Vakacava ena vakatara na Kalou meda liutaki keda ga, da qai vakaleqa na noda veigauna se bera mai? Sega, ni na yavala me vakaotia na rarawa kei na veivakacacani eda vakila tu mai ena dua na gauna balavu. E vinakata na Dauveibuli meda kila ni sa voleka na gauna me yavala kina. E vakatakila vakacava na itukutuku bibi qori?

Vakasamataka mada na ivakatautauvata qo: Ni o vodo motoka o na saga mo muria na idusidusi ena Internet se mape kei na so tale na ivukevuke. Ni o raica ni veidonui na ivakatakilakila kei na ka e tiko ena idusidusi ni vanua o sa muria tiko, o na nuidei ni sa voleka na vanua mo kele kina. E dusimaki keda tale ga na Kalou ena nona Vosa me baleta na ivakatakilakila ni veika era na yaco e vuravura. Nida raica gona na kena sa yaco tiko na ivakatakilakila qori, eda nuidei nida sa bula donuya tu na gauna ena vakarau yaco kina na icavacava.

Vakamacalataki ena iVolatabu ni na vakairogorogo na ka ena yaco i vuravura nida volekata tiko yani na icavacava. Ena duatani sara na veika ena yaco ena gauna qori ni vakatauvatani kei na veigauna sa sivi. Dikeva mada eso era tukuni ena Vosa ni Kalou.

1. TIKO YAVAVALA E VURAVURA Parofisaitaki ena Maciu wase 24 na ivakatakilakila ni veika ena yaco. Na ivakatakilakila qori ena dusia na “ivakataotioti ni veika vakavuravura” me ‘yacova’ sara na “icavacava.” (Tikina e 3 kei na 14) E cavuti tiko kina na ivalu lelevu, leqa ni kakana, uneune ena veivanua, tubu ni ivalavala tawadodonu, batabata na loloma, kei na nodra lawaki qaseqase na iliuliu ni lotu mera veivakacalai. (Tikina e 6 ina 26) Dua na gauna balavu na kena yaco tiko na veika qori. Ia ni sa roro tiko mai na icavacava, ena dua ga na gauna era na yaco vata kina. Ena salavata mai kei na tolu na ivakatakilakila e tarava.

2. ITOVO E kaya na iVolatabu ni na torosobu na itovo ni tamata ena “iotioti ni veisiga”—e dusia tiko na gauna me yacova yani na icavacava. E tukuni kina: “Nira na dau lomani ira ga na tamata, era na lomana na ilavo, era na dau tukutukuni ira, era na qaciqacia, era na dau veibeci, era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakauvosa, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veiliumuritaki, era na domoqa, era na dokadoka, era na lomana ga na marau era sega ni lomana na Kalou.” (2 Timoci 3:1-4) E sega ni ka vou nodra dau tawaveidokai e levu, ia ena qai ca ga vakalevu ena “iotioti ni veisiga,” sa rauta me tukuni ni qori na gauna “ena vakilai kina e levu na ka dredre.” O vakadinadinataka qori?

3. VAKARUSAI TIKO O VURAVURA E kaya na iVolatabu ni na “vakawabokotaki ira . . . na vakarusai vuravura tiko” na Kalou. (Vakatakila 11:18) Sala cava eda vakarusai vuravura tiko kina? E tautauvata kei na ka a yaco ena gauna i Noa: “Sa qai ca ga o vuravura ena mata ni Kalou dina, e sinai tale ga o vuravura ena itovo kaukaua. Io, e raici vuravura na Kalou ni sa ca dina.” E kaya kina na Kalou: “Au sa na vakarusai ira.” (Vakatekivu 6:11-13) O vakadinadinataka ni sa qai tubu tiko ga na itovo kaukaua? Eda bula tiko qo ena dua na gauna vakairogorogo: Noda vakarusai vuravura tiko eda na rawa ga ni leqa kina. Kuria qori na kena sa tu vakarawarawa na iyaragi. Dua tale na sala eda vakarusai vuravura tiko kina oya noda sega ni dau lewa vinaka. Eda tini vakacacana na veika eda bula tiko kina me vaka na cagi eda ceguva, na manumanu kei na kau era tu wavoliti keda kei na wasawasa.

