1, 2. E vakacegui keda vakacava o Jiova nida sotava na ituvaki dredre, e vakadeitaki keda vakacava nona Vosa?

ERAU veitalanoa tiko e dua na cauravou o Etuate kei Sitiveni e dua na qase ni ivavakoso e vakawati. Sa dau vakasamataka voli o Etuate na ka e tukuni ena 1 Korinica 7:28: “O ira na vakawati ena vakararawataki na yagodra.” E veinanuyaka sara: “Cava e kena ibalebale qori, cava au na cakava keu sa vakawati?” Ni bera ni taroga qori, e kerei koya sara o Sitiveni me vakasamataka e dua tale na ka e cavuta na yapositolo o Paula, oya ni o Jiova “na Kalou e dau vakacegui keda ena ka kece, e vakacegui keda ena veika dredre kece eda sotava [se ni vakararawataki na yagoda].”—2 Kor. 1:3, 4.

² E Tama yalololoma o Jiova, e vakacegui keda tale ga nida sotava na ituvaki dredre. De dua eda sa vakadinadinataka nona veitokoni kei na nona veidusimaki, vakabibi ena nona Vosa. Io, eda vakadeitaka ni o Jiova e kila na ka eda na vinaka kina, me vaka ga e cakava vei ira na nona dauveiqaravi ena gauna makawa.—Wilika Jeremaia 29:11, 12.

3. Na taro cava eda na veivosakitaka?

 ³ Macala ga ni rawa nida vosota ke da kila taumada na veika e dau vakavu leqa se kena e dau vakararawataka na yagoda. Qori sara ga na ka eda na cakava ena bula vakawati se bula vakavuvale. Na cava eso na ka ena rawa ni ‘vakararawataka na yagoda’ me vaka e cavuta o Paula? Na ivakaraitaki cava ena gauna vakaivolatabu kei na noda gauna qo ena vukei keda meda kunea na vakacegu? Noda kila qori ena vukei keda meda vosota.

4, 5. Na cava eso na ka e vakavuna na ‘vakararawataki ni yagoda’?

⁴ Eda kila na ka e tukuna na Kalou ena itekitekivu ni bula ni kawatamata: “Ena biuti tamana kina kei tinana o tagane, ena kabiti watina, erau na lewe dua ga.” (Vkte. 2:24) Qori na ka e cavuta o Jiova ena gauna a tauyavutaka kina na imatai ni vakawati. Ia nida sega ni uasivi, ena rawa ni vakaleqa na veimaliwai vakavuvale na nona sa vakawati e dua, kei na tauyavu ni vuvale vou. (Roma 3:23) Sa na liu nona talairawarawa o yalewa vei tagane, sega vei rau nona itubutubu. Ni lesi koya sara ga na Kalou me ulu i yalewa. (1 Kor. 11:3) E dau dredre dina vei ira na vakawati vou mera muria qori. Ia me salavata kei na Vosa ni Kalou, me ciqoma o yalewa ni sa na liutaki koya o watina, sega ni nona itubutubu. Na veimaliwai vakaveivugoni ena rawa ni basika kina na duidui, rawa ni vakararawataki rau na veiwatini vou.

⁵ Eso na gauna e rawa ni okati tale ga me ituvaki rarawataki vei rau na veiwatini na nona vakasavuya o yalewa ni sa bukete. De dua rau na marautaka ni sa na dua na luvedrau, ia rau na lomaleqataka na veiqaravi vakavuniwai ena rairai vinakati ena loma ni gauna qori se ni oti na vakasucu. Ena leqataki tale ga na levu ni ilavo ena vinakati ena gauna qori kei na veigauna se bera mai. Levu tale na veiveisau ena vinakati ni sucu na gone. De dua sa na levu na gauna e vakayagataka o tina vei luvena, ena rawa ni nanuma o tagane ni sa sega ni kauaitaki. Ena yasana adua, sa na veisau tale ga na itavi i tama. Sa na levu nona icolacola ni sa tiko e dua tale na lewenivuvale me qarava.

6-8. Na cava era rarawataka kina eso nira sega ni vakaluveni?

⁶ Eso na veiwatini e duidui na ituvaki rarawataki era sotava. Kena ivakaraitaki, era na rairai vinakata mera vakaluveni. Dua na ka na rarawa i yalewa ke sega ni bukete. Eda kila ke da mani vakawati se vakaluveni, eda na sega ni galala mai na icolacola. Ia e okati tale ga me ‘vakararawataki na yagodra’ na veiwatini, nodra sega ni rawa ni vakaluveni. (Vkai. 13:12) Ena gauna vakaivolatabu, e ka vakamadua nona sega ni vakaluveni e dua. Kena ivakaraitaki o Raijeli na wati Jekope, e rarawataki tuakana ni vakaluveni. (Vkte. 30:1, 2) O ira na daukaulotu era veiqaravi ena vanua e dau raici kina vakabibi na vakaluveni, era dau tarogi se cava era sega kina ni vakaluveni. Ke ra maqosa mada ga ni vakamacala vakadodonu na daukaulotu, levu era dau kaya ga vei ira, “Keimami na qai masulaki kemuni!”

