1, 2. (a) Na vosa vakatautauvata cava e vakamacalataka o Jisu vei ratou nona itokani voleka? (Raica na iyaloyalo e cake.) (b) Na cava meda kila ena vosa vakatautauvata ni sipi kei na me?

E VOSA tiko o Jisu vei ratou nona itokani voleka o Pita, Adriu kei Joni. Eratou rogoca oti ga ni vakamacalataka na vosa vakatautauvata ni dauveiqaravi e yalodina e vuku, na tini na goneyalewa, kei na taledi. E tinia nona ivakamacala o Jisu ena dua tale na vosa vakatautauvata. E tukuna me baleta na gauna ena lewa kina na “veimatanitu” na “Luve ni tamata.” E uqeti ratou sara ga na nona tisaipeli na vosa vakatautauvata qo! E vakamacalataka o Jisu e rua na ilawalawa, dua e sipi dua e me. E vakabibitaka tale ga e dua na ilawalawa, na kena ikatolu e vakatoka mera ‘tacina’ na “tui.”—Wilika Maciu 25:31-46.

² Sa dede nodra kauaitaka tiko na dauveiqaravi nei Jiova na vosa vakatautauvata qo ni vakatau sara ga kina na nodra bula kei na mate. E vakaraitaka nira na bula tawamudu eso, so tale era na vakarusai. Ena vakatau na noda bula ena ka eda kila na ka dina e tukuna o Jisu kei na noda bulataka. Bibi gona meda taroga: E vakamatatataka tiko vakacava o Jiova na noda kila na vosa vakatautauvata qo? Na cava eda kaya kina ni bibi na vosa vakatautauvata qo ena cakacaka vakavunau? O cei  me vunau? Na cava meda yalodina kina nikua vua na “tui” kei ira e vakatoka mera ‘tacina’?

3, 4. (a) Na ka bibi cava meda kila ena vosa vakatautauvata ni sipi kei na me? (b) E vakamacalataki vakacava na vosa vakatautauvata qo ena Zion’s Watch Tower ni 1881?

³ Me matata vei keda na vosa vakatautauvata ni sipi kei na me, meda kila e tolu na ka bibi: o cei e vakamacalataki tiko, na gauna ni veilewai, kei na yavu e vakatokai kina e dua me sipi se me.

⁴ Na Zion’s Watch Tower ni 1881 e vakamacalataki Jisu me “Luve ni tamata” se “Tui.” Era vakamacalataka na Gonevuli ni iVolatabu na vosa ena King James Version “na wekaqu” ni dusi ira na veiliutaki kei Karisito, vaka kina o ira na nuitaka na bula uasivi e vuravura. Era kaya ni na vakayacori ena Duanaudolu na Yabaki ni Veiliutaki i Karisito nodra tawasei na me kei na sipi. Era vakabauta nira na vakatokai mera sipi o ira na bulataka na lawa ni Kalou me baleta na loloma.

5. E vakamatatataki vakacava ena 1923 na noda kila na vosa vakatautauvata?

⁵ Ena itekitekivu ni 1920, e vukei ira na nona dauveiqaravi o Jiova mera kila na ibalebale ni vosa vakatautauvata qo. E vakadeitaka na Vale ni Vakatawa vakavalagi ni 15 Okotova, 1923, ni o Jisu na “Luve ni tamata.” Ia e vakamacalataka na yavu vakaivolatabu me baleti ira na ‘tacina’ ena vosa vakatautauvata qo. E dusi cei? E dusi ira ga na veiliutaki kei Jisu i lomalagi ena loma ni duanaudolu na yabaki. A vakamacalataki ira na sipi mera nuitaka na bula e vuravura ena ruku ni veiliutaki ni Matanitu i Karisito. Na gauna cava era na tawasei kina na sipi kei na me? E vakamacalataka na ulutaga ya ni o Karisito kei ira na tacina era na veiliutaki mai lomalagi ena Duanaudolu na Yabaki. Ena rawa gona vakacava vei ira na nuitaka na bula e vuravura mera vukei ira na lumuti? E tinia kina na ulutaga oya nira na tawasei na sipi kei na me ni bera na Duanaudolu na Yabaki ni Veiliutaki i Karisito. E vakamacalataka na ulutaga oya na yavu e vakatokai kina e dua me sipi. Era na lewai na tamata ena nodra ciqomi Jisu me nodra Turaga, ra qai nuitaka na Matanitu ni Kalou me kauta mai na ituvaki vinaka.

