1. Na cava e tukuna o Jisu me baleta na iyau vakalomalagi?

ESO na iyau eda sega ni raica rawa. Na iyau mareqeti duadua mada ga e sega ni laurai. E cavuta o Jisu ena iVunau ena Ulunivanua, ni iyau vakalomalagi e uasivia na iyau vakayago. Oti, e tukuna tale ga na ka dina qo: “Na vanua e tiko kina na nomu iyau, ena tiko tale ga kina na yalomu.” (Maciu 6:19-21) Na lomada ena uqeti keda meda cakava na ka eda mareqeta se taleitaka vakalevu. Eda kumuna na “iyau mai lomalagi” ni rogo vinaka na yacada se vakadonui keda na Kalou. E vakamacalataka o Jisu ni sega ni rusa rawa se butakoci na iyau qori.

2. (a) Na cava e uqeti keda kina o Paula ena 2 Korinica 4:17, 18? (b) Cava eda na veivosakitaka ena ulutaga qo?

² E uqeti keda na yapositolo o Paula meda “raica tiko ga na ka . . . e sega ni rairai.” (Wilika 2 Korinica 4:17, 18.) Na ka e sega ni rairai, oya na ka vinaka kece e vakarautaka vei keda na Kalou ena vuravura vou. Eda na veivosakitaka ena ulutaga qo e va na ka e sega ni rairai e yaga vei keda ena gauna qo. Oya na noda veiwekani se veitokani kei na Kalou, na isolisoli ni masu, na veivuke ni yalo tabu, kei na nodra veitokoni mai lomalagi ena cakacaka vakaitalatala. Eda na veivosakitaka tale ga na ka meda cakava meda vakavinavinakataka kina na iyau qori.

3. Na cava na iyau mareqeti duadua e sega ni laurai? E rawati vakacava qori?

³ Na iyau mareqeti duadua e sega ni laurai, oya na noda veitokani kei na Kalou o Jiova. (Same 25:14) E rawa vakacava  nida veitokani kei na Kalou nida kawa ivalavala ca, ia me savasava tiko ga o koya? E rawa ga qori ena isoro i Jisu, ni “kauta tani na nodra ivalavala ca na kai vuravura.” (Joni 1:29) Ni bera mada ga ni mate o Jisu, e kila tu o Jiova ni na yalodina me yacova na mate me rawa nida vakabulai. Oya na vuna e rawa ni veitokani kina na Kalou kei ira na bula ni bera ni mate o Karisito.—Roma 3:25.

4. Tukuna eso na turaga era veitokani kei na Kalou ni bera na gauna vaKarisito.

⁴ Dikeva mada eso na turaga era veitokani kei na Kalou ni bera na gauna vaKarisito. Dua na ivakaraitaki o Eparama, e vakasakiti na nona vakabauta. Ni sivi e 1,000 vakacaca na yabaki nona mate o Eparama, e vakatokai koya o Jiova me “noqu itokani.” (Aisea 41:8) Kena ibalebale nida mate mada ga, se okati keda tiko ga o Jiova meda nona itokani voleka. O Jiova e nanumi Eparama vinaka tu. (Luke 20:37, 38) Dua tale na ivakaraitaki o Jope. Nira soqoni vata na agilosi mai lomalagi, e doudou o Jiova me tukuna na veika me baleti Jope. E vakatokai Jope o Jiova me “turaga yalododonu ni dau yalodina, e rerevaka tiko ga na Kalou qai sega ni dau goleva na ca.” (Jope 1:6-8) Dua tale na ivakaraitaki o Taniela. E yalodina me qaravi Jiova ena vanua lotu butobuto me rauta ni 80 na yabaki. Na cava na rai nei Jiova me baleti koya? E vakatolu nona vakadeitaka na agilosi vei Taniela ni “mareqeti vakalevu” ena mata ni Kalou. (Tani. 9:23; 10:11, 19) Eda nuidei gona ni rai vakanamata tu o Jiova ena siga ena vakaturi ira kina na nona itokani lomani era sa takali.—Jope 14:15.

