1-2. Na ituvaki cava era sotava e levu na tacida? E veivakayalolailaitaki vakacava?

VAKASAMATAKA mada e tolu na ituvaki qo: E tauva e dua na tacida cauravou e dua na mate ena vakamalumalumutaki koya. E vakacegui mai na nona cakacaka e dua na tacida tagane sa yabaki 50 vakacaca, e dredre me raica e dua tale na cakacaka. E dua na tacida yalewa yalodina itabaqase sa lailai na ka e rawata ena nona qaravi Jiova.

² Ke o sotava tiko na ituvaki va qori, de dua o nanuma ni sa sega na kemu yaga. O na rarawa, beci iko, ena vakaleqa tale ga na nomu veimaliwai.

3. E raica vakacava na noda bula o Setani kei ira e lewa?

³ E laurai e vuravura na rai nei Setani me baleta na noda bula. E dau beci keda o Setani. Ena nona lomaca e tukuna vei Ivi ni na galala ke talaidredre vua na Kalou, ia e kila vinaka ni na mate kina. O Setani e lewa tiko na veika vakabisinisi ni vuravura qo, veika vakapolitiki kei na lotu. Sa rauta mera vakaraitaka e levu na daunibisinisi, daunipolitiki, kei na iliuliu ni lotu nira sega ni doka na noda bula kei na noda rai.

4. Na cava eda na veivosakitaka ena ulutaga qo?

⁴ O Jiova e vinakata meda kila ni tiko na keda yaga, e dau tokoni keda tale ga nida sotava na ituvaki e rawa ni vakayalolailaitaki keda. (Same 136:23; Roma  12:3) Eda na veivosakitaka ena ulutaga qo na sala ena vukei keda kina o Jiova: (1) nida tauvimate, (2) nida leqa vakailavo, kei na (3) bula vaqase eda nanuma kina ni sega na keda yaga vei Jiova. Ia meda veivosakitaka mada na vuna eda nuidei kina ni mareqeti keda yadua o Jiova.

5. O kila vakacava nida talei vei Jiova?

⁵ Eda buli mai na kuvuniqele, ia eda talei sara mai na dua na iluku qele. (Vkte. 2:7) Dikeva mada e vica na vuna eda talei kina vei Jiova. E buli keda meda vakatotomuria na nona itovo. (Vkte. 1:27) E okati keda gona o Jiova meda uasivi ira na vo ni nona ibulibuli e vuravura, e lesi keda kina meda qarava na vuravura kei na manumanu.—Same 8:4-8.

6. Na cava e dua tale na vuna eda kila kina ni mareqeti keda o Jiova?

⁶ Ni valavala ca mada ga o Atama, se mareqeti keda tiko ga o Jiova. Na levu ni nona mareqeti keda, e solia kina na Luvena lomani o Jisu me ivoli ni noda ivalavala ca. (1 Joni 4:9, 10) E yaga tale ga na ivoli vei ira na mate ena vuku ni ivalavala ca i Atama, ni na vakaturi ira na “yalododonu kei ira na sega ni yalododonu.” (Caka. 24:15) E laurai ena nona Vosa nida talei vua ke da tauvimate mada ga, leqa vakailavo, se bula vaqase.—Caka. 10:34, 35.

7. Na cava eso tale na vuna eda vakabauta kina ni mareqeti keda o Jiova?

⁷ Qo e vica tale na vuna eda vakabauta kina ni mareqeti keda o Jiova. E vagolei keda vua, e raica tale ga e lomada nida taleitaka na itukutuku vinaka. (Joni 6:44) Nida veiwekani voleka kei Jiova, ena toro volekati keda. (Jeme. 4:8) E vakayagataka o Jiova na nona gauna kei na igu me vakavulici keda, qori e vakaraitaka nida talei vua. E kila vinaka na ivakarau ni noda bula ena gauna qo, e kila tale ga ni rawa nida veisau. E dau veivakadodonutaki ni lomani keda. (Vkai. 3:11, 12) Qori na ivakadinadina matata ni mareqeti keda!

8. E uqeti keda vakacava na Same 18:27-29 me donu noda rai?

⁸ Era nanuma eso ni o Tui Tevita e turaga macawa, e sega na betena. Ia e kila ni lomani koya o Jiova, e tokoni koya tale ga. Sa rauta me donu na nona rai ni sotava na ituvaki dredre. (2 Sam. 16:5-7) Nida yalolailai se sotava na leqa, ena vukei keda o Jiova me donu noda rai meda vosota. (Wilika Same 18:27-29.) Ni tokoni keda o Jiova, ena sega ni dua na ka me tarova na noda qaravi koya ena mamarau. (Roma 8:31) Meda veivosakitaka mada qo e tolu na ituvaki meda kua kina ni guilecava ni lomani keda o Jiova, e mareqeti keda tale ga.

