Rau na Veivolekati Tiko ga Vakacava o Tama kei Luvena Tagane?

“MATAI sara ga o iko Ta, o cakava vakacava oya?” O rairai kurabui ni tarogi iko o luvemu ena taro qori. De dua o sakitaka ena gauna qori ni o dua na tama. Ia sa na wacava na nomu marau ke muria o luvemu na nomu ivakasala vuku qai tauca na kena yaga. *—Vosa Vakaibalebale 23:15, 24.

E se qoroi iko tiko ga o luvemu ena ka o cakava, se sa veisau na nona rai ena gauna qo? O na veivolekati tiko ga vakacava kei luvemu tagane ni tubucake tiko me yacova ni sa uabula? Meda raica mada e liu eso na leqa e dau yaco.

Tolu na Leqa

1. LAILAI NA GAUNA: Ena levu na vanua era dau cakacaka ga na tama ena vuvale. Levu na gauna era na sega ni tiko e vale ena vuku ni nodra cakacaka. Ena so na vanua, e lailai sara na gauna ena tiko kina o tama kei luvena. Me kena ivakatautauvata, e dua na vakadidike a caka ena dua wale ga na gauna qo mai Varanise, e laurai kina ni sega mada ga ni 12 na miniti na levu ni gauna e vakayagataka o tama vei luvena ena dua na siga.

VAKASAMATAKA: E vakacava na levu ni gauna o vakayagataka vei luvemu tagane? Tovolea mada ena loma ni dua se rua na macawa mai qo mo vola na levu ni gauna drau veimaliwai kina e veisiga. O na rairai kurabuitaka na ka o raica.

2. IVAKARAITAKI CA: Eso na tagane era a sega ni veimaliwai vakalevu kei tamadra. E kaya o Jean-Marie mai Varanise: “Keirau sega ni veimaliwai vakalevu kei tamaqu.” E tarai koya vakacava qori? E tomana: “Qori e vakavuna e levu na leqa au sega ni bau tadra ni na yaco. Dua vei ira na leqa qori ni dau dredre meu veivosakitaka kei luvequ tagane na ka e yaga.” Ena so tale na ituvaki, era kilai tamadra vinaka eso na tagane ia era sega ga ni veivolekati. E kaya o Philippe, e yabaki 43: “E sega ni dau vakaraitaka vei au o tamaqu ni lomani au. Qori e vakadredretaka tale ga meu vakaraitaka vei luvequ niu lomani koya.”

VAKASAMATAKA: O nanuma ni vakadredretaka na nomu veimaliwai kei luvemu na ivakarau ni nomu dau veimaliwai kei tamamu? O raica ni o dau muria na itovo ca i tamamu se na nona itovo vinaka? Na itovo cava o vakatotomuria tiko?

3. SEGA NI VINAKA NA IVAKASALA: E kena ivakarau ena so na vanua me raici vakamamada  na itavi i tama ena nodra susugi na gone. E tukuna o Luca e susu ena dua na vanua ena Ra kei Urope: “Era nanuma o ira ena noqu vanua ni susu gone e nodra itavi na yalewa.” Ena so tale na vanua, e dau tukuni ga vei ira na tama me kaukaua na nodra lewa vei ira na luvedra. Me kena ivakaraitaki, o George e susu ena dua na matanitu vakaAferika e kaya: “Ena noqu vanua era sega ni dau qito kei luvedra na tama, e leqataki ke cakava qori ena vakamalumalumutaka na nona lewa o tama. Qori na vuna keirau sega ni dau veimaliwai vinaka kina kei luvequ tagane.”

VAKASAMATAKA: Na cava na nodra itavi na tama ena nomu vanua? Era vakavulici ni nodra itavi ga na tina na susu gone? Era uqeti beka na tama mera vakaraitaka nira lomani se kauaitaki luvedra, se sega ni dau ciqomi na rai va qori ena nomu vanua?

