Eǒ. Tutoblonunu mǐtɔn nɔ gbéjé fímu lɛ, wema lɛ, alǒ han lɛ kpɔ́n, bo nɔ slɛ́ ɖěɖee mǐ ɖó na nyi alɔ na lɛ é ǎ. Etɛwu?

  Biblu dó wusyɛn lanmɛ nú mǐ mɛ ɖokpo ɖokpo ɖɔ mǐ ni kplɔ́n “nǔwukpíkpé nukúnnúmɔjɛnǔmɛ tɔn” mǐtɔn, bo na dó tuùn nǔ e sɔgbe é kpo nǔ e nyla é kpo.—Eblée lɛ 5:14, nwt.

  Nǔgbododó lɛ ɖò Mawuxówema ɔ mɛ, bɔ Klisanwun ɖé sixu da kpɔ́n hwenu e é ɖò ayiɖeɖayǐ tɔn lɛ cyan wɛ é. a Lee é nɔ nyí gbɔn ɖò gbɛzán mǐtɔn sín akpáxwé lɛ bǐ mɛ é ɔ, nǔ e gbé mǐ nɔ nya é wɛ nyí ɖɔ mǐ “nɔ tɛ́n kpɔ́n bo nɔ tuùn nǔ e nɔ nyɔ́ Aklunɔ nukúnmɛ é.”—Efɛzinu lɛ 5:10.

  Biblu kplɔ́n mɛ ɖɔ tatɔ́ xwédo tɔn lɛ ɖó acɛ ɖó bǎ ɖé mɛ, enɛ wu ɔ, ye sixu wá gbeta ɔ kɔn bo dó ayiɖeɖayǐ ɖé lɛ sín sɛ́n nú mɛ e ɖò xwédo yetɔn mɛ lɛ é. (1 Kɔlɛntinu lɛ 11:3; Efɛzinu lɛ 6:1-4) É ɖò mɔ̌ có, nú é tɔ́n sín xwédo mɛ ɔ, mɛ ɖebǔ ɖó acɛ bo na ɖè nyǐ fímu, han, alǒ hansinɔ ɖé lɛ, lobo dó sɛ́n yetɔn nú mɛ e ɖò agun ɔ mɛ lɛ é ǎ.—Galatinu lɛ 6:5.