5. Na cava e vinakati meda veitokani voleka kina kei Jiova?

⁵ Era le vica nikua era veitokani voleka kei Jiova? E vica vata na milioni. Eda kila qori ni levu sara na tagane, yalewa, kei na gone e veiyasa i vuravura era vakaraitaka ena nodra itovo nira via veitokani kei na Kalou. O Jiova e “veitokani voleka kei ira na yalododonu.” (Vkai. 3:32) E rawati vakacava na veitokani qori? Era vakaraitaka nira vakabauta na isoro ni veivoli i Jisu. Ena yavu qori, eda mai veitokani kina kei Jiova, eda yalataki keda vua, qai papitaiso. Nida vakayacora na ikalawa bibi qori, eda tomani ira kina e vica vata na milioni na lotu vaKarisito era sa papitaiso ra qai marautaka tiko na nodra “veitokani voleka” kei koya e cecere duadua ena lomalagi kei na vuravura!

6. Eda na mareqeta vakacava na noda veitokani kei na Kalou?

⁶ Eda na mareqeta vakacava na noda veitokani kei na Kalou? Erau yalodina tiko ga vua na Kalou o Eparama kei Jope, me duanadrau vakacaca na yabaki. Vakacava o keda? E vinakati meda yalodina tiko ga ke sa dede mada ga noda qaravi Jiova tiko ena vuravura qo. Me vakataki Taniela, meda mareqeta vakalevu na noda veitokani kei na Kalou, vakalailai na noda bula. (Tani. 6:7, 10, 16, 22) Ena veivuke i Jiova, eda na vosota kina na veika dredre meda veitokani voleka tiko ga kei koya.—Fpai. 4:13.

7. (a) Me vaka e tukuni ena Vosa Vakaibalebale 15:8, na cava na rai i Jiova me baleta noda masu? (b) E sauma vakacava o Jiova na noda masu?

⁷ E dua tale na iyau e sega ni rairai oya na masu. Era dau taleitaka na veitokani voleka mera veivosakitaka na nodra nanuma kei na ka era vinakata. Vakacava e va tale ga qori na noda veitokani kei Jiova? Io! E vosa vei keda o Jiova ena nona Vosa ni tu kina na nona rai kei na ka e vinakata. Eda vosa vakacava vei Jiova?  Oya ena masu, eda tukuna vua na veika bibi eda vakasamataka tu, eda talaucaka tale ga vua na lomada. E taleitaka o Jiova me rogoca na noda masu. (Wilika Vosa Vakaibalebale 15:8.) Ni noda iTokani dauloloma o Jiova, e sega ni rogoca ga na noda masu, e sauma tale ga. Eso na gauna e saumi totolo na noda masu. Eso tale na gauna ena rairai vinakati meda masulaka tiko ga e dua na ituvaki. Eda nuidei gona ni na saumi ena gauna donu kei na sala vinaka duadua. E macala ga ni rawa ni duatani na ka e vakarautaka na Kalou mai na ka eda namaka. Kena ivakaraitaki, ena sega ni vakaotia na veika dredre, ia ena rawa ni vakarautaka na vuku kei na kaukaua meda “vosota.”—1 Kor. 10:13.

8. Eda na mareqeta vakacava na isolisoli ni masu?

⁸ Eda na vakaraitaka vakacava nida mareqeta na isolisoli talei qo na masu? Dua, nida muria na ivakasala meda “kua ni cegu ena masu.” (1 Ces. 5:17) O Jiova e sega ni vakasaurarataki keda meda masu. Ia e doka na noda galala ni vakatulewa, e uqeti keda tale ga meda “gumatua ena masu.” (Roma 12:12) Eda na mareqeta gona na isolisoli qori nida masu wasoma e veisiga. E bibi meda okata ena noda masu na noda vakavinavinaka kei na vakacaucau vei Jiova.—Same 145:2, 3.

9. Na cava e tukuna e dua na tacida tagane me baleta na masu? Cava nomu rai me baleta na masu?

⁹ Na dede ga ni noda qaravi Jiova qai vakadinata ni dau rogoca na noda masu, eda na mareqeta kina vakalevu na isolisoli qori. Dua na kena ivakaraitaki o Chris, e dua na tacida tagane a veiqaravi tu vakatabakidua me 47 na yabaki. E kaya: “Au dau vakanamata ena veimataka niu yadra mai meu masu vei Jiova. E dau vakacegui au niu masu vei Jiova ni cadra na matanisiga qai totoka tu na veikabula! Qori e uqeti au meu vakavinavinakataka na nona isolisoli kece, okati kina na masu. Niu masu ni cava e dua na siga, au marautaka noqu moce ni vinaka na noqu lewaeloma.”

