée tɔn kpá é.
9 Ðó hwenu gěgé ko wá yi, bɔ hǔn kunkun gbɔn tɔ jí nyí awǒvinú din, lobɔ nubláblázán* ɔ tlɛ ko wá yi wútu ɔ, Pɔ́lu byɔ́ nǔɖé;
10 é ɖɔ nú yě ɖɔ: “Mɛ ce lɛ́ mi, un mɔ ɖɔ tomɛyiyi élɔ́ ná hɛn nǔ gěgé gblé; é ka nyí agban lɛ́ kpó tɔjíhún ɔ kpó kɛ́ɖɛ́ wɛ ɖo axɔ́ nu ǎ, loɔ, gbɛ* mǐtɔn lɔ ɖo axɔ́ nu.”
11 É ɖo mɔ̌ có, sɔ́jakanwekogán ɔ ɖótó Pɔ́lu ǎ, é ɖótó tɔjíhúnkuntɔ́ ɔ kpó tɔjíhúnnɔ ɔ kpó.
12 Ðó tɔjíhúnglíntɛn ɔ nɔ nyɔ́ nɔ avivɔhwenu ǎ wútu ɔ, gěgé mɛ e ɖo hǔn ɔ mɛ lɛ́ é tɔn ɖɔ ɖɔ mǐ ní sún hǔn, bo ná kpɔ́n ɖɔ mǐ ná kpé wú bo jɛ tɔjíhúnglíntɛn Klɛ́ti tɔn e nɔ nyí Fenísi, bo kpan nukɔn totaligbé-zǎnzǎnhwe jí kpó tofɔligbé-zǎnzǎnhwe jí kpó é, bo ná nɔ fínɛ́ ɖo avivɔ ɔ hwenu a jí.
13 Hwenu e jɔhɔn tofɔligbé tɔn ɔ jɛ nyinyi jí dɛ̌dɛ̌ é ɔ, yě mɔ ɖɔ linlin émítɔn jɛnu, bo sún gandótɔnu lɛ́, lobo jɛ hǔn ɔ kun jí gbɔn Klɛ́ti sín xutó.
14 É ɖo mɔ̌ có, hwenu kléwún ɖé gúdo ɔ, jɔhɔn syɛ́nsyɛ́n e è nɔ ylɔ́ ɖɔ Elakilɔ́ɔn* é jɛ nyinyi jí.
15 Jɔhɔn syɛ́nsyɛ́n ɔ d’alɔ tɔjíhún ɔ mɛ kpó zǐngídi kpó, bɔ mǐ sɔ́ sixú kpé wú bo kun hǔn kpan nukɔn jɔhɔn ɔ ǎ, énɛ́ wú ɔ, mǐ jó mǐɖée dó bɔ é dɔn mǐ ɖidó.
16 Énɛ́ gúdo ɔ, mǐ yá wǔ gbɔn tɔtɛ́ntinto kpɛví e è nɔ ylɔ́ ɖɔ Kodáa é kpá dín, bo mɔ tɛn dó gló jɔhɔn ɔ; é ɖo mɔ̌ có, é fá cóbónú mǐ wá kpé wú bo hwlɛ́n akló* e ɖo tɔjíhún ɔ sín gǔdo é ǎ.
17 Amɔ̌, ée yě sɔ́ akló ɔ dó tɔjíhún ɔ mɛ gúdo é ɔ, yě sin kan lɛ́ lɛ̌ dó tɔjíhún ɔ, bɔ ɖó yě ɖo xɛsi ɖi wɛ ɖɔ tɔjíhún ɔ táá wá yi dó ta xugbado Síitu* tɔn mɛ wútu ɔ, yě dɔn avɔ lɛ́ dó do,* bɔ jɔhɔn ɔ dɔn yě ɖidó.
18 Jɔhɔn syɛ́nsyɛ́n ɔ ɖo mǐ dán wɛ kpó zǐngídi ɖaxó kpó, énɛ́ wú ɔ, yě jɛ agban ɖe kpo nú tɔjíhún ɔ jí ayǐhɔ́ngbe tɔn.
19 Bɔ ɖo azǎn atɔngɔ́ ɔ gbe ɔ, yě ɖe tɔjíhún ɔ sín wǔjɔnú ɖé lɛ́ kɔn nyi gbě kpó alɔ yěɖésúnɔ tɔn lɛ́ kpó.
20 Ée hwesivɔ́ ma hun ǎ, bɔ sunví lɛ́ ma ka lɛ́ tɔ́n ǎ nú azǎn gěgé, bɔ jɔhɔn ɖaxó e syɛ́n tawun é nɔ nyi wá gba mǐ é ɔ, mǐ wá jɛ nukúnɖíɖó e mǐ ɖó ɖɔ mǐ ná gán é ba kpo jí.