6. E vakamatatataki tiko ga vakacava noda rai ena 1995?

⁶ Na kena vakamatatataki va qori na noda kila eda lai nanuma kina ni nodra lewai na sipi kei na me ena iotioti ni veisiga ena vakatau tiko ena nodra ciqoma se sega na itukutuku vinaka ni Matanitu ni Kalou. Ena lomaloma ni veiyabaki ni 1990, e vakamatatataki na noda rai. E vakamacalataka e rua na ulutaga ni Vale ni Vakatawa 15 Okotova, 1995, na tautauvata ni vosa i Jisu ena Maciu 24:29-31 (wilika) kei na Maciu 25:31, 32. (Wilika.) * Na cava eda vulica kina? E vakamacalataka na imatai ni ulutaga: “Ena qai yaco mai muri na nodra lewai na sipi kei na me.” Ena gauna cava? “Ena qai yaco oqo ni sa tekivu na ‘veivakararawataki levu’ e tukuni tiko ena Maciu 24:29, 30 (NW), kei na nona tadu mai ‘vakaiukuuku’ na Luve ni tamata. . . . Ena icavacava gona ni ivakarau ca oqo, sa na qai veilewai me vakataulewa tale ga o Jisu.”

7. Na cava sa qai matata vei keda ena gauna qo?

 ⁷ Sa qai matata sara vei keda nikua na ibalebale ni vosa vakatautauvata ni sipi kei na me. O cei e vakamacalataki tiko ena vosa vakatautauvata? O Jisu na “Luve ni tamata” e Tui. O ira na ‘tacina,’ e dusi ira na tagane kei na yalewa lumuti era na veiliutaki kei Karisito i lomalagi. (Roma 8:16, 17) “Na sipi” kei na “me” e dusi ira na tamata mai na veimatanitu era sega ni lumuti ena yalo tabu. Vakacava na gauna ni veilewai? Ena qai vakayacori ni voleka na icavacava ni veivakararawataki levu sa tu qo e matada. Na yavu cava era na lewai kina na tamata mera sipi se me? Ena vakatau qori ena nodra tokoni ira na ivovo ni taci Karisito era se bula tiko e vuravura. Sa voleka ni cava na ituvaki qo, eda vakavinavinakataki Jiova ni vakararamataka tiko na ibalebale ni vosa vakatautauvata i Jisu ena Maciu wase 24 kei na 25!

8, 9. Na cava era vakatokai kina na sipi mera “yalododonu”?

⁸ Ena vosa vakatautauvata ni sipi kei na me, e sega ni tukuna vakadodonu o Jisu na cakacaka vakavunau. Na cava ga e tukuni kina ni vakabibitaki ena vosa vakatautauvata qo na cakacaka vakavunau?

⁹ Kena imatai, e vakayagataka o Jisu na vosa vakatautauvata me veivakavulici, e sega ni tukuna tiko na kena tawasei dina na manumanu, na sipi kei na me. Ena sala vata qori, e sega ni tukuna ni o ira na lewai mera sipi e dodonu mera solia na kakana kei na isulu vei ira na lumuti, me qaravi ira nira tauvimate, se sikovi ira nira vesu tu. Ia e vakaibalebaletaka tiko o Jisu na nodra rai o ira na vaka na sipi me baleti ira na tacina. E vakatokai ira na sipi o Jisu mera “yalododonu” nira kila ni tiko e vuravura e dua na ilawalawa lumuti era taci Karisito, era tokoni ira tale ga ena yalodina ena iotioti ni veisiga.—Maciu 10:40-42; 25:40, 46; 2 Tim. 3:1-5.

