Vakalagilagia na Dauveibuli ena Nomu iSausau Vakayalo

“SA NA sega tu ga ni donu na cagi vua e dua e soko tiko ni sega ni kila na vanua me kele kina.” Na vosa oqo a rairai tukuna e dua na vuku ni Roma ena imatai ni senitiuri e vakabibitaka kina me tiko na isausau me vakainaki kina na noda bula.

E volatukutukutaki tu ena iVolatabu na kedra itukutuku e so era dau tekia na isausau ra qai kakavaka sara. Rauta ni 50 na yabaki na nona “taya e dua na waqa [o Noa] . . . me vakabulai ira kina na nona lewe-ni-vale.” Na parofita o Mosese e sa ‘raica tu na icovi sa waraki koya tu.’ (Iperiu 11:​7, 26) Na isosomi i Mosese o Josua, a soli vua na ilesilesi vakalou me vakamalumalumutaka na vanua kece o Kenani.​​—Vakarua 3:​21, 22, 28; Josua 12:​7-​24.

Ena imatai ni senitiuri S.K., e uqeta nona isausau vakayalo o Paula na nona tukuna o Jisu me “vunautaki mada e vuravura taucoko nai tukutuku-vinaka.” (Maciu 24:14) E uqeti koya sara ga na raivotu kei na ka e tukuna o Jisu, okati kina na ilesilesi me ‘kauta na yaca i Jisu ina veimatanitu.’ E liutaka sara ga kina o Paula na tauyavu ni vica na ivavakoso vakarisito mai Esia Lailai kei na veivanua e Urope.​​—Cakacaka 9:​15; Kolosa 1:​23.

Io, ena veitabagauna sa sivi era dau tekia na nodra isausau na dauveiqaravi i Jiova ra qai rawata sara ga ena nodra vakalagilagia kina na Kalou. Eda na tekia vakacava nikua na noda isausau vakayalo? Na isausau cava meda na kakavaka, na cava eda na cakava meda na rawata kina?

Me Vinaka na iNaki ni Noda iSausau

E rawa ni kovuta na basoga ni noda bula kece na isausau, e tu tale ga o ira e nodra bula sara ga mera tekia ra qai rawata na isausau vakayago. Ia e duidui na isausau vakayalo mai na isausau ni vuravura oqo. E uto sara ga ni nodra isausau e levu nikua na kocovi ni iyau, na itutu, kei na kaukaua. E sa na cala tu ga kevaka eda saga me rogo kina na yacada se meda dua vei ira na vetaicake! Na isausau e vakacaucautaki kina na Kalou o Jiova e vauci kina na noda sokalou vua kei na noda tokona na nona Matanitu. (Maciu 6:​33) Ena uqeti keda meda sauva na isausau oqori na noda lomana na Kalou, noda lomani ira na wekada, kei na noda via vakaogai keda tiko ga ena veika vakayalo.​​—Maciu 22:​37-​39; 1 Timoci 4:7.

E bibi me vinaka na inaki ni noda isausau vakayalo ena noda kakavaka e so tale na itavi, se na noda saga meda toso vakayalo. Ia ena so na gauna e sega ga ni dau rawati na isausau vinaka vaka oqori. Na cava gona meda cakava me vakarawarawataka na noda rawata na isausau eda tekia?

Me Tiko Vei Keda na Kena Yalo

Vakasamataka mada nona tuvana vinaka o Jiova na nona bulia na lomalagi kei na vuravura. Na nona cavuta na vosa “yakavi kei na mataka” e vakaraitaka ni wasea vakalalai na gauna me bulibuli kina kei na veika me bulia ena loma ni gauna oqori. (Vakatekivu 1:​5, 8, 13, 19, 23, 31) E kila vinaka ena itekitekivu ni iwasewase ni gauna yadua na nona isausau se ka me cakava ena loma ni gauna oqori. Oqori sara ga na ka e qai cakava ni sa bulibuli. (Vakatakila 4:​11) E kaya na peteriaki o Jope me baleti Jiova: “Na ka sa vinakata na yalona, sa kitaka ga.” (Jope 23:13) Kena irairai ni marautaka dina o Jiova na ka kece ga e bulia, e kaya kina ni sa “ka vinaka sara”!​​—Vakatekivu 1:​31.