Ke o dua na tama o qai sotava tiko na leqa sa tukuni oti mai, o na walia vakacava? Raica mada e vica na vakatutu qo.

Tekivu ni se Gone na Luvemu Tagane

Nira sucu na gone, era na dau via vakatotomuri tamadra. Kua ni vakawalena na nona via vakatotomuri iko na luvemu. Na cava mo cakava? Gauna cava soti drau rawa ni veimaliwai kina?

Ena vinaka mo drau cakacaka vata kei luvemu ena so na gauna. Me kena ivakaraitaki, kerei koya me vukei iko ke o cakava eso na ka e vale. O rawa ni solia vua e dua na sasa se isivi lailai. E sega ni vakabekataki ni dau sakitaki iko, ena marautaka gona mo drau cakacaka vata. De na taura toka na gauna mo drau vakaotia kina na ka drau cakava, ia drau na veivolekati, o na vakavulici koya tale ga me daucakacaka. Na iVolatabu sa vakasalataki ira makawa na tama mera dau cakacaka vata kei luvedra, ra qai vakayagataka na gauna qori mera vakavulici ira kina. (Vakarua 6:6-9) Se yaga tiko ga nikua na ivakasala qori.

Me tiko tale ga na gauna mo drau qito vata kina kei luvemu. Ena marautaki na nomudrau veimaliwai ena gauna qori. Era raica tale ga na dauvakadidike ni na vukei gone me dauvakatovolea na veika vovou, me doudou tale ga.

E tiko e dua tale na vuna bibi mera qito vata kina kei luvedra na tama. E kaya e dua na dauvakadidike o Michel Fize: “Erau na veivosaki vinaka na tama kei gone ni rau dau qito vata.” Ena gauna va qori, ena vakaraitaka kina o tama ena ka e tukuna kei na ka e cakava ni lomani luvena. Ni cakava qori sa vakavulici luvena tiko me dau loloma tale ga. E kaya o André e dua na tama mai Jamani: “Au dau qito vata kei na luvequ o Manuel ni se gone. Niu dau mokoti koya, e vulica tale ga kina me vakaraitaka na nona lomani au.”

Ni wiliwili vei luvena o tama ni bera ni moce e dua tale na sala me vaqaqacotaki kina na nodrau veilomani. Wilika wasoma vua eso na italanoa qai vakarogoci koya ni tukuna na ka e marautaka kei na ka e leqataka ena dua na siga. Qori ena vakarawarawataka nomudrau veivosaki tiko ga ni tubu cake tiko.

Saga mo Taleitaka Tale ga na ka e Taleitaka

Eso na gone era na rairai sega ni via veivosaki kei tamadra. Ke sega ni dau via sauma o luvemu na nomu taro, kua ni nanuma ni sega ni via vosa vei iko. De dua ena talaucaka na lomana ke o veisautaka na iwalewale ni nomudrau veivosaki.

E dau dredre ena so na gauna me rau veivosaki o Jacques e dua na tama mai Varanise kei na luvena o Jérôme. A sega ni vakasaurarataki luvena me vosa, ia e veisautaka ga na gauna me rau veivosaki kina—oya ena nodrau dau qito soka vata. E kaya o Jacques: “Ni oti na neirau qito, keirau dau dabe ena co me keirau vakacegu vakalailai. Qori na gauna e dau talaucaka kina na lomana o luvequ. Au kila ni neirau tiko taurua sara ga ena gauna va oya e vakavolekati keirau.”

Vakacava ke sega ni taleitaka o luvemu na qito? A nanuma lesu o André na nodrau dau  sara kalokalo kei luvena. E tukuna: “Keirau dau kau idabedabe i tuba, na iovi me vakatakatai keirau ena batabata ni bogi, yadua na bilo ti keirau qai sarava tu na lomalagi. E levu sara na ka keirau dau veitalanoataka, wili kina na veika me baleta na Dauveibuli, kei na so tale na ka me baleti keirau.”—Aisea 40:25, 26.

