KE O gade ena yanuyanu lailai o Sangir Besar e Idonisia ena vica na yabaki sa oti, o na rairai raica e tolu na tacida yalewa lotu vaKarisito e baravi. Eratou kilai levu ena yanuyanu qori ena nodratou cakacaka vakaitalatala ni ratou vukei ira e kea mera kila na iVolatabu. Ia ena gauna qori, e duatani sara na ka eratou cakava tiko.

Matai, ratou na lako i wai, eratou laveta mai na vatu bibi. Eso na vatu qori, na kedra levu e vaka na polo ni soka. Tarava, ratou dabe ena idabedabe kau lalai, ratou vakayagataka na ituki me ratou tukilaka na vatu me ka lalai sara, e ka levu tale na yaloka ni toa. Oti, ratou tawana na vatu lalai qori ena vokete qai laveta cake ena ikabakaba ina vanua ratou vakaitikotiko kina. Ratou tawana tale ga ena taga lelevu me qai vakavodoki ena lori lelevu, me vakayagataki ena caka gaunisala.

Dua vei ratou na veitacini qori o Hulda. E rawa ni vakayagataka e levu na gauna ena cakacaka qo ena vuku ni kena ituvaki. Na ilavo e rawata mai e saumi kina na veika e vinakati ena veisiga ena vuvale. Ia qo sa dua tale na nona isausau, e vinakata me volia e dua na tablet me rawa ni raica kina na porokaramu na JW Library^®. E kila o Hulda ni vidio kei na so tale na ka e vakarautaki ena porokaramu qori ena vakavinakataka nona cakacaka vakaitalatala, me kila vinaka tale ga na iVolatabu.

E cakacaka o Hulda ena veimataka me rua na aua me dua veimama na vula. E tukilaka e levu na vatu me tawa ena dua na lori lailai. E mani rawa na ilavo me voli e dua na tablet.

E kaya o Hulda: “Dua na ka na noqu oca kei na momosi ni yagoqu niu tukitukilaka na vatu. E totolo ga niu guilecava na mosi niu sa rawa ni vakayagataka noqu tablet vou me vuavuaivinaka na noqu cakacaka vakaitalatala, e rawarawa tale ga noqu vakavakarau ena soqoni vaKarisito.” E kaya tale ga ni yaga vakalevu na tablet ni tekivu na matedewa, e rawa ni sema kei ira na mataveitacini ena vunau kei na soqoni. Eda marau vata kei Hulda ni sa rawata nona isausau.