Biblu ɖɔ xó ɖě dó fɔtóo nǔbliblíwiwa tɔn kpinkpɔn, xóɖóxámɛxó ɖiɖɔ gbɔn Ɛntɛnɛti jí, alǒ nǔ mɔhun ɖě wu tlɔlɔ ǎ. Amɔ̌, Biblu xlɛ́ lee nǔwalɔ ɖěɖee nɔ flɔ́ zo dó glɔ̌ nú xóɖóxámɛ e ma nyí ɖò alɔwliwli mɛ ǎ é, alǒ ɖěɖee nɔ zɔ́n bɔ è nɔ ɖó linlin masɔgbe dó xóɖóxámɛ wu lɛ é nɔ cí nú Mawu é nyì wɛn. Kpɔ́n wemafɔ Biblu tɔn elɔ lɛ:

•   “Hǔn, mi bo sú nǔ e nyí ayikúngban jí tɔn ɖò ayi mitɔn mɛ lɛ sín kún dó; nǔ enɛ lɛ wɛ nyí: agalilɛ, nǔbliblíwiwa, jlǒ agbaza tɔn lɛ.” (Kolosinu 3:5) Fɔtóo nǔbliblíwiwa tɔn kpinkpɔn nɔ sú kún dó nú jlǒ nyanya lɛ ǎ, é nyɔ́ wà ɔ, zo wɛ é nɔ flɔ́ dó glɔ̌ nú ye. É nɔ zɔ́n bɔ è nɔ nyí mɛbliblí ɖò Mawu nukúnmɛ.

•   “Mɛɖé kpɔ́n nyɔnu ɖé bo ɖò linlin wɛ na ɖóxó xá ɛ ɔ, é ko lɛ̀ aga xá nyɔnu enɛ ɖò ayi mɛ xóxó.” (Matie 5:28) Fɔtóo nǔbliblíwiwa tɔn kpinkpɔn nɔ dɔn linlin nyanya e nɔ zɔ́n bɔ è nɔ wà nǔ nyanya lɛ é wá.

•   “È ma sè agalilɛxó, nǔbliblíwiwa, abǐ nukúnkɛ́ndidó sín xó vɔ́vɔ́ ɖò tɛntin mitɔn ó.” (Efɛzinu lɛ 5:3) Mǐ ɖó na nɔ sɔ́ nǔbliblíwiwaxó dó ɖ’alisá na, kaka bo na wá ɖɔ mǐ na kpɔ́n alǒ xà nǔ d’ewu ǎ.

•   “Nǔ nyanya e gbɛtɔ́ nɔ wà lɛ ɖò nǔglɔ ǎ; ye wɛ nyí: agalilɛ, nǔ kwijikwiji wiwa, . . . kpodo nǔ hǔnmɛ enɛ lɛ kpan. Un ɖò ɖiɖɔ nú mi wɛ dìn lee un ko ɖɔ gbɔn nú mi ɖ’ayǐ ɔ, ɖɔ mɛ e nɔ wà nǔ mɔhunkɔtɔn lɛ kún ɖò axɔ́suɖuɖu Mawu tɔn mɛ na byɔ wɛ ó.” (Galatinu lɛ 5:19-21) Mawu nɔ mɔ mɛ ɖěɖee nɔ kpɔ́n fɔtóo nǔbliblíwiwa tɔn, nɔ ɖɔ xóɖóxámɛxó gbɔn Ɛntɛnɛti jí, gbɔn alokan jí, alǒ nɔ sɛ́ nǔbliblí lɛ dó mɛ gbɔn alokan jí lɛ é dó mɔ mɛbliblí, mɛ e walɔ yetɔn ko kwiji lɛ é. Nú mǐ nɔ ɖ’alɔ ɖò nǔ mɔhun lɛ mɛ ɔ, mǐ na ba fɛ́nú Mawu tɔn kpò bǐ mlɛ́mlɛ́.