“Nǔɖiɖi wɛ nyí te ninɔ kpɔ́n nǔ e ɖó nukún wɛ è ɖe é kpó jiɖiɖe kpó; nǔ e tíin bɔ è ma nɔ mɔ ǎ lɛ́ é sín kúnnuɖenú e ɖo wɛn é wɛ.”—Eblée lɛ́ 11:1, Biblu gbɛ yɔ̌yɔ́ ɔ tɔn.

 “Nǔɖiɖi ɖíɖó wɛ nyí è ní ɖeji dó nǔ e ɖó nukún wɛ è ɖe ɔ wú; è ní gán jɛ nǔ e è ma mɔ ǎ é wú ɖɔ é tíin.”—Eblée lɛ́ 11:1, MAWUXÓWÉMA.

 Wěmafɔ énɛ́ wɛ tínmɛ nǔ e nǔɖiɖi nyí é ɖo kléwún mɛ hú gǎn ɖo Nǔwlánwlán mímɛ́ lɛ́ mɛ, bo xlɛ́ ɖɔ nǔɖiɖi byɔ́ nǔ hú è ní ɖi nǔ nú nǔɖé kpowun.

 “Nǔɖiɖi wɛ nyí te ninɔ kpɔ́n nǔ e ɖó nukún wɛ è ɖe é kpó jiɖiɖe kpó.” Ðo gbe dodó e mɛ è wlán Eblée lɛ́ 11:1 dó é mɛ ɔ, xókwín Glɛ̌kigbe tɔn e tínmɛ bɔ é nyí “nǔɖiɖi” é nɔ ɖe linlin jiɖiɖe kpó gǎnjɛwú syɛ́nsyɛ́n kpó tɔn tɔ́n. Nǔɖiɖi mɔ̌hun nɔ jínjɔ́n nǔ e è jló ɖɔ é ní jɛ é jí kpowun ǎ, loɔ ‘te ninɔ kpɔ́n nǔɖé kpó jiɖiɖe kpó’ wɛ. Xógbe Glɛ̌kigbe tɔn e è tínmɛ bɔ é nyí ‘te ninɔ kpɔ́n nǔɖé kpó jiɖiɖe kpó’ a é ɔ, è sixú lɛ́ tínmɛ bɔ é nyí “ayǐkúngbanwéma”; ayǐkúngbanwéma énɛ́ nɔ dó gesí gǎnjɛwú ɖé, bo nɔ ná jiɖe mɛ e sí é ɖe é.

 “Nǔɖiɖi wɛ nyí . . . nǔ e tíin bɔ è ma nɔ mɔ ǎ lɛ́ é sín kúnnuɖenú e ɖo wɛn [alǒ, “ɖu ɖo mɛ jí,” tínmɛ e ɖo do é] é.” Nǔɖiɖi nɔ jínjɔ́n kúnnuɖenú e lí dǒ é jí. Kúnnuɖenú mɔ̌hun syɛ́n sɔmɔ̌ bo nɔ zɔ́n bɔ ényí mɛɖé ma tlɛ sixú mɔ nǔɖé ɖó nukún wú ǎ ɔ, é nɔ ɖó gǎnjɛwú ɔ ɖɔ nǔ énɛ́ tíin.

 Wěma Eblée lɛ́ tɔn nyí wěma e mɛsɛ́dó Pɔ́lu wlán sɛ́dó klisánwun xwe kanweko nukɔntɔn ɔ tɔn e nɔ nɔ Jeluzalɛ́mu kpó yě mɛ e nɔ nɔ xá e lɛ́ lɛ̌ dó Jeluzalɛ́mu lɛ́ é mɛ lɛ́ é kpó é. Ðo akpáxwé wěmasɛ́dómɛ ɔ tɔn énɛ́ mɛ ɔ, Pɔ́lu ɖɔ xó dó lě do nǔɖiɖi ɖo tají sɔ é wú. Ði kpɔ́ndéwú ɔ, é wlán ɖɔ: “Nǔɖiɖi mɛvo ɔ, nǔ mɛtɔn sixú nyɔ́ Mawu nukúnmɛ ǎ, ɖó mɛ ɖěbǔ e sɛkpɔ́ Mawu é ɖó ná ɖi nǔ ɖɔ é tíin, bo nɔ dó ajɔ mɛ e ɖo biba ɛ wɛ vɛ́návɛ́ná lɛ́ é.” (Eblée lɛ́ 11:6) Ée Pɔ́lu tínmɛ nǔ e nǔɖiɖi nyí é ɖo Eblée lɛ́ 11:1 mɛ gúdo é ɔ, é ná kpɔ́ndéwú súnnu kpó nyɔ̌nu kpó e xó Biblu ɖɔ bɔ yě ɖe jijɔ énɛ́ xlɛ́ lɛ́ é tɔn. É ɖɔ lěe yě ɖe nǔɖiɖi yětɔn xlɛ́, gbɔn nǔwiwa sɔgbe xá jlǒ Mawu tɔn gblamɛ gbɔn é sín xó.—Eblée lɛ́ 11:4-38.