Taro na Dauwiliwili . . .

Na cava e Vinakata Kina na Kalou Meda Bula Tawamudu?

E tukuna na iVolatabu ni isolisoli vakayalololoma ni Kalou vei keda na “bula tawamudu.” (Joni 6:​40) Na cava e vinakata kina meda bula tawamudu? E ivakaraitaki beka ga ni nona lewadodonu?

Na lewadodonu e okati kina na kena tau vakadodonu na lewa qai veiganiti. E veiganiti beka meda bula? Sega. E tukuna na iVolatabu: “Ni sa sega na tamata yalododonu e vuravura, sa caka vinaka tiko, ka sega ni caka cala.” (Dauvunau 7:​20) Na ivalavala ca e dodonu me totogitaki. E vakaroti Atama na Kalou ni na mate ena siga e valavala ca kina. (Vakatekivu 2:​17) A qai uqeti na yapositolo o Paula me vola: “Na isau ni ivalavala ca na mate.” (Roma 6:​23) Koya gona, ni dodonu me mate kece na kawa i Atama, na cava ga e vinakata kina na Kalou meda bula tawamudu?

Na bula tawamudu “e soli wale.” Qo e ivakaraitaki ni loloma levu i Jiova kei na nona loloma soli wale vei keda na kawatamata. E tukuna na iVolatabu: “Nida ivalavala ca kece, eda sega ni yacova rawa tale ga na lagilagi ni Kalou. Na nona loloma soli wale ga era okati kina mera yalododonu, qo nira sereki ena ivoli i Karisito Jisu.”​—Roma 3:​23, 24.

Eda kila ni dodonu ga meda mate, ia e vinakata na Kalou mera bula tawamudu na lomani koya. E veiganiti beka ya? E tukuna na iVolatabu: “Na cava meda qai kaya? E sega ni dodonu na lewa ni Kalou? Sega sara! Ni a kaya vei Mosese: “Au na lomani koya ga au via lomana, au na yalovinaka ga vei koya au via yalovinaka vua.” . . . O cei o iko mo vosa lesu vua na Kalou?”​—Roma 9:​14-​20.

Ena so na vanua, na iliuliu ni matanitu se turaganilewa e rawa ni sereki koya e dodonu me totogitaki ke laurai ni muria na ivakaro nei turaganilewa, sa veisautaka tale ga nona itovo. E rawa ni vosota nona cala na turaganilewa se peresitedi, qai vakamamadataka na kena itotogi. Sa ivakaraitaki dina ga ni yalololoma qori.

E rawa ni vakatulewataka o Jiova me kua ni totogitaki ira na ivalavala ca. Ia ena vuku ni nona loloma, e vakarautaka na bula tawamudu vei ira na muria nona ivakatagedegede. E tukuna na iVolatabu: “Ni sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”​—Cakacaka 10:​34, 35.

Na ivakaraitaki levu duadua ni nona loloma na Kalou, nona tala mai na Luvena me vakararawataki qai mate ena vukuda. E tukuna me baleti Tamana o Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.”​—Joni 3:​16.

O Jiova e vakadonui ira kece na lomani koya ra qai cakava na lomana, se mani vakacava na keda ituvaki. Na inuinui gona ni bula tawamudu e ivakaraitaki ni loloma soli wale ni Kalou e tawavakamelei rawa.

[Tikina bibi ena tabana e 20]

E ivakaraitaki ni loloma soli wale ni Kalou e tawavakamelei rawa