10. Era vakaraitaka vakacava o ira na vaka na sipi nira dokai ira na taci Karisito?

¹⁰ Kena ikarua, dikeva na tikina wavolita na vosa i Jisu. E vakamacalataka tiko na ivakatakilakila ni nona tiko kei na ivakataotioti ni veika vakavuravura. (Maciu 24:3) Ni tekivu nona ivakamacala e vakaraitaka o Jisu ni na okati ena ivakatakilakila e dua na ka vakatubuqoroqoro, oya na kena ‘vunautaki ena veiyasa i vuravura’ na itukutuku vinaka ni Matanitu ni Kalou. (Maciu 24:14) Ni bera ni tukuna na vosa vakatautauvata ni sipi kei na me, e tukuna e liu na vosa vakatautauvata ni taledi. Ena ulutaga sa oti, e vakayagataka o Jisu na vosa vakatautauvata qori me vakabibitaka vei ira na ‘tacina’ lumuti ni dodonu mera gugumatua ena cakacaka vakavunau. Ia e dua na itavi vakaitamera mera cakava na iwiliwili lailai ni lumuti era bula i vuravura ena gauna e tiko kina o Jisu, oya mera vunau ena “veimatanitu” ni bera na icavacava. Na vosa vakatautauvata ni sipi kei na me e vakaraitaka nira na vukei. Koya gona, e dua na sala bibi era vakaraitaka kina o ira na lewai mera sipi nira dokai ira na taci Karisito, oya mera tokoni ira ena cakacaka vakavunau. Na cava e okati kina? Mera tokoni ga vakailavo ra qai vakacegui, se vinakati eso tale na ka?

11. Na taro cava eda na rairai taroga, na vuna?

¹¹ Nikua sa rauta ni walu na milioni na iwiliwili ni tisaipeli i Jisu, levu vei ira qori era sega ni lumuti. E sega ni solia vei ira o Jisu na taledi, e solia ga vei ira na nona dauveiqaravi lumuti. (Maciu 25:14-18) Eda na rairai taroga, ‘Dodonu mera vunau tale ga na sega ni lumuti ena yalo tabu?’ Dikeva mada eso na vuna e dodonu kina.

12. Na cava eda vulica ena ka e tukuna o Jisu ena Maciu 28:19, 20?

¹² E vakaroti ira kece nona tisaipeli o Jisu mera vunau. Ni vakaturi o Jisu, e tukuna vei ratou nona imuri me ratou veivakatisaipelitaki, me ratou vakavulici ira mera muria na “ka kece” e vakarota. E okati ena ivakaro qori na cakacaka vakavunau. (Wilika Maciu 28:19, 20.) Koya gona, e dodonu meda vunau kece na tisaipeli i Jisu, se da na veiliutaki i lomalagi se bula e vuravura.—Caka. 10:42.

13. Na cava eda vulica ena raivotu i Joni?

¹³ E tukuni ena Vakatakila nira na vunau na lumuti kei na so tale. O Jisu e vakaraitaka vei Joni ena raivotu na “yalewavou,” qori o ira na 144,000 na lumuti era na veiliutaki kei Karisito i lomalagi, era sureti ira na lewenivanua mera “gunuva wale na wai ni bula.” (Vkta. 14:1, 3; 22:17) Na wai vakatakarakara qori e dusia na isolisoli kece e vakarautaka o Jiova me vakabulai kina na kawatamata mai na ivalavala ca kei na mate ena yavu ni isoro i Karisito. (Maciu 20:28; Joni 3:16; 1 Joni 4:9, 10) Na uto sara ga ni itukutuku eda vunautaka e baleta na ivoli, era liutaka sara tiko ga na lumuti nodra vukei na tamata mera vulica qori me yaga tale ga vei ira. (1 Kor. 1:23) E dua tale na ilawalawa e raica o Joni ena raivotu, era sega ni lumuti. E tukuni tale ga  vei ira mera kaya, “Mai!” Era muria ena nodra sureti ira eso tale mera gunuva na wai ni bula. Na ikarua ni ilawalawa qo era nuitaka na bula e vuravura. Koya gona, e dusia vakamatata na raivotu ni o ira kece na ciqoma na veisureti mera ‘lako mai’ e nodra itavi mera lai vunau.

