O Vakadinadinataka ni Dau Veidusimaki na Kalou?

ERA se sega vakadua ni bau raica e dua na ka va qo na Isireli kei ira na kai Ijipita. Nira biubiu mai Ijipita na Isireli, e liutaki ira voli na duru o ena siga, ia ena bogi ena veisau qori me duru bukawaqa. E vakatubuqoroqoro dina qori! Ia erau basika vakacava na duru o kei na duru bukawaqa? Na cava na kena inaki? Sa oti qo e rauta ni 3,500 na yabaki, na cava eda vulica ena nodra rai na Isireli me baleta na “duru buka waqa kei na o”?—Lako 14:24.

Na Vosa ni Kalou e cavuti koya e vakavuna na duru o kei na duru bukawaqa kei na kena inaki, e kaya: “A sa liutaki ira tiko ko Jiova e na duru o e na siga, me tuberi ira e na sala; kei na duru buka waqa e na bogi, me vakararamataki ira; me ra lako e na siga kei na bogi.” (Lako 13:21, 22) A vakayagataka na Kalou o Jiova na duru o kei na duru bukawaqa me liutaki ira na nona tamata mai Ijipita ina vanualiwa. E vinakati mera tu vakarau mera muria na vanua ga e toso kina. Nira cicimuri ira na Isireli na mataivalu ni Ijipita mera ravuti ira, a toso na duru o me lai tu ena kedra maliwa na Isireli kei ira na kai Ijipita, mera taqomaki kina na Isireli. (Lako 14:19, 20) E sega ni liutaki ira na Isireli na duru o kei na duru bukawaqa ena sala lekaleka ga, ia na nodra muria na kena veidusimaki e sala duadua ga era na yaco bula kina ena Vanua Yalataki.

Na duru o kei na duru bukawaqa e vakadeitaka vei ira na tamata ni Kalou ni tiko vata kei ira o Jiova. E matataki Jiova na duru o kei na duru bukawaqa, eso na gauna e dau rogo sara ga mai kina na domona. (Tiko 14:14; Same 99:7) Na duru o tale ga e vakatakilai Mosese me dua e digitaka o Jiova me liutaka na matanitu o Isireli. (Lako 33:9) Na iotioti ni gauna a tukuni ena iVolatabu na kena rairai mai na duru o, oya na nona vakadeitaka o Jiova me sa digi Josua me veiliutaki me sosomitaki Mosese. (Vkru. 31:14, 15) Ena lako vinaka na nodra biubiu mai Ijipita na Isireli ke ra kila vinaka ni dusimaki ira tiko na Kalou, ra qai muria sara.

Era Guilecava na iVakadinadina

Era rairai qoroqoro sara ga na Isireli nira raica ena imatai ni gauna na duru o kei na duru bukawaqa. Ia e ka ni rarawa ni cakamana era raica tiko oya e veigauna, e sega ni tara sara na lomadra, sega ni uqeti ira mera nuitaki Jiova tawamudu kina. Era saqata ena levu na gauna na veidusimaki ni Kalou. Nira cicimuri ira yani na kai Ijipita, era sega ni nuitaka na kaukaua i Jiova me veivakabulai. Ia o ira na Isireli era beitaki Mosese na dauveiqaravi ni Kalou, ni kauti ira ina vanua era na mate kina. (Lako 14:10-12) Nira vakabulai mai na Wasa Damudamu, era vosa kudrukudrutaki Mosese, Eroni, kei Jiova ni lailai na kakana kei na wai. (Lako 15:22-24; 16:1-3; 17:1-3, 7) Ni oti ga e vica na macawa, era vakasaurarataki Eroni me bulia e dua na luve ni bulumakau koula. Vakasamataka mada! Ena dua na yasa ni keba era raica na Isireli na duru o kei na duru bukawaqa—na ivakadinadina vakatubuqoroqoro ni nona sereki ira mai Ijipita o Jiova. Ia ena dua tale na yasa ni keba voleka ga e kea, era qarava tiko kina na matakau ra qai kaya: “Oqo na nomudou kalou, ka kauti kemudou cake mai na vanua ko Ijipita.” E ‘veibeci vakalevu’ na ka era cakava!—Lako 32:4; Niem. 9:18.