Ena vakavatukana tale ga vaka oqori na noda isausau ke tiko vei keda na kena yalo. Cava ena vukea me tiko vei keda na yalo vaka oqori?  Ena gauna se sega ni vakacokotaki kina na vuravura qai lala tu, sa raitayaloyalotaka tu o Jiova na gauna sa na buli oti kina​​—e dua na vatutalei e ciri tu e maliwalala, e vakacaucautaki qai vakarokorokotaki ga kina o koya. Ke da vinakata tale ga meda sauva na veika eda sa nakita meda na cakava, ena rawati ga ena noda vakasamataka na macala kei na yaga ni ka eda via sauva tiko. Oqori sara ga na ka e vakadinadinataka o Tony, e yabaki 19. E sega ni guilecava rawa na veika e raica ena imatai ni gauna a sikova kina na valenivolavola ni tabana ni iVakadinadina i Jiova ena ra kei Urope. Tekivu sara e kea na nona sa dau vakasamataka tu o Tony, ‘Ena vakacava tu beka na bula kei na veiqaravi ena vanua vaka oya?’ E dau vakasamataka e veigauna qai saga tale ga me rawata na isausau oqori. Dua na ka na nona marau ni sa sureti me lai veiqaravi ena valenitabana ni oti tale e vica na yabaki!

Na noda vakailala kei ira era kakavaka e dua nodra isausau ra qai rawata vinaka, ena uqeti keda tale ga meda rawata na noda. O Jayson e sa yabaki 30, e sega ni dau taleitaka na cakacaka vakavunau ni se itabagone. Ia ni oti na nona vuli ena dua na sekedri, e tekivu sara me na veiqaravi vakapainia, me cakacaka vakaitalatala vakatabakidua. Na cava a uqeti Jayson me painia? E kaya: “E uqeti au sara ga na noqu dau vosa vei ira na painia kei na noqu dau cakacaka vata kei ira.”

Ena Yaga Sara ke Da Vola Noda iSausau

Ena rawa ga ni matata e dua na ka eda lalawataka kevaka eda tovolea meda digia vinaka na vosa meda vakamacalataka kina. E kaya o Solomoni ni vosa veiganiti e vaka na matanimoto ena vakadodonutaka na noda ilakolako. (Dauvunau 12:11) Ke volai gona na veivosa oqori, ena kasa sara ga ena lomada kei na noda vakasama. Sa rauta me vakaroti ira kina na tui e Isireli o Jiova mera dau vola na nona Lawa. (Vakarua 17:18) Ena vinaka gona kevaka eda vola na noda isausau kei na sala meda na covia kina, vola tale ga na ka e rawa ni vakataotaka, kei na sala meda na walia kina. De dua ena gadrevi meda vulica e so na ka vou me rawa nida rawata kina noda isausau. Ena yaga tale ga ke da kere veivuke vei ira era rawa ni tokoni keda.

E vakila sara ga o Geoffrey na yaga ni nona tuvana vinaka na nona isausau vakayalo, e sa balavu na nona painia lavotaki ena dua na vanua e tu vagalala, ena vanua vakaesia. A mani qai mate vakasauri na watina. Ena gauna ni veisau oqori, a nakita kina o Geoffrey me so na nona isausau me rawa ni vakaogai koya sara ga ena cakacaka vakapainia, ia me dua na nona isausau. Ni sa vola oti na nona isausau, a masulaka me na tolu na nona vuli iVolatabu vou ni cava na vula. E dau railesuva e veisiga na nona cakacaka, ena veiya tini na siga e dau dikeva kina na nona toso. Vakacava e rawata beka na nona isausau? E kaya ena marau io, ni sa ripotetaka e va na vuli iVolatabu vou!

Me Liu Mada na iSausau Lalai

E so na isausau e vaka me dau dredre tu ga ni rawati. O Tony e sa tukuni oti mai, e vaka e vanavana na vula na nona via lai veiqaravi ena valenivolavola ni tabana ni iVakadinadina i Jiova. Ni gauna oya e se sega ni vinaka na ivakarau ni  nona bula, e se sega tale ga ni yalataki koya vua na Kalou. Sa qai loma i Tony me veisautaka nona bula me salavata kei na ivakaro i Jiova, qai nona isausau me papitaiso. Ni sa rawata na isausau oqori, sa qai saga me sauva tale na isausau ni painia veivuke, e toqa sara ena nona ivolanivula na tikinisiga me tekivu kina. Oti, sa nona isausau na cakacaka vakapainia tudei, mani toqa tale ena nona ivolanivula na tikinisiga me tekivu kina. Ni sa painia tiko ena dua toka na gauna, e sa kila ni na sega ni dredre vua me rawata na isausau ni veiqaravi ena valenitabana.

Ena vinaka sara kevaka meda vidavida na isausau levu eda via tekia. Oqo ena vakarawarawataka noda kakavaka vakamalua na isausau levu eda saga tiko. Noda railesuva ena veigauna noda toso kei na noda sa rawata na isausau lalai ena vukea meda dei tiko ena noda isausau levu. Ena vukei keda tale ga na noda masulaka vakawasoma vei Jiova na noda ituvatuva. E uqeti keda kina o Paula: “Dou masu tikoga.”​​—1 Cesalonaika 5:​17.

Gadrevi na Sasaga kei na Yalodei

E so na isausau eda na sega ga ni rawata, dina ga ke tiko e dua na kena ituvatuva vinaka, se kevaka se tiko vei keda na kena yalo. E kena irairai ni a rarawa sara ga na tisaipeli o Joni Marika ni a sega ni via kauti koya o Paula ena ikarua ni nona ilakolako vakaulotu! (Cakacaka 15:​37-​40) A vuli kina o Marika qai veisautaka na nona isausau me vakalevutaka kina na nona veiqaravi. A veisau dina. E muri, a vakacaucautaki Marika o Paula, rau qai veivolekati kei na yapositolo o Pita e Papiloni. (2 Timoci 4:​11; 1 Pita 5:​13) E qai rairai itavi lavotaki duadua vua na nona volatukutukutaka na bula i Jisu kei na nona cakacaka vakaitalatala.

O keda tale ga eda na rairai sega ni rawata ena so na gauna na isausau vakayalo eda saga tiko meda covia. Ia meda kua ni soro, meda raica ga na toso eda sa cakava me tekivu mai na gauna eda tekia kina noda isausau, se vakadeitaka se da rawata se sega na isausau oqori qai veisautaka ke gadrevi. Ke da sotava e so na ka ni veivakataotaki, meda sasaga vakaukaua ena nuidei kei na yalogu. E vakadeitaka vei keda o Tui Solomoni: “Mo vakalaiva vei Jiova na nomu cakacaka, ena vakataudeitaki kina na nanuma ni lomamu.”​​—Vosa Vakaibalebale 16:3.

E so na isausau eda na sega ni rawata ena keda ituvaki. Kena ivakaraitaki, na tautauvimate kei na itavi vakavuvale ena vakadredretaka na sauvi ni so na isausau vakayalo. Ia meda kua ga ni guilecava ni isolisoli uasivi na bula tawamudu e lomalagi se ena Parataisi e vuravura. (Luke 23:43; Filipai 3:​13, 14) Ena rawati vakacava? E vola o Joni: “Ko koya ga sa vakayacora na loma ni Kalou sa tu dei ka tawa mudu.” (1 Joni 2:​17, VV) Dina ga nida na sega ni rawata e so na isausau ena keda ituvaki, ia e se rawa tiko ga nida “rerevaka na Kalou, ka muria na nona vunau.” (Dauvunau 12:13) Na isausau vakayalo ena vukei keda meda dei tiko ga nida cakava na loma ni Kalou. Meda vakayagataka mada ga oqori meda vakalagilagi koya kina na Dauveibuli.

[Kato ena tabana e 22]

iSausau Vakayalo Meda Dikeva

○ Wili iVolatabu e veisiga

○ Wilika na ilavelave kece ni Vale ni Vakatawa kei na Yadra!

○ Vakavinakataka na ivakarau ni noda masu

○ Bulataka na vua ni yalo tabu

○ Vakalevutaka noda veiqaravi tabu

○ Meda kenadau ena vunau kei na veivakavulici

○ Saga meda kenadau ena vunau ena talevoni, vanua ni bisinisi kei na vunau tawalokuci