E italatala qase o Ta ena lotu na United Church ena vanua keitou tiko kina e Kenada. E veimacawa e dau tukuna vei au kei ganequ me keirau lai wilivola ni Sigatabu, oti keirau na tomani koya i lotu ena 11 na kaloko ena mataka. Ena yakavi, keirau na tomani Na ena Vale ni Soqoni. Keirau raica ni duidui vakalevu na rua na lotu qori.

E tukuna sara o Na nona vakabauta vou vei rau na nona itokani dredre o Bob kei Marion Hutcheson, rau taleitaka tale ga na ka dina. Ena 1958, rau kauti au na veiwatini qori kei na tolu na luvedrau tagane ena dua na soqo ni veimatanitu e siga walu, na Divine Will e vakayacori ena siti o Niu Yoka. Niu vakasamataka lesu, au kila ni sega ni rawarawa nodrau kauti au, ia e guiguilecavi dredre na soqo qori.

Niu se gone, keitou tiko ena dua na vanua ni susu manumanu, au taleitaka na qaravi ira. Au vakasamataka tiko meu vuniwai ni manumanu. E qai tukuna qori o Na vua e dua na qase ni ivavakoso. E vakasalataki au vakavinaka na qase qori nida sa bula tiko ena “iotioti ni veisiga” qai tarogi au se na vakacava noqu veiwekani kei Jiova keu na vuli ena univesiti me vica na yabaki. (2 Tim. 3:1) Au mani nanuma meu sa kua ni vuli torocake.

 Au se vakasamataka tiko ga na ka meu cakava niu tuvaitutu oti ena sekeneri. Au dau lai vunau ena muanimacawa, ia au sega ni taleitaka na cakacaka vakaitalatala, au nanuma tale ga niu na sega ni rawa ni painia. E uqeti au o Ta e sega ni tiko ena dina, kei noqu Ta lailai meu cakacaka saumi ena dua na kabani levu ni inisua e Toronto. E vakaitutu o Ta lailai ena kabani qori, au mani vakadonuya meu cakacaka kina.

Niu tiko e Toronto, au dau cakacaka bogi, au vakailala tale ga kei ira na sega ni vakabauta, qori e vakavuna meu sega ni vakaitavi vakalevu ena veika vakayalo. Au a tiko vei tamai Ta, e sega ni iVakadinadina i Jiova. Ia ni sa mate, e vinakati meu toki.

Rau vaka na noqu itubutubu o rau na Hutcheson, rau a kauti au ena noda soqo ena 1958. Rau mani sureti au me keitou lai tiko vata, rau vukei au tale ga meu vaqaqacotaka na noqu veiwekani kei Jiova. Ena 1960, au papitaiso kei na luvedrau o John. E tekivu painia sara o John, e uqeti au qori meu vakaitavi vakalevu ena cakacaka vakaitalatala. Era raica noqu toso vakayalo na tacida tagane ena ivavakoso, oti au lesi sara meu ivakatawa ni Koronivuli ni Vuli Vunau. a

Ena 1966, au vakawatitaki Randi Berge, e dua na painia gugumatua e via veiqaravi ena vanua e vinakati kina vakalevu na veivuke. E kauaitaki keirau na ivakatawa dauveilakoyaki, e uqeti keirau sara me keirau lai veivuke ena ivavakoso e Orillia, mai Ontario. Keirau mani vakasosolo me keirau toki.

Ni keirau yaco i Orillia, au tomani Randi meu painia tudei. E uqeti au nona gugumatua! Niu vakaitavi vakalevu ena painia, dua na ka noqu marau niu vakayagataka na iVolatabu, au raica tale ga nodra taleitaka na ka dina e levu. Au marau sara ga niu vukea e dua na veiwatini e Orillia me rau veisautaka nodrau bula me rau qaravi Jiova.

Dua na neirau veisiko e Toronto, au sotavi Arnold MacNamara sara, e dua vei ratou na tacida tagane e liutaka tiko na cakacaka e Peceli. E taroga ke keirau via painia lavotaki. Totolo ga noqu kaya: “Io! Me keirau kua ga ni lesi e Quebec!” Sa tiko tale ga vei au na nodra rai cala na lewe i Kenada era vosa vakavalagi me baleta na tikoyavavala ena yasayasa o Quebec era vosa vakaVaranise. Ena gauna qori, era vinakata tiko na daunipolitiki e Quebec mera tugalala vei ira na vo ni yasayasa e Kenada.

E tukuna o Arnold, “Ena gauna qo, o Quebec ga era lesi tiko kina na painia lavotaki.” Au mani vakadonuya meu lako kina. Au sa kila tiko ni vinakata o Randi me lai veiqaravi e kea. Au qai raica ni qo e dua na vakatulewa vinaka duadua ena neirau bula!

