1. Na cava eda vulica ena bose vakayabaki ni 2023?

 ENA bose vakayabaki ni iVakadinadina i Jiova ena 2023, a e vakamatatataki kina eso na ka eda vakabauta, eda rogoca tale ga eso na irogo marautaki me baleta noda cakacaka vakavunau. Kena ivakaraitaki, eda vulica ni rawa nira to vei Jiova eso ni vakarusai oti mada ga o Papiloni na Ka Levu. Eda vulica tale ga me tekivu mai na Noveba 2023, e sega ni vinakati me ripotetaka na dautukutuku na ka kece e cakava ena cakacaka vakavunau. Vakacava kena ibalebale qori ni sa sega ni bibi na noda cakacaka vakavunau? Sega sara!

2. Na cava sa qai bibi tiko ga kina e veisiga na noda cakacaka vakavunau? (Marika 13:10)

² Sa qai bibi tiko ga e veisiga na noda cakacaka vakavunau. Na vuna? Ni sa lekaleka na gauna. Dikeva mada na ka e tukuna o Jisu me baleta na cakacaka vakavunau ena iotioti ni veisiga. (Wilika Marika 13:10.) E tukuna o Jisu ena ivola i Maciu ni na vunautaki na itukutuku vinaka e vuravura taucoko ni bera ni yaco “na icavacava.” (Maciu 24:14) Na matavosa qori e dusia na kena vakarusai na vuravura ca i Setani. E sa lokuca oti tu o Jiova na ‘siga kei na aua’ me na vakayacori kina qori. (Maciu 24:36; 25:13; Caka 1:7) Ni cava e dua na siga, eda sa volekata sara tiko ga yani na siga qori. (Roma 13:11) Ia meda vunau tiko ga me yacova na icavacava.

3. Na cava e uqeti keda meda vunau?

 ³ Nida vakasamataka na noda cakacaka vakavunau, qo e dua na taro meda nanuma tiko: Na cava eda vunautaka kina na itukutuku vinaka? Kena isau rawarawa ga, e uqeti keda na loloma meda vunau. Na ka eda cakava ena cakacaka vakavunau e vakaraitaka na noda loloma, ya noda taleitaka na itukutuku vinaka, noda lomani ira na lewenivanua, koya e bibi duadua noda lomani Jiova kei na yacana. Meda dikeva yadua mada.

EDA VUNAU NIDA TALETAKA NA ITUKUTUKU VINAKA

4. Na cava o cakava ni o rogoca na itukutuku vinaka?

⁴ O vakasamataka na gauna o rogoca kina eso na itukutuku vinaka? De dua se qai sucu vou e dua na lewenivuvale, se tukuni vei iko e dua na cakacaka o vinakata sara tu ga. Na levu ni nomu marau o tukuna qori vei ira na nomu lewenivuvale kei ira na nomu itokani. Vakacava e va tale ga qori nomu rogoca na itukutuku vinaka duadua, na itukutuku ni Matanitu ni Kalou?

5. Na cava na nomu rai ni o se qai rogoca vakadua na ka dina mareqeti ena Vosa ni Kalou? (Raica tale ga na iyaloyalo.)

⁵ Vakasamataka lesu nomu se qai rogoca vakadua na ka dina ena Vosa ni Kalou. O vulica ni lomani iko na Tamamu vakalomalagi, e vinakata mo lewe tale ga ni nona vuvale era sokaloutaki koya, e yalataka ni na vakaotia na mosi kei na rarawa, o rawa tale ga ni sotavi ira na wekamu era sa takali ena vuravura vou, kei na levu tale. (Mari. 10:29, 30; Joni 5:28, 29; Roma 8:38, 39; Vkta. 21:3, 4) O marautaka sara ga na ka dina qori. (Luke 24:32) Na nomu taleitaka na ka o vulica, o via wasea sara ga na ka dina mareqeti qori!—Vakatauvatana Jeremaia 20:9.

6. Na cava o vulica ena nodrau ivakaraitaki o Ernest kei Rose?

⁶ Dikeva mada e dua na kena ivakaraitaki. Ni se qai voleka ni yabaki tini o  Ernest b e mate o tamana. E kaya: “Au dau veinanuyaka: ‘Sa lako i lomalagi o Ta? Se sa mate vakadua?’ Au vuvutaki ira sara ga na vo ni gone e bula tiko na tamadra.” E lako wasoma o Ernest ena ibulubulu, e tekiduru ena yasa ni bulubulu qai masu: “Kemuni na Kalou, au via kila se tiko e vei o Ta.” Ni oti e 17 na yabaki na takali nei tamana, e sureti o Ernest me vuli iVolatabu, mani vakadonuya. E marautaka ni vulica nira sega ni vakilai ira tu na mate, era moce tu, e yalataka tale ga na iVolatabu nira na vakaturi. (Dauv. 9:5, 10; Caka. 24:15) Sa qai kunea o Ernest na isaunitaro a via kila tu! E marautaka na ka dina vakaivolatabu e vulica tiko. E tomani Ernest na watina o Rose ena vuli iVolatabu, e taleitaka tale ga na ka e vulica tiko. Rau papitaiso ena 1978. Rau gumatua ena nodrau wasea na ka dina qori vei ira na nodrau vuvale, itokani, kei ira kece era via vakarorogo. Toso na gauna erau vukea o Ernest kei Rose e sivia ni 70 mera toso, mera papitaiso.

