iSau ni Tini na Taro me Baleta na Veiyacovi

1 Na veiyacovi e imatai beka ni nodrau ivalavala ca o Atama kei Ivi ena were o Iteni?

▪ Kena isau: Levu era nanuma na vuanikau vakatabui ena were o Iteni e vakaibalebaletaka na veiyacovi. Ia e sega ni tokona qori na iVolatabu.

Vakasamataka mada: Ni bera ni buli o Ivi, a vakaroti Atama na Kalou me kua ni kana “mai na kau sa kilai kina na ka vinaka kei na ka ca.” (Vakatekivu 2:15-18) Na vakatatabu qori e sega ni baleta na veiyacovi ni a tiko taudua o Atama. A matata vinaka tale ga na ivakaro ni Kalou vei Atama kei Ivi me rau “vakaluveni ka tubu me lewe vuqa, ka vakatawai vuravura.” (Vakatekivu 1:28) Ena rawa beka vua na Kalou dauloloma me vakaroti rau na imatai ni veiwatini me rau “vakatawai vuravura” ena nodrau veiyacovi, oti qai totogitaki rau me rau mate ni sa muri na nona ivakaro?—1 Joni 4:8.

Kena ikuri, a tiko taudua o Ivi ena gauna a ‘tauca kina na vuanikau, kania, solia vei watina, mani kania tale ga.’—Vakatekivu 3:6.

Rau a sega ni cudruvi o Atama kei Ivi ni rau veiyacovi rau qai vakaluveni. (Vakatekivu 4:1, 2) E macala gona ni vuanikau rau kania e sega ni vakaibalebaletaka na veiyacovi, ia e dua ga na vuanikau e tu ena were.

2 E vakatabuya beka na iVolatabu na veiyacovi?

▪ Kena isau: E tukuni ena imatai ni ivola ena iVolatabu ni Kalou a bulia na “tagane kei na yalewa.” A tukuna na Kalou ni “vinaka sara” na ka e bulia. (Vakatekivu 1:27, 31) A uqeti vakalou ena dua na gauna e muri e dua na dauvola iVolatabu me vola vei ira na tagane vakawati: “Mo marautaki koya sa watimu ni ko sa cauravou. . . . Mo mamau ga e na sucuna e na veigauna kecega.” (Vosa Vakaibalebale 5:18, 19) E vakaraitaka beka na vosa qori ni vakatabuya na iVolatabu na veiyacovi?

 A bulia na Kalou na gacagaca ni vakatubukawa me rawa kina na vakaluveni, qai isolisoli marautaki vei rau na veiwatini me rau vakaraitaka kina na nodrau veidomoni kei na nodrau veitaleitaki. Na veiyacovi ena vakacegui rau vakayago na veiwatini, rau veivolekati, e vakacegui tale ga kina na lomadrau.

3 E vakadonuya beka na iVolatabu na tiko vakasuva?

▪ Kena isau: E tukuna vakamatata na iVolatabu “ni na lewai ira na dau veidauci . . . na Kalou.” (Iperiu 13:4) Na vosa vaKirisi ni veidauci na por·neiʹa, e rabailevu na kena ibalebale. Qori e vakaibalebaletaka na ivalavala kece ni veiyacovi tawadodonu ena taudaku ni vakamau. * E sega gona ni vinakata na Kalou me rau tiko vakasuva e dua na tagane kei na yalewa, ke rau nanuma mada ga me rau qai vakamau ena dua na gauna e muri.

Se mani vakacava na levu ni nodrau veidomoni e dua na tagane kei na yalewa, e vinakata ga na Kalou me rau qai veiyacovi ni rau sa vakamau. Na Kalou ga a buli keda meda dauloloma ni nona itovo kilai tani duadua na loloma. E tiko gona na vuna vinaka e vakarota kina mera veiyacovi ga o ira na vakamau, me vaka ena vakamacalataki ena ulutaga tarava.

4 E donu beka ke dua e levu na watina?

▪ Kena isau: A vakatara ena dua na gauna na Kalou me sivia na dua na watidra na tagane. (Vakatekivu 4:19; 16:1-4; 29:18–30:24) Ia a sega ni tauyavutaka na Kalou na ivakarau qori, a bulia e dua ga na wati Atama.

A vakarota na Kalou me vakadeitaka tale o Jisu Karisito na nona ivakatagedegede taumada, oya me dua ga na watina na tagane se na yalewa. (Joni 8:28) A kaya o Jisu ena gauna a tarogi kina me baleta na vakawati: “O koya e bulia na tamata mai na ivakatekivu e bulia na tagane kei na yalewa qai kaya, ‘Ena biuti tamana kina kei tinana o tagane me kabiti watina me rau sa na dua ga na yago’.”—Maciu 19:4, 5.

 Ena dua na gauna e muri a uqeti vakalou e dua na tisaipeli i Jisu me vola: “Mera dui vakawati na tagane kei na yalewa.” (1 Korinica 7:2) E tukuna tale ga na iVolatabu, na tagane vakawati e lesi ena so na itavi ena ivavakoso “me dua ga na watina.”—1 Timoci 3:2, 12.

