E RAICI vakabibi ena so na vanua na irogorogo, ya na vuna e taqomaki kina vakalawa. E okati e keri nona taqomaki e dua mai na veibeitaki (itukutuku tabaki se volai me vosavakacacataki kina e dua), kei na vakaucaca (vakacacani kena irogorogo e dua ena vosa e cavuti). Na kena kauaitaki va qori na irogorogo eda nanuma kina e dua na ka se tukuni makawa sara: “Me digitaki na yaca rogo vinaka me kua na iyau levu, e vinaka meda dokai e ca na siliva kei na koula.” (Vosa Vakaibalebale 22:1) Na cava meda cakava me rogo vinaka kina na yacada ra qai dokai keda eso tale? E vakamacalataki ena iVolatabu eso na vakatutu vinaka.

Kena ivakaraitaki, raica mada na ka e kaya na Same 15. Ni sauma na daunisame na taro “o cei me vulagi ena valelaca [ni Kalou]?,” a kaya: “O koya e . . . cakava tiko na ka dodonu qai dau vosa dina mai lomana. O koya e sega ni vakaucaca . . . , e sega ni caka ca vua erau tiko veitikivi, qai sega ni vakarogocataki ira nona itokani. E cati koya e ivalavala torosobu, . . . E dau dina ena nona vosa ni yalayala, veitalia ke vakaleqai kina. . . . E sega tale ga ni ciqoma na veivaqumi.” (Same 15:1-5) Io, ena dokai o koya e muria na ivakavuvuli totoka qori.

Dua tale na itovo eda na dokai kina na yalomalumalumu. E kaya na Vosa Vakaibalebale 15:33: “E tarava mai na yalomalumalumu na lagilagi.” O koya e yalomalumalumu ena dikeva na veika me vakavinakataka, qai saga vagumatua me cakava na veiveisau e gadrevi. Ena yalorawarawa tale ga me kere veivosoti ke vakararawataka e dua. (Jemesa 3:2) Ia o koya e dokadoka e dau cudru totolo. E kaya na Vosa Vakaibalebale 16:18: “E liu na dokadoka e tarava na rusa, e liu na yaloqaciqacia e tarava na bale.”

Vakacava ke vakaucacataki iko e dua? E macala ga ni o na cudru, ia e ka vakayalomatua beka mo sauma lesu? E vinaka mo taroga, ‘Ena vakaotia na vakaucaca noqu saga meu taqomaka na kequ irogorogo, se na qai tete ga kina na itukutuku?’ E veiganiti ena so na gauna me biu ena tabana ni lawa na leqa, ia e kaya na ivakasala vuku ena iVolatabu: “Mo kua ni vakusakusa ni veilewai.” Ia “mo drau veivosakitaka kei na wekamu na nomu kisi.” (Vosa Vakaibalebale 25:8, 9) * O na sega ni vakalusi ilavo ena veilewai ke o tauri iko vakamalua qai vakasamataka vinaka na ka mo cakava.

E sega ni ivola ga ni lotu na iVolatabu. E nuitaki tale ga na kena ivakasala qai yaga ena basoga kece ni noda bula. O ira na muria na ivakasala ena iVolatabu, era na dokai ena nodra itovo qai vinaka na kedra irogorogo.