1. Me vaka e tukuni ena Maciu 24:9, na cava meda kua ni kurabui kina ni cati keda o vuravura?

E BULI keda o Jiova meda dauloloma, meda veilomani tale ga. Ni dua gona e cati keda, eda na rarawa, de dua eda na rere. Kena ivakaraitaki, e kaya na tacida o Georgina e tiko mai Urope: “Niu yabaki 14, e cati au o tinaqu niu mai qaravi Jiova. Au vakila niu sega ni lomani, au nanuma tale ga niu gone ca.” * E vola e dua na tacida tagane o Danylo: “Nira mokuti au na sotia, vosataki au, ra qai vakarerei au niu iVakadinadina i Jiova, dua na ka noqu rere, au madua sara ga.” E mosimosi dina noda cati va qori, ia meda kua ni kurabui. Sa tukuna oti tu o Jisu nida na cati.—Wilika Maciu 24:9.

2-3. Na cava era cati kina na imuri i Jisu?

² Na cava eda cati kina na imuri i Jisu? Nida “sega ni vakavuravura” me vakataki koya ga. (Joni 15:17-19) Eda dokai ira na matanitu vakatamata, ia eda sega ni sokalou vei ira se sokaloutaka na kedra ivakatakarakara. Eda qaravi Jiova duadua ga. Eda tokoni koya ni dodonu me liutaka na kawatamata, qori na dodonu e saqata tiko o Setani kei ira na nona “kawa.” (Vkte. 3:1-5, 15) Eda vunautaka na Matanitu ni Kalou na inuinui duadua ga ni kawatamata, sa voleka tale ga qo ni vakarusai ira vakadua na saqata tiko na kena veiliutaki. (Tani. 2:44; Vkta. 19:19-21) Na itukutuku qori era taleitaka na yalomalumalumu, ia era cata na daucaka ca.—Same 37:10, 11.

 ³ Eda cati tale ga nida saga meda muria na ivakatagedegede dodonu ni Kalou. E veibasai sara kei na itovo dukadukali sa takalevu tu e vuravura nikua. Kena ivakaraitaki, levu era vakadonuya na ivakarau ni bula vakasisila e tautauvata kei na kena e vakarusa na Kalou e Sotoma kei Komora! (Juta 7) Nida saga gona meda muria na ivakatagedegede ni Kalou e vauca na bula va qori, era na cati keda e levu ra qai tukuna nida sega ni taleitaki ira.—1 Pita 4:3, 4.

4. Na itovo cava e vakayaloqaqataki keda nida cati?

⁴ Eda na vosota vakacava nida cati se vosataki? Meda nuidei ni na vukei keda o Jiova. Na noda vakabauta e vaka na isasabai e ‘bokoci kina na gasau waqa kece ni vunica.’ (Efeso 6:16) Ia e sega ni vinakati wale ga na vakabauta. Meda dauloloma tale ga. Na vuna? Ni loloma e “sega ni cudrucudru.” E nuitaka na ka kece, e vosota na ka kece. (1 Kor. 13:4-7, 13) Meda raica mada qo na sala e uqeti keda kina noda lomani Jiova, noda lomani ira na tacida kei ira mada ga na keda meca, meda vosota nida cati.

5. E vakayaloqaqataki Jisu vakacava na nona lomani Tamana?

⁵ Ena bogi ni bera nodra vakamatei Jisu na kena meca, e kaya vei ira na nona imuri yalodina: “Au na vakayacora na ka e vakarota vei au o Tamaqu meu cakava, me kila kina o vuravura niu lomani Tamaqu.” (Joni 14:31) Nona lomani Jiova o Jisu e vakayaloqaqataki koya me vosota na veika mosimosi e vakarau sotava. Eda rawa tale ga ni vosota va qori nida lomani Jiova.

6. Me vaka e tukuni ena Roma 5:3-5, cava nodra rai na dauveiqaravi i Jiova ni cati ira o vuravura?

⁶ Nira lomani Jiova na nona dauveiqaravi era vosota kina na veivakacacani. Kena ivakaraitaki, ni ratou vakaroti na yapositolo ena nodra mataveilewai levu na Jiu me ratou kua ni vunau, nodratou lomani Jiova e uqeti ratou me ratou “talairawarawa ga vua na Kalou ni iliuliu, sega vua na tamata.” (Caka. 5:29; 1 Joni 5:3) Era lomani Jiova tale ga va qori e levu na tacida nikua qai vakayaloqaqataki ira mera tudei nira veivakacacani na iliuliu ni matanitu voravora. Era sega ni yalolailai, era marau ga ni cati ira o vuravura.—Caka. 5:41; wilika Roma 5:3-5.