Oti e lima na macawa na vuli vosa vakaVaranise, o yau, o Randi, kei na dua tale na veiwatini keitou gole i Rimouski, rauta ni 540 na kilomita (se 336 na maile) ena vuaicake kei Montreal. E levu sara na ka me keirau vulica, e laurai vinaka qori ena dua na soqoni niu sa wilika na veika me kacivaki. Au tukuna ni soqo levu e vakarau vakayacori, ena levu sara kina na “mataveitacini ositeriji,” e dodonu me “mataveitacini mai Austria.”

E Rimouski, ratou mai tomani keitou e va tale na tacida goneyalewa gugumatua, vaka kina o rau na Huberdeau kei na rua na luvedrau yalewa. Rau veivuke na Huberdeau ena kena saumi e dua na vale e vitu na kena rumu mera vakaicili kina na painia. Dau vakatokai na vale qori me Vale Vulavula, ni vulavula na kena duru kei na vale taucoko. Keitou dau le 12 se 14 na tiko kina. Ni keirau painia lavotaki kei Randi, keirau dau lai vunau ena veimataka, sigalevu, kei na yakavi sara. Keirau taleitaka gona me dua e dau tomani keirau, vakabibi ena yakavi batabata ni lutu na ucacevata.

Keirau veivolekati sara kei ratou na painia yalodina qori, sa vaka ga eratou lewe ni neirau vuvale. Eso na gauna keimami dau dabe wavokita na buka ni waqa toka, se tiko na siga keimami dau vakasaqa vata kina. Dua vei ira na tacida tagane e matai ena qiriqiri, na bogi gona ni Vakarauwai keimami dau lagasere, keimami danisi.

E vuavuaivinaka na cakacaka e Rimouski! Ena loma ga ni lima na yabaki, e marautaki na nodra toso eso na vuli iVolatabu mera papitaiso sara. E tubu tale ga na ivavakoso ina rauta ni 35 na dautukutuku.

E Quebec, keirau vakavulici vinaka sara ena kacivaki ni itukutuku vinaka. Keirau raica tale ga nona dau veivuke o Jiova ena cakacaka qo, kei na ka me keirau bula kina. Kena ikuri, keirau vulica me keirau lomani ira na lewenivanua vosa vakaVaranise, taleitaka nodra vosa kei na nodra itovo vakavanua. E uqeti keirau qori me keirau lomani ira e duidui na nodra itovo vakavanua.—2 Kor. 6:13.

E sega ni namaki ni kerea na valenivolavola ni tabana me keirau toki ena tauni o Tracadie, ena tokalau ni vanua o New Brunswick. E via dredre toka qo ni keirau se qai sainitaka oti e dua na veidinadinati ni rede kei na noqu cakacaka vagauna meu veivakavulici e koronivuli. Kena ikuri, era se qai dautukutuku eso na vuli iVolatabu, e tara tale tiko ga na Vale ni Soqoni.

 Keirau masulaka ena muanimacawa kece qori na neirau toki, keirau veisiko tale ga e Tracadie, e duidui toka mai Rimouski. Ia keirau vakatulewataka ke vinakata o Jiova me keirau toki i kea, keirau sa na lako ga. Keirau mani vakatovolei Jiova, keirau raica tale ga nona veivuke ena ka keirau lomaleqataka. (Mala. 3:10) Ni kaukaua tu ga vakayalo o Randi, dau vakuai koya, e dau veiwali tale ga, e vakarawarawataka sara ga na neirau toki.

E dua tiko ga na qase ena ivavakoso qori, o Robert Ross. E painia tiko e kea kei watina o Linda, rau mani vakatulewataka me rau tiko ga kina ni sucu oti na nodrau ulumatua. Rau qarava tiko na luvedrau gonetagane qori. E uqeti keirau sara ga kei Randi na nodrau veikauaitaki kei na gumatua ena cakacaka vakaitalatala.

Ni keirau painia oti e Tracadie me rua na yabaki, e sega tale ga ni namaki neirau sureti me keirau veiqaravi vakaivakatawa ni tabacakacaka. Keirau veiqaravi ena tabacakacaka vosa vakavalagi me vitu na yabaki, oti keirau lesi tale ina tabacakacaka vosa vakaVaranise e Quebec. Dau vakavinavinakataka noqu ivunau na ivakatawa ni tikina e Quebec, o Léonce Crépeault. Ia oti qori ena taroga, “Cava mo cakava me matata kina?” b E yaga vei au na nona veikauaitaki qori meu vakamatatataka na noqu veivakavulici, me kilai rawarawa tale ga.