5 E cala beka ke rau vakayagataka na veiwatini na itatarovi ni vakaluveni?

▪ Kena isau: A sega ni vakarota o Jisu mera vakaluveni na nona imuri. Sega tale ga ni dua vei ira na tisaipeli i Jisu a vakarota qori. E sega ni vakacala na iVolatabu na kena vakayagataki na itatarovi ni vakaluveni.

O rau sara ga na veiwatini erau na vakatulewa me rau vakaluveni se sega. Ena vakatau tale ga vei rau na iwiliwili ni gone kei na gauna me rau na vakaluveni kina. Ke rau nanuma me rau vakayagataka na itatarovi e sega ni wili me vakalutu, oya na nodrau vakatulewa, erau na saumitaro tale ga kina. * Me kua ni dua e vakalewai rau kina.—Roma 14:4, 10-13.

6 E cala beka na vakalutu?

▪ Kena isau: E talei vua na Kalou na bula, na gone mada ga se kunekunetaki tiko e okata me tamata bula. (Same 139:16) A tukuna na Kalou ni na totogi e dua e vakavuna na mate ni gone se bera ni sucu. Ena rai ni Kalou, na vakamatei ni gone se bera ni sucu e wili me laba.—Lako Yani 20:13; 21:22, 23.

Ia vakacava ke yaco na ituvaki leqataki ena gauna ni vakasucu qai gadrevi me vakatulewataki me vakabulai o tinanigone se na gone? Ena ituvaki va qori, erau na vakatulewataka sara ga na veiwatini o cei me vakabulai. *

7 E vakadonui beka ena iVolatabu na veisere?

▪ Kena isau: E vakadonuya na iVolatabu na veisere. Ia a vakaraitaka o Jisu na vuna duadua ga me qai caka kina na veisere ena nona kaya: “Na tagane e sereka na watina qai vakawati tale e sa wili me veibutakoci ke sega ni veidauci o watina.”—Maciu 19:9.

E cata na Kalou na veisere e caka vakatawadodonu. Ena saumitaro gona vua o koya e vakaisina na watina, vakabibi ke biuti watina me vakawatitaka e dua tale.—Malakai 2:13-16; Marika 10:9.

8 E vakadonuya beka na Kalou na veimoceri vakamataqali vata?

 ▪ Kena isau: Na iVolatabu e vakacala na veidauci, wili kina na veimoceri vakamataqali vata. (Roma 1:26, 27; Kalatia 5:19-21) E vakadeitaka na iVolatabu ni cata na Kalou na ivakarau ni bula qori, ia eda kila tale ga na “levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.”—Joni 3:16.

O ira na lotu vaKarisito era cata na veimoceri vakamataqali vata, ia era caka vinaka vei ira na tamata kece ga. (Maciu 7:12) E vinakata na Kalou meda “doka na tamata kece ga.” Era sega gona ni cati ira na veimoceri vakamataqali vata na lotu vaKarisito dina.—1 Pita 2:17.

9 E cala beka na vakayagataki ni mobail kei na internet ena veika tawakilikili?

▪ Kena isau: Me kena ivakaraitaki, e rawa ni veivosakitaki ena talevoni na veika e veivagarogaroi, e rawa ni vakayagataki tale ga na mobail kei na internet me vakau kina na itaba kei na itukutuku e veivagarogaroi.

E sega ni veivosakitaki vakamatailalai na ivakarau vovou va qori ena iVolatabu. Ia e tukuna ga: “Me kua mada ga ni cavuti ena kemuni maliwa na veidauci, na ka tawasavasava ena kena veimataqali, se kocokoco; me kua tale ga na itovo lolovira e vakamadua, na veivosaki e vakasisila, se na veiwali ca, na ka kece qo era sega ni kilikili.” (Efeso 5:3, 4) Na veivosaki veivagarogaroi ena talevoni kei na vakau ni itaba kei na itukutuku veivagarogaroi ena mobail kei na internet e uqeta na rai cala me baleta na veiyacovi qai veiuqeti me vakacegui na gagadre ni veiyacovi ena taudaku ni vakamau. Na ivalavala va qori e sega ni vukea e dua me lewa vinaka na nona gagadre ni veiyacovi, e uqeti koya ga me vakaceguya na gagadre qori.

10 Na cava e kaya na iVolatabu me baleta na vakatavevele?

▪ Kena isau: E sega ni cavuti ena iVolatabu na vakatavevele—na yagoi ni yago tabu me garovi kina na veiyacovi. Ia era vakaroti na lotu vaKarisito ena Vosa ni Kalou: “Moni vakamatea na gagadre ni veitikiniyagomuni vakavuravura, na veidauci, na ivalavala tawasavasava, na garogaro, na gagadre ca.”—Kolosa 3:5.

Na vakatavevele e uqeta na rai cala me baleta na veiyacovi qai laurai kina na yalo ni nanumi koya ga. E vakadeitaka na iVolatabu ni na solia na Kalou “na kaukaua e uasivia na kaukaua ni tamata” vua e vinakata dina me muduka na vakatavevele.—2 Korinica 4:7; Filipai 4:13.

[iVakamacala e ra]