DUA na ka na veilecayaki nei Fernando * ni rau kerea na qase ni nona ivavakoso me ratou veivosaki mada. Ni dau veisiko oti na ivakatawa ni tabacakacaka, eratou na vakamacalataka vua na qase na ka me vakavinakataka me rawa ni qarava kina eso tale na itavi ena ivavakoso. E nanuma o Fernando ni sa na sega tu ga ni lesi me qase ni sa balavu tale ga nona wawa. Ia se qai veisiko oti ga na ivakatawa ni tabacakacaka. Na itukutuku cava eratou na tukuna vua?

E vakarorogo toka o Fernando ni vakamacala e dua vei rau. E cavuta na 1 Timoci 3:1 qai kaya ni ratou sa taura na qase na ivola ni sa vakadonui me sa dua na qase ni vavakoso. E kurabui qai taroga, “Na cava?” E tokaruataka tale vua na tacida, e laurai sara ga e matana na marau. Ni kacivaki ena ivavakoso ni sa qase o Fernando, dua na ka nodra marau na mataveitacini.

Vakacava e cala nida via veiqaravi ena ivavakoso? Sega. E vakamacalataki ena 1 Timoci 3:1, “ke dua e via qarava na itavi vakaivakatawa, e sa vinakata tiko na cakacaka vinaka.” Era muria gona e levu na tagane lotu vaKarisito na vosa veiuqeti qori, era saga mera toso vakayalo mera qarava eso tale na itavi ena ivavakoso. Era vakila na kena yaga na tamata ni Kalou nikua nira tu ena ivavakoso e udolu na qase matua kei na dauveiqaravi. Na tubu ni ivavakoso nikua sa qai vinakati ga kina vakalevu na tacida tagane mera veiqaravi. Mera vakayacora vakacava qo? Vakacava e dodonu mera leqataka na vuna era sega ni lesi kina mera qase ni ivavakoso, me vakataki Fernando?

Na vu vaKirisi ni ‘veiqaravi’ oya na gagadre kei na igu e soli me tauci kina e dua na ka. O na lai vakasamataka nona sasaga e dua me tauca na vuanikau dreu mai vuna. Qo e sega ni noda via kocova  yani meda “qarava na itavi vakaivakatawa.” Na vuna? Nona sauva e dua na isausau qo, e dodonu me qarava kina “na cakacaka vinaka,” sega ni vaqara itutu.

E tiko ena 1 Timoci 3:2-7 kei na Taito 1:5-9 na ivakatagedegede e gadrevi ena cakacaka vinaka qo. Rogoca mada na ka e tukuna o Raymond, e sa dede nona veiqaravi vaqase, me baleta na ivakatagedegede qori: “Au raica ni bibi duadua ga na kequ ituvaki vakayalo. E yaga na ka o tukuna kei na ka o vakavulica, ia e bibi sara mo kua ni beitaki ena dua na ka, mo lewai iko vinaka, mo yalomatua, kua ni yakusurasura nomu bula, dau veikauaitaki, mo yalorawarawa tale ga.”

Na tacida e guta dina me veiqaravi ena vakaraitaka ena nona veimaliwai na ivakatagedegede vakaivolatabu e gadrevi. Ena saga me kua ni beitaki ena dua na ka, sega ni daulawaki se dukadukali nona ivalavala. Ena lewai koya vinaka, yalomatua, sega ni yakusurasura nona bula qai yalorawarawa. Koya gona, era na nuitaka na tacina ni na rawa me liutaki ira qai walia nodra leqa. Ena vakayaloqaqataki ira vakalevu na itabagone kei ira na ka vou ke dau veikauaitaki. Ena veivakacegui, ena vukei ira na itabaqase kei ira na tauvimate ke dau vinakata na ka dodonu. Io, e saga me bucina na itovo kece qori ena vukudra na tacina, sega ni nona via vaqara itutu. *

