Agostinho e nɔ nɔ Brésil é ɖɔ: “Un sù ɖò gle tò ɔ tɔn ɖé mɛ. Wamamɔnɔ klókló wɛ nú mǐ. Un gbɔ bo jó azɔ̌mɛ dó, bo na mɔ tɛn dó w’azɔ̌ bo d’alɔ xwédo mǐtɔn.” Xwè 33 wɛ Agostinho ko ɖó hwɛ̌ cobo nyɔ́ nǔ wlan, lobo lɛ́ nyɔ́ nǔ xá. É ɖɔ: “Nǔwlanwlán kpo nǔxixa kpo e un kplɔ́n é d’alɔ mì bɔ un ɖó wi ɖò ta hugǎn.”

Agostinho ɖò mɛ 250 000 jɛji ɖěɖee Kúnnuɖetɔ́ Jehovah tɔn lɛ kplɔ́n nǔwlanwlán kpo nǔxixa kpo ɖò xwè 70 jɛji e wá yì lɛ é mɛ é mɛ. Etɛwu Kúnnuɖetɔ́ Jehovah tɔn lɛ ka sɔnǔ nú klási mɔ̌hun lɛ? Nɛ̌ mɛ lɛ ka ɖu lè tɔn gbɔn?

Ðò 1935 ɔ, Kúnnuɖetɔ́ Jehovah tɔn lɛ nɔ jla wɛn ɔ gbɔn tò 115 mɛ. Bo na dó jla wɛn ɔ mɛ e nɔ dó gbè vovo lɛ é ɔ, mɛsɛ́dó lɛ nɔ xò xóɖiɖɔ junjɔn Biblu jí e è lilɛ dó gbè ɖevo mɛ bo yí dó kan jí lɛ é nú mɛ lɛ, bɔ ɖò ninɔmɛ ɖé lɛ mɛ ɔ, ye nɔ xwlé wema e ɖò anɔ̌nugbe yetɔn mɛ lɛ é ye. Mɛ gegě nɔ jló tawun bo na kplɔ́n Biblu có, nǔ e ye ma nyɔ́ xà ǎ é kpo nǔ e ye ma nyɔ́ wlan ǎ é kpo nɔ gbò kpo nyi ali jí nú ye mɛ ɖé lɛ.

Ðó mɛ lɛ ma nɔ kpéwú bo nɔ xà Biblu ɔ yeɖesunɔ ǎ wutu ɔ, é nɔ vɛwǔ nú ye tawun bonu ye na kplɔ́n nǔgbododó Biblu tɔn lɛ bo xwedó. (Jozuwée 1:8; Ðɛhan 1:2, 3) Ye nɔ lɛ́ mɔ wuvɛ̌ gegě ɖò Klisanwun sín azɔ̌ yetɔn lɛ wiwa kɔn. Ði kpɔ́ndéwú ɔ, enyi mɛjitɔ́ lɛ ma nyɔ́ nǔ xà ǎ ɔ, nǔ kplɔnkplɔn vǐ yetɔn lɛ dó Biblu wu nɔ byɔ gǎndidó tawun ɖò ye sí. (Sɛ́nflínmɛ 6:6, 7) Gɔ́ na ɔ, mɛ e huzu Kúnnuɖetɔ́ tlolo, bo ma ka nyɔ́ nǔ xà ǎ lɛ é ɔ, nǔwukpíkpé e ye ɖó bo na zán Biblu ɔ hwenu e ye ɖò nǔ kplɔ́n mɛ ɖevo lɛ wɛ é é nɔ ɖó dogbó.

Ðò 1940 kpo 1959 kpo vlamɛ ɔ, mɛ ɖěɖee nɔ kpé nukún dó azɔ̌ Kúnnuɖetɔ́ Jehovah tɔn lɛ tɔn wu lɛ é we, ye wɛ nyí Nathan H. Knorr kpo Milton G. Henschel kpo, yì tò gegě mɛ bo d’alɔ bɔ è bló tuto nú wɛnɖagbejijlazɔ́ ɔ. Ðò tò ɖěɖee mɛ mɛ gegě ma nyɔ́ nǔ wlan, bo ma lɛ́ nyɔ́ nǔ xà ɖè ǎ lɛ é ɔ, ye dó wusyɛn lanmɛ nú alaxɔ ayǐ ɔ jí tɔn ɖɔ é ni bló tuto nú klási nyɔ̌wlan-nyɔ̌xa tɔn lɛ ɖò agun lɛ mɛ.