10. Na cava meda mareqeta kina na yalo tabu?

¹⁰ E dua tale na isolisoli ni Kalou meda mareqeta oya na yalo tabu. E uqeti keda o Jisu meda kerea tiko ga na yalo tabu. (Luke 11:9, 13) E vakayagataka o Jiova na nona yalo tabu me vakaukauataki keda, na “kaukaua e uasivia na kaukaua ni tamata.” (2 Kor. 4:7; Caka. 1:8) Ena veivuke i Jiova eda na vosota kina na veika dredre eda rairai sotava tiko.

11. Ena sala cava e dau vukei keda kina na yalo tabu?

¹¹ Ena sala cava e dau vukei keda kina na yalo tabu? Ena vukei keda na yalo tabu ena itavi eda lesi kina. Ena vakavinakataka na noda taledi kei na ka eda rawa ni cakava. E vukei keda meda qarava vinaka na noda itavi vakayalo. Na vuavuaivinaka ni noda itavi vua na Kalou e rawati ga ena veivuke ni yalona tabu.

12. Me vaka e cavuti ena Same 139:23, 24, na cava meda kerea kina na yalo tabu?

¹² Dua tale na sala eda mareqeta kina na isolisoli ni yalo tabu, oya nida masuti Jiova me vukei keda meda kila ke tiko e lomada na vakanananu kei na gagadre ca. (Wilika Same 139:23, 24.) Ke da masulaka qori vei Jiova, ena vakayagataka nona yalo tabu meda yadrava na vakanananu ca kei na kena gagadre. Ke da kila ni sa tiko vei keda na rai qori, e bibi meda kerea na yalo tabu me vakaukauataki keda meda vorata. E vakaraitaka qori nida cata na ka ena tarova nona vukei keda o Jiova ni vakayagataka nona yalo tabu.—Efeso 4:30.

13. Eda na vakaraitaka vakacava nida mareqeta vakalevu na yalo tabu?

¹³ Eda na vakaraitaka vakacava nida mareqeta vakalevu na yalo tabu? Oya nida vakasamataka na ka e cakava tiko ena noda gauna. Ni bera ni lako cake i lomalagi o Jisu, e tukuna vei ratou na nona tisaipeli: “Dou na rawata na kaukaua ni sobuti kemudou na yalo tabu, dou na qai tukuni au . . . [ena] veivanua yawa sara kei vuravura.” (Caka. 1:8) Qori sara ga na ka e yaco  tiko ena gauna qo. Ena veitokoni ni yalo tabu, era mai qaravi Jiova kina e rauta ni walu veimama na milioni mai na veiyasa i vuravura. Kena ikuri, eda duavata vakamataveitacini ni vukei keda na yalo tabu meda bucina na itovo vinaka me vaka na loloma, marau, vakacegu, vosovoso, yalololoma, yalovinaka, vakabauta, yalomalua, kei na lewai keda vinaka. Na itovo kece qori e okati ena “vua ni yalo tabu.” (Kala. 5:22, 23) Sa dua dina na isolisoli talei!

14. O cei e tokoni keda ena cakacaka vakaitalatala?

¹⁴ E dua na isolisoli talei oya meda “cakacaka vata” kei Jiova, Jisu, kei ira na agilosi. (2 Kor. 6:1) Eda cakacaka vata kei ira ena gauna kece eda vakaitavi kina ena veivakatisaipelitaki. Qori na ka e tukuna o Paula me baleti koya kei ira na vakaitavi ena cakacaka qo. E kaya: “[Eda] cakacaka vata kei na Kalou.” (1 Kor. 3:9) Nida vakaitavi ena cakacaka vakaitalatala, eda cakacaka vata tale ga kei Jisu. Nanuma ni a vakaroti ira nona imuri mera “vakavulici ira na lewe ni veivanua kece ga mera tisaipeli,” oti qai tukuna: “Au tiko vata kei kemuni.” (Maciu 28:19, 20) Vakacava o ira na agilosi? Eda marau nira dusimaki keda na agilosi meda tukuna na “itukutuku vinaka tawamudu vei ira na tiko e vuravura”!—Vkta. 14:6.

