O temaki ena gauna e malele kina na lomamu ina veika ca. Kena ivakaraitaki, o domona e dua na ka ni o lai volivoli. O vakasamataka sara ni o rawa ni butakoca qai sega ni dua e raica. Ia e tukuna nomu lewaeloma mo kua ni cakava! O mani cavuraka laivi na vakasama ni butako o toso sara tiko. Sa oti e keri nomu temaki, o vorata rawa tale ga.

KA E KAYA NA IVOLATABU

Ke o temaki, sega ni kena ibalebale ya ni o tamata ca. E kaya na iVolatabu nida dau temaki kece. (1 Korinica 10:13) E bibi ga meda kauaitaka na ka eda cakava nida temaki. Eso era rawai ena veitemaki nira sega ni cavuraka laivi na gagadre ca. Eso tale era yavala totolo mera vorata na ka era temaki kina nira kila ni cala.

“E vakatovolei e dua ni bacani koya qai siwati koya na nona gagadre ca.”​—Jemesa 1:14.

E vakamacalataka na iVolatabu na itekitekivu ni valavala ca. E kaya na Jemesa 1:15: “Ni sa matua na gagadre ca, sa qai vakasucuma na ivalavala ca.” Eda kila ni na sega ni bukete tu ga e dua na yalewa, ena yaco mai na gauna me vakasucu kina. Ke da sega tale ga ni cavuraka laivi na gagadre ca, eda na valavala ca dina. Ia e rawa nida vorata na gagadre ca, meda kua ni bobula kina.

RAWA NI VEIVUKE NA IVOLATABU

E rawa ni veivuke noda vakasama ena kena vakabulabulataki na gagadre ca. E rawa tale ga ni veivuke ena vorati ni gagadre ca nida vagolea noda vakasama ina dua tale na ka. Kena ivakaraitaki, noda vakasamataka e dua na ka meda cakava, noda veitalanoa kei na noda itokani, se dua tale na ka vinaka eda rawa ni vakasamataka. (Filipai 4:8) E yaga meda dau vakasamataka na itinitini ni noda rawai ena veitemaki, ni rawa ni vakaleqa na lomada, noda bula vakayago se bula vakayalo. (Vakarua 32:29) Dua tale na ivukevuke yaga na masu. A kaya o Jisu Karisito: “Dou masu tiko ga, mo dou kua kina ni temaki.”—Maciu 26:41.

“Kua ni nanuma cala: Na Kalou ena sega ni vakalialiai. Na ka kece e kaburaka e dua ena tamusuka tale ga.”​—Kalatia 6:7.

KA DINA

Kua ni raica vakamamada na veitemaki, ni rawa ni bacani qai siwati kina o koya e sega ni qaqarauni, e lialia se yalowai. (Jemesa 1:14) E dau yaco vakalevu qori ena veitemaki e vauca na veiyacovi tawadodonu, qai levu na leqa e rawa ni yaco kina.—Vosa Vakaibalebale 7:22, 23.

RAWA NI VEIVUKE NA IVOLATABU

A kaya o Jisu Karisito: “Ke vakacalai iko tiko na matamu imatau, leuta, kolotaka laivi.” (Maciu 5:29) A sega ni tukuna o Jisu me leu laivi dina na mata! A kaya tiko ga meda vakamatea na veitikiniyagoda, meda cata na ka ena vakavuna noda valavala ca. Ke sega, eda na vakararawataka na Kalou qai sega ni rawata na bula tawamudu. (Kolosa 3:5) E bibi meda yavala totolo meda vorata na veitemaki. A masuta e dua na tamata yalodina ni Kalou: “Ni vagolea tani na mataqu meu kua ni raica na ka tawayaga.”—Same 119:37.

E sega ni rawarawa meda lewai keda vinaka ni “malumalumu ga na yago.” (Maciu 26:41) Kena ibalebale eda na dau cala. Ia ke da veivutuni dina qai saga meda kua ni caka ca tiko ga, eda na vakila na nona dau “yalololoma qai dauveinanumi” na Kalou o Jiova. (Same 103:8) Sa bau veivakacegui dina ya!

“Ke oni dau raica ga, na cala, i Ja, o cei gona Jiova ena duri rawa?”​—Same 130:3.