Alaxɔ lɛ sɛ́ alixlɛ́mɛ lɛ dó agun lɛ dó lee ye na bló tuto nú klási lɛ gbɔn é wu. Ðò tò ɖé lɛ mɛ ɔ, acɛkpikpa ɔ ko nɔ ɖó wlɛnwín mɛkplɔnkplɔn tɔn lɛ kpo wema lɛ kpo, bɔ è sixu zán. Ði kpɔ́ndéwú ɔ, ɖò Brésil ɔ, acɛkpikpa ɔ sɛ́ wema lɛ kpo azɔ̌wanú ɖevo lɛ kpo dó alaxɔ ɔ, bɔ é má ye gbɔn agun lɛ mɛ. Ðò tò ɖevo lɛ mɛ ɔ, Kúnnuɖetɔ́ lɛ ɖesunɔ wɛ bló tuto nyɔ̌wlan-nyɔ̌xa ɔ tɔn.

Sunnu, nyɔnu, yɔkpɔvu kpo mɛxo kpo bǐ wɛ è hun klási nyɔ̌wlan-nyɔ̌xa tɔn lɛ sín hɔn kɛ́ na. Linlin ɔ wɛ nyí ɖɔ è na kplɔ́n mɛ lɛ bonu ye na nyɔ́ anɔ̌nugbe yetɔn xà, enyi enɛ na bo tlɛ byɔ ɖɔ è ni sɔnǔ nú klási gbè vovo lɛ tɔn ɖò agun ɖokpo ɔ mɛ ɔ nɛ.

Nɛ̌ mɛ lɛ ka ɖu lè tuto nyɔ̌wlan-nyɔ̌xa tɔn enɛ tɔn gbɔn? Nawe ɖé nyí Kúnnuɖetɔ́ bo ɖò Mexique bo ɖɔ: “Dìn ɔ, un nɔ mɔ nukúnnú jɛ wɛn Biblu tɔn mɛ, bɔ é nɔ byɔ ayi ce mɛ. Nǔ e un nyɔ́ xà é d’alɔ mì bɔ un nɔ vo, bo nɔ ɖɔ xó xá nɔzo ce lɛ lobo nɔ lɛ́ kpéwú, bo nɔ jla wɛn Biblu tɔn ɔ mɛ gegě hugǎn.”

Lè e tuto nyɔ̌wlan-nyɔ̌xa tɔn ɔ hɛn wá nú mɛ lɛ é hugǎn alɔdidó ye bonu ye na mɔ nukúnnú jɛ Biblu ɔ mɛ kpowun. Isaac e nɔ nɔ Burundi é ɖɔ: “Nǔwlanwlán kpo nǔxixa kpo e un kplɔ́n é d’alɔ mì bɔ un kplɔ́n xɔgbigbázɔ́. Xɔgbigbá wá huzu azɔ̌ ce, bɔ dìn ɔ, un nɔ kpé nukún dó tuto xɔgbigbá tɔn ɖaxó ɖaxó lɛ wu.”

Xwè 49 wɛ Jesusa e nɔ nɔ Pérou é ɖó cobo jɛ klási nyɔ̌wlan-nyɔ̌xa tɔn yì jí. É ɖɔ: “Ðó un nyí nyɔnu xwési ɖé wutu ɔ, é nɔ byɔ ɖɔ nú un yì axi mɛ ɔ, má xà nyikɔ nǔ e un jló na xɔ lɛ é tɔn kpo akwɛ yetɔn kpo. Ð’ayǐ ɔ, enɛ nɔ vɛwǔ nú mì ɖesu. Amɔ̌, klási nyɔ̌wlan-nyɔ̌xa tɔn ɔ d’alɔ mì, bɔ un nɔ vo bo nɔ xwlé axi nú xwédo ce.”

Ðò xwè lɛ vlamɛ ɔ, axɔ́suzɔ́watɔ́ tò vovo tɔn lɛ kpa Kúnnuɖetɔ́ Jehovah tɔn lɛ nú azɔ̌ e ye wà bɔ tuto nyɔ̌wlan-nyɔ̌xa tɔn yì nukɔn é. Égbé ɔ, Kúnnuɖetɔ́ Jehovah tɔn lɛ kpò ɖò tuto klási nyɔ̌wlan-nyɔ̌xa tɔn lɛ tɔn bló wɛ, bo nɔ zán wlɛnwín kpo azɔ̌wanú kpo ɖěɖee wu è w’azɔ̌ ɖè ɖò xwè lɛ vlamɛ lɛ é. Ye lɛ́ sɔnǔ nú alɔnuwema lɛ, bo zín livi 224 mɔ̌ dó gbè 720 mɛ bo na mɔ tɛn dó d’alɔ mɛ lɛ bonu ye na kplɔ́n nǔxixa, alǒ d’alɔ mɛ ɖěɖee ma sè wema kaka ɖé ǎ lɛ é. *