E macala mai na nodra talaidredre na Isireli nira beca na veidusimaki i Jiova. E sega ni leqa na nodra rai vakayago, e leqa ga na nodra rai me baleta na veidusimaki i Jiova kei na nodra  talairawarawa kina. Era raica tiko na duru o kei na duru bukawaqa, ia era sa guilecava ni vakatakarakarataka na veidusimaki i Jiova. Na nodra ivalavala e “vakacudrui Koya na Yalosavasava ni Isireli,” ia e yalololoma tiko ga o Jiova ni dusimaki ira na Isireli ena nona vakayagataka na duru o kei na duru bukawaqa me yaco sara ina Vanua Yalataki.—Same 78:40-42, 52-54; Niem. 9:19.

Raica na iVakadinadina ni Veidusimaki ni Kalou Nikua

Ena gauna tale ga qo, e dau matata na idusidusi i Jiova vei ira na nona tamata. A sega ni bau nanuma o Jiova mera qara ga na Isireli na gaunisala mera muria, e sega ni tukuni tale ga vei keda nikua meda dui qara ga na sala ina vuravura vou. O Jisu Karisito e lesi me iLiuliu ni ivavakoso. (Maciu 23:10; Efeso 5:23) E lesia eso na itavi vua na dauveiqaravi yalodina, na ilawalawa era lewena na lotu vaKarisito yalodina era lumuti ena yalo tabu. Na dauveiqaravi yalodina e qai lesi ira na ivakatawa ni ivavakoso vaKarisito.—Maciu 24:45-47; Taito 1:5-9.

Ena kilai vakacava na dauveiqaravi yalodina e vuku se dauniyau? Raica mada na nona vakamacalataka o Jisu: “O cei sara mada na dauniyau e yalodina e vuku, e lesia na nona turaga me lewa na nona ilawalawa dauveivuke, qai vakarautaka tiko ga na kedra ivakarau kakana ena kena gauna dodonu? Ena marau na dauveiqaravi ya ke yaco mai na nona turaga qai raica ni vakayacora dina tiko!”—Luke 12:42, 43.

Qori na vuna e “yalodina” kina na dauniyau, e sega ni tawayalodina se vakanadakui Jiova, o Jisu, na ka dina ena iVolatabu se o ira na tamata ni Kalou. Ni “vuku” tale ga na dauniyau, e dau lewavinaka ni dusimaka na cakacaka bibi duadua, oya na kena vunautaki na “itukutuku vinaka ni matanitu ni Kalou” kei na nodra vakavulici na ‘lewe ni veivanua kece ga mera tisaipeli.’ (Maciu 24:14; 28:19, 20) E talairawarawa na dauniyau me vakarautaka “ena kena gauna dodonu” na kakana vakayalo e yaga e bulabula. E laurai na veivakadonui i Jiova ena nona vakalougatataki ira na nona tamata e tubu tiko ga na kedra iwiliwili, e veidusimaki ena vakatulewa bibi e caka, vakamatatataki na ka dina vakaivolatabu, taqomaki keda mera kua ni vakawabokotaki keda na meca, qai taqomaka na lomada kei na noda vakasama.—Aisea 54:17; Fpai. 4:7.

Muria na Veidusimaki ni Kalou

Eda na vakaraitaka vakacava nida doka na veidusimaki ni Kalou? E tukuna na yapositolo o Paula: “Moni talairawarawa vei ira era liutaki kemuni tiko moni yalorawarawa tale ga.” (Iper. 13:17) E sega ni dau rawarawa qori. Kena ivakatautauvata: Kaya mada ke o dua na Isireli o bula ena gauna i Mosese. O sa taubale toka ena loma ni dua na gauna, qai tu vakadua na duru o se na duru bukawaqa. Ena vakacava na dede ni kena tu vakadua? Dua na siga? Dua na macawa? Vica vata na vula? O na veinanuyaka: ‘E yaga meu talaucaka kece na noqu iyaya?’ O na rairai talaucaka e liu na iyaya e yaga duadua. Ia ni oti e vica na siga, ni sega ni cegu na lomamu ena nomu vakayanaka tiko na nomu iyaya, o mani talaucaka kece. Ni voleka sara tu ga ni oti na nomu talaucaka na iyaya, o raica ni sa vakarau toso tale na duru o se duru bukawaqa—e vinakati mo sa baci tawana tale na nomu iyaya! Ena sega toka ni rawarawa qori se veiganiti. Ia e vinakati ga mera “cavu tu” na Isireli.—Tiko 9:17-22.