7. Na cava meda cakava nira cati keda na lewe ni noda vuvale?

⁷ E dredre sara meda vosota nira cati keda tale na lewe ni noda vuvale. Nida se qai vulica na ka dina, de ra nanuma nida sa vakacalai tiko. Eso tale era rawa ni kaya ni sa leqa na noda vakasama. (Vakatauvatana Marika 3:21.) De voravora sara nodra veivakacacani, ia meda kua ni kidroa. E kaya o Jisu: “Era na meca ni tamata yadua na lewe sara ga ni nona vuvale.” (Maciu 10:36) Se mani vakacava na nodra ivakarau vei keda na lewe ni noda vuvale, eda na sega ni cati ira. Na levu ga ni noda lomani Jiova, na levu tale ga ni noda lomani ira. (Maciu 22:37-39) Ia meda kua ni vakalecalecava na lawa kei na ivakavuvuli vakaivolatabu nida vinakata meda vakamarautaka e dua.

8-9. E vosota vakacava e dua na tacida yalewa ni tusaqati?

⁸ E dei o Georgina, sa tukuni oti mai, ni tusaqati koya vakaukaua o tinana. E kaya: “Keirau a vuli iVolatabu vakaveitinani kei ira na iVakadinadina i Jiova. Ni oti e ono na vula au sa via lako ina soqoni, ia sa  veisau na ivakarau nei Na. Au qai kila ni dau veivosaki tiko kei ira na vukitani, e tokona vakalevu nodra ile ni keirau veivosaki. E vosataki au, dreta na uluqu, kidomoki au, qai kauta laivi na noqu ivola. Au papitaiso niu sa yabaki 15. Ni saga o tinaqu meu kua ni qaravi Jiova, e lai biuti au ena dua na vale era tiko kina na itabagone, eso era dau vakayagataka na waigaga ni veivakamatenitaki, era basulawa tale ga. E sega sara ga ni rawarawa nira saqati keda o ira sara ga e dodonu mera lomani keda, mera kauaitaki keda.”

⁹ E vosota vakacava o Georgina? E kaya: “Na siga e saqati au kina o tinaqu, au se qai wilika taucoko sara ga na iVolatabu. Au vakadeitaka niu sa kunea na ka dina, au volekati Jiova tale ga. Au masuti koya wasoma, e dau rogoca noqu masu. Niu se tiko ena vale qori, e sureti au e dua na tacida yalewa ina nona vale, keirau lai veitalanoa, vakekeli tale ga ena iVolatabu. Era dau vakayaloqaqataki au ena gauna qori na mataveitacini ena Vale ni Soqoni. Era raici au me vaka ga na lewe ni nodra vuvale. Au vakadinadinataka sara ga ni kaukaua o Jiova vei ira kece na dau veitusaqati.”

10. Na cava meda nuitaka kina na noda Kalou o Jiova?

¹⁰ E vola na yapositolo o Paula, ni sega ni dua na ka me “tawasei keda mai na loloma ni Kalou e mai vakaraitaka o Karisito Jisu na noda Turaga.” (Roma 8:38, 39) De dua eda na rarawa vakalailai ga, ia ena tiko ga e yasada o Jiova me vakacegui keda, me vakayaloqaqataki keda tale ga. Me vaka eda raica ena ivakaraitaki nei Georgina, o Jiova e dau vakayagataki ira sara ga na lewe ni noda vuvale vakayalo mera vukei keda.

11. E vukei ratou vakacava na nona tisaipeli o Jisu ena ka e vakamacalataka ena Joni 15:12, 13? Tukuna e dua na kena ivakaraitaki.