Vakacava ke o sega ni via cakava eso na ka e taleitaka o luvemu? Ke va qori, ena vinaka mo yalorawarawa mo cakava na ka o sega ni taleitaka. (Filipai 2:4) E kaya o Ian, e vakaitikotiko mai Sauca Aferika: “Au dautaleitaka na qito, ia e sega ni taleitaka qori na luvequ o Vaughan. E taleitaka o koya na waqavuka kei na kompiuta. Au saga meu taleitaka tale ga na ka qori, au dau kauti koya ena vanua e dau vakatasuasuataki kina na kena vukataki na waqavuka, keirau dau qitora vata tale ga e dua na qito ni waqavuka ena kompiuta. Au raica ni sa qai rawarawa sara na neirau dau veivosaki kei Vaughan ni keirau cakava vata eso na ka e taleitaka.”

Vukei Koya me Nuidei

“Ta, raica!” A bau kailavaka o luvemu tagane lailai na vosa qori ni cakava rawa e dua na ka vou? Ke sa itabagone nikua, se doudou tiko ga me kerekere vei iko? De dua sa sega ni cakava qori. Ia ena vinakati mo vakasalataki koya me rawa ni yalomatua kina ni sa uabula.

Raica mada na ka e cakava na Kalou o Jiova vua e dua na luvena. Ni vakarau tekivu na nona ilesilesi bibi e vuravura o Jisu, a vakaraitaka e matanalevu na Kalou na nona lomani koya, e kaya: “Qo na Luvequ lomani, au vakadonuya.” (Maciu 3:17; 5:48) E macala ni nomu itavi mo vakadodonutaki luvemu, mo vakavulici koya tale ga. (Efeso 6:4) Ia o dau saga mo vakavinavinakataki koya ena veika vinaka e tukuna se cakava?

E dau dredre vei ira eso na tagane mera vakaraitaka na nodra veivakadonui se nodra loloma. De dua era tuberi ena vuvale e dau weroka kina na nodra itubutubu na nodra cala sega ni ka vinaka era cakava. Ke o sotava qori ena vinakati mo sasaga vakaukaua mo vukei luvemu me nuidei. O na cakava vakacava qori? O Luca sa cavuti oti mai e dau cakacaka vata kei Manuel na luvenatagane e yabaki 15 ena veika me caka e vale. E tukuna: “Au dau tukuna vei Manuel ena so na gauna me cakava vakataki koya e dua na cakacaka, au na qai vukei koya ke gadrevi. Levu na gauna e dau cakava duadua ga me yacova ni oti. E dau vakamarautaki koya na veika e rawata, e nuidei tale ga kina. Ni rawata vinaka na ka e cakava, au na vakacaucautaki koya. Ke sega ni vinaka sara me vaka a nanuma, au dau vakaraitaka ga vua niu marautaka na nona sasaga.”

O rawa ni vakanuideitaki luvemu ni o vukei koya me sauva eso na isausau lelevu. Ia vakacava ke berabera na nona sauva qori se duidui na nona isausau mai na ka o vinakata? Ke yaco qori, de vinaka mo vakasamataka tale mada na veika o namaka me cakava. E tukuna o Jacques sa cavuti oti mai: “Au dau saga meu vukei luvequ me tekia na isausau ena rawata, me tekia sara ga na nona isausau, sega ni noqu. Au dau vakasamataka tale ga ni dodonu me vakatau ga vua na nona sasaga me rawata na nona isausau.” O na vukei luvemu me rawata na nona isausau ke o dau rogoca na ka e tukuna, vakacaucautaki koya ena veika vinaka e cakava o qai vakayaloqaqataki koya ena ka e lekata.

Ena sega ni maravu tu ga na nomudrau veimaliwai kei luvemu, ena tiko na duidui ena so na gauna. Ia ena volekati iko tiko ga o luvemu ni toso na gauna ni dau kena ivakarau meda volekati ira era vukei keda me rawa vinaka na noda sasaga.

[iVakamacala e ra]