Eda rawa ni taroga, ‘Bau dua na kaukaua e tu vei keda ena duanadrau na yabaki sa oti meda vakarusa kina na ka kece?’ Na gauna qo eda vakayagataka  tiko noda kaukaua me levu kina na iyaragi vovou eda taukena, eda vakacacani vuravura tale tiko ga. Sa rui levu na iyaya vovou eda bulia, eda sega ni kila kina meda lewa vinaka vakacava na kena vakayagataki me kua ni vakavuna na leqa. E sega ni dodonu meda viavia lewa na veika me baleta na veigauna se bera mai. Ni se bera ni kawaboko na ka kece e vuravura qo, ena yavala na Kalou me vakawabokotaki ira na vakarusai vuravura tiko. Qori na nona vosa ni yalayala!

4. VUNAU E VEIYASA I VURAVURA Dua tale na ivakatakilakila e parofisaitaki tu me baleta na icavacava, oya na kena vakayacori e dua na cakacaka levu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:14) Duatani sara na cakacaka vakavunau qo ni vakatauvatani kei ira na matalotu era dau veivakalotutaki ena gauna sa sivi. Ena vakabibitaki na “itukutuku vinaka . . . ni Matanitu ni Kalou” ena iotioti ni veisiga. O kila e dua tale na matalotu e dau vakabibitaka na itukutuku qori? De dua era sa cakava tiko eso, ia vakacava era vunau tiko ga ena dua na vanua se ra dau vunau e “veiyasa i vuravura me ivakadinadina ina veimatanitu kece”?

E vakabibitaki sara ga na “itukutuku vinaka . . .  ni Matanitu ni Kalou” ena Web site kilai levu na www.jw.org. Vakamacalataki kina na itukutuku qori ena sivia na 700 na vosa. O kila e dua tale na sasaga va qori e vakabibitaki kina na itukutuku vinaka ni Matanitu ni Kalou e veiyasa i vuravura? Ni se bera sara na Internet, era kilai levu na iVakadinadina i Jiova ena nodra sasaga me vakatetei na itukutuku vinaka ni Matanitu ni Kalou. Tekivu mai na 1939, sa dau volai tiko ena tabana e liu ni Vale ni Vakatawa na matavosa “Kacivaka na Matanitu i Jiova.” Tukuni ena dua na ivola me baleta na lotu ni “sega ni vakatauvatani rawa na nodra gumatua” ni cakacaka na iVakadinadina i Jiova kei na kena “rabailevu.” E vakabibitaki ena itukutuku vinaka qo ni sa voleka sara ‘ni yaco na icavacava.’ Ena yaco ga ena vuku ni ka e cakava na Matanitu ni Kalou.

Vakacava na va na ivakatakilakila ena iVolatabu e dikevi ena ulutaga qo, o vakadinadinataka nira sa yaco kece? Sa sivi e duanadrau na yabaki na kena vakarautaka tiko na ivola qo na itukutuku me baleta na veika e yaco tiko e vuravura, mera kila kina na dauwiliwili nida sa  volekata sara tiko ga na icavacava. Era sega ni kauai eso nira vakatitiqa, ra kaya ni sega ni dina na itukutuku qori se vakadeitaki, e rawa ni veivakacalai tale ga. Ra kaya ni vakavuna na torosobu ni ituvaki kei vuravura na kena sa qai levu tiko ga na sala ni veitaratara. Ia e levu era vakabauta na veika sa vakadinadinataki, ra qai kila nida sa bula tiko ena dua na gauna bibi ena ivolatukutuku ni kawatamata.

Era kaya eso na kenadau nida sa vakarau vakila na veiveisau lelevu ena noda vuravura. Kena ivakaraitaki, ena 2014, e veivakasalataki na nodra isoqosoqo na saenitisi e vakatokai me Science and Security Board ena dua na itukutuku ena Bulletin of the Atomic Scientists vua na United Nations Security Council ni sa rivarivabitaki tiko na noda bula. Era vakadinadinataka na saenitisi qori: “Ni dikevi lesu na veivakatorocaketaki sa yaco tiko, e ririkotaki kina na bula ni kawatamata ni rawa sara ga ni vakaleqai.” Levu era duavata nida sa yacova tu qo e dua na gauna bibi ena ivolatukutuku ni kawatamata. Era vakadeitaka na tabaka na ivola qo kei na levu era dau wilika nida sa bula sara tiko ga ena iotioti ni veisiga, sa voleka sara na icavacava. Ia mo kua ni rerevaka na veika e se bera ni yaco, marautaka ga na veika ena rawati kina. Na vuna? Ni o rawa tale ga ni bula ena icavacava!