Era marau na qase mera veivakasalataki mera veivakayaloqaqataki tale ga, ia na bulataki ni ivakatagedegede vakaivolatabu ena vakatau vei koya e via veiqaravi. E tukuna o Henry, e dua sa dede nona veiqaravi vaqase: “Ke o via veiqaravi, cakacaka vakaukaua mo rawata na kena ivakatagedegede.” E vakamacalataka tale ga o koya na Dauvunau 9:10, e kaya: “‘Na ka kece e cakava na ligamu mo qarava ena nomu igu taucoko.’ Solia nomu vinaka taucoko ena itavi eratou lesia na qase. Marautaka na itavi kece e lesi vei iko ena ivavakoso, na tataviraki mada ga. Lakolako sa na laurai na ivakarau ni nomu cakacaka kei na sasaga.” Ke o vinakata mo dua na qase, mo cakacaka vagumatua mo nuitaki tale ga ena veibasoga kece ni nomu veiqaravi tabu.  Me itakele ni nomu bula na yalomalumalumu, sega ni dokadoka.—Maciu 23:8-12.

E rawa nira solimaka na tadolova tiko na itavi ena ivavakoso, se viavia lewa nodra vakatulewa na qase. So tale era na sega ni taleitaka nodra veivakasalataki na qase. Dodonu gona mera taroga, ‘Au via murilomaqu, seu via qarava ena yalomalumalumu na sipi i Jiova?’

Dua tale na ka me nanuma o koya e via veiqaravi vaqase, oya me “nodra ivakaraitaki ga na qelenisipi.” (1 Pita 5:1-3) Me kua ni tiko ena nona vakasama kei na nona itovo na lawaki. Ena vosota tiko ga ke se bera ni lesi me qase. Ni dua e qase e sega ni kena ibalebale ni sa uasivi, nida tamata ga. (Tiko 12:3; Same 106:32, 33) Ena rairai nanuma e dua ni ‘sega na ka me beitaki kina,’ ia eso era na raica rawa na nona malumalumu. (1 Kor. 4:4) Koya gona, ke ra vakasalataki iko vakayalololoma ena iVolatabu na qase, mo vakarorogo vinaka, kua ni cudru. Saga sara mo muria nodra ivakasala.

Era wawa tale ga vakabalavu e levu na tacida mera qai lesi. De sa vica vata na yabaki nomu saga tiko mo “qarava na itavi vakaivakatawa.” Vakacava o sa vuturi? Ke va qori, rogoca tale mada na vosa uqeti vakalou qo: “Ni vakaberaberataki na ka sa nuitaki tiko sa dau oca kina na yaloda: Ia sa kau ni bula ni sa rawa tu na ka e domoni.”—Vkai. 13:12.

Ni sega ni rawati na ka e nuitaki, ena vakavuna ga na yalorarawa. Qori na ka e vakila o Eparama. A yalataka o Jiova ni na dua na luvena tagane ia e vica vata na yabaki nodrau wawa toka kei Sera, sega ga ni dua na luvedrau. (Vkte. 12:1-3, 7) Sa qai tagicaka o Eparama ni sa qase: ‘Kemuni Jiova na Turaga Cecere Duadua, na cava oni na solia vei au, niu se sega ga ni vakaluveni . . . Oni sega ni solia vei au e dua na kawa.’ E qai vakadeitaka vua o Jiova ni na yaco dina na veika e yalataka me baleta na luvena tagane. Ia ni oti tale e 14 na yabaki sa qai vakayacora na Kalou na nona yalayala.—Vkte. 15:2-4; 16:16; 21:5.