7. Na cava ena yaco nida taleitaka vakalevu na ka dina vakaivolatabu? (Luke 6:45)

⁷ Nida taleitaka vakalevu na ka dina vakaivolatabu, e macala nida na via tukuna yani. (Wilika Luke 6:45.) Eda na vakataki rau na tisaipeli i Jisu ena imatai ni senitiuri erau kaya: “Keirau na sega ni galuvaka na ka keirau raica kei na ka keirau rogoca.” (Caka. 4:20) Na levu ni noda taleitaka na ka dina, eda na via wasea sara ga vei ira na tamata kece.

EDA VUNAU NIDA LOMANI IRA NA TAMATA

8. Na cava e uqeti keda meda tukuna yani na itukutuku vinaka? (Raica na kato “ Lomani Ira—Mera Tisaipeli.”) (Raica tale ga na iyaloyalo.)

⁸ Eda lomani ira na tamata me vakataki Jiova kei na Luvena. (Vkai. 8:31; Joni 3:16) Eda lomani ira vakalevu na ‘sega ni kila na Kalou’ kei ira na ‘sega tu na nodra inuinui.’ (Efeso 2:12) Era sa luvu tiko ena levu ni leqa, ia e tiko vei keda na iqaloqalo, ya na tukutuku vinaka ni Matanitu ni Kalou. Nida lomani ira vakalevu e uqeti keda meda sasaga sara ga meda tukuna yani vei ira na itukutuku vinaka. Na itukutuku mareqeti qori e solia vei ira na inuinui, e vukei ira mera qara na bula vinaka ena gauna qo, e solia tale ga vei ira na “bula dina,” ya na bula tawamudu ena vuravura vou.—1 Tim. 6:19.

9. Na ivakaro cava eda na tukuna me baleta na gauna se bera mai? Na vuna? (Isikeli 33:7, 8)

⁹ Nida lomani ira na lewenivanua eda  na vakaroti ira me baleta na kena vakarau vakarusai na vuravura ca qo. (Wilika Isikeli 33:7, 8.) Eda lomani ira kece, wili kina o ira na noda lewenivuvale era sega ni tiko ena dina. Levu era sa ogataka tu ga na nodra bula ni veisiga, ia era sega ni kila na ka sa vakarau yaco, ya “na veivakararawataki levu ena ivakatagedegede e sega ni bau vakilai vakadua mai na ivakatekivu kei vuravura me yacova mai qo, io, ena sega tale ni qai yaco e muri.” (Maciu 24:21) Eda vinakata mera kila na ka ena yaco ena gauna ni veilewai qori, ena vakarusai na lotu lasu, ena vakarusai tale ga na ituvaki ca ni vuravura qo qai tarava mai na Amaketoni. (Vkta. 16:14, 16; 17:16, 17; 19:​11, 19, 20) Eda masulaka me levu era rogoca na ivakaro mera mai tomani keda ena sokalou savasava ena gauna qo. Ia vakacava o ira na sega ni rogoca na ivakaro ena gauna qo, okati kina o ira na noda lewenivuvale?

10. Na cava e bibi kina meda tukuna yani na ivakaro?

¹⁰ Me vaka e vakamacalataki ena ulutaga sa oti, de dua e inaki i Jiova me na vakabulai ira e veisau na lomadra nira raica na kena vakarusai o Papiloni na Ka Levu. Ke vaka kina, sa qai bibi tiko ga na noda tukuna yani na ivakaro qori. Vakasamataka mada qo: Na ka eda tukuna vei ira ena gauna qo de dua era na vakasamataka ena gauna ya. (Vakatauvatana Isikeli 33:33.) Era na rairai vakasamataka lesu na ivakaro era rogoca vei keda qai uqeti ira mera tomani keda ena sokalou savasava ni se vo na gauna. Me vaka na ovisa ni valeniveivesu mai Filipai e veisau na lomana ni sa ‘yaco oti e dua na uneune levu,’ de dua ena veisau na lomadra o ira na sega ni vakarorogo ena gauna qo ni sa vakarusai o Papiloni na Ka Levu.—Caka. 16:25-34.

EDA VUNAU NIDA LOMANI JIOVA KEI NA YACANA

11. Na sala cava eda solia kina vei Jiova na lagilagi, vakarokoroko, kei na kaukaua? (Vakatakila 4:11) (Raica tale ga na iyaloyalo.)