21 Hwenu gěgé ko wá yi, bɔ yě ɖu nǔtí ǎ, énɛ́ gúdo ɔ, Pɔ́lu sí te ɖo tɛ́ntin yětɔn, bo ɖɔ: “Mɛ ce lɛ́ mi, é ɖo wɛn ɖɔ mi ɖó ná ko xwedó wěɖexámɛ ce, bo gɔn hǔn sún sín Klɛ́ti, énɛ́ ɔ, nǔ ná gblé nú mi lě ǎ, nǔ mitɔn ɖě ka ná lɛ́ dɔn ǎ.
22 É ɖo mɔ̌ có, din ɔ, un ɖo byɔ̌byɔ́ mi wɛ ɖɔ mi ní kpan akɔ́n, ɖó mɛ* ɖokpó ná dɔn ɖo mi mɛ ǎ, tɔjíhún ɔ kɛ́ɖɛ́ wɛ ná dɔn.
23 Zǎn e wá yi é mɛ ɔ, Mawu e tɔn un nyí, bo nɔ wa sinsɛnzɔ́ mímɛ́ ná é sín wɛnsagun ɖokpó wá nɔ te ɖo akpá ce,
24 bo ɖɔ: ‘Pɔ́lu, ma ɖi xɛsi ó, a ɖó ná yi Sezáa nukɔn; gɔ́ ná ɔ, ɖó hwi wú ɔ, Mawu ná hwlɛ́n mɛ e ɖo tɔjíhún ɔ mɛ xá we lɛ́ é bǐ.’
25 Énɛ́ wú ɔ, mɛ ce lɛ́ mi, mi kpan akɔ́n, ɖó un ɖi nǔ nú Mawu ɖɔ nǔ lɛ́ ná jɛ lěe è ɖɔ gbɔn nú mì é pɛ́ɛ́.
26 Amɔ̌, tɔjíhún ɖó ná gba dó mǐ ɖo tɔtɛ́ntinto ɖé jí.”
27 Ðo azǎn 14gɔ́ ɔ gbe, ɖo zǎnmɛ hwenu e jɔhɔn ɔ ɖo mǐ dán wɛ ɖo xu Adlíya tɔn jí é ɔ, mɛ e nɔ w’azɔ̌ ɖo tɔjíhún ɔ mɛ lɛ́ é jɛ linlin jí ɖo zǎnxwete ɖɔ yě ɖo agě ɖé sɛkpɔ́ wɛ.
28 Yě jlɛ́ doyiyi xu ɔ tɔn, bo mɔ mɛte 20,* énɛ́ wú ɔ, yě lɛ́ yi nukɔn kpɛɖé, bo lɛ́vɔ́ jlɛ́ bo mɔ mɛte 15.*
29 Ðó mǐ ɖo xɛsi ɖi wɛ ɖɔ tɔjíhún ɔ sixú yi gba dó awǐnnya wú wútu ɔ, yě dó gandótɔnu ɛnɛ xu ɔ mɛ, gbɔn tɔjíhún ɔ gúdo, bo jɛ biba jí ɖɔ ayǐ ní yá wǔ hɔ́n.
30 Mɛ e nɔ w’azɔ̌ ɖo tɔjíhún ɔ mɛ lɛ́ é ka jɛ tíntɛ́nkpɔ́n jí, bo ná hɔn sín tɔjíhún ɔ mɛ. Yě ɖe akló ɔ jɛ te dó xu ɔ jí, cí nǔ ɖɔ gandótɔnu lɛ́ dó xu ɔ mɛ gbé wɛ yě ja, gbɔn tɔjíhún ɔ sín awɔnnu ɖɔhun.
31 Ée Pɔ́lu mɔ mɔ̌ é ɔ, é ɖɔ nú sɔ́jakanwekogán ɔ kpó sɔ́ja lɛ́ kpó ɖɔ: “Ényí súnnu énɛ́ lɛ́ ma nɔ tɔjíhún ɔ mɛ ǎ ɔ, mi ná gán ǎ.”
32 Énɛ́ ɔ, sɔ́ja lɛ́ sɛ́n kan nú akló ɔ, bo jó è dó bɔ é ɖidó.
33 Ée ayǐ ɖibla hɔ́n é ɔ, Pɔ́lu dó wǔsyɛ́n lanmɛ nú yě bǐ ɖɔ yě ní ɖu nǔ, bo ɖɔ: “Sín azǎn 14 ɖíe wɛ mi ɖo nukún ɖó nǔ wɛ, bo ɖo adohu adohu jí, lobɔ mi ka lɛ́ ɖu nǔtí ǎ.
34 Énɛ́ wú ɔ, un ɖo wǔsyɛ́n dó lanmɛ nú mi wɛ ɖɔ mi ní ɖu nǔ; ganjíninɔ mitɔn wú wɛ un ɖɔ mɔ̌, ɖó ɖa e ɖo ta nú mi lɛ́ é ɖokpó vɔ́vɔ́ ná j’ayǐ ǎ.”