9. E rawa ni cala vakacava na noda rai nida tauvimate?

⁹ Na tauvimate e rawa ni cala kina noda rai, eda nanuma kina ni sa sega na keda yaga. Eda na rairai maduataka nira kila eso ni sa lailai ga na ka eda rawata, se ni vinakati meda vukei. Nira sega mada ga ni kila eso nida tauvimate tiko, eda na rawa ni maduataka nida sega ni cakava rawa eso na ka me vaka e liu.  Ena gauna rarawataki qori, o Jiova ga ena vakayaloqaqataki keda. Ena sala cava?

10. Me vaka e cavuti ena Vosa Vakaibalebale 12:25, na cava ena vukei keda nida tauvimate?

¹⁰ Nida tauvimate, “na vosa vinaka” ena vakayaloqaqataki keda. (Wilika Vosa Vakaibalebale 12:25.) O Jiova e maroroya tu ena iVolatabu e levu na vosa vinaka meda kila kina ni mareqeti keda nida tauvimate mada ga. (Same 31:19; 41:3) Nida wilika na vosa uqeti qori se wilika vakavica, ena vukei keda o Jiova me donu na noda rai nida tauvimate.

11. E vakacegui Jorge vakacava o Jiova?

¹¹ Dikeva mada na ivakaraitaki nei Jorge. Ni se cauravou, e tauvi koya e dua na mate e vakamalumalumutaki koya, e nanuma kina ni sega na kena yaga. E kaya, “Au sega ni namaka me va qo na kequ mate, au maduataka tale ga nodra wadravi au e levu. Sa qai ca tiko ga na kequ ituvaki, au kila ni sa na veisau na noqu bula. Dua na ka na noqu rarawa, au masuti Jiova me vukei au.” E vakacegui koya vakacava o Jiova? E kaya, “Niu dau guilecava totolo na ka, e tukuni meu wilika eso na tikinivolatabu leleka ena Same e vakaraitaka kina o Jiova nona kauaitaki ira na nona tamata. Au wilika vakavica na tikinivolatabu qori e veisiga, e veivakacegui, e veivakadeitaki. Toso na gauna, era raica e levu niu sa matadredredre. Era tukuna ni uqeti ira na noqu matamamarau. Au kila ni rogoca o Jiova na noqu masu! E vukei au me donu noqu rai. Au dau vakasamataka nona rai e tu ena nona Vosa me baleti au niu tauvimate.”

12. Ni o tauvimate, na cava mo cakava me tokoni iko kina o Jiova?

 ¹² Ke o tauvimate tiko, mo nuidei ni kila o Jiova na kemu ituvaki. Mo masuti koya me vukei iko me donu nomu rai. Oti mo wilika na vosa vinaka e tu ena iVolatabu e maroroi me baleti iko. Mo wilika vakalevu na tikinivolatabu e vakaraitaka kina o Jiova ni mareqeti ira na nona dauveiqaravi. Ni o cakava qori, o na kila ni dau vinaka o Jiova vei ira kece na qaravi koya ena yalodina.—Same 84:11.

13. Ena vakacava nona rai na ulunivuvale e vakacegui mai na nona cakacaka?

¹³ Era vinakata na ulunivuvale mera vakarautaka na ka me bula kina na nodra vuvale. Kaya mada ke vakacegui mai na nona cakacaka e dua na ulunivuvale ia e sega nona cala. E sasaga me vaqara cakacaka tale, e sega ga ni raica e dua. Ena rairai nanuma ni sega na kena yaga. Ena uqeti koya vakacava ni dau vakasamataka na vosa ni yalayala i Jiova?

14. Na cava e dau dina kina o Jiova ena nona yalayala?

¹⁴ E dau dina o Jiova ena nona yalayala. (Josua 21:45; 23:14) Qo e vica na vuna. Kena imatai, ni vakatau kina na kena irogorogo. E yalataka o Jiova ni na karoni ira na yalodina vua, e raica ni nona itavi me vakayacora na nona yalayala. (Same 31:1-3) E kila tale ga nira na rarawa na lewe ni nona vuvale ke sega ni karoni ira. E yalataka ni na vakarautaka na ka vakayago kei na isolisoli vakayalo, ena sega ni dua me tarova nona vakayacora na ka e yalataka!—Maciu 6:30-33; 24:45.