14. Na cava e okati ena noda muria na “lawa i Karisito”?

¹⁴ E dodonu mera vunau o ira kece na vakarurugi ena “lawa i Karisito.” (Kala. 6:2) E sega ni rua na ivakatagedegede i Jiova. Kena ivakaraitaki, e tukuna vei ira na Isireli: “Sa dua ga na kenai vakarau vua nai taukei, kei na kai tani sa tiko vulagi e na kemudou maliwa.” (Lako 12:49; Vunau 24:22) Era sega ni vauci na lotu vaKarisito ena Lawa e soli vei Mosese. Ia o keda kece eda vakarurugi ena “lawa i Karisito,” se da lumuti se sega. Na lawa qori e okati kina na ka kece e vakavulica o Jisu. Na ka bibi duadua e vakavulica oya mera veilomani na nona imuri. (Joni 13:35; Jeme. 2:8) Na sala bibi eda vakaraitaka kina nida lomana na Kalou, na Karisito kei ira na wekada na noda vunautaka na itukutuku vinaka ni Matanitu ni Kalou.—Joni 15:10; Caka. 1:8.

15. Na cava e tukuni kina ni ivakaro i Jisu e baleti ira kece nona imuri?

¹⁵ Na ka e tukuna o Jisu vei ira na le vica e rawa ni vakaibalebale vei ira na le levu. Kena ivakaraitaki, e veiyalayalati o Jisu kei ratou na le 11 na nona tisaipeli me baleta e dua na Matanitu, ia na veiyalayalati qori e baleti ira kece na 144,000. (Luke 22:29, 30; Vkta. 5:10; 7:4-8) Ni vakaturi oti o Jisu, e rairai vei ratou e vica ga na nona imuri qai vakarota me ratou vunau. (Caka. 10:40-42; 1 Kor. 15:6) Era kila na nona tisaipeli yalodina kece ena imatai ni senitiuri ni dodonu mera vunau, dina ni sega ni vosa yadudua vei ira o Jisu. (Caka. 8:4; 1 Pita 1:8) Nikua tale ga, e sega ni vosa yadudua o Jisu vei ira na walu na milioni na dautukutuku ni Matanitu ni Kalou. Ia era kila kece ni dodonu mera vunau mera vakaraitaka kina nodra vakabauti Karisito.—Jeme. 2:18.

16-18. Era na tokoni ira vakacava na taci Karisito o ira na vinakata mera vaka na sipi? Na cava mera cakava kina qori ena gauna qo?

¹⁶ E vala tiko o Setani kei ira na ivovo ni taci Karisito era se bula tiko e vuravura, sa qai kaukaua tiko ga nona vala ni kila ni sa “lekaleka nona gauna.” (Vkta. 12:9, 12, 17) Era vosota na veivakatovolei nira liutaka tiko na cakacaka levu duadua ni vunau ena ivolatukutuku ni kawatamata. E sega ni vakatitiqataki ni tiko vata kei ira o Jisu, e dusimaki ira tiko.—Maciu 28:20.

¹⁷ E ka dokai dina vei ira na iwiliwili levu era vaka na sipi mera tokoni ira na taci Karisito, sega wale ga ena cakacaka vakavunau ia ena so tale na sala. Kena ivakaraitaki, era tokona vakailavo qai veivuke ena tara Vale ni Soqoni, Vale ni Soqo Lelevu, kei na valenivolavola ni tabana. Era yalodina nira talairawarawa vei ira na veiliutaki e lesia na “dauveiqaravi e yalodina e vuku.”—Maciu 24:45-47; Iper. 13:17.

¹⁸ Sa voleka me ratou sereka na cagi ni veivakarusai ena veivakararawataki levu na agilosi. Ena yaco qori nira sa dregati oti na ivovo ni taci Karisito e vuravura. (Vkta. 7:1-3) Ni bera na Amaketoni, era na kacivi kece i lomalagi na lumuti. (Maciu 13:41-43) Koya gona, qo na gauna mera tokona ena yalodina na taci Karisito o ira na vinakata mera vakatokai mera sipi.