Na Yalo ni Kirisimasi
“E rawarawa sara meda ogaoga ena levu na ka e dau caka ena gauna ni olodei. E vaka me sa tu ga na ka me caka ena gauna qori, e lekaleka ga na nodra sota na vuvale kei na veitokani nira osooso vakalevu. Sa sega ni vakilai na marau ni levu dina na ka e lomaocaocataki.” —BRAD HENRY NA KOVANA VAKACEGU MAI OKLAHOMA [MERIKA], ENA 23 TISEBA, 2008.
NI SA roro voleka mai qo na Kirisimasi, sa baci vakavotui na kena yalo ena sere, iyaloyalo, kei na porokaramu ena tivi mera uqeti kina na tamata ena marau kei na lasa e salavata mai kei na gauna ni olodei qori. Na cava o nanuma ni dodonu me caka ena gauna ni Kirisimasi? Meda
Vakananumi Jisu Karisito kina?
Marautaka na soli iloloma?
Vukei ira na vakaloloma?
Soqovata vakavuvale?
Uqeta na veiyaloni?
Me vaka a tukuna na kovana vakacegu o Henry, sa cavuti oti mai, e levu vei ira era solevutaka na Kirisimasi e dredre mera dau vakayacora na veika qori ena gauna ni Kirisimasi. E gauna osooso, veivakaocai qai levu ga kina na caka bisinisi. E rawa beka ni vakilai na marau kei na loloma e dodonu me laurai ena gauna ni Kirisimasi?
E uqeti keda kece na iVolatabu meda vakananumi Jisu Karisito, meda soli ka mai vu ni lomada, meda vukei ira na vakaloloma, da qai veimaliwai kei ira na noda vuvale. E vakavulici keda tale ga ena sala meda dau veiyaloni kina. Koya gona, na ulutaga veitaravi qo e sega ni vakamacalataka na vuna era sega ni solevutaka kina eso na Kirisimasi, * ia ena veivosakitaki ga kina e vica na taro qo:
Na cava era solevutaka kina eso na Kirisimasi?
Na cava e dredre kina me vakilai na marau kei na loloma e dodonu me laurai ena gauna ni Kirisimasi?
Na ivakavuvuli vakaivolatabu cava sa vukei ira e vica vata na milioni mera raica ni tiko e dua na ka e bibi cake mai na Kirisimasi?
