Wěma nukɔntɔn e è wlán sɛ́dó Kɔlɛ́ntinu lɛ́ é 5:1-13
5 Agalilɛ* sín xó ɖé ɖo tɛ́ntin mitɔn bɔ mɛ lɛ́ nɔ ɖo ɖiɖɔ wɛ, bɔ è tlɛ nɔ mɔ agalilɛ* mɔ̌hun ɖo mɛ e ɖo akɔta ɖě lɛ́ mɛ lɛ́ é gɔ́n ǎ, é wɛ nyí ɖɔ mɛ ɖokpó ɖo mi mɛ bo yí tɔ́ tɔn sín asi.
2 Bɔ mi nɔ gó ɖó énɛ́ wú wɛ a? Aluwɛ mɛ wɛ mi ɖó ná byɔ́ lobo ɖe mɛ e wa nǔ mɔ̌hun é sín tɛ́ntin mitɔn ǎ cé?
3 Un ɖo kpɔ́ xá mi cɔɔ lě* ǎ có, un ɖo fínɛ́ ɖo ayi* mɛ, bɔ un ko ɖɔ hwɛ xá nya e wa nǔ énɛ́ é cí nǔ ɖɔ kpɔ́ wɛ un ɖe xá mi nǔgbó ɖɔhun.
4 Hwenu e mi ná kplé ɖó kpɔ́ ɖo Aklúnɔ mǐtɔn Jezu nyíkɔ mɛ é ɔ, mi ní tuun ɖɔ un ɖo kpɔ́ xá mi ɖo ayi* mɛ, bɔ hlɔ̌nhlɔ́n Aklúnɔ mǐtɔn Jezu tɔn lɔ ɖo kpɔ́ xá mi.
5 Mi ɖó ná jó mɛ mɔ̌hun nú Satáan bónú kún agbaza ɔ tɔn ní dó sixú sú dó, bónú è ní dó sixú hwlɛ́n gbigbɔ ɔ gán ɖo Aklúnɔ sín azǎn gbe.
6 Nugo e mi nɔ yí é nyí nǔ ɖagbe ǎ. Mi tuun ɖɔ tɔ́n kpɛví ɖé wɛ nɔ fɔ́n linfín e è nya é blěbú ǎ cé?
7 Mi ɖe tɔ́n xóxó ɔ síin, bo ná dó sixú nyí linfín nyinya yɔ̌yɔ́, ɖó tɔ́n sɔ́ ɖo mi mɛ ǎ. Ðó nǔgbó ɔ, è ko sɔ́ Klísu lɛ̌ngbɔ́ví Dǐndínwáyixwe tɔn mǐtɔn ɔ dó sá vɔ̌.
8 Énɛ́ wú ɔ, mi nú mǐ ní ma sɔ́ tɔ́n xóxó ɔ, alǒ nǔnyanyawiwa kpó hwɛhuhu kpó sín tɔ́n dó ɖu xwe ɔ ná ó, é nyɔ́ wa ɔ, é ní nyí kpó wɔ̌xúxú e mɛ è ma dó tɔ́n ǎ é kpó, énɛ́ wɛ nyí nǔ ɖagbe kpó nǔgbó kpó.
9 Ðo wěma e un sɛ́ dó mi é mɛ ɔ, un wlán ɖɔ mi ní ma sɔ́ nɔ dó gbɛ̌ xá agalɛtɔ́* lɛ́ ɖě ó.
10 É nyí mi ní nɔ zɔ nú agalɛtɔ́,* nukúnkɛndótɔ́, mɛwlóɖutɔ́ alǒ bǒcyɔsɛntɔ́ gbɛ élɔ́ tɔn lɛ́ bǐ mlɛ́mlɛ́ xó ɖɔ wɛ un ɖe ǎ. Ényí mɔ̌ wɛ ɔ, mi ná gbɔ bo gosín gbɛ ɔ mɛ nɛ́.
11 Amɔ̌ din ɔ, un ɖo nǔ wlán sɛ́dó mi wɛ ɖɔ mi ní ma sɔ́ nɔ dó gbɛ̌ xá mɛ ɖěbǔ e è ylɔ́ ɖɔ nɔví, bɔ é ka nyí agalɛtɔ́,* nukúnkɛndótɔ́, bǒcyɔsɛntɔ́, nǔyáɖɔnúmɛtɔ́,* ahannumúnɔ alǒ mɛwlóɖutɔ́ é ɖě ó. Mi ní ma tlɛ nɔ ɖu nǔ xá mɛ mɔ̌hun lɔ vɔ́vɔ́ ó.
12 Ðó étɛ́ ka kan mì ɖo hwɛɖiɖɔ xá mɛ e ma ɖo agun ɔ mɛ ǎ lɛ́ é mɛ? Mi wɛ ná nɔ ɖɔ hwɛ xá mɛ e ɖo agun ɔ mɛ lɛ́ é,
13 bɔ Mawu ná ɖɔ hwɛ xá mɛ e ma ɖo agun ɔ mɛ ǎ lɛ́ é ǎ cé? “Mi ɖe nǔnyanyawatɔ́ ɔ sín tɛ́ntin mitɔn.”
Tínmɛ e ɖo do lɛ́ é
^ Pɔnɛyíya ɖo Glɛ̌kigbe mɛ. Kpɔ́n Xógbe ɖé lɛ́ sín tínmɛ.
^ Pɔnɛyíya ɖo Glɛ̌kigbe mɛ. Kpɔ́n Xógbe ɖé lɛ́ sín tínmɛ.
^ Blǔju tɔn, “ɖo agbaza mɛ.”
^ Blǔju tɔn, “gbigbɔ.”
^ Blǔju tɔn, “gbigbɔ.”
^ Kpɔ́n Xógbe ɖé lɛ́ sín tínmɛ: “Agalilɛ.”
^ Kpɔ́n Xógbe ɖé lɛ́ sín tínmɛ: “Agalilɛ.”
^ Kpɔ́n Xógbe ɖé lɛ́ sín tínmɛ: “Agalilɛ.”
^ Alǒ “mɛzuntɔ́.”
