Mɛ̌ mɛ̌ e ka ɖó na kplɔ́n nǔ vǐ lɛ dó mɛ̌ wu? Mɛjitɔ́ lɛ wɛ Biblu sɔ́ azɔ̌ enɛ dó así na, bɔ mɛjitɔ́ gegě ko mɔ ɖɔ wěɖexámɛ e bɔ d’ewu lɛ é xwixwedó nɔ d’alɔ:

•   Ma nɔ kú winnya ó. Biblu ɖɔ xó nyi wɛn dó mɛ̌, sunnuxwé kpo nyɔnnuxwé kpo wu, bɔ Mawu ɖɔ nú akɔta Izlayɛli tɔn ɖɔ è ɖó na kplɔ́n nǔ “yɔkpɔvu” lɛ dó xó mɔhun lɛ wu. (Sɛ́nflínmɛ 31:12; Levíi ví lɛ 15:2, 16-19) A sixu zán xógbe e jɛxa bo ma na ɖexlɛ́ ɖɔ mɛ̌ alǒ wǔjɔnú gbɛtɔ́ tɔn ee nɔ nɔ hwlahwlá lɛ é nyí winnyanú ǎ lɛ é.

•   Nɔ kplɔ́n nǔ ye kpɛɖé kpɛɖé. Ma ɖɔ hwenu e vǐ towe jɛ winnyawinnya xwè sɛkpɔ́ jí é wɛ emi na ɖɔ nǔ e kúnkplá mɛ̌ lɛ é bǐ n’i ɖò tɛndo ɖokpo mɛ ó, é nyɔ́ wà hǔn, tinmɛ gǒflɛ́mɛ ɖěɖee mɛ é sixu mɔ nukúnnú jɛ lɛ é n’i kpɛɖé kpɛɖé.—1 Kɔlɛntinu lɛ 13:11.

•   Nɔ kplɔ́n nǔgbododó walɔ ɖagbe tɔn lɛ ye. È sixu kplɔ́n nǔɖe lɛ vǐ lɛ ɖò wemaxɔmɛ dó mɛ̌ wu. Amɔ̌, Biblu dó wusyɛn lanmɛ nú mɛjitɔ́ lɛ ɖɔ é kún nyí lee mɛ̌ cí é kɛɖɛ wɛ ye na kplɔ́n vǐ yetɔn lɛ ó, loɔ, ye na lɛ́ kplɔ́n ye bɔ ye na nɔ ɖó linlin e sɔgbe é dó mɛ̌ wu, bɔ jijɔ yetɔn na nɔ xlɛ́ ɖɔ ye ɖó sísí na.—Nǔnywɛxó 5:1-23.

•   Nɔ ɖótó vǐ towe. Enyi vǐ towe kan nǔ byɔ we dó mɛ̌ wu hǔn, ma ván nukún d’è alǒ ma yawǔ ɖó linlin agɔ dó wǔ tɔn ó. É nyɔ́ wà hǔn, nɔ “ɖò gbesisɔmɛ bo na nɔ ɖótó mɛ,” ma “nɔ zɔn xó jí” ó.—Jaki 1:19, nwt.

Lee a na nya xɛ ɖò vǐ towe jí sín mɛ e nɔ ɖóxó xá vǐ kpɛví lɛ é sí gbɔn é

•   Sɔnǔ nú hwiɖée. Ba dò nú nǔ dó lee mɛ e nɔ ɖóxó xá vǐ kpɛví lɛ é nɔ wà nǔ gbɔn é wu.—Nǔnywɛxó 18:15; kpɔ́n wemata 32gɔ́ wema Les jeunes s’interrogent: Réponses pratiques, Akpáxwé 1 tɔn.

•   Nɔ mɔ dò nú nǔ e ɖò jijɛ wɛ ɖò vǐ towe sín gbɛzán mɛ é. Mɔ nǔ jɛ wu ɖɔ mɛ e lɔ mɛ vǐ towe ɖè é nyí mɛ ɖejid’ewu, bo ma ka lɔn nú é nɔ “gbawunjo mɛ” ó.—Nǔnywɛxó 29:15.

•   Kplɔ́n vǐ towe nú e ni ɖó linlin e ɖò jlɛ̌ jí é dó tónúsíse wu. Vǐ lɛ ɖó na kplɔ́n bo na setónú nú mɛjitɔ́ yetɔn lɛ. (Kolosinu lɛ 3:20) Amɔ̌, nú a kplɔ́n vǐ towe ɖɔ é ɖó na nɔ setónú hwebǐnu nú mɛxo ɖebǔ hǔn, a ɖò sísɔ́ ɛ ɖó mɛ e nɔ ɖóxó xá vǐ kpɛví lɛ é sín mɔ mɛ wɛ nɛ. Mɛjitɔ́ Klisanwun lɛ sixu ɖɔ nú vǐ yetɔn ɖɔ, “Enyi mɛ ɖebǔ ɖɔ nú we ɖɔ a ni wà nǔ e Mawu gbɛ́ wǎn na é hǔn, ma bló ó.”—Mɛsɛ́dó 5:29.

•   Ðè afɔ klewun klewun e na nya xɛ ɖò mɛ jí lɛ é. D’alɔ vǐ towe bonu é ni tuùn nǔ e é na wà hwenu e mɛɖé na tɛ́n kpɔ́n bo na ɖóxó xá ɛ, hwenu e a ma ɖò finɛ ǎ é é. Lee nǔ ɔ nɔ yì gbɔn é sín kpɔ́ndéwú klewun ɖé xíxlɛ́ vǐ towe sixu zɔ́n bɔ é na kpankɔ́n bo ɖɔ “Ma sɔ́ bló mɔ̌ ɖě ó! Na ɖè we gbà!” bo yawǔ hɔn sín finɛ. É sixu byɔ ɖɔ a ni nɔ flín nǔ “vǐ towe lɛ bléblé,” ɖó ye sixu yawǔ wɔn.—Sɛ́nflínmɛ 6:7, Contemporary English Version.