E SEGA ni ka vou na tarataravaki vei Pisalieli kei Aoliapi. Rairai rau sa guilecava na levu ni biriki erau bulia ni rau bobula tu mai Ijipita. Ia sa oti yani na gauna qori. Rau sa vakarau qo me rau cakava na cakacaka ni matai e uasivi sara, oya me rau na liutaka na kena tara na valeniveitavaki. (Lako 31:1-11) Ia era na le vica ga era na raica eso na ka totoka rau cakava. Erau na yalolailai ni na sega ni laurai levu na ka rau cakava? E bibi me laurai levu na nodrau cakacaka? Vakacava na nomu cakacaka, e bibi me laurai levu?

Eso na iyaya ni valeniveitavaki sa bau vakatubuqoroqoro sara ga na kena ibulibuli. Kena ivakaraitaki, na rua na jerupi koula e toka ena dela ni kato ni veiyalayalati. E kaya na yapositolo o Paula ni “vakatubuqoroqoro.” (Iper. 9:5) Raitayaloyalotaka mada na kedrau totoka ni buli mai na koula tukilaki!​—Lako 37:7-9.

Ke kune ena gauna qo na ka erau bulia o Pisalieli kei Aoliapi, ena veiganiti me biu ena vale ni iyau maroroi kilai levu mera raica na lewenivanua. Ia ni buli tiko, e le vica era raica na kena totoka? E biu na jerupi ena Loqi Tabu Sara, ena raica ga na bete levu ni curu kina vakadua e veiyabaki ena Siga ni Veibuluti. (Iper. 9:6, 7) Koya gona, e le vica ga era raica.

Kaya mada ke o tu ena kedrau ituvaki o Pisalieli kei Aoliapi, o cakacaka vakaukaua mo tara na iyaya e totoka na kena irairai. Ena vakacava nomu rai ke le vica ga era raica? Nikua era marautaka e levu ni vakacaucautaka se qoroya nodra cakacaka na nodra icaba. Era raica qo me sala e kilai kina na vinaka ni nodra cakacaka. Eda duidui na dauveiqaravi i Jiova. Me vakataki Pisalieli kei Aoliapi, eda lomavakacegu nida cakava na loma i Jiova, da qai kila ni vakadonui keda.

Ena gauna i Jisu, e dau matau vei ira na iliuliu ni lotu mera masu mera dokai kina. Ia e duatani na ka e tukuna o Jisu: Masu ena yalodina mo kua ni vinakata mo dokai kina. Na kena itinitini? “Ena  saumi iko na Tamamu mai lomalagi e raici iko tiko.” (Maciu 6:5, 6) E macala eke ni bibi duadua na ka e nanuma o Jiova me baleta na noda masu, sega ni ka era nanuma eso tale. Na yaga ni noda masu e vakatau ena nona rai. E dina tale ga qori ena veika kece eda rawata ena noda veiqaravi tabu. Eda sega ni nanuma ni bibi na noda cakacaka ena vuku ga ni nodra veivakacaucautaki na tamata. E bibi ga ni vakamarautaki Jiova, o koya e “raici iko tiko.”

Ni sa tara oti na valeniveitavaki, e “tekivu solega na valelaca ni veitavaki na o, qai vakasinaita na valeniveitavaki na lagilagi i Jiova.” (Lako 40:34) E matata ni sa vakadonuya o Jiova! Na cava nodrau rai o Pisalieli kei Aoliapi ena gauna sara ga oya? E sega ni volai na yacadrau ena iyaya rau tara, e kena irairai ni rau lomavakacegu ni kila ni vakalougatataka na Kalou na nodrau cakacaka kece. (Vkai. 10:22) Ni toso na gauna, e macala ni rau marau me rau raica ni sa vakayagataki tiko na nodrau cakacakaniliga ena veiqaravi vei Jiova. Ni rau na vakaturi ena vuravura vou, erau na marau me rau kila ni a vakayagataki na valeniveitavaki ena sokalou dina me 500 na yabaki!

E tiko ena isoqosoqo i Jiova nikua o ira na dau droini, ira na vakaraitaki ena iyaloyalo, ira na daunivakatagi, ira na dauveitaba, ira na dauvakadewa kei ira na dauvolavola e sega ni laurai levu nodra cakacaka. Kena ibalebale ni sega ni dua e raica na ka era cakava. E okati tale ga qori ena cakacaka e vakayacori tiko ena sivia e 110,000 na ivavakoso e vuravura raraba. O cei e raici koya e qarava na akaude ni vakalewena tiko na kena ivola ni sa cava na vula? O cei e raici koya na vunivola ni vakarautaka na ripote ni cakacaka vakavunau ni ivavakoso? O cei e raici koya na tacida e vakavinakataka eso na ka ena Vale ni Soqoni?

Ena icavacava ni nodrau bula o Pisalieli kei Aoliapi, e sega ni tiko na nodrau icocovi, metali se ivakananumi me vakaraitaka na totoka ni ibulibuli ni ka rau tara. Ia rau rawata e dua na ka e uasivi sara​—na nona veivakadonui o Jiova. Eda vakadeitaka ni raica nodrau cakacaka o Jiova. Meda vakatotomuria mada ga na nodrau yalomalumalumu kei na nodrau veiqaravi ena yalorawarawa.