Vakacava e sega ni marautaka o Eparama na nona qaravi Jiova ena gauna e wawa voli kina? Sega. Sega vakadua ni vakatitiqataka na veika e yalataka o Jiova. E vakanamata tiko ga ina gauna ena vakayacori kina. E vola na yapositolo o Paula: “Ena nona vosota voli o Eparama, e qai yaco vua na vosa ni yalayala.” (Iper. 6:15) Sa qai vakalougatataka na tamata yalodina qo na Kalou Kaukaua Duadua ena sala e sega sara ga ni namaka. Na cava o rawa ni vulica vei Eparama?

Ke o se sega tiko ga ni veiqaravi vaqase ena gauna qo, mo nuitaki Jiova tiko ga se mani vakacava na balavu ni nomu wawa. Kua ni vakacauoca ena nomu veiqaravi. E tukuna o Warren, e dua na qase a vukea e levu mera toso vakayalo: “Ena taura na gauna me qai lesi e dua ena itavi vakaivakatawa. Ena qai laurai na ivakatagedegede e tiko vua ena veika e cakava kei na ivakarau ni nona  qarava nona itavi. Eso era nanuma nira na qarava vinaka sara na itavi ke ra lesi ena itavi era vinakata. E cala na ivakarau ni rai qori, ena rawa tale ga nida kauaitaki keda kina vakasivia. Na ka vinaka duadua ga oya mo yalodina ni qaravi Jiova se vanua cava se taba ni veiqaravi cava o lesi kina.”

E wawa me tinivakacaca na yabaki e dua na tacida tagane qai lesi me qase. E vakamacalataka na veika e vulica ena Isikeli wase 1, e kaya: “E lewa o Jiova na totolo ni toso ni nona qiqi kei na nona isoqosoqo. E bibi gona meda muria na gauna i Jiova sega ni noda. Nida via veiqaravi vaqase meda kua ni nanumi keda vakasivia, se na ka eda vinakata meda cakava se ka eda na rawata kina. Na ka au vinakata ena rairai veibasai kei na ka e kila o Jiova ni ganiti au.”

Ke o via vakaitavi ena cakacaka vinaka mo dua na ivakatawa vaKarisito, solia nomu vinaka taucoko me marau tiko ga kina na ivavakoso. Ke rui berabera, mo tauri iko vakamalua, mo yalovosovoso. E kaya o Raymond: “E dau vakavu rarawa ke da nanamaki tale vakasivia. O ira na va ya era na sega ni marautaka nodra qaravi Jiova.” Mo gumatua ni bucina na vosota, na itovo e umani ena vua ni yalo tabu. Saga mo vakavinakataka nomu veika vakayalo ni o vulica na iVolatabu. Vakarabailevutaka tale ga nomu cakacaka vakaitalatala kei na nomu vakavulici ira na tataleitaki ena iVolatabu. Mo dau liutaki ratou nomu vuvale ena veika vakayalo kei na sokalou vakavuvale. Mo marau vata kei ira na tacimu vakayalo ena gauna ni veimaliwai. Ni o saga tiko nomu isausau, o na marautaka nomu qaravi Jiova ena gauna qo.

E dua na veivakalougatataki i Jiova na noda saga meda vakaitavi ena ivavakoso. E sega ni namaka o Jiova kei na nona isoqosoqo mera oca ra qai rarawa na qaravi koya. Na Kalou e dau tokoni ira qai vakalougatataki ira na gumatua ni qaravi koya ena inaki vinaka. E vakadinadinataki ni dau veivakalougatataki na Kalou, ‘e sega ni kuria ena ka rarawa.’—Vkai. 10:22.

Se mani vakacava na balavu ni noda sasaga meda veiqaravi, ena tiko ga na ka meda vakavinakataka ena noda qaravi Jiova. O na saga mo bucina na ivakatagedegede e gadrevi, o na solia nomu vinaka taucoko ena ivavakoso, ia o na sega ni vakawaleni ratou nomu vuvale. Ni o cakava qori ena sega ni guilecava o Jiova nomu sasaga mo qaravi koya. Mo marautaka mada ga nomu qaravi Jiova se itavi cava o lesi kina.