¹¹ Ena bogi ni bera ni mate o Jisu, e vakasalataki ratou tale nona tisaipeli me ratou dau veilomani. (Wilika Joni 15:12, 13.) E kila ni nodratou dau vakuai ratou me ratou veilomani tiko ga, eratou na vosota kina ena duavata ni cati ratou o vuravura. Vakasamataka mada na ivakaraitaki ni ivavakoso e Cesalonaika. Gauna e tauyavu kina era vakacacani tiko ga na lewena. Ia era ivakaraitaki vinaka ni yalodina  kei na loloma na tacida qori. (1 Ces. 1:3, 6, 7) E uqeti ira o Paula mera veilomani tiko ga ena ‘nodra vinaka kece.’ (1 Ces. 4:9, 10) Ena uqeti ira na nodra loloma mera vosa vakayalovinaka vei ira na yalolailai, mera vukei ira tale ga na malumalumu. (1 Ces. 5:14) Era muria na veidusimaki i Paula. Ni oti gona e dua na yabaki, e rawa ni vola qo ena ikarua ni nona ivola vei ira: “E laurai vakalevu . . . na nomuni veilomani.” (2 Ces. 1:3-5) E uqeti ira na nodra loloma mera vosota kina na veika dredre kei na nodra vakacacani.

12. Era vakaraitaka vakacava na loloma na tacida ena dua na vanua ni yaco na ivalu?

¹² Vakasamataki Danylo tale mada sa tukuni oti mai, kei watina. Ni yaco na ivalu ena nodrau tauni, e sega ni cegu nodrau tiko ena soqoni, rau vunau vakalevu, rau wasea tale ga na kakana vei ira na tacidrau vakayalo. Dua na siga era lako yani na sotia ena vale nei Danylo. E kaya: “Era vinakata meu cakitaka na noqu vakabauta. Niu bese, era mokulaki au, era via vanai au vakalasulasu nira vana cake i macawa. Ni bera nira biubiu, era veivakarerei nira na lesu mai mera mai kucuvi watiqu. Sega ni bera nira vakavodoki keirau ena sitima na tacida me keirau gole ina dua tale na tauni. Au na sega vakadua ni guilecava na nodra ivakaraitaki ni loloma. Ni keirau yaco ena tauni vou qori, era solia vei keirau na tacida e kea na kakana, era vukei au me dua noqu cakacaka, me dua tale ga na neirau vale! E rawa gona ni keirau vakaicilitaka eso tale na tacida era isenivalu.” E laurai ena ivakaraitaki qo ni uqeti keda na loloma vaKarisito meda vosota nida cati.

13. E vukei keda vakacava na yalo tabu meda qaravi Jiova ena vosota nida cati?

¹³ E kaya o Jisu vei ira nona imuri mera lomani ira na kedra meca. (Maciu 5:44, 45) Vakacava e rawarawa qori? Sega! Ia ena rawati ga ena veivuke ni yalo tabu ni Kalou. Na vua ni yalo tabu e okati kina na itovo me vaka na loloma, vosovoso, yalovinaka, yalomalua, kei na lewai keda vinaka. (Kala. 5:22, 23) E uqeti keda na itovo qori meda vosota tiko ga nida cati. Era sa veisau kina e levu na dau veitusaqati ena nodra vakabauta na watidra,  luvedra, se o ira na tiko veitikivi, nira vakaraitaka na itovo vakalou qori. Eso mada ga na dau veitusaqati era sa tacida vakayalo. Ke dredre gona mo lomani ira na cati iko ni o qaravi Jiova tiko, kerea na yalo tabu. (Luke 11:13) Mo vakadeitaka tale ga ni vinaka duadua na sala i Jiova.—Vkai. 3:5-7.

14-15. E uqeti Yasmeen vakacava na Roma 12:17-21 me lomani watina tiko ga ni tusaqati koya?

¹⁴ Vakasamataka mada na ivakaraitaki nei Yasmeen, e tiko ena Tokalau e Loma. Ni sa iVakadinadina i Jiova, e nanuma o watina ni vakacalai, e saga gona me tarova nona qaravi Jiova. E vosataki koya, e uqeti ira na wekadrau, vaka kina na italatala kei na dua na daurairai mera vakarerei koya, mera beitaki koya tale ga ni tawasea nona vuvale. E bau rulaki ira sara mada ga na tacida o watina ena dua na gauna ni soqoni! Dau tagi ga o Yasmeen ni vakalolomataki tiko va qori.