¹¹ Na vuna bibi duadua eda vunautaka kina na itukutuku vinaka, ya nida lomana na Kalou o Jiova kei na yacana tabu. Eda raica noda cakacaka vakavunau me dua na sala eda vakacaucautaka kina na Kalou eda lomana. (Wilika Vakatakila 4:11.) Eda duavata ni ganiti Jiova ga na lagilagi, na vakarokoroko, kei na kaukaua era vakaraitaka na nona dauveiqaravi era yalodina vua. Eda vakalagilagi Jiova, eda vakarokorokotaki koya tale ga nida tukuna yani na ivakadinadina  matata ni “bulia na ka kece.” Kena ikuri, eda bula tiko ena vukuna. Eda solia vua na noda kaukaua nida vakayagataka na noda gauna, igu kei na iyau ena cakacaka vakaitalatala ena kena levu eda rawata. (Maciu 6:33; Luke 13:24; Kolo. 3:23) Kena itukutukuni rawarawa ga, eda taleitaka meda veivosakitaka na Kalou eda lomana. Eda vinakata tale ga meda tukuna vei ira eso tale na yacana kei na mataqali Kalou vakacava o koya. Na vuna?

12. Sala cava eda vakarokorokotaka kina na yaca i Jiova ena cakacaka vakaitalatala?

¹² Na noda lomani Jiova e uqeti keda meda vakarokorokotaka na yacana. (Maciu 6:9) Eda vinakata meda vakalasuya na lasu kece e tukuna o Setani me baleti Jiova. (Vkte. 3:1-5; Jope 2:4; Joni 8:44) Ena noda cakacaka vakavunau, eda gumatua meda tutaka na yaca ni Kalou, nida tukuna yani na ka dina me baleti koya vei ira kece na via rogoca. Eda vinakata mera kila kece ni nona itovo uasivi duadua na loloma, ni dodonu tu ga na ivakarau ni nona veiliutaki, ena vakarau vakaotia nona Matanitu na veika rarawa, ena kauta tale ga mai na vakacegu kei na marau vua na kawatamata. (Same 37:10, 11, 29; 1 Joni 4:8) Nida tukuna na veika me baleta na Kalou o Jiova ena cakacaka vakavunau, eda sa vakarokorokotaka tiko na yacana. Eda marau tale ga meda kila nida cakava tiko na ka ga e dodonu meda cakava, ya meda tukuni Jiova. Ena sala cava?

13. Na cava e ka dokai kina meda vakatokai meda iVakadinadina i Jiova? (Aisea 43:10-12)

¹³ E digitaki keda o Jiova meda nona “ivakadinadina.” (Wilika Aisea 43:10-12.) Vica na yabaki sa oti, e tukuni ena dua na ivola mai na iLawalawa Dauvakatulewa: “E ka dokai meda vakatokai meda  iVakadinadina i Jiova.” c Na vuna? Dikeva mada na ivakaraitaki qo. Ke o vinakata me dua nomu ivakadinadina ena mataveilewai, o na digia e dua o kila vinaka, o nuitaka, e vinaka na kena irogorogo, ena vakabauti tale ga na nona ivakamacala. Ni digitaki keda o Jiova meda nona iVakadinadina, e vakaraitaka ni kilai keda vinaka, e nuitaki keda tale ga meda tukuna yani ni o koya ga na Kalou dina. E ka dokai meda nona iVakadinadina nida vakayagataka na gauna veiganiti kece meda tukuna yani na yacana qai vakalasuya na ka ca kece e tukuni me baleti koya. Nida cakava qori, eda sa muria tiko na ibalebale ni yacada, eda iVakadinadina i Jiova!—Same 83:18; Roma 10:​13-15.

EDA NA VUNAU TIKO GA ME YACOVA NA ICAVACAVA

14. Na ka marautaki cava eda vakanamata kina?

¹⁴ Na ka marautaki cava eda vakanamata kina? Ena veivakalougatataki i Jiova, eda vakanuinui tu me levu era vakabauta na ka dina ni bera ni tekivu na veivakararawataki levu. Eda marau tale ga ni rawa ni levu tale era na biuta mai na vuravura i Setani donuya na gauna dredre duadua ni kawatamata, ya na veivakararawataki levu, mera mai tomani keda ena vakacaucautaki Jiova!—Caka. 13:48.

15-16. Na cava eda na cakava tiko ga, me yacova na gauna cava?

¹⁵ Ena gauna mada ga qo, e tu na cakacaka meda cakava. Qori na cakacaka ena sega ni tokaruataki tale. Eda marau meda vunautaka na itukutuku vinaka e veiyasa i vuravura. Ena gauna vata qori, eda vakaroti ira tiko na lewenivanua ena ka sa vakarau yaco. E vinakati mera kila ni sa voleka sara ni vakarusai na ituvaki ni vuravura ca qo. Ni yaco mai na gauna ni veilewai qori, era na kila kina ni vu mai vei Jiova na itukutuku eda kacivaka tiko.—Isik. 38:23.

¹⁶ Na cava gona meda vakadeitaka meda cakava? Ni uqeti keda na loloma, qori noda taleitaka na itukutuku vinaka, lomani ira na lewenivanua, koya e bibi duadua noda lomana na Kalou o Jiova kei na yacana, eda na gumatua tiko ga ena vunau, eda na sega tale ga ni lokuyara me yacova ni tukuna o Jiova, “Sa rauta!”