Eda dau raica vakacava na veidusimaki ni Kalou? Eda dau ‘cavu tu sara’ meda muria? Se da muria tiko ga na kena ivalavala e sa matau tu vei keda? Vakacava, eda kila vinaka na idusidusi vovou, me vaka na kena e vauca na caka vuli iVolatabu, na vunau vei ira e duidui na nodra vosa, wasoma na noda vakaitavi ena sokalou vakavuvale, noda tokona na Komiti Veitaratara kei na Valenibula, kei na noda itovo vinaka ena soqo sigatolu? Eda na vakaraitaka tale ga nida doka na veidusimaki ni Kalou nida ciqoma na ivakasala. Eda sega ni nuitaka ga na noda vuku nida vakatulewataka eso na ka bibi, ia eda nuitaki Jiova kei na nona isoqosoqo me  dusimaki keda. Me vaka ga na nona nuitaka e dua na gone me rau taqomaki koya na nona itubutubu ena gauna ni draki ca, eda nuitaka tale ga na isoqosoqo i Jiova me taqomaki keda ena gauna ni draki ca vakaivakatakarakara, qori ni tarai keda na leqa ni vuravura qo.

E macala ga nira sega ni uasivi o ira era liutaka na isoqosoqo ni Kalou e vuravura me vakataki Mosese ga. Ia na duru o se bukawaqa a vakadinadinataka tiko ga vei ira na Isireli ni lesi Mosese na Kalou, e vakadonui koya tale ga. Nanuma tale ga ni sega ni vakatau vei ira na Isireli na gauna mera toso kina. Era muria ga na ‘ivakaro i Jiova ena gusui Mosese.’ (Tiko 9:23) Ni dau veidusimaki o Mosese ena vuku i Jiova, a rairai tukuna na gauna mera toso kina.

Nikua, na dauniyau i Jiova e veidusimaki tale ga ena gauna me caka kina e dua na ka. E cakava vakacava qori? E veidusimaki ena ulutaga ena Vale ni Vakatawa, na Noda Cakacaka Vakaitalatala, ivola vovou, kei na ivunau ena soqo sigadua, sigarua se sigatolu. E vakadewataki ena ivavakoso na ivakasala nira vakayagataki na ivakatawa dauveilakoyaki, vakayagataki na ivola se vuli e dau tuvanaki mera tiko kina na tagane era veiqaravi ena ivavakoso.

O kila vinaka tiko na ivakadinadina ni nona veidusimaki na Kalou? Ena iotioti ni veisiga qo, o Jiova e vakayagataka na nona isoqosoqo me dusimaki keda ena vuravura ca i Setani e tautauvata kei “na vanua-liwa.” Qori e vakavuna meda marautaka na duavata, veilomani kei na tiko nuidei.

Nira yacova na Vanua Yalataki na Isireli, a tukuna o Josua: “Dou sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni.” (Josua 23:14) Nikua eda na yacova tale ga na dauveiqaravi ni Kalou na vuravura vou e yalataki tu vei keda. Ia na noda yacova na vanua yalataki e vakatau sara ga ena noda vakamalumalumu ena nona veidusimaki na Kalou. Koya gona, meda vakadinadinataka tiko ga ni dau veidusimaki o Jiova!

[iYaloyalo ena tabana e 5]

E dusimaki keda tiko nikua na isoqosoqo i Jiova

iVola e sevutaki ena soqo sigatolu

Vuli vaKalou

Soqoni me baleta na cakacaka vakavunau