¹⁵ Era dau vakacegui Yasmeen na tacina vakayalo, era vakayaloqaqataki koya tale ga ena Vale ni Soqoni. Era uqeti koya na qase me muria na veiuqeti ena Roma 12:17-21. (Wilika.) E kaya o Yasmeen, “Sega dina ni rawarawa, au dau kerei Jiova me vukei au, au saga tale ga meu muria na ka e kaya na iVolatabu. Ni nakita o watiqu me vakadukara na valenikuro, au na samaka ga. Ni vosataki au, au dau sauma ga vakayalovinaka. Ni tauvimate, au na qaravi koya.”

16-17. Na cava eda vulica vei Yasmeen?

¹⁶ E vakalougatataki o Yasmeen ni lomani watina tiko ga. E kaya: “Sa qai nuitaki au vakalevu o watiqu ni kila niu dau dina. Sa tekivu rogoci au ni keirau veivosakitaka na ka e vauca na lotu, e veidokai, e kaya tale ga me keirau veiyaloni. Ena gauna qo e dau uqeti au meu lako ina soqoni. Sa vinaka sara neirau bula vakavuvale, keirau sa veiyaloni tale ga. Au nuitaka tiko ni na ciqoma o watiqu na ka dina me keirau mai qaravi Jiova vata.”

¹⁷ Na cava eda vulica vei Yasmeen? Na loloma e “ubia na ka kece, . . . e nuitaka na ka kece, e vosota na ka kece.” (1 Kor. 13:4, 7) E mosimosi dina nida cati, e vakararawataki keda tale ga, ia e sega ni guce na loloma. E veiuqeti, e vakamarautaki Jiova tale ga. Ke ra cati keda na dau veitusaqati, eda se rawa tiko ga ni marau. E rawati vakacava?

18. Eda na marau tiko ga vakacava nida cati?

¹⁸ E kaya o Jisu: “Moni marau ni oni cati.” (Luke 6:22) Eda sega ni vinakata meda cati. Eda sega tale ga ni marautaka meda vakacacani tiko ena vuku ni noda vakabauta. Ia eda na marau tiko ga vakacava nida cati? Vakasamataka e tolu na vuna qo. Kena imatai, e vakadonui keda na Kalou nida vosota tiko. (1 Pita 4:13, 14) Kena ikarua, e vakatovolei na noda vakabauta me dei kina. (1 Pita 1:7) Kena ikatolu, eda na rawata kina na icovi talei ni bula tawamudu.—Roma 2:6, 7.

19. Na cava eratou marau kina na yapositolo ni ratou mokulaki?

¹⁹ Ni vakaturi o Jisu, ratou vakila na yapositolo na marau a tukuna tiko. Ratou marau ni ratou mokulaki ra qai vakaroti ratou me ratou kua ni vunau. Na vuna? “Ni vakadonuya na Kalou me ratou vakacacani ena vuku ni yaca i Jisu.” (Caka. 5:40-42) Eratou lomana vakalevu na nodratou Turaga mai na nodratou rere nira cati ratou na meca. Eratou vakaraitaka na nodratou loloma qori ni “sega ni cegu” nodratou vunautaka na itukutuku vinaka. Vakacava nikua? Levu na tacida era yalodina tiko ena veiqaravi ni dredre mada ga na ituvaki. Era kila ni na sega ni guilecava o Jiova na nodra cakacaka kei na nodra lomana na yacana.—Iper. 6:10.

20. Na cava eda na veivosakitaka ena ulutaga e tarava?

²⁰ Ena cati keda tiko ga o vuravura ni se bera ni vakarusai na ituvaki ca qo. (Joni 15:19) Ia meda kua ni rere. Me vaka eda na vulica ena ulutaga tarava, o Jiova ena “vakadeitaki” ira na nona dausokalou yalodina, ena “taqomaki” ira tale ga. (2 Ces. 3:3) Koya gona, meda lomani Jiova tiko ga, ira na tacida, kei ira mada ga na keda meca. Nida muria na ivakasala qori, eda na duavata, eda na kaukaua tiko vakayalo, eda na rokovi Jiova, eda na vakadinadinataka tale ga ni sega ni guce na loloma nida cati.