35 Ée é ɖɔ mɔ̌ é ɔ, é zé wɔ̌xúxú, bo dó kú nú Mawu ɖo yě bǐ nukɔn, bo fɛ́n lobo jɛ ɖuɖu jí.
36 Énɛ́ wú ɔ, yě bǐ kpan akɔ́n, bɔ yě lɔ jɛ nǔ ɖu jí.
37 Mǐ mɛ e ɖo tɔjíhún ɔ mɛ lɛ́ é bǐ bló gbɛtɔ́* 276.
38 Ée yě ɖu nǔ gɔ́ xo é ɔ, yě bɛ́ blěe sín tɔjíhún ɔ mɛ nyi dó xu ɔ mɛ dó ɖe agban kpo nú tɔjíhún ɔ.
39 Hwenu e ayǐ hɔ́n é ɔ, yě mɔ agě ɔ, yě ka tuun éé wɛ é ǎ, amɔ̌, yě mɔ xugbado ɖé sɛ́dó, bɔ nyɛ̌kɛ́n ɖo fínɛ́; énɛ́ ɔ, yě kán ɖ’é jí, bo ná yi glín tɔjíhún ɔ ɖó fínɛ́, ényí é sixú nyɔ́ bló ɔ nɛ́.
40 Énɛ́ wú ɔ, yě sɛ́n kan nú gandótɔnu lɛ́, bo jó yě dó bɔ yě jɛ xu ɔ mɛ, bɔ hwe ɖokpó ɔ nu ɔ, yě tún zɛn* lɛ́ sín kan lɛ́, bɔ énɛ́ gúdo ɔ, yě vlɔ́n avɔ kpɛví e ɖo nukɔn é, bónú jɔhɔn ní dó sixú dɔn tɔjíhún ɔ yi xu ɔ tó.
41 Hwenu e tɔjíhún ɔ gba dó kɔ́gúdu ɖaxó e kplé ɖo sin ɔ glɔ́ é ɖé wú é ɔ, é dó ta kɔ́gúdu ɔ mɛ, bɔ awɔnnu tɔn ján cí kɔ́mɛ, bo sɔ́ sixú sɛ tɛn ǎ, amɔ̌, aslɔkɛ́ lɛ́ jɛ xixo dó tɔjíhún ɔ wú jí ɖo gǔdo kpó zǐngídi kpó, bo gba tɔjíhún ɔ hánnyá ɖo gǔdo.
42 Ée nǔ nyí mɔ̌ é ɔ, sɔ́ja lɛ́ wá gbeta ɔ kɔn bo ná hu gantɔ́ lɛ́, bónú yě mɛ ɖě ní ma wá lin tɔ bo hɔn yi ó.
43 Amɔ̌, sɔ́jakanwekogán ɔ kán ɖ’é jí, bo ná hwlɛ́n Pɔ́lu sín mɛ, bo gbɛ́ nú yě ɖɔ yě ní ma wa nǔ e lin wɛ yě ɖe é ó. É ɖe gbe nú mɛ e nyɔ́ tɔ lin lɛ́ é ɖɔ yě ní lɔ́n jɛ xu ɔ mɛ, bo yi agě ɔ jí dó nukɔn,
44 bɔ mɛ e kpo lɛ́ é ná bɔ d’é wú, mɛ ɖě ná nɔ xwlɛ jí, bɔ mɛ ɖěvo lɛ́ ná nɔ tɔjíhún ɔ sín fínfɛ́n lɛ́ jí. Mɔ̌ mɛ ɔ, mɛ bǐ jɛ agě jí wǔyɛ́yɛ́ afɔyɛ́yɛ́.
Tínmɛ e ɖo do lɛ́ é
^ Septembre kpó octobre kpó sín avla mɛ wɛ, hwenu e jǐ nɔ jɛ jija jí, bɔ xu nɔ ɖo adǎn jí é.
^ Alǒ “lǐndɔ̌n.”
^ Énɛ́ wɛ nyí, jɔhɔn tofɔligbé-zǎnzǎnhwe jí tɔn ɖé.
^ È nɔ zán dó hwlɛ́n gbɛ gán hwenu e awǒvinú ja jijɛ gbé é.
^ Kpɔ́n Xógbe ɖé lɛ́ sín tínmɛ.
^ Kpo kpó kan kpó, éé nɔ hɛn avɔ lɛ́ ɖó te é lɔ sixú ko ɖ’é mɛ.
^ Alǒ “lǐndɔ̌n.”
^ Alǒ “lǐndɔ̌n.”
^ Nǔɖé wɛ bɔ tɔjíhúnkuntɔ́ lɛ́ nɔ zán dó xo sin dó akpá vovo xwé, bo nɔ lɛ́ dó xlɛ́ ali tɔjíhún ná.