15. (a) Na cava era sotava na lotu vaKarisito ena imatai ni senitiuri? (b) Eda nuidei vakacava ena ka e cavuti ena Same 37:18, 19?

 ¹⁵ Nida nanuma tiko na vuna e dau dina kina o Jiova ena nona vosa ni yalayala, eda nuidei ni na vukei keda nida leqa vakailavo. Dikeva mada na nodra ivakaraitaki na lotu vaKarisito ena imatai ni senitiuri. Nira vakacacani na lewe ni ivavakoso e Jerusalemi, “era dui se kece . . . ratou qai vo ga na yapositolo.” (Caka. 8:1) Na cava e yaco ena ituvaki qori? Era leqa vakailavo! Era rairai biuta tu yani na mataveitacini na nodra vale kei na bisinisi. Ia e sega ni biuti ira o Jiova, era marau tu ga. (Caka. 8:4; Iper. 13:5, 6; Jeme. 1:2, 3) Ke sa tokoni ira na lotu vaKarisito yalodina qori o Jiova, ena tokoni keda tale ga.—Wilika Same 37:18, 19.

16. Na ituvaki cava eda na rairai nanuma kina ni sega ni marautaka o Jiova noda veiqaravi?

¹⁶ Ni toso mai na bula vaqase, eda na rairai nanuma ni lailai sara na ka eda solia vei Jiova. Qori tale ga na veika e rairai lomaleqataka o Tui Tevita ni sa qase mai. (Same 71:9) Ena vakacegui keda vakacava o Jiova?

17. Na cava eda vulica vei Jheri?

¹⁷ Dikeva mada na ivakaraitaki ni tacida yalewa o Jheri. E kerei me tiko ena vuli me baleta na vakavinakataki ni Vale ni Soqoni, ia e sega ni vinakata me lako. E kaya: “Au sa qase, au sa yada, e sega vei au na kila meu yaga kina vei Jiova. E sega na betequ.” Ena bogi ni bera ni vakayacori na vuli, e talaucaka na lomana vei Jiova ena masu. Ni yaco ena Vale ni Soqoni ena siga tarava, e lomalomarua  tiko ga ke rawa ni veivuke se sega. Ni vakayacori tiko na vuli, e vakabibitaka e dua na tacida ni noda taledi levu ga oya meda yalorawarawa me vakavulici keda o Jiova. E kaya o Jheri: “E tiko sara ga vei au na taledi qori! Au luluvu ni sauma o Jiova na noqu masu. E vaka me tukuna tiko vei au ni tiko noqu taledi meu solia vua, e tu vakarau me vakavulici au!” E vakasamataka o Jheri: “Au rere niu gole ena vuli ya, au yalolailai, au nanuma ni sega na kequ yaga. Ia ni oti na vuli, au nuidei, au vakayaloqaqataki, au kila ni tiko na kequ yaga!”

18. E vakaraitaka vakacava na iVolatabu ni mareqeta o Jiova noda veiqaravi nida sa qase?

¹⁸ Nida sa qase mada ga, eda nuidei ni tu na cakacaka e vinakata o Jiova meda cakava. (Same 92:12-15) E vakavulica o Jisu ni mareqeta o Jiova na ka eda cakava ena vukuna ke lailai mada ga, me vakatau ena keda ituvaki. (Luke 21:2-4) Mo cakava ga na ka o rawata. Kena ivakaraitaki, mo wasea na itukutuku me baleti Jiova, masulaki ira na tacida, vakayaloqaqataka eso tale mera yalodina tiko ga. E raici iko o Jiova mo drau cakacaka vata ena nomu yalorawarawa, sega ni ka o rawata.—1 Kor. 3:5-9.

19. Eda nuidei vakacava ena ka e cavuti ena Roma 8:38, 39?

¹⁹ Eda kalougata nida sokalou vei Jiova, na Kalou e dau mareqeti ira na qaravi koya! E buli keda meda vakayacora na lomana, eda marau tale ga nida sokalou vua. (Vkta. 4:11) Ke beci keda o vuravura, o Jiova e mareqeti keda tu ga. (Iper. 11:16, 38) Nida yalolailai ena vuku ni tauvimate, leqa vakailavo, se bula vaqase, meda nanuma tiko ni sega ni dua na ka me tawasei keda mai na nona loloma na Tamada vakalomalagi.—Wilika Roma 8:38, 39.