⁷ Dua tale na ivakaraitaki qo mai Igiladi. E vinakata me vakaluveni e dua na tacida yalewa, ia e qai sega ni rawa. Ni oti qori e yaco eso na veiveisau. E tukuna ni rarawataka vakalevu nona  sega ni rawa ni vakaluveni ena iotioti ni veisiga qo, rau mani nanuma vakaveiwatini me rau susuga e dua na gone. E kaya: “Eso na gauna au dau rarawataka noqu sega ni vakaluveni. Dina niu sa na susu gone, ia e sega ni vaka ga meda susuga na luveda dina.”

⁸ E tukuna na iVolatabu ni na “maroroi” na yalewa lotu vaKarisito “ni vakasucu gone” tiko. (1 Tim. 2:15) Ia e sega ni kena ibalebale qo nida na rawata na bula tawamudu ke da vakasucu se vakaluveni. E tukuna tiko ga ni yalewa e qaravi luvena, e qarava tale ga na cakacaka ni vale, ena sega ni rawai ena kakase se me siova na veika me baleti ira eso tale. (1 Tim. 5:13) Ia ena sega ni galala mai na ituvaki rarawataki e dau yaco ena vakawati kei na bula vakavuvale.

9. Na cava e duatani kina nona takali e dua na isa ni vakawati?

⁹ Nida veivosakitaka tiko na veika rarawa e dau yaco ena bula vakawati, eda na rairai sega sara ni vakasamataka na kena qo: Nona takali e dua na isa ni vakawati lomani. Io, qori e dua dina na ituvaki mosimosi vei ira e levu. Ena rairai sega tale ga ni namaka na isa ni vakawati me yaco qori ena iotioti ni veisiga qo. Ia eda vakabauta dei na yalayala i Jisu me baleta na veivakaturi sa voleka. (Joni 5:28, 29) E yaga vakacava na yalayala qori vua na isa ni vakawati se bula tiko? Ena vakacegui koya vakalevu. Qori e dua tale na sala e vakayagataka kina na nona Vosa na Tamada dauloloma me tokoni keda, me vakacegui keda nida rarawa. Meda veivosakitaka mada eso na dauveiqaravi ni Kalou era vakadinata na nona dauveivakacegui o Jiova.

10. Na cava e cakava o Ana me vakacegui kina? (Raica na imatai ni iyaloyalo.)

¹⁰ E sotava tale ga o Ana na wati Elikana e dua na ituvaki rarawataki. E yava o Ana, ia e vakaluveni o Penina na ikarua ni wati i Elikana. (Wilika 1 Samuela 1:4-7.) E vakalialiai Ana o Penina “e veiyabaki.” Dua na ka na rarawa kei na lomabibi nei Ana. E masulaka vei Jiova me rawa ni vakacegui. Io, e “masu tiko . . . vakabalavu vei Jiova.” Vakacava a namaka o Ana me rogoca o Jiova na nona kerekere? De dua. Eda kila ga ni sa “sega tale ni laurai e matana na lomaleqa.” (1 Sam. 1:12, 17, 18) E nuitaka ni na raica o Jiova me vakaluveni se vakacegui koya ena dua tale na sala.

11. Ena vakacegui keda vakacava na masu?

¹¹ Ena sega ni oti rawa na ituvaki rarawataki nida se sega ni uasivi, eda bula tale tu ga ena vuravura e lewa o Setani. (1 Joni 5:19) Ia eda kalougata nida kila ni o Jiova “na Kalou ena dau vakacegui keda ena ka kece”! Dua na sala eda vukei kina meda vosota na ituvaki dredre oya na noda masu. E talaucaka na lomana vei Jiova o Ana. Nida sotava tale ga na veika dredre, meda kua wale ga ni tukuna vei Jiova na ka eda nanuma, meda kerekere sara ga vua. Io, meda talaucaka na ka kece nida masu vagumatua mai vu ni lomada.—Fpai. 4:6, 7.

12. Na cava e vakamarautaki Ana?

¹² Ke o yalolailai ni o sega ni rawa ni vakaluveni se takali e dua o lomana, o rawa ni vakacegui ena ituvaki rarawataki qori. Ena gauna i Jisu, e takali na wati Ana na parofita yalewa ni se qai yabaki vitu ga nodrau vakawati. E sega ni cavuta  na iVolatabu ni vakaluveni o Ana. Ia na cava e cakava tiko o Ana ni sa yabaki 84? E kaya na Luke 2:37: “E sega vakadua ni yali mai na valenisoro, e tomana tiko ga nona veiqaravi tabu ena bogi kei na siga, ena nona lolo kei na nona dau masu.” Io e vakacegui ni qaravi Jiova, e marautaka tale ga.