Dua na noqu ilesilesi guiguilecavi dredre na noqu vakaitavi ena Soqo ni Veimatanitu ena 1978 na “Victorious Faith,” e vakayacori e Montreal. Au veiqaravi ena Tabana ni Kakana. Keimami a namaka tiko e 80,000, e muri tale ga e dua na ituvatuva vou ni veivakani. E vou na ka kece: na misini, na kakana, kei na kena vakarautaki. E rauta ni 20 na katoniwaililiwa lelevu, eso na gauna e sega ni waqa tu. Ni bera ni tekivu na imatai ni siga, e sega mada ga ni keimami curu rawa ena rara qori me lai vakarautaki me yacova na bogilevu tutu, ni a vakayacori tiko kina na qito. E sagai tale ga me waqa na ovani ni bera na kida ni mataka me caka kina na ikatalau! Dua na ka na neimami wawale, ia e levu na ka au vulica ena bibi ni cakacaka vakaukaua, matua vakayalo, kei na neimami dau veiwali kei ira keimami veiqaravi vata tiko. Neimami veivolekati, keimami veitokani kina me yacova mai qo. Dua dina na ka  marautaki qai guiguilecavi dredre na soqo qo e Quebec, na vanua era dau veitusaqati tiko ena veiyabaki ni 1940 kei na 1950!

Levu sara na ka au vulica vei ira na tacida era ovasia ni noda soqo lelevu e Montreal. Dua na yabaki, e ovasia ni soqo qori o David Splane, sa lewe tiko ni iLawalawa Dauvakatulewa ena gauna qo. Ni toso na gauna, au kerei meu qarava na itavi qori, e veitokoni vakalevu o David.

Ena 2011, keirau marautaka na neirau veiqaravi vakaivakatawa ni tabacakacaka me 36 na yabaki. Oti qori, au sureti meu dau veivakavulici ena nodra vuli na qase. E 75 na duidui loga keirau moce kina ena loma ni rua na yabaki, ia e yaga dina na neirau vakuai keirau. Ni mai cava e dua na macawa, dua na ka nodra vakavinavinaka na qase nira raica ni kauaitaka nodra bula vakayalo na iLawalawa Dauvakatulewa.

Oti au veivakavulici sara ena Koronivuli ni iTalatala ni Matanitu. Era dau oca na gonevuli ena levu ni ka mera cakava. Qo na nodra dabe tiko ena loma ni kalasi me vitu na aua ena dua na siga, nodra cakava nodra lesoni ena tolu na aua ena veibogi, kei na nodra vakaitavi vakava se vakalima ena dua na macawa. Keirau tukuna kei na dua tale na dauveivakavulici ni rawa ga qori ena veivuke i Jiova. Au se nanuma tiko ga qo na nodra kurabui ni levu tale na ka era rawata nira nuitaki Jiova.

Na nona dau veikauaitaki o tinaqu e uqeti ira nona vuli iVolatabu mera toso vakayalo, e vukei tamaqu mada ga me veisautaka nona rai me baleta na ka dina. Ni oti e tolu na siga nona mate o Na keitou kurabui ni mai vakarorogo o Ta ena ivunau soqovi levu ena Vale ni Soqoni, e sega ni calata na soqoni ena loma ni 26 na yabaki e tarava. A sega ni papitaiso o Ta, ia era kaya vei au na qase ni dau liu tu ga mai ena soqoni e veimacawa.

E ivakaraitaki vinaka tale ga o Na vei keitou na gone. Ratou qaravi Jiova tiko ena yalodina e tolu na ganequ kei na dui watidratou. E rua na ganequ rau veiqaravi ena valenivolavola ni tabana, dua e Potukali, dua tale e Haiti.

Keirau sa painia lavotaki tiko kei Randi ena gauna qo e Hamilton, e Ontario. Ni keirau veiqaravi vakaivakatawa ni tabacakacaka, keirau marautaka me keirau tomani ira na mataveitacini ena nodra veisikovi lesu kei na vuli iVolatabu. Ia ena gauna qo dua na ka neirau marau ni keirau raica nodra toso vakayalo neirau vuli iVolatabu. Keirau veitokani vinaka tale ga kei ira na mataveitacini ena ivavakoso vou, e uqeti keirau nona tokoni ira o Jiova ena gauna vinaka kei na gauna ca.

Ni keirau railesu, dua na ka neirau marau nira kauaitaki keirau e levu. Keirau vinakata tale ga me keirau vakaraitaka neirau “dau nanumi” ira eso tale, me keirau uqeti ira mera qaravi Jiova ena nodra igu taucoko. (2 Kor. 7:6, 7) Kena ivakaraitaki, dua na vuvale e veiqaravi vakatabakidua o nodratou Na, o luvena tagane, kei na luvena yalewa. Au tarogi nodratou Ta ke bau vakasamataka tu me painia. E kaya ni sa tokoni ratou tiko na painia qori. Au mani taroga, “O na tokoni ratou vinaka cake ni vakatauvatani kei Jiova?” Au uqeti koya me tovolea mada na ka ratou sa marautaka tiko ena gauna qo. Oti tale e 6 na vula sa painia tale ga.

Keirau na tomana kei Randi na neirau “tukuna . . . ina itabatamata e tarava” na “cakacaka veivakurabuitaki” i Jiova, keirau nuitaka tale ga nira na mai marautaka na nodra qaravi koya me vakataki keirau ga.—Same 71:17, 18.