15. Tukuna e dua na ivakaraitaki ena bibi ni nona veitokoni o Jiova ena noda cakacaka vakaitalatala.

¹⁵ Na cava e rawati ena nodra veitokoni mai lomalagi? Nida kaburaka na itukutuku ni Matanitu ni Kalou, e lutu eso na itei e lomadra na yalomalumalumu mani tubu. (Maciu 13:18, 23) O cei e vakatubura na sore ni ka dina me vuavuaivinaka? E tukuna o Jisu ni na sega ni mai nona imuri e dua vakavo ke “vagolei koya mai” o Tamana. (Joni 6:44) E tiko ena iVolatabu e dua na kena ivakaraitaki. O nanuma nona vunau o Paula vei ira na yalewa ena taudaku ni koro o Filipai? Rogoca na ka e tukuna na iVolatabu me baleta e dua na marama na yacana o Litia: “E dolava na lomana o Jiova me rogoca na veika e tukuna tiko o Paula.” (Caka. 16:13-15) Me vakataki Litia, o Jiova e vagolei ira mai e milioni.

16. O cei me rokovi ena vuavuaivinaka ni noda cakacaka vakaitalatala?

¹⁶ O cei me rokovi ena vuavuaivinaka ni noda cakacaka? E sauma o Paula na taro qori ni vola ena ivavakoso e Korinica: “Au tea o yau, e vakasuasuataka o Apolosa, na Kalou ga e vakatubura, e sega kina ni dua na ka o koya e tea, se o koya e vakasuasuataka, na Kalou ga, ni o koya e vakatubura.” (1 Kor. 3:6, 7) Me vakataki Paula, e bibi meda vakavinavinakataki Jiova ena vuavuaivinaka ni noda cakacaka vakaitalatala.

17. Eda na vakaraitaka vakacava nida vakavinavinakataka noda “cakacaka vata” kei na Kalou, Karisito, kei ira na agilosi?

¹⁷ Eda na vakaraitaka vakacava nida vakavinavinakataka noda “cakacaka vata” kei na Kalou, Karisito, kei ira na agilosi? Oya nida qara na sala meda wasea kina na itukutuku vinaka. E levu na sala eda na cakava kina qori nida vunau e “matanalevu kei na cakacaka vakavunau e veivale.” (Caka. 20:20) Levu tale ga era vunau tawalokuci. Nira sotava e dua, era kidavaki koya, era saga tale ga mera tekivuna na veivosaki. Ke tataleitaki, era na maqosataka nodra vakamua na veivosaki ena itukutuku vinaka ni Matanitu ni Kalou.

18-19. (a) Eda na vakasuasuataka vakacava na sore ni ka dina? (b) Tukuna e dua na irogo e vakaraitaka ni vukei gonevuli o Jiova.

¹⁸ Nida “cakacaka vata kei na Kalou,” e sega ni vinakati ga meda tea na sore ni ka dina, e bibi tale ga me vakasuasuataki. Ni  tataleitaki e dua, eda vinakata meda lesuvi koya, se tuvanaka me lesuvi koya e dua tale me tekivu na vuli iVolatabu. Ni toso na vuli, eda marau ni uqeta o Jiova na lomana kei na nona vakasama me veisau me rawa ni tisaipeli.

¹⁹ Dikeva mada na ivakaraitaki nei Raphalalani, e dua na daucakaisausau mai Sauca Aferika. Dua na ka nona taleitaka na ka e vulica ena iVolatabu. Ia e dredre me vakabauta na ka e tukuna na Vosa ni Kalou me baleta na nona veivosaki kei ira na tukana era sa mate. (Vkru. 18:10-12) Toso na gauna, e yalorawarawa me moica vakamalua na Kalou na nona rai. Na cava e yaco? Sa biuta vakadua na nona cakaisausau, na ivurevure sara ga ni nona bula. Sa yabaki 60 tiko o Raphalalani, e kaya: “Au marau nira vukei au vakalevu na iVakadinadina i Jiova, era vukei au mada ga me dua na noqu cakacaka saumi. Koya e bibi duadua, au vakavinavinakataki Jiova ni vukei au meu veisautaka na noqu bula, meu rawa ni vakaitavi ena gauna qo ena cakacaka vakaitalatala niu nona iVakadinadina.”

20. Na cava o vakadeitaka mo cakava?

²⁰ Eda veivosakitaka ena ulutaga qo e va na iyau eda sega ni raica rawa. Na kena eda mareqeta vakalevu duadua oya na noda veitokani voleka kei Jiova. Nida veitokani voleka kei Jiova, ena yaga vei keda na vo ni tolu na iyau. Oya noda toro volekati Jiova ena masu, eda vakila na veivuke ni nona yalo tabu kei na nodra veitokoni mai lomalagi ena noda cakacaka vakaitalatala. Eda vinakata meda mareqeta vakalevu na iyau qori. Me kua tale ga ni cegu na noda vakavinavinakataki Jiova ni noda iTokani vinaka duadua.