13. Tukuna e dua na ivakaraitaki ni nodra dau veivakacegui na itokani dina nira sega ni cakava qori na wekada.

¹³ Nida veimaliwai kei ira na tacida, sa na yaco mera noda itokani dina, meda veivolekati tale ga. (Vkai. 18:24) E vakasamataka lesu e dua na tacida yalewa o Paula nona rarawataka na nona malumalumu vakayalo o tinana. A yaco qori ni se qai yabaki lima. E sega ni rawarawa me vosota na ituvaki qori. E dau uqeti koya vakalevu e dua na painia o Ann, ni kauaitaka nona bula vakayalo. E kaya o Paula: “E sega ni wekaqu o Ann, ia e yaga vakalevu nona dau yalololoma. E uqeti au meu qaravi Jiova tiko ga.” Io, e yalodina tiko ga o Paula. E marautaka nona sa rawa ni qaravi Jiova tale kei tinana. E marau tale ga o Ann, ni vaka e dua na tina vakayalo vei Paula.

14. Era na vakalougatataki vakacava o ira na dauveivakacegui?

¹⁴ Nida kauaitaki ira eso tale ena veisau noda rai me baleti ira. Era kila na tacida yalewa era vakawati se dawai ni vakavu marau vakalevu na nodra  kacivaka na itukutuku vinaka nira cakacaka vata kei na Kalou. Era na saga mera vakarokorokotaka na Kalou nira cakava na lomana. Eso mada ga era raica na nodra vakaitavi ena cakacaka vakaitalatala me iwali ni nodra leqa. Io, eda na tokona noda duavata vakamataveitacini nida kauaitaki ira na tiko ena yalava, vaka kina ena ivavakoso. (Fpai. 2:4) E ivakaraitaki vinaka kina na yapositolo o Paula. O ira na tacida mai Cesalonaika era raici koya me vaka e dua na “tina” e vaka tale ga na tamadra vakayalo.—Wilika 1 Cesalonaika 2:7, 11, 12.

15. O cei e nona itavi me vakavulici ira na gone ena ka dina?

¹⁵ E bibi tale ga na noda veivuke kei na noda veivakacegui ena vuvale. Ena so na ituvaki, eso na ka vou era kerei ira na dautukutuku matua mera vukei ira ena nodra vakavulici ena ka dina na luvedra, se mera vakavulici luvedra ena iVolatabu. Na iVolatabu e vakarota ni qori e nodra itavi sara ga na itubutubu. (Vkai. 23:22; Efeso 6:1-4) Ena so na gauna, ena vinakati nodra veivuke eso tale, ena yaga tale ga vakalevu. Ia me kua ni vakawaleni nodra itavi na itubutubu. Bibi kina mera dau veivosaki wasoma kei ira na lewenivuvale.

16. Na cava meda nanuma tiko nida vukei ira na gone?

¹⁶ Ke ra vinakata na itubutubu meda vakavulici luvedra, meda qarauna me kua ni ulabaleti na nodra itavi. Eso na gauna eda na kerei meda vakavulici ira na gone era sega ni taleitaka na ka dina na nodra itubutubu. Ni yaco qori, meda nanuma tiko ni noda itavi ga meda veivuke vakayalo, eda na sega ni via suguta na itavi vakaitubutubu. Ena vinaka tale ga me caka na vuli ena nodra vale ni rau tiko na itubutubu se ni tiko e dua tale na tacida matua se dua na vanua veiganiti e laurai levu. Ena sega kina na rai cala. Ni toso na gauna, eda vakanuinui nira na qarava ga na itubutubu na nodra itavi lesi vakalou mera vukei ira vakayalo na luvedra.

17. Era na vu ni veivakacegui vakacava na gone?

¹⁷ Nira vulica na gone mera lomana na Kalou dina ra qai muria nona ivakasala, era na vu ni vakacegu ena vuvale. Rawa nira cakava qori nira doka nodra itubutubu, ra veivuke tale ga ena so na sala. E rawa sara ga nira veivuke vakayalo. Ni bera na Waluvu, a qaravi Jiova na kawa i Seci o Lemeki. E tukuna me baleti luvena o Noa: “Ena vakacegui keda mai na noda cakacaka kei na oca ni ligada ena vuku ni qele e cudruva o Jiova.” A yaco dina na parofisai qori ni sa sega ni cudruvi tale na qele. (Vkte. 5:29; 8:21) O ira na gone era tutaka na sokalou dina, era na vu ni vakacegu vei ira e vale, ena vukei ira kece mera vosota na ituvaki rarawataki, era na bula sivia na ituvaki ena dredre sara mai na Waluvu.

18. Na cava ena vakayaloqaqataki keda meda vosota na ituvaki dredre?

¹⁸ Na masu, na vakasamataki vakatitobu ni ivakaraitaki vakaivolatabu, kei na nodra veivolekati na tamata i Jiova, sa vukei ira na vica vata na milioni nikua mera vakacegui mai na ituvaki dredre. (Wilika Same 145:18, 19.) Noda kila ni o Jiova e vu ni vakacegu tawamudu, ena vakayaloqaqataki keda meda vosota na ituvaki rarawataki nikua kei na veigauna se bera mai.