‘E Vakavulici Keitou me Keitou Rokova na Nona Lotu’

E TUKUNI vua e dua na iVakadinadina i Jiova ena yasayasa o Rovigo, mai Itali, ni sa tubu tiko vua e dua na mate vuce, e kena irairai ni sa na rawati koya. Curusuka i valenibula, e kerea tale ga kina me kua ni soli vua na dra, mani yaco na gauna sa lai qaravi ga e vale. Ratou dau lai qaravi koya e vica na nasi mai na tabana ni veiqaravi vei ira na tauvi kenisa.

E tarai ira kece na vuniwai kei na nasi era qaravi koya na kaukaua ni nona vakabauta na tacida tauvimate oqo, sa yabaki 36, kei na nona dau yalorawarawa ni muria na ivakasala. Ni se bera ni rawai koya na kenisa, e dua vei ira na nasi dauveiqaravi e vola ena dua na nodra ivola na nasi na veika a sotava ena nona qaravi Angela, na yaca e vakatokai tacida tauvimate kina.

“E karakivosa toka ga o Angela qai laurai vua ni via bula. E dina ni kila tu o koya ni na rawati koya na kena mate, ia e qara me dua na kena iwali se kena wai me vaka ga eda na cakava kece ena ituvaki oya. . . . Ni toso na gauna keitou sa kilai koya vinaka sara na nona nasi. E dau tu vakarau me ciqoma na neitou veiqaravi. Ni rawarawa na kila na yalona, e vakarawarawataka na neitou itavi. Dau ka ni marau na neitou lai qaravi koya, ni keitou vakila ni oya e gauna ni neitou veitaratara kei na dua na marama vinaka, e sega gona ni yaga ga vei Angela, vei keitou sara mada ga. . . . Keitou vakila totolo tale ga ni na ka ni bolebole na nona qaravi ena vuku ni nona lotu.” Oqori na ka e kaya o nasi ni nanuma ni dodonu me soli vei Angela na dra, ia a sega ni vakadonuya o Angela.​—Cakacaka 15:28, 29.

“Ni neitou itavi me keitou qaravi Angela vakavuniwai, keitou vakaraitaka vua ni keitou sega ni duavata kei na nona sega ni vakadonuya me tauri dra, ia ena yasana kadua, mai na ka keitou raica vua, keitou kila ni bibi vua na bula. Keitou raica tale ga ni bibi vei iratou vakamatavuvale na nodratou lotu. Sega ni soro o Angela ena mate sa kune vua, e kaukaua tu ga na yalona. E via bula, e saga ena nona igu taucoko me kua ni rawati koya na kena mate. E tukuna vakamatata na ka e lomana, na ka e vakabauta. Kune vei Angela e dua na ka e sega ni kune vei keda e levu, oya na gu ni yalo, qai qaqaco vinaka tu na nona vakabauta, e duidui sara mai vei keda ni luluqa na noda vakabauta. . . . E vakavulici keitou o Angela ni bibi me keitou rokova na nona lotu, e dina ni sega ni duavata kei na so na iwalewale ni veiqaravi ena neitou tabana. . . . Keitou vakabauta ni lesoni bibi sara e vakavulici keitou kina oqo o Angela, vakauasivi ni keitou veitaratara kei ira na veimataqali tamata, veimataqali lotu, keitou sotava tale ga na veimataqali ituvaki. E macala ni keitou na yaga vei ira, ia e rawa sara tale ga ni keitou vuli mai vei ira kece keitou sotava.”

E tokaruataka tale ga na nasi e volavola oqo na ka sa tabaki oti ena Code of Professional Ethics for Italian Nurses, se na ivakaro me baleti ira na nasi mai Itali a vakadonui ena 1999, e tukuni kina: “Ni qarava na nasi na nona itavi, me ciqoma ni tiko na dodonu i tauvimate me baleta na lotu, ivakatagedegede ni itovo savasava, ivakarau vakavanua, e matatamata cava o tauvimate, e yalewa se tagane.” Ena so na gauna e dau dredre vei ira na vuniwai kei na nasi mera rokova na vakabauta vakalotu i tauvimate, eda vakavinavinakataki ira gona era tu vakarau mera vakayacora oqo.

O ira na iVakadinadina i Jiova era dau vakasamataka sara vakatitobu na veika e vauca na nodra bula kei na nodra qaravi vakavuniwai ni bera nira vakatulewa. Ra dau dikeva vinaka sara na ka e kaya na iVolatabu, me vaka e laurai ena kisi i Angela, e sega gona ni kena ibalebale nira vakauyalodra ga. (Filipai 4:5, NW) Ena veiyasa i vuravura, sa tubu tiko ga na kedra iwiliwili na dauveiqaravi vakavuniwai era tu vakarau mera rokova na nodra lewaeloma na tauvimate era iVakadinadina.