Jisu Veika e Cakava
Jisu Veika e Cakava
“Na qau kakana meu cakava na loma i koya e talai au mai.”—JONI 4:34.
NA ITUVAKI e cavuta kina o Jisu na vosa e cake e vakatakila na ka e vakaliuca ena nona bula. Ena mataka taucoko, ratou a taubaletaka tiko na veidelana mai Samaria o Jisu kei ratou na nona tisaipeli. (Joni 4:6, ivakamacala e ra) Eratou nanuma na tisaipeli ni via kana o Jisu, ratou mani solia vua eso na kakana. (Joni 4:31-33) Na ka e tukuna e kilai kina na inaki ni nona bula e vuravura. Na nona cakava na cakacaka ni Kalou e bibi cake mai na nona kana. A vakaliuca na loma ni Kalou ena ka e tukuna kei na ka e cakava. Na cava e okati kina?
▪ Vunautaka qai vakavulica na Matanitu ni Kalou E vakamacalataka na iVolatabu na cakacaka i Jisu, e tukuna: “E qai lakova o Jisu na yasayasa taucoko o Kalili me veivakavulici . . . me vunautaka na itukutuku vinaka ni matanitu ni Kalou.” (Maciu 4:23) A sega wale ga ni vunau o Jisu se vakarogoya na Matanitu ni Kalou vei ira tale eso. A vakavulici ira tale ga—wili kina na nona ivakamacala matata. A usutu sara ga ni vunau i Jisu na Matanitu ni Kalou.
Ena gauna taucoko ni nona cakacaka vakaitalatala, a vakavulica o Jisu na Matanitu ni Kalou kei na ka ena cakava. Meda dikeva mada eso na ka dina me baleta na Matanitu ni Kalou kei na tikinivolatabu a tukuna kina o Jisu na ka dina qori.
▪ Na Matanitu ni Kalou e dua dina na matanitu mai lomalagi qai lesia o Jiova me kena Tui o Jisu Karisito.—MACIU 4:17; JONI 18:36.
▪ Ena dokai na yaca ni Kalou ena vuku ni Matanitu qo qai cakava na loma ni Kalou e vuravura me vaka sa caka tiko mai lomalagi.—MACIU 6:9, 10.
▪ Ena veiliutaki ni Matanitu ni Kalou, ena veisau na vuravura taucoko me parataisi.—LUKE 23:42, 43.
▪ Sa voleka ni yaco mai na Matanitu ni Kalou me vakayacora na inaki ni Kalou e vuravura. *—MACIU 24:3, 7-12.
▪ Cakamana lelevu A kilai levu o Jisu me “Qasenivuli.” (Joni 13:13) Ia ena tolu veimama na yabaki ni nona cakacaka vakaitalatala, a vakayacora tale ga o Jisu e vica na cakamana lelevu. E rua na vuna a cakava kina qo. Dua, me vakadinadinataki kina ni talai koya mai na Kalou. (Maciu 11:2-6) Kena ikarua, oya e ivakaraitaki lailai ga ni ka ena cakava o Jisu na Tui ni Matanitu ni Kalou ena kena ivakatagedegede levu cake ena gauna se bera mai. Meda raica mada eso na cakamana a cakava.
▪ E vakamaravutaka na wasawasa qai vakaruruya na cagi kaukaua.—MARIKA 4:39-41.
▪ A vakabulai ira na tauvimate, na mataboko, didivara kei na lokiloki.—LUKE 7:21, 22.
▪ E vakalevutaka na kakana me rauti ira e dua na ilala levu era via kana tu.—MACIU 14:17-21; 15:34-38.
▪ E tolu na ituvaki a bau vakabulai ira kina na mate.—LUKE 7:11-15; 8:41-55; JONI 11:38-44.
Raitayaloyalotaka mada na bula ena vuravura ena nona veiliutaki e dua na Tui e kaukaua!
▪ Vakatakila na itovo i Tamana E sega ni dua tale e ganita me vakavulica na veika me baleti Jiova, na Luvena ga e kilai me o Jisu Karisito. Ni “ulumatua ni kabuli kece,” na nona bula voli kei Jiova e lomalagi o Jisu e dede cake sara vei ira na ka bula vakayalo tale eso. (Kolosa 1:15) Vakasamataka mada na levu ni gauna me vulica kina na ivakarau ni vakasama i Tamana, nona inaki, ivakatagedegede kei na nona ivalavala.
E rawa ni kaya gona o Jisu: “E sega ni dua e kila na Luvena, o Tamana ga, e sega tale ga ni dua e kila na Tamana, o Luvena ga, kei koya ena vinakata na Luvena me vakatakilai Tamana vua.” (Luke 10:22) A gumatua qai marautaka o Jisu me vakatakila na veika me baleti Tamana ni bula voli e vuravura. E uasivi na ka e tukuna qai vakavulica o Jisu na veika e vulica sara ga vua na Kalou Cecere Duadua ena nona itikotiko cecere mai lomalagi.—Joni 8:28.
Na veika e cakava o Jisu me vakatakilai Tamana kina e rawa ni vakatauvatani ena ka e cakava na misini e lewa na drodro ni livaliva. Na misini va qori e rawa ni taura na livaliva kaukaua qai vakamalumutaka na kena drodro me veiganiti kei na iyaya vakalivaliva ena vakayagataki. E va tale ga qori na ka e cakava o Jisu ni mai bula e vuravura, na ka e vulica mai lomalagi a vakasavuya ena sala ena vakarawarawataka na nodra kila o ira e vuravura ra qai bulataka.
Raica mada e rua na sala kilai levu a vakatakilai Tamana kina o Jisu.
▪ E tukuna na ka dina me baleti Jiova ni veivakavulici—na yacana, nona inaki, kei na nona ivalavala.—JONI 3:16; 17:6, 26.
▪ A vakaraitaka o Jisu ena ka e cakava e levu na itovo talei i Jiova. E ucui tamana vinaka sara ga ena nona itovo, a rawa kina ni tukuna: ‘O koya e raici au e raici Tamaqu.’—JONI 5:19; 14:9.
E vakatubuqoroqoro na ka e cakava o Jisu. Ena yaga vakalevu ke da dikeva na vuna e mate kina da qai bulataka na ka eda vulica.
[iVakamacala e ra]
^ para. 9 Mo kila eso tale na ka me baleta na Matanitu ni Kalou kei na ivakadinadina ni sa vakarau mai veiliutaki, raica na wase 8, “Na Cava na Matanitu ni Kalou?,” kei na wase 9, “Eda sa Bula Tu Beka Oqo ena ‘iOtioti ni Veisiga’?,” ena ivola Na Cava Sara Mada e Kaya na iVolatabu? tabaka na